Ислом ҳамкорлик ташкилоти бош котиби ташкилотга аъзо давлатларни инсонпарварлик ёрдами жамғармасига бериладиган молиявий кўмакни оширишга чақирди.

Ҳусайн Иброҳим Тоҳа Ислом бирдамлик жамғармаси бутун дунё мусулмонларига ёрдам кўрсатгани, аммо қочқин ва табиий офат қурбонларига ёрдам бериш каби соҳалардаги лойиҳаларни молиялаштириш учун кўпроқ маблағ кераклигини маълум қилди.

Ташкилот раҳбари бу ҳақда шу ҳафтанинг душанба куни бўлиб ўтган Ислом жамғармаси доимий кенгашининг 65-йиғилишидаги нутқи чоғида айтиб ўтди. У жамғармани энг муҳим исломий хайрия ташкилотларидан бири деб атади ва ИҲТга аъзо давлатларнинг ихтиёрий хайрияларини кўпайтириш орқали унинг қамровини кенгайтиришга ҳаракат қилишга чақирди.

ИҲТ раҳбари Ҳусайн Тоҳа Ислом жамғармаси бошқарувини Қуддусдаги қўллаб-қувватлаш лойиҳалари ва Фаластиндаги соғлиқни сақлаш ва таълим дастурларини давом эттиришга чақирди.

Ислом бирдамлик жамғармаси ижтимоий ва моддий ёрдам кўрсатиш, шунингдек, мусулмон мамлакатлар, табиий офат ва инқирозлардан жабр кўрган одамларга шошилинч инсонпарварлик ёрдамини кўрсатиш орқали мусулмон жамиятларини рағбатлантиришни мақсад қилган.

ЎМИ Халқаро алоқалар бўлими

Ўзбекистон мусулмонлари идораси матбуот хизмати

Сурхондарё вилоятининг Денов шаҳридаги Саид оталиқ мадрасаси XVI асрга оид ноёб тарихий ёдгорлик бўлиб, бу иншоот ўз даврида Хўжа Алауддин Аттор Валийга атаб, ул зотнинг ўғиллари ва неваралари томонидан 26 йилда бунёд эттирилган.

Воҳа тарихининг илмий, маърифий, маданий, меъморий жиҳатдан муҳим ёдгорликларидан бири бўлган мадраса ўтган асрдаги мустабид тузум даврида ташландиқ ҳолга келиб қолган. Президентимизнинг 2021 йил 1-2 июнь кунлари вилоятга ташрифи чоғида берилган топшириқларига мувофиқ, 13 миллиард сўм маблағ ажратилиб, Саид Оталиқ мадрасасини қайта реставрация қилишга киришилди.

Ҳазрат Хожа Алоуддин Аттор нақшбандия тариқатининг улуғ пири, авлиё, “Силсилаи шариф” дa ўн еттинчи ҳалқадаги муршид, аллома бўлган. “Аттор” дейилишларига сабаб ул зоти шарифдан ҳамиша хушбуй ҳид анқиб турган, суҳбатлари ҳам ёқимли бўлган.

– Асл исмлари Муҳаммад ибн Муҳаммад ал-Бухорий бўлган Алауддин Аттор Ҳазрат Баҳоуддин Нақшбандийнинг шогирди ва куёви бўлиб, устози вафотидан сўнг тариқат таълимотини кенг ёйиш учун Деновга кўчиб келган,– дейди вилоят туризм ва спорт бош бошқармаси бошлиғи ўринбосари, илмий тадқиқотчи Зебунисо Алимардонова. – Халқ орасида Шайх Аттори Валий номи билан ҳам танилган. Илми, одоби, тарбияси, хулқи билан устозининг дуосини олган Аттор Денов шаҳридаги бир хонақоҳда муридларига таълим-тарбия бериш билан машғул бўлган. “Тухфаа аз-зоирийн” китобида ул зотнинг насаби Ҳазрати Али розияллоҳу анхугача етиб боргани ёзилган. Милодий 1400 йилда вафот этгач, ўғиллари Хожа Ҳасан Аттор тариқатни давом эттирган. Тумандаги Сармозор ота қабристонига дафн этилган.

Буни қарангки, Ҳазрат Алоуддиннинг оталари вафот этгач, мерос икки акаси билан ул зотнинг ўртасида уч ўғилга бўлинади. Лекин Аттор мерос олмай, Бухородаги мадрасага ўқишга киради. Илм ўрганади. Акалари савдогар, дўкондор, давлатманд кишилар бўлиб кетади. Алоуддинни Ҳазрат Баҳоуддин Нақшбанд ўз қарамоғларига олиб, таълим беради. Нақшбандия тариқатининг улуғ пири, авлиё бўлиб, камолга етади.

