Бугун фарзандларимиз қандай ўйинчоқлар ўйнаяпти? Ғарбдан кириб келаётган айрим ўйинчоқлар ортига қандай мақсад яширинган? Оғзи қийшиқ, бошининг ярми йўқ, оёқ-қўллари беўхшов ўйинчоқлар уларнинг овунчоғига айланиб улгурдими?

Биз ота-оналар болаларимиз соғлиғи, руҳиятига чанг соладиган ўйинчоқларни сотиб олиб бермаяпмизми? Фарзандимиз жиззаки, урушқоқ, одамови, жаҳлдор бўлиб қолаётганига ўзимиз айбдор эмасми?   

ЎзА ижодкорлари болаларимиз келажаги, соғлиғи, тақдирига хавф солаётган ана шундай ўйинчоқлар ҳақида ўрганишлар олиб борди. Психолог, тадбиркор, тадқиқотчи, сотувчи-ю харидорлар, ота-оналарнинг фикрлари билан қизиқди. 

Бугун фарзандларимиз кўпроқ қандай ўйинчоқларни ўйнашяпти? Ушбу саволга тадбиркор Анвар Абдуқаюм шундай жавоб берди:   

— Болалар асосан хорижда, кўпроқ Хитой давлатида чиқарилаётган мультфильм ҳамда сериал қаҳрамонлари, умуман инсон онгига фойда бермайдиган, миллий ва маънавий қадриятларга таъсир қиладиган ўйинчоқларни ўйнашяпти. Энг афсусланарли жиҳати, нотўғри ўйинчоқлар олиб бериш орқали ота-оналар ўз қўли билан фарзандининг келажагини барбод қиляпти. 

Болаларимиз тасаввур ва тушунчаларини чалғитиши мумкин бўлган, уларнинг хаёлида ижобий, лекин аслида салбий ўйинчоқ қаҳрамонлар кимлар?   

— Болаларимиз қалбида меҳр-шафқат, муҳаббат, раҳмдиллик, эзгулик каби фазилатларни аста-секинлик билан йўқ қилаётган ўйинчоқлар “Попит ҳамда антистресс”, Хагги Вагги ва Кисси Мисси кабилардир, — дейди тадқиқотчи Нигора Ҳусанова. — Бундай ўйинчоқлар тарғиботи асосан ғарб мамлакатларидан кириб келяпти. Чунки буларнинг асосчилари ҳам ғарб мамлакатлари ҳисобланади. Айтишимиз мумкинки, ғарбдан чиққан оммавий маданиятга ғарбнинг ўзи ғарқ бўлди. Энди шарқ мамлакатларини ўз домига тортиб кетяпти. 

— Бу ўйинчоқларнинг болалар ўртасида оммалашиш сабаблари нимада? 

—2020 йилдан бошлаб бу ўйинчоқлар савдоси жуда ҳам кучайиб кетди, — дейди Н.Ҳусанова. — Чунки пандемия даврида одамлар орасида виртуал оламга қизиқиш ортди. Ўзини-ўзи яккалаш амалиёти ҳаммани виртуал оламга ипсиз боғлаб қўйди.   

Шу даврда “Poppy Playtime” ўйин компанияси томонидан ишлаб чиқилган ўйин қаҳрамонлари, мисол учун кўк бошли махлуқ, яъни Хагги Вагги ва Кисси Мисси ўйинчоқлари жуда ҳам оммалашди.   

Ўйин бошида Кисси Мисси Хагги Ваггининг синглиси бўлади. Кейинчалик уни маъшуқасига айланиб кетади. Ўйиндан ёш болалар юрагига қўрқув соладиган турли саҳналар, қонли лавҳалар, ваҳимали мусиқалар, шунингдек, собиқ ака-сингил ўртасидаги «эҳтиросли» лаҳзалар ҳам ўрин олган. Бу болаларимизга ниҳоятда салбий таъсир кўрсатади ва тасаввурлари ўзгариб кетишига сабабчи бўлади.   

