Шавкат Мирзиёев бугун Тошкент шаҳар сайловчилари билан учрашув давомида Ислом цивилизацияси марказининг аҳамияти ҳақида гапирди.

“Азалдан Тошкент шаҳри миллий давлатчилигимизнинг юксак тараққий этган марказларидан бири бўлган, десак айни ҳақиқат бўлади. Қарийб уч минг йиллик Шоштепа, 2200 йиллик тарихга эга Мингўрик ёдгорликларидан топилган ноёб экспонатлар ҳам шундан далолат беради. 

Абу Райҳон Беруний, Маҳмуд Кошғарий сингари улуғ мутафаккирлар асарларида Шош, яъни Тошкент эли мард, жасур, ўз юрти ҳимоясига ҳамиша тайёр, қўли очиқ ва сахий инсонлар сифатида таърифланган.

Бу заминда таваллуд топган, Шоший, Тошкандий тахаллуслари билан фаолият кўрсатиб, бебаҳо асарлар яратган юзлаб улуғ зотлар дунёвий ва диний илмлар бўйича ўз замонасининг тенгсиз олимлари ҳисобланган.

Сузук ота мақбараси каби муҳташам мажмуалар бунёд этаётганимиз, Ўзбекистондаги Ислом цивилизацияси марказини қураётганимиздан барчангиз яхши хабардорсиз. Мен бежиз бу жойдан пулни аямаяпман. Ислом цивилизацияси марказига кириб чиққан одам ўзгариб чиқиши керак. Масалан, Беруний тарихини ўрганмоқчи бўлган инсон буюк олим тилидан сўзланган овозни эшитади.

Ғалаба боғини ҳам бежизга барпо қилмадик. Бу ҳам бизнинг тарихимиз, қанча қанча юртдошларимиз жанг майдонларидан қолиб кетишди, фронт ортида меҳнат қилишди. Буни унутиб бўлмайди”, – деди давлатимиз раҳбари.

azon.uz

ЎМИ матбуот хизмати

Улан-Удэдаги мусулмонлар жамоаси жомеъ масжиди ҳузурида маданий-маърифий марказ қуриш ва унинг ҳудудини кенгайтириш ниятида. Бурятия пойтахтидаги масжид 2010 йилда очилган бўлиб, у хусусий эҳсонлