"Xadichai Kubro" ayol-qizlar o‘rta maxsus islom ta'lim muassasasida "Qur'oni Karim" va tajvid kurslariga qabul davom etmoqda.

Eslatib o‘tamiz, "Qur'oni Karim va tajvid" kursida o‘qimoqchi bo‘lsangiz, qabul uchun ta‘lim muassasamizning O‘rikzordagi binosiga borasiz kerakli hujjatlarni (passport, 3×4 rasm 4 ta, 086 ma'lumot) taqdim etganizdan so'ng sizga 3 oylik to'lov uchun hisob varaqasi beriladi. To‘lovni amalga oshirganingizdan so‘ng o‘zingizga qulay bo‘lgan ta‘lim muassasasi binosida: Sebzor yoki O‘rikzordagi kurslarda o‘qishiniz mumkin.

"Qur'oni Karim va tajvid kursi"ning 3 oylik narxi 1 million 360 ming so'mni tashkil etadi.

Sizda "Qur'oni Karim va tajvid kursi" bilan bog‘liq savol yoki murojaatlar bo‘lsa quyidagi raqamga qo‘ng‘irog qilishingiz mumkin

71 299 24 11
 71 299 27 90

"Xadichai Kubro" ayol-qizlar o’rta maxsus islom ta’lim muassasasi matbuot xizmati

Қатар Давлати Амири шайх Тамим бин Ҳамад Ол Сонийнинг Ўзбекистон Республикаси Президенти Шавкат Мирзиёев таклифига биноан мамлакатимизга қилган амалий ташрифи айни пайт бутун жаҳон оммавий ахборот воситаларидаги асосий мавзулардан бирига айланган. Айниқса, араб дунёси матбуоти ушбу ташриф билан боғлиқ воқеаларга катта аҳамият қаратмоқда.

Хусусан, ҳамкоримиз – Қатар ахборот агентлиги – QNA саҳифаларида юртимизда Қатар Амири иштирокида бўлиб ўтган тадбирлар батафсил ёритилди.

Шу билан бирга QNA сайтида Ўзбекистон Миллий ахборот агентлиги – ЎзА Бош директори Абдусаид Кўчимов ва QNA Бош директори Аҳмад бин Саид Ал Румайҳийнинг Қатар Амири Шайх Тамим бин Ҳамад Ол Соний томонидан таъсис этилган Халқаро коррупцияга қарши курашиш бўйича юксак мукофот топширилиши муносабати билан билдирган фикрларига кенг ўрин ажратилди.

ЎзА раҳбари Ўзбекистоннинг глобал миқёсда коррупцияга қарши курашиш, бу борада ижобий натижаларга эришиш учун халқаро ҳамкорлик, илғор хорижий давлатлар билан билим, тажриба алмашишни кучайтириш йўлидаги саъй-ҳаракатларини алоҳида таъкидлаган.

Айни чоғда, ЎзА Бош директори Қатар давлатининг коррупцияга қарши кураш тажрибаси бошқа давлатлар учун ўрнак эканини эътироф этган. Бу жараёнда кучли институтлар барпо этиш, самарали бошқарув, шаффофлик, ҳалоллик ва маданиятни таъминлайдиган қонунлар қабул қилиш, мазкур тамойилларга содиқликни тасдиқловчи стандартларни кенг тарғиб қилиш таклифини илгари сурган.

Қатар Давлати бу йилги мукофот соҳибларини тақдирлаш маросимига мезбонлик қилиш учун Ўзбекистонни танлагани мамлакатимизнинг бу борадаги халқаро саъй-ҳаракатларини қўллаб-қувватлаш, қолаверса, икки давлат ўртасидаги ўзаро манфаатли муносабатларни чуқурлаштириш истаги билан боғлиқлигини англатади.

Ўз навбатида, QNA Бош директори Аҳмад бин Саид Ал Румайҳий 2016 йил илк бор тақдим этилган “Халқаро коррупцияга қарши курашиш бўйича юксак мукофот”га жаҳон ҳамжамияти томонидан катта эътибор қаратилаётганига урғу берган. У Шайх Тамим бин Ҳамад Ол Соний Жаноби Олийлари ва кўплаб бошқа давлатлардан юқори мартабали шахслар қатнашган анжуманнинг Ўзбекистонда ўтказилиши юртимизда коррупцияга қарши кураш борасида амалга оширилаётган ишларнинг ҳақли эътирофи сифатида баҳоланишини таъкидлаган.