Ҳазрат Баҳоуддин шогирди Алоуддинни ўзига жуда яқин олган. Ул буюк зот Атторни ҳамиша сулук бошида ўзларига яқин жойда ўтиришини буюрган. Муридлар бунинг сабабини сўраганларида: “Уни бўри еб қўймасин деб, шундай қиламан. Бўри яъни, нафс доимо пойлаб туради. Шунинг учун ҳам ундан хабар олиб тураман, токи у бўрига ем бўлмасин”, дея жавоб берган.

Яна манбаларда қайд этилишича, кунлардан бир кун Ҳазрат Баҳоуддин Нақшбанд Алоуддин Аттор ҳужраларига келиб, у киши билан суҳбатлашади ва гап орасида: “Эй фарзанд, менинг қизим балоғатга етган, ўшани никоҳингизга олинг”, дейди. Ҳазрат Алоуддин эса: “Устоз менинг тўшагим бўйра бўлса, ёстиғим ғишт бўлса, бор давлатим мана шу синган кўза бўлса, мен оилани қандай боқаман? Сизнинг бу сўзларингиз мен учун катта бахтдир, лекин аҳволим ўзингизга аён, пирим!”, дея жавоб беради. Ҳазрат Баҳоуддин: “Ризқни бергувчи Аллоҳдир. Сизга ҳам, қизимга ҳам Аллоҳ ризқ берур. Менинг бу тарафдан ташвишим йўқ”, дейди қатьий ишонч билан. Шу суҳбат сабаб бўлиб, Алоуддин Аттор устозларининг қизини ўз никоҳига олади.

Денов шаҳрида улуғ аждодимизга атаб ўзига хос ноёб лойиҳа ва услубда бунёд этилган мазкур мадраса Қуръони Карим сураларига монанд 114 ҳужрадан иборат қилиб қурилган. Икки қаватли ёдгорликнинг тўлиқ реставрация қилингани юртимизда муқаддас қадамжолар ва тарихий обидаларни қайта тиклаб, зиёрат туризмини ривожлантиришга, ўтмишда яшаб ўтган буюк алломаларимизни дунёга кенг тараннум этишга қаратилаётган юксак эьтибор ифодасидир.

ЎзА хабарига кўра, муаззам зиё масканни қайта реставрация қилиш жараёнида мадрасани пештан таъмирлаш ва тиклаш ҳамда ганч безакларини таъмирлаш ва тиклаш ишлари бажарилди. Ҳужралар ўз даврига хос сувоқ қилиниб, оқланди. Биринчи қават ер қисмига қиш масуми учун иситиш мосламалари тўшалиб, ғиштли плиткалар ётқизилди. Иккинчи қаватдаги хоналар ерига ҳам ғиштли плиткалар қопланди.

– Ўтган асрларда мадрасанинг 3 та гулдастасига дарз кетиб, ёрилган экан, – дейди Зебунисо Алимардонова. – Реставрация чоғида қайта таъмирланиб, тикланди. Ташки ва ички ғиштлари ораси тозаланиб, қайта тўлдирилди. Устки қисми ёғингарчиликдан ҳимоя қилиш учун тўлиқ ёпилди. 160 дан ортиқ қадимий услубдаги эшик ва ром ясалиб, ўрнатилди. Мадрасанинг асосий кириш қисмидаги дарвоза янгиланди. Атрофида йирик ҳажмдаги ободонлаштириш ишлари олиб борилди. Эндиликда қайта тикланган маҳобатли ёдгорликнинг биринчи қаватида йўқолиб бораётган ҳунармандчилик турларини тиклаш, ҳунармандчилик маркази ташкил этиб, ҳунармандлар учун қулай шароитлар яратиш мўлжалланмоқда. Иккинчи қаватини музейга айлантириб, қадимий ва ҳамиша навқирон Денов тумани тарихи асосида турли даврларни намойиш этувчи экспозициялар яратиш, ҳудудда асрлар давомида шаклланиб келган бой моддий-маданий ва маънавий меросни тиклаш режалаштирилаётир. Буларнинг барчаси Янги Ўзбекистонда ёдгорликларга янгича муносабатда бўлинаётгани, узоқ ўмишдан сўйлайдиган обидаларимизнинг нафақат меъморий бичимини, балки тарихий аҳамиятини тиклашга ҳам алоҳида эътибор берилаётганининг амалдаги самарасидир.

