Саудия Арабистони Подшоҳлиги ОАВ хабарига кўра, ҳукумат Қуръони каримнинг 12 нусхасини ўз қўли билан араб ёзувида ёзган машҳур суриялик хаттот Усмон Тоҳага фуқаролик беришга қарор қилди.

Саудия Арабистони Усмон Тоҳани ўз ҳудудида ўнлаб йиллар яшаб, ҳозир 87 ёшда экани ва Қуръони каримга бўлган хизматини қадрлаган ҳолда Саудия фуқаролиги берилиши маълум қилинди.

Ўтган асрнинг саксонинчи йиллари охиридан бошлаб хаттот Усмон Тоҳа Мадинадаги Подшоҳ Фаҳд номли Қуръони каримни чоп этиш мажмуаси билан ҳамкорликда Қуръонни ўз қўли билан ёзишни бошлаган ва шу кунга қадар 12 нусхада Қуръони каримни ёзиб тугатишга муваффақ бўлган.

Эътиборлиси, Саудия Арабистони подшоси Салмон бин Абдулазиз ҳазратлари 2019 йил ноябрь ойида “имтиёзли яшаш учун рухсатнома бериш” тўғрисидаги қароридан сўнг Подшоҳликнинг 2030 йилги тараққиёт режасига қўшимча равишда турли соҳаларда, жумладан, суд, қонунчилик, тиббиёт, саноат, нефт саноати соҳаларида хизмат қилган иқтидорли шахсларни фуқароликка қабул қилишга буйруқ берган эди.

Маълум қилинишича, хаттот Усмон Тоҳа 1934 йилда Суриянинг Ҳалаб шаҳрида туғилган. У 1965 йилда Дамашқ университетининг Тарбия факультетини тамомлаган, араб ва форс тилларида рассомлик ва хаттотлик бўйича муваффақиятга эришган, Ислом оламидаги хаттотлар буюк устози Ҳомид ал-Амадий томонидан 1973 йилда энг яхши хаттотлик илми бўйича ижоза “махсус унвони”ини олишга сазовор бўлди.

ЎМИ Халқаро алоқалар бўлими

— Уйда намоз ўқишдан аввал таҳорат олиб, кийимларни тозасига алмаштириб ўқиймиз. Жума намозини ўқиш учун масжидларга чиқишдан олдин ҳам шундай қиламиз. Лекин баъзилар масжидга ишдан чиқиб ёки узоқ йўлдан келиб ўқиб кетаверишади. Уларнинг уст-бошини алмаштиришларига имкон бўлмайди. Шу кийимида тоза бўлмаган жойларга кирган бўлиши ҳам мумкин. Мана шундай ҳолатда намоз ўқишлари жоиз-ми?

— Бадан, либос ва намоз жойининг пок бўлиши барча мазҳаб уламолари наздида шарт ҳисобланади. Қуръони каримда:

﴿وَثِيَابَكَ فَطَهِّرْ﴾

“...ва либосингни покла” (Муддассир сураси, 4-оят) деб буюрилган.

Демак, тоза ва нажосатдан пок либосда намоз ўқиш шарт. Борди-ю, бадани ёки либосида нажосат бўлса, уни кетказиш имкони бўлса, у билан ўқилган намоз дуруст бўлмайди. Аммо бизнинг мазҳабимизда нажосатни кетказиш имкони мавжуд бўлмаса, у билан намоз ўқийверади ва кейин ўша намозни қайтариб ўқимайди. Саволда сўралганидек, аниқ нажосат ва нопок бўлмаган либосда намоз ўқилаверади.

Гумон билан масалага ҳукм қилинмайди. Абдуллоҳ ибн Масъуд розияллоҳу анҳудан ривоят қилинади. Набий алайҳиссалом: “Агар бирингиз намозда шак қилса, тўғрисини қасд қилсин”, деганлар.

Муҳаммад Айюб ҲОМИДОВ

Маккаи Мукаррамадаги Масжидул Ҳаромга янги ногиронлар аравачаларининг катта партияси етиб келди. Мусулмонлар зиёратгоҳи саналган Байтуллоҳ ҳудудига имконияти чекланган ногирон зиёратчиларнинг ҳаракатланиши учун 8000 та оддий ва электр аравачалари келтирилди.

Зиёратчилар аравачаларни махсус мобил илова орқали олдиндан буюртма қилиши мумкин. Ногирон зиёратчилар аравачалардан фойдалангандан сўнг улар дизинфекция қилинади.

Саудия Арабистони Подшоҳлигида соғлигида муаммоси бор зиёратчларга алоҳида эътибор қаратилиб, ҳар йили Макка ва Мадинада ҳаж ва умра амалларини бажариши учун янада қулай шароитлар қилинмоқда.

ЎМИ Халқаро алоқалар бўлими

«Шуни билиб олмоқ лозимки, Абул Ҳасан ва Абу Мансур - Аллоҳ улардан рози бўлсин ва Ислом номидан яхшилик-ла мукофотласин - ўзларидан келиб чиқиб бирор фикр айтмадилар ва янги мазҳабни пайдо қилмадилар. Албатта, бу зотлар салафи солиҳлар мазҳабини қарор топтирдилар ва Расулуллоҳ соллаллоҳу алайҳи васалламнинг саҳобаларининг йўлига мувофиқ келдилар. У зотлардан бири Шофеъий мазҳабининг ва хужжатларининг нусратида турган бўлсалар, бошқалари Ҳанафий мазҳабининг ва хужжатларининг нусратида қоим турдилар. У зотларнинг ҳар иккалалари бидъат ва залолат аҳлига қарши мунозара қилдилар ва уларни ер билан яксон қилиб, ғалаба қозондилар. Дарҳақиқат, бу ҳақиқий жиҳоднинг аслидир! Одамларнинг ўзларини у зотларга нисбат беришига келсак, у зотларнинг ҳар бири салафи солиҳлар йўлига бир арқонни боғладилар, уни маҳкам тутдилар ва унга хужжат ва далилларни келтирдилар. Натижада ушбу йўлда юрган ва далилларга эргашган кишига «Ашъарий» ва «Мотуридий» номи ишлатиладиган бўлди».

«Итҳофу саадатил муттақийн би шарҳи иҳёи улумид дин» асаридан

2/6-7 Б, Имом Муртазо Забийдий роҳимаҳуллоҳ