ЎзА

Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Қўшни кўчадаги уйда яшайдиган амакимнинг ўғли, еттинчи синф ўқувчиси – Маъруфнинг эрталаб рюкзагини елкасига илиб олганча қаергадир югуриб кетаётганини кўриб, унинг йўлини тўсдим. 
– Қаерга шошиляпсан? 
– Мактабга. 
– Мактабга?! Дарс бошланишига ҳали анча бор-ку! Автобус бекати эса анави ерда. Нега бу томондан кетяпсан? 

Бу саволни беришимни кутмаган Маъруф қизариб кетди.
– Пулим йўқ эди... Дадам йўлкирага берганларини ишлатиб қўйгандим...
– Анави куни ҳам яёв кетаётганингни кўргандим. Майли, мана буни олгин-да, – дедим унга чўнтагимдан пул чиқариб, – мактабга автобусда бор, қолганини кейин гаплашамиз.

Кечқурун ишдан қайтаётганимда атайлаб қўшни кўчадаги қариндошимизникига кирдим. Амаким, келинойим билан озгина у ёқ-бу ёқдан гаплашгач, уларга «Маъруфда озгина ишим бор эди», деб жиянни ташқарига олиб чиқдим.

– Хўш, – дедим бошини қуйи қилиб олган Маъруфга қараб. – Яна нималар қилиб юрибсан? Амаким йўлкиранг учун пул беришларини биламан... Ўртоқларинг билан компьютер хонага кирдингларми?
– Йўқ. Дадам рухсат бермайдилар интернет-кафега киришга...
– Алдамаяпсанми?
– Йўқ.
– Барибир ўртоқларингдан билиб оламан. Қанчадан бери пиёда юрибсан?
– Бир ойча бўлиб қолди...
– Вой-бў... Нимага ишлатдинг шунча пулни?
– Битта одам сўраган эди...
– Ким?

Шу пайт бармоқлари қалтирай бошлаган Маъруфнинг паст овозда айтган «Онаси касал бўлиб қолган экан...» деган сўзларини зўр-базўр англадим. Кейин жияним тез-тез бир нарсаларни ғўлдирай кетди. Йиғламсираб гапиргани учун нима деётганини тушуниб бўлмасди.

– Энди, шошма, – дедим жиянни бағримга босиб. – Ҳаммасини бошидан дона-дона қилиб айтиб бер.

Аҳамиятлиси, Маъруф менга бир ой давомида бошидан ўтганини тушунтириб берганидан сўнг у анча улғайганини тушуниб етдим. Жияннинг айтиб берганидан шу маълум бўлдики, у ҳар куни мактабдан пиёда қайтаётганида уйидаги аҳволни таҳлил қилар, битта ўзи ишлаб, онаси ва укаларини боқиб келаётган дадасига қандай қилиб ёрдам бериш ҳақида бош қотиришга ҳаракат қилган экан.

– Тўғри, бошқа синфдошларимга ўхшаб ҳар куни дўкондан мазали егуликларни ололмасдим. Бироқ уст-бошим тоза ва бутун, уйда еб-ичишимиздан муаммо йўқ эди, – дея тушунтирарди менга Маъруф. – Шунчаки, ўртоқларим ўзлари хоҳлаган нарсаларни сотиб олиш учун дўконга кириб кетганларида, ичимда «Бизга ҳам шундай кунлар насиб қилиб қолар», деб қўярдим. Бир куни шунга ўхшаш ҳар хил нарсаларни ўйлаб мактабдан уйга кетаётганимда олдимдан кичкина халта кўтариб олган, чамаси 25-30 ёшлардаги бир киши ўтиб кетди.