Ўзбекистон мусулмонлари идораси матбуот хизмати

Миссионерлик- лотинча “юбориш” ва “топшириқ” маъноларини билдириб, бир динни бошқа диндагилар ўртасида тарқатиш сохасидаги черков (яъни, католик ва протестантлар каби йўналишлар) ташкилотларнинг фаолиятидир. Содда қилиб айтганда, миссионерлик христианлаштиришдир. Шуни билиш лозимки даъват (насихат) бошқа, миссионерлик бошқа нарсадир.

Бир дин вакилини ўз қавмига хитоби даъват  бўлиб, ҳар бир инсон бу ишни қилиши мумкин. Аммо бир дин вакилининг бошқа диндагиларни ўз динига оғдириш учун қиладиган харакати эса, миссионерлик дейилади ва бу қонун билан таъқиқланади. Минг афсуслар бўлсинки охирги пайтларда баъзи шахслар муқаддас динимиз Исломни қўйиб, бошқа динга ўтиб кетиш холлари кузатилмоқда. Бу холга чек қўйилмас экан, миллат барқарорлигига таҳдид солиниши турган гап!

Дунё тарихига назар соладиган бўлсак, миссионерларнинг ўзга дин вакиллари орасидаги фаолияти хар дойим минтақа барқарорлигини бузган, ахоли орасида нотинчлик ва қон тўкилишларга сабаб бўлган.

Миссионерларнинг ғаразли мақсадлари ва фаолиятлари:

Халқни христианлаштириш. Шу орқали уларни иқтисодий, сиёсий ва маънавий жихатдан Ғарб давлатлари таъсир доирасига олиш;

Халқларда ўз динига нисбатан шубҳа уйғотиш, уларнинг ўз динидан чиқариш ва динсиз қолдириш;

Қадимдан христиан бўлганларни ўз динларида мустаҳкамроқ туришга чорлаш ва улар сафини янги христианлар билан тўлдириш.  

Улар мақсадлари йўлида барча воситалардан фойдаламоқда, уларнинг хийла найранглари моддий рағбатлантириш ва турли алдов йўллари билан олиб боради.

Баъзи ватандошларимиз уларнинг кетидан эргашиб кетаётганининг Биринчи сабаби – муқаддас Ислом дини хукмларидан мутлақо бехабарлик.

Иккинчиси сабаб – ён атрофимиздаги кам таъминланган оилалар, ногиронлар ва боқувчисидан айрилган қариялар бева- бечоралардан вақтида хабар олинмаётгани, моддий ва маънавий берилмаётгани билан бевосита боғлиқ. Миссионерлар бу «имконият»дан «унумли» фойдаланиб баъзи муҳтожларнинг кўнглини овлаб, диндан чиқармоқда. Бу эса бизни жамият ва халқимизмаънавий ва моддий аҳволига янада жиддийроқ эътибор қаратишимизни тақозо этади.

Аллоҳ таоло Қуръони каримда муртадлик яъни Ислом динидан чиқиш ҳақида қатъий таъкидлаб шундай деган:

“Сизлардан кимда ким ўз (Ислом) динидан қайтиб, кофир ҳолида ўлса, ундай кимсаларнинг қилган амаллари (тоат ибодатлари) дунёю охиратда беҳуда кетар. Улар дўзах аҳлидирлар ва унда мангу қолурлар” (Бақара сураси, 217- оят)   

Шу ўринда катта шахарлардан бирида бўлган воқеани эслайлик: Ўзига тўқ, махаллада хурмат эътиборли бир отахонни олийгоҳда таълим олиётган қизлари йўлдаги бахтсиз тасодиф туфайли вафот этади. Унинг жанозасига махалладошлар, қариндош-уруғлар, қуда-андалар каби мингдан ортиқ киши тўпланади. Майит тобудга солиниб жаноза ўқилиши учун олиб чиқилмоқчи бўлганда, қаердандир икки нафар миссионер даъватчилари келиб бу қизни динини ўзгартириб уларнинг сектасига қўшилганини айтиб, исботлар келтиришади. Мархумани муслима эмаслиги, динини ўзгартирганлиги барчага аён бўлади. Табиийки унга жаноза буюрилмайди ва йиғилган жамоа тарқаб кетади. Мархуманинг отаси бу шармандаликни кўтара олмай юрак хуружидан вафот этади.

