Бугун, 21 сентябрь куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Финляндия мусулмонлари жамоаси бош имоми Рамиль Беляев бошчилигидаги делегацияни қабул қилдилар.

Учрашувда Муфтий ҳазратлари меҳмонларни ташриф билан қутлаш баробарида сўнгги йилларда юртимиздаги диний-маърифий ислоҳотлар, Фатво маркази фаолияти, ҳаж-умра ишлари, Қуръони карим курслари, масжид-мадрасаларни обод этиш ва диний таълимни ривожлантириш борасида қилинаётган ишлар ҳақида маълумот бердилар.

Рамиль Беляев Финляндияга Ислом дини кириб келиши, ривожланиши ва охирги пайтларда мўмин-мусулмонлари сони ошиб бораётгани ҳақида сўзлаб берди. Шунингдек, у икки мамлакат дин пешволарининг ҳамкорликлари узоқ тарихга бориб тақалиши, ўтган асрнинг 60-йилларида икки давлат уламолари сафарлар уюштирганларини фото суратлар ёрдамида баён қилди. 

Мулоқотда томонлар диний-маърифий, илмий-тадқиқот, диний таълим ва масжидлар фаолиятини ривожлантириш йўналишида ўзаро ҳамкорлик қилиш масалаларини ҳам муҳокама қилдилар.  

Меҳмонлар Шайх Нуриддин Холиқназар ҳазратларини Финляндияга Ислом дини кириб келиши юбилей санасига бағишланган маросимга таклиф этди.    

Учрашув дўстона ва самимий руҳда ўтди. 

Ўзбекистон мусулмонлари идораси
Матбуот хизмати

Расулуллоҳ соллаллоҳу алайҳи васаллам: “Уйим билан минбарим орасида жаннат равзаларидан бир равза бор”, деганлар (Имом Бухорий ривояти).

Равза — боғ деган маънони билдиради.

Уламолар бу жой раҳматнинг тушиши, зикр, ибодат ва тиловат сабабли бахт-саодатнинг ҳосил бўлишида худди жаннат боғига ўхшайди, деб таъриф берганлар.

Мисрда “Кибермакон ва диний нутқнинг замонавий воситалари” мавзусидаги 34-халқаро анжуман бўлиб ўтди. Унда юртимиздан Ўзбекистон мусулмонлари идораси халқаро алоқалар бўлими мудири Шавкат Ҳамдамов қатнашди.

Форумни Миср Араб Республикаси Вақфлар вазирлиги ва Ислом ишлари олий Кенгаши ташкил этди. Халқаро анжуман 60 дан ортиқ давлатдан кўплаб машҳур Ислом арбобларини жамлади.

Aнжуман иштирокчилари рақамли платформа ва интернет технологиялари билан боғлиқ масалалар, кибермаконда экстремистик ғояларни тўсишга қаратилган стратегиялар ва бундай ғоялар тарғиботига қарши курашишнинг турли усулларига доир мавзуларни муҳокама қилди.

Шунингдек, муаммоларни бартараф этишда ишончли Исломий контент зарурлигини таъкидлади. Университетлар ва оммавий ахборот воситалари давлат томонидан молиялаштирилиши ва мактабларнинг таълим ролини кучайтиришни таклиф қилди.

Ўзбекистон мусулмонлари идораси
Матбуот хизмати