Маъруфнинг айтишича, ўзига ярашган кийимларни кийиб олган ўша йигитнинг қадамида қандайдир қатъият ва ишонч бўлган. Сал ўтиб йигит эски бир уй дарвозаси олдидаги супачада ўтирган, ёши саксонлардан ошган онахонга халтасидан бир даста пулни олиб, узатибди. Онахон эътироз билдириб, олишни истамаса ҳам ҳалиги киши унинг қўлига пулни тутқазибди. Охири ҳадяни олган аёл йигитни дуо қилибди. Маъруф аввалига кўрганини ҳазм қила олмай, жойида қотиб қолибди. Кейин тўсатдан бошқа кўчага бурилиб кетган йигитга етиб олиш мақсадида қадамини тезлатибди. Ўша кўчага кирганида йигит анча узоққа кетиб қолган экан. Маъруф сахий кишига етиб олиш илинжида бегона кўча бўйлаб анча юриб, катта йўл ёқасига чиқибди. Аввало чарчагани, иккинчидан бошқа йўлдан кетиб қолгани учун уйига таксида кетадиган бўлибди. Кўп ўтмай олдига «Нексия» тўхтабди. Ҳайдовчи билан йўл ҳақини келишгач, орқа ўриндиққа яхшилаб суяниб ўтириб олибди. Таксичи ҳаракатланишни бошлаганида машина магнитофони овозини баландлатибди.

«Расуллуллоҳ соллаллоҳу алайҳи васаллам айтадилар: «Aллоҳ таоло бандасининг садақасини ўнг қўли билан қабул қилади ва уни сизлардан бирингиз тойчоғини тарбия қилгандек тарбия қилади» (Бухорий ривояти). Яна Пайғамбаримиз соллаллоҳу алайҳи васаллам айтадилар: «Мол садақа сабабидан камаймайди» (Термизий ривояти). Ҳатто энг кичкина қилинган садақа ҳам, Aллоҳнинг наздида катта қийматга эга. Aгар ҳамма одамлар, бу нарсаларни Aллоҳ қабул қилишини билганда ва тушуниб етганда эди…».

Маърузага берилиб кетган Маъруф уйига қандай етиб келганини билмай қолибди. Агар ўша пайт таксичи «Ука, шу ерда тушасанми?» демаганида кетаверар экан. Машинадан тушиб, кўчанинг бошидан уйи томон бораётганида рўпарасидан ёши 17–18 дан ошмайдиган бир йигит чиқиб қолибди. Бошига эски дўппини бироз қийшайтириб қўндириб олган, бир кўзи негадир юмилиб қолган йигит хижолат бўлиб, Маъруфга мурожаат қилибди: 
– Узр, – дебди нотаниш йигит саломлашгач, ўзидан кичик болани сизлаб. – Уят бўлса ҳам сиздан бир нарса сўрамоқчи эдим.
– Майли, сўрайверинг, – дебди Маъруф.

– Вазият шундайки, онам бетоб бўлиб, бир ҳафтадан бери касалхонада ётибдилар. Уларнинг муолажаларига керак пулни ишлаб топиб бердим. Энди дориларга ҳам пул зарур бўлиб қолди. Ҳозир масжиддан керакли пулнинг бир қисмини олиб чиқдим. Барибир етмаяпти. Имкониятингиз бўлса, сиз ҳам ёрдам беринг... Aллоҳ номи билан сўрайман, ёлғон гапирмаяпман. Онам ростдан ҳам касал. 

 Уни диққат билан эшитиб, ўйлаб ҳам ўтирмай чўнтагидан эллик минг сўм пулни чиқариб, «кўп эмасу, фақат шунча бера оламан» деб узатдим, – дея ҳикоясини давом эттирди Маъруф. – Ўша ака пулни олиб, ўзида йўқ хурсанд бўлиб, раҳматлар айтиб, дуолар қилди. Аммо бу сўзлар қулоғимга кирмади. Сабаби мени аллақандай ҳислар чулғаб олганди. Мен бахтиёр эдим. Бир тарафдан уйдагиларимга пулни қаерга сарфлаб юборганимни қандай қилиб тушунтиришни ўйлардим. Ўйлаб-ўйлаб, ҳеч кимга ҳеч нима демай, уйдан сал эрта чиқиб, мактабга пиёда бориб, вазиятдан чиқиб кетишга қарор қилдим. Бор гап шу. 

– Шундай йўл тутиб, катта савоб олибсан, – дедим жиянга қараб. – Ҳақиқатан ҳам садақанинг катта-кичиги бўлмайди. Аммо келаси сафар бундай ишларни катталар билан маслаҳатлашиб қилгин. Нотаниш жойларга боришинг, бегона машиналарга ўтиришинг яхши эмас...

Боланинг қўлига керакли миқдорда пул бериб, Аллоҳ таолодан шунақа эсли ҳушли, иймони бутун фарзандларимизни кўпайтиришини сўрадим.

Сардор Қурбонов

«Ҳилол» журналининг 4(49) сонидан

Озарбайжоннинг оммабоп «Каспий» газетасида Тошкент шаҳрида бунёд этилаётган Ўзбекистондаги Ислом цивилизацияси марказига бағишланган мақола чоп этилди, деб хабар бермоқда «Дунё» АА мухбири.

Нашрда 2024 йил бошига қадар Тошкентда Ўзбекистондаги Ислом цивилизацияси марказини очиш режалаштирилаётгани маълум қилинган.

«Марказ қурилиши сўнгги беш йил давомида Тошкент шаҳрининг Олмазор туманидаги машҳур Ҳазрати Имом (Ҳастимом) мажмуаси ҳудудидаги 7 гектар майдонда олиб борилмоқда, — дейилади мақолада. -Қурилиш ишларининг асосий қисми аллақачон якунланган».

Қайд этилишича, Ўзбекистондаги Ислом цивилизацияси маркази нафақат туркий дунёда, балки бутун ислом оламида ушбу йўналишда фаолият юритаётган илмий марказлар учун таянч вазифасини ўтайди.

«Марказда маҳаллий ва хорижлик мутахассислар илмий изланишлар олиб боради, улар фаолияти натижалари асосида энциклопедия ва илмий нашрлар чоп этилади, теледастурлар тайёрланади, фильмлар суратга олинади, - деб ёзган Озарбайжон босма нашри. – Марказда фаолият юритадиган Халқаро ислом академиясида 200 нафардан ортиқ талаба магистратура ва докторантурада ўқишни давом эттириши мумкин».

Нашрда таъкидланганидек, Марказ Ўзбекистонда туризмни ривожлантиришга ҳам катта ҳисса қўшиши кутилмоқда.

«Ўзбекистондаги Ислом цивилизацияси маркази қурилиши билан мамлакатнинг диний ва тарихий сайёҳлик йўналишларига илмий, таълим ва маданий йўналиш қўшилади», - деб ёзган «Каспий» газетаси.

Ўзбекистон мусулмонлари идораси
Матбуот хизмати

“18 декабрь – Халқаро Араб тили куни” муносабати билан Тошкент Ислом институтида Халқаро араб тили куни нишонланди.
Хусусан, институтнинг Тиллар кафедраси томонидан “Араб тили шаръий илмлар асоси” деб номланган тадбир ўтказилди. Унда Ўзбекистон халқаро ислом академияси ва Ал-Азҳар университети профессорлари Шиҳата Абдурраззоқ Абу Шуша ҳамда Доктор Убайд Муҳаммад Абдулҳалим маъруза билан қатнашди.

Мазкур тадбирда институт проректорлари, ўқитувчи ва талабалар қатнашди.

Шунингдек, Тошкент ислом институти Тиллар кафедраси томонидан халқаро араб тили куни муносабати билан талабалар ўртасида кўргазмали чиқишлар бўйича танлов ўтказилди.

Унда қуйидаги натижалар қайд этилди:
1-ўрин: 202-гуруҳ талабалари;
2-ўрин: 101-102-гуруҳ талабалари;
3-ўрин: 204-гуруҳ талабалари.

Ғолибларга диплом ва эсдалик совғалари топширилди. Маросим якунида Доктор Шиҳата Абдурраззоқ Абу Шуша ва Доктор Убайд Муҳаммад Абдулҳалимга институт ташаккурномаси тақдим этилди.

Мазкур танлов доирасида институт талаба-қизлари томонидан араб тилли мамлакатларнинг рамзлари ва маданиятини намойиш этувчи кичик кўргазма ташкил этилиб, аудитория ва йўлаклар байрамона безатилди.

Бундан ташқари, “18 декабрь – Халқаро Араб тили куни” арафасида Тошкент ислом институти Тиллар кафедраси ташаббуси билан 304-гуруҳ талабалари Абдурраҳмон Жомийнинг "Шарҳи Мулла Жомий" асарини ўқиб, хатм қилишди.

Ўзбекистон мусулмонлари идораси
Матбуот хизмати