Дунё учун охиратини сотган кимса дунё ва охиратда хўрлик ва шармандаликка учраши аниқ!

Баҳодир Шарипов,

Чуст туман бош имом хатиби

Ўзбекистон ўзининг бой тарихи, бетакрор маданий мероси, жаҳон цивилизацияси ривожига салмоқли ҳисса қўшган кўплаб олим ва мутафаккирлари, қадимий меъморий ёдгорликлари, бетакрор пазандачилик ва халқ амалий санъати билан хорижликлар, сайёҳлар ва зиёратчилар эътиборини тортмоқда, деб ёзади Мисрнинг «Ал-Масаи Ахбор ал-Йаум» нашри.

Ўзбекистон Президентининг «Ўзбекистон Республикасида ички ва зиёрат туризмини янада ривожлантириш чора-тадбирлари тўғрисида»ги фармони мамлакатда сайёҳликнинг мазкур йўналишини ривожлантириш учун ҳуқуқий асос бўлиб хизмат қилмоқда.

Республика ҳудудида турли динларга оид маданий мерос объектларининг мавжудлиги Ўзбекистонда зиёрат туризмини кенг тарғиб қилишга, бу йўналишда хорижий сайёҳлар оқимини оширишга сабаб бўлаётган муҳим омиллар сирасига киради. Мамлакатдаги зиёрат туризми учун ҳар жиҳатдан мос келадиган жами 622 та маданий мерос объектининг 595 таси ислом динига, 19 таси насронийлик, 8 таси эса буддавийлик динига мансубдир.

"Мамлакатда буддавийларнинг бошқа мамлакатларга саёҳатларини уюштирадиган ўнлаб сайёҳлик агентликлари мавжуд", - деди "Чоге" буддавий ташкилоти вакили Юн Юнг Хи (Жанубий Корея). - Ўзбекистон билан зиёрат туризми соҳасида ҳамкорлик қилишга тайёрмиз ва манфаатдормиз."

Ўзбекистон ҳудудида яшаб, ўзидан катта мерос қолдирган Имом Бухорий, Имом Термизий, Имом Мотуридий, Баҳоуддин Нақшбандий, Хўжа Абдуҳолиқ Ғиждувоний, бошқа машҳур аллома ва мутафаккирлар мақбаралари ислом динига эътиқод қиладиган кўплаб сайёҳларнинг диққат-эътибори марказида бўлган қадамжолар ҳисобланади.

"Ўзбекистон бутун дунёдан келган сайёҳлар учун муҳим манзилдир, - дейди "Дамга" газетаси мухбири Мурат Палавар (Туркия). - Мамлакат ўзининг жозибадор муҳити билан меҳмонларни ҳайратга солмоқда. Феруза тусда безатилган қадимий масжидлар, мадрасалар, карвонсаройлар ҳар қандай сайёҳни албатта забт этади. Республика сайёҳлик салоҳияти билан бир қаторда асрлар давомида эъзозланиб келинаётган миллий анъана ва қадриятлари ҳам ташриф буюрувчилар эътиборини ўзига жалб этмоқда".

Мамлакатда зиёрат туризмини ривожлантиришга қаратилган чора-тадбирлар ўзининг амалий самараларини бермоқда. Бунга сабаб бўлаётган омиллар эса талайгина.

«Энг аввало, Ўзбекистонга зиёратчи сайёҳларни жалб қилиш бўйича қабул қилинган ҳужжатларга биноан, қатор мамлакатлар фуқаролари учун визасиз режимнинг жорий этилганини қайд этиш жоиздир, - дея таъкидлайди нашр. Бунинг натижасида 2018-2019 йилларда Ўзбекистонга Индонезиядан келган сайёҳлар сони 170%, Малайзиядан 158%, Туркиядан 154% ва БААдан 153%га ўсди.

Мақолада мамлакатда ҳалол туризм бўйича Сингапурда жойлашган жаҳоннинг нуфузли ташкилоти бўлган «Crescent Rating» агентлиги билан 2018 йилда яқиндан ҳамкорлик йўлга қўйилганига алоҳида эътибор қаратилган. «Crescent Rating» ва «Mastercard» ташкилотлари томонидан ҳар йили эълон қилинадиган «Жаҳон мусулмон сайёҳлари индекси» (Global Muslim Travel Index) рейтингида республика 32-ўриндан 22-ўринга кўтарилди ва Ислом ҳамкорлик ташкилотига аъзо мамлакатлар орасида сайёҳларни жалб қилаётган «энг жозибадор» ҳамда «хавфсизлик ва бағрикенглик даражаси юқори» бўлган 10 та давлат қаторидан ўрин олди», - деб эътироф этади нашр.

Crescent Rating маълумотларига кўра, 2026 йилга бориб ҳалол туризм соҳасида дунёда 230 миллион саёҳатчи бўлади. Pew Research Center ҳисоб-китобларига кўра, 2050 йилга бориб дунё аҳолисининг қарийб 30 фоизи мусулмонлар бўлишини инобатга олсак, Ўзбекистонда зиёрат туризмини ривожлантиришнинг муҳимлиги долзарб ҳисобланади.
"Россиянинг Шимоли-ғарбий минтақаси ва Санкт-Петербург Мусулмонлар Диний идораси ва Ўзбекистон мусулмонлари идораси фаол тарзда зиёрат туризми, ислом қадамжоларига ташриф буюриш соҳасидаги саъй-ҳаракатларини ривожлантирмоқда", дейди шайх Россиянинг Шимоли-ғарбий минтақаси ва Санкт-Петербург Мусулмонлар Диний идораси раҳбари Равиль Панчеев. - Шу маънода Ўзбекистон ўзининг тарихий ва муқаддас обидалари билан алоҳида ўрин тутади. Мамлакатда Бухоро, Самарқанд, Хива ва бошқа кўплаб муқаддас шаҳарлар мавжуд".

Ўзбекистонда туризм соҳасини янада ривожлантириш ва ушбу йўналишда хорижий мутахассислар тажриба алмашиш мақсадида 2019 йил 21-23 февраль кунлари Бухоро шаҳрида I Халқаро зиёрат туризми форуми ўтказилди. Мазкур анжуманда 130 дан зиёд мамлакатнинг туризм ҳамда дин соҳаси олимлари ва мутахассислари иштирок этди. Тадбир якунида қабул қилинган «Бухоро декларацияси»да Ўзбекистон зиёрат туризми марказларидан бири сифатида эътироф этилди.

"Ўзбекистон очиқ музейга ўхшайди,-дейди Анқара университети илоҳиёт профессори Сонмез Қутлу. – Бу ерда ўзингизни ёлғиз ҳис этмайсиз. Ўзбекистонга борганимда, ўзим туғилиб ўсган Ерзинжон вилоятидан юргандек туюлди. Мамлакатдаги ҳар бир бурчак ва анъаналар таниш. Барча дўстларимга тортинмасдан Ўзбекистонга боришни, ушбу республиканинг қадамжоларини зиёрат қилишни тавсия этаман".

2020 йилда Таълим, фан ва маданият масалалари бўйича Ислом ташкилоти (ISESCO) томонидан Бухоро «Ислом олами маданияти пойтахти» деб эълон қилингани муносабати билан онлайн шаклда илмий конференция ва мулоқотлар ҳам ўтказилди.

Сўнгги йилларда хорижий мамлакатлардаги тасаввуф йўналиши вакилларининг Ўзбекистондаги «Етти пир» ва Нақшбандия тариқатига оид зиёратгоҳларга қизиқиши тобора ортиб бормоқда. «Малайзияда жойлашган «World Sufi Centre» жамияти билан биргаликда 2018-2019 йилларда анъанавий тарзда ўтказилган Нақшбандия фестивалига хориждан 500 дан ортиқ иштирокчи келди. Кейинги йилларда янада кўпроқ хорижий сайёҳни жалб қилиш мақсадида ушбу зиёратгоҳларда кенг кўламли қурилиш ва реконструкция ишлари олиб борилди.

Сўнгги йилларда хорижлик сайёҳларни янада кўпроқ жалб этиш мақсадида ушбу қадамжоларда кенг кўламли қурилиш ва реконструкция ишлари амалга оширилиб, таҳоратхоналар қурилди, замонавий ахборот технологиялари, сенсор ахборот киосклари, янги музей ва кутубхоналар, озиқ-овқат расталаридан фойдаланилди.

Бундан ташқари, мамлакатдаги бошқа туристик масканларда зиёратчилар учун тегишли шарт-шароитлар яратилмоқда. Меҳмонхона ва ресторанларни "ҳалол" сертификатлаш жорий этилди. Республиканинг халқаро аэропортлари ва темир йўл вокзалларида намоз ўқиш ва таҳорат олиш учун махсус жойлар ташкил этилган. Шундай қилиб, масалан, "Умра +" дастури доирасида мустақил зиёратчиларни ёки сайёҳларнинг катта гуруҳини учратиш мумкин.