Бу ўйинчоқларни ҳозирги кунда савдога чиқаришда айнан камалак ранглардан фойдаланилади. Бу ранглар бир жинслилар ўртасидаги никоҳни тарғиб қилувчи ранглар ҳисобланиб, болаларнинг ёшлигидан онгига кўникма ҳосил қилиб борилади. Болалар руҳиятига ёшлигидан шикастланиш, азоб чекиш, тушкунликка тушиб қолиш деган сўзларни сингдириш учун олиб борилаётган амалиёт ҳисобланади. Бу ҳам ғоя ва мафкуралар курашининг бир кўриниши.   

— Бундай ўйинчоқларни ўйнаш болаларда қандай стрессларни келтириб чиқаради? 

— Енгил-елпиликни тарғибот қилувчи, калта-култа кўйлаклар ёки аёллик танасининг символикаларини кўрсатган қўғирчоқлар қизчаларнинг эрта улғайишига олиб келади, — дейди психолог Шоира Исоқова. — Яъни, эрта етилишни келтириб чиқаради. Чунки ўйинчоқ яратаётган одамлар ўзининг руҳияти, фантазиясидан келиб чиқиб қўғирчоқ яратади. Бизнинг халқимиз жуда ҳам таъсирчан, ҳиссиётли ва ишонувчан халқ. Чиройли экан, бола ўйнаса бўлади, деб сотиб олади. Лекин бундай қўғирчоқлар болани қўрқитиши, руҳиятида ўзгаришларни келтириб чиқариши мумкин.

— Дўконларимизда миллий қаҳрамонларимиз қиёфаси акс этган қўғирчоқларни учратиш мумкинми? 

— Амир Темур ва қўшинлари ёки Алпомиш достони қаҳрамонлари, Жалолиддин Мангуберди каби миллий қаҳрамонларимиз ва уларнинг қўшинлари акс этган, болани ортидан эргаштира оладиган қўғирчоқларни дўконлардан излаб тополмаганман, — дейди шоир Шодмонқул Салом. — Ўйинчоқлар дўконларини боланинг руҳиятини бузадиган, бузгандаям ниҳоятда бадбин, инсонийликка мос бўлмаган, одамийликка бегона бўлган рамзлар, тимсоллар акс этган қўғирчоқлар эгаллади.  Инсоннинг тафаккури 8 ёшгача шаклланиб бўлади, дейилади. Биз 8 ёшгача боламизни қўлдан бой бериб қўйяпмиз. Яна автобусда бизга жой бермаса, метрода гапимизга ўринли жавоб ололмасак, шартаки, агрессив, жаҳлдор бўлса, ундай боладан хафа бўламиз. Ундай болалар ойдан тушган эмас, ўзимизнинг боламиз, шу жамиятнинг фарзанди. Биров бизга тарбиялаб бергани йўқ, ўзимизнинг ҳосилимиз. Шунинг учун анча-мунча кеч бўлган, маълум авлод ҳам йўқолгандир. Лекин ҳечдан кўра кеч яхши.

Нигора Раҳмонова,

ЎзА

“Фозилмон ота” зиёратгоҳи Фарғона водийсининг туризм марказига айланиб бораётган сўлим Хонобод шаҳрининг энг обод масканлардан бири ҳисобланади.

“Фозилмон ота” зиёратгоҳи – Андижон вилоятининг қўшни Қирғизистон билан чегарадош бўлган энг чекка шарқий-жанубий ҳудудидаги Хонобод шаҳрининг Фозилмон маҳалласида жойлашган қадимий зиёратгоҳдир. Ушу муқаддас масканнинг энг муҳим ва асосий хосияти унинг инсонлар саломатлигига ижобий таъсир қилувчи шифобахш булоғидир.  

Ота-боболаримиз, кекса авлод вакилларининг айтишларича, минг бир дардга даво булоғининг ҳаётбахш тирик сувларидан неча асрлар давомида одамлар шифо топиб келади. Зиёратгоҳга нафақат андижонликлар, балки республикамизнинг бошқа вилоятларидан ҳам одамлар келиб дам олади.  Булоқ суви инсон организмига тетиклик, қувват бахш этади, кўплаб хасталикларга, айниқса, ички ва тери касалликларига яхши даво бўлади.  