Халқаро миқёсда, хусусан, Дубай, Аланья, Қозон, Жакарта ва Сингапурдаги кўргазма ва анжуманлар доирасида мамлакатнинг ислом цивилизацияси маркази сифатидаги обрўсини юксалтириш борасида салмоқли ишлар амалга оширилмоқда. Туркиянинг TRT Avaz, Индонезиянинг Trans7, NetTV, SCTV,, Малайзиянинг AlHijrah, Сингапурнинг HalalTrip ва бошқа машҳур хорижий оммавий ахборот воситалари платформалари орқали ҳам тарғибот ишлари олиб борилди. Натижада, Mastercard – Crescent Rating Halal Travel Frontier 2020 ҳисоботида Ўзбекистон ислом меросини тиклаш орқали мусулмон сайёҳлик бозорида янги тенденцияни ўрнатган мамлакат сифатида дунёга эълон қилинди.
Афсуски коронавирус пандемияси Ўзбекистон туризм соҳасига ҳам ўзининг салбий таъсирини кўрсатди. Шунга қарамай, Ўзбекистон раҳбарияти томонидан пандемия шароитида мамлакатда туризм соҳасини ривожлантириш ва пандемия билан боғлиқ муҳитнинг юмшаши билан сайёҳларнинг ташрифини жадаллаштириш йўналишида тизимли ишлар олиб борилмоқда.

Нашрда виза тизими бекор қилинган қатор мамлакатларда тарғибот ишларини жадаллаштириш мақсадида «Ўзбекистоннинг туризм бренди элчиси» институти жорий этилгани атрофлича ёритилди. Унга мувофиқ, Софи Ибботсон (Буюк Британия), Махд Асри Заинал Абидин (Малайзия), Хасиб Ур Раҳмон (Покистон), Эко Шри Маргианти (Индонезия) туризм элчиси ва зиёрат туризм элчиси мақомига эга бўлди.

Хусусан, сайёҳлар ташриф буюриши учун шароит ва қулайликлар яратиш, сайёҳлик объектларини реконструкция қилиш, ҳалол овқатланиш ва яшаш жойларини ташкил этиш, экскурсия зоналарини тайёрлашга катта эътибор қаратилмоқда.

Яна бир муҳим жиҳат. Республикада зиёрат туризмини изчил ривожлантириш мақсадида турли мамлакатлар мусулмонлари, яъни бўлажак зиёратчиларнинг республиканинг муқаддас жойлари ҳақида хабардорлигини оширишга катта эътибор қаратилмоқда. Шу мақсадда Ўзбекистоннинг хориждаги дипломатик ваколатхоналарида кенг кўламли тарғибот-ташвиқот ишлари мунтазам олиб борилмоқда.

Хусусан, виза режими бекор қилинган бир қатор мамлакатларда тушунтириш кампанияси самарадорлигини ошириш мақсадида "Ўзбекистон сайёҳлик бренди элчиси" институти жорий этилди. Унга мувофиқ, Софи Ибботсон (Буюк Британия), Махд Асри Заинал Абидин (Малайзия), Хасиб Ур Раҳмон (Покистон), Эко Шри Маргианти (Индонезия) туризм элчиси ва зиёрат туризм элчиси мақомига эга бўлди. Улар ўз мамлакатларида Ўзбекистоннинг ижобий қиёфасини тарғиб этиш, маҳаллий оммавий ахборот воситаларида турли мақола ва интервьюлар эълон қилиш ҳамда республикага сайёҳларни жалб этиш бўйича муҳим ишларни амалга оширмоқда.

Юқоридагилардан келиб чиққан ҳолда комил ишонч билан айтиш мумкинки, Ўзбекистон туризмнинг барча йўналишларини ривожлантириш ва хорижий сайёҳларни жалб бўйича дунёда етакчи мамлакатлардан бирига айланмоқда.

Туризм соҳаси доимий изланиш, инвестиция ва замонавий технологиялардан самарали фойдаланишни талаб этади. Шу боис Ўзбекистон учун ушбу стратегик муҳим йўналишни янада ривожлантириш, республиканинг тарихий-маданий меросини пухта сақлаш ғоят муҳимдир.

Ўзбекистон мусулмонлари идораси матбуот хизмати