Ривоятларга кўра, XIII асрда яшаб ўтган уламо, пайғамбаримиз авлодларидан Сайид Фозилмон Деҳлавий ҳазратлари Аллоҳнинг иродаси ила муқаддас булоқ бўйини ўзига макон қилган. Инсонларни дину диёнатга, ҳақиқатга, маърифатга чорлаган. Ўз кароматлари билан эл орасида авлиёлик  мақомини олган. У зот вафот этгач, шу жойга дафн қилинади.  

XVI аср охирида келган кучли сел натижасида Фозилмон ота мақбараси лойқа остида қолади. 1805 йилда уламо, ўзбек мумтоз адабиётининг вакили шоир Хўжамназар Холмуҳаммад ўғли Хувайдонинг ўғли Холмуҳаммад Эшон ибн Хавайдо томонидан қабр ўрни аниқланиб, мақбара қайта тикланган.  

Кейинги йилларда мақбара ва зиёратгоҳ миллий услубда таъмирланиб, ободонлаштирилди. Зиёратчиларнинг кўнгилли дам олиб, ҳордиқ чиқаришлари учун зарур барча шароитлар яратилди. Ҳар йили, айниқса, ёз мавсумида бу ер минглаб зиёратчилар келиб-кетадиган энг гавжум масканлардан бирига айланади.  

Ф. УБАЙДУЛЛАЕВ,  

З. УМРЗОҚОВ (сурат), 

Ilm shunday ulug‘ kuchki, bartaraf etishda uning qurbi yetmaydigan biror muammo yo‘q. Ilmning aql-zakovat chirog‘i bilan yoritilgan  yo‘li insoniyatni hidoyatga, tinchlik-totuvlikka yo‘naltiradi.

Ilmning fazilati va ilm egalarining qadr-qimmati borasida Muoz ibn Jabal roziyallohu anhudan quyidagi rivoyat keltirilgan:

“Ilm o‘rganing! Zero, xolis ilm Alloh taolodan qo‘rqishga yetaklaydi. Ilm izlash ibodatga, uni o‘zaro muzokara qilish tasbihga, tadqiq va tahqiq etish esa, dushmanga qarshi turishga tengdir. O‘zgalarga ta’lim berish sadaqa, uni ilm ahliga sarflash qurbatdir (Alloh taologa yaqinlik). Ilm yolg‘izlikda sirdosh, tanholikda hamroh, dinga chorlovchi, yaxshi-yu yomonlikda sabrga undovchi, do‘stlar davrasida tirgak, notanish kimsalar orasida yaqin do‘st, jannat yo’lining mayog’idir. Alloh taolo ilm sabab turli xalqlarni ulkan darajalarga ko’tardi. Natijada ularni Alloh taolo ezgu ishlarga boshlovchi, izlaridan yuriladigan, amallariga havas qilinadigan, ular fikriga tayaniladigan insonlar qildi. Farishtalar ham ilm egalarining fazilatini orzu qilib, ularni qanotlari ila siypaydi.

Dunyodagi barcha narsa – dengizdagi kitu-baliqlar, yerdagi yirtqichu-hayvonlar, osmonu yulduzlar ilm egalariga istig‘for aytadi. Chunki ilm ko’r qalblarga hayot, zulmat chumg‘agan ko‘zlarga nur, madorsiz tanaga quvvatdir. Ilm oddiy insonni salohiyatli yetuk shaxsga aylantiradi. Amir va xoqonlar davrasiga yetkazadi. Dunyo va oxiratda ulkan darajalarga ko‘taradi. Ilmiy bir lahza tafakkur ro‘zaga, o‘zaro fikr almashish qiyomul laylga teng! Ilm bilan toat-ibodat ado topadi. Ilm yordamida taqvo qilib, ajrga yetiladi. Ilm sabab qarindoshlik bog‘lanadi. Ilm bilan halol-harom bilinadi. Ilm imom, amal esa uning muqtadisidir”[1].

Shuning barobarida amalsiz ilm yo‘q. Muoz ibn Jabal roziyallohu anhudan rivoyat qilinadi: “Хohlagan ilmni o‘rganing! Lekin Alloh taolo amalsiz ilmingizga ajr bitmas”[2]. Ushbu rivoyat ilm amal qilish uchun tahsil qilinishiga turtkidir. Shuning uchun ham ilm tolib o‘rgangan har bir ilmiga amaldagi haqqini bermasdan o‘tib ketishi maqbul ish emas. Ilmiga sodiq amalda mustahkam ilm egalari qancha yetishib chiqsa, bizlar taraqqiyot va farovonlik sari odimlab boraveramiz.

Abdulaziz Furzulov,

“Sayyid Muhyiddin maxdum” madrasasi mudarrisi

[1] Imom Abu Homid G'azzoliy. Ihyo ulumiddin. – Misr.: Dorul Misriya, 2004. – B.18.

[2] Abu Muhammad Dorimiy. Sunani Dorimiy. – Riyoz.: Dorul mug’niy, 2000. 262-hadis.

Мамлакатимиз элчихонаси кўмагида 26-29 август кунлари Ўзбекистондаги Ислом цивилизацияси маркази ва Имом Бухорий халқаро илмий-тадқиқот маркази вакилларидан иборат делегациянинг Ўмонга амалий сафари ташкил қилинди, деб хабар бермоқда «Дунё» АА мухбири.

Ташриф давомида мамлакатимиз вакиллари Ўмоннинг Архив ва ҳужжатларни сақлаш миллий департаменти раиси Ҳамад ал-Давяни билан учрашди.
Унда икки томонлама илмий ҳамкорликни йўлга қўйиш масалалари муҳокама қилинди. Ўмон томони учун Ўзбекистондаги Ислом цивилизацияси маркази ва Имом Бухорий халқаро илмий-тадқиқот маркази фаолияти тўғрисида батафсил тақдимот ўтказилди.

Департамент раиси Ҳамад ал-Давяни сўнгги йилларда Ўзбекистон Президенти раҳбарлигида мамлакатимиз бой маданий меросини асраб-авайлаш ва ўрганиш, маърифат ва диний бағрикенглик таълимотини кенг ёйиш бўйича амалга оширилаётган улкан саъй-ҳаракатларни Ўмон томони юқори баҳолашини таъкидлади.

Мулоқот натижасида томонлар Ҳамкорлик меморандумини ишлаб чиқиш ва имзолашга келишиб олдилар.

Шунингдек, мамлакатимиз делегацияси аъзолари, Ўмон Архив ва ҳужжатларни сақлаш миллий департаментида нодир қўлёзма ва ҳужжатларни сақлаш, зарарланган саҳифаларни реставрация қилиш, шунингдек, қўлёзма ва тошбосма асарларнинг фотомоделларини яратиш, султонликда кечган тарихий жараёнлар шоҳидлари ҳикояларини видеотасмаларга тушириш жараёнлари билан танишдилар.

Сафар давомида Ўзбекистон делегацияси Ўмон миллий музейига борди. Музейда Ўмон тарихи, жумладан, исломий мерос ҳақида ҳикоя қилувчи коллекциялар ҳамда уларни намойиш этиш услублари билан танишдилар. Музейшунослик соҳасида ўзаро тажриба алмашиш масалалари муҳокама қилинди.

Бундан ташқари мамлакатимиз илмий жамоатчилиги Ўмон султони девони ҳузуридаги Султон Қобус маданият ва фан маркази раиси Ҳабиб ал-Риями билан музокаралар ўтказди.

Ҳабиб ал-Риями 2018 йилда Ўзбекистон Фанлар академияси Абу Райҳон Беруний номидаги Шарқшунослик институти янги биносининг очилиш маросимида мамлакат делегацияси таркибида иштирок этганини билдириб, султонлик раҳбарияти Ўзбекистон билан ҳамкорлик алоқаларини ривожлантиришга алоҳида эътибор қаратишини таъкидлади.

Томонлар, шунингдек, ўзаро тажриба алмашиш, илмий тадқиқотлар олиб бориш, илмий анжуманлар ўтказиш ва ўқув грантларини ажратиш масалалари хусусида ҳам фикр алмашдилар.

Ўзбекистон мусулмонлари идораси
Матбуот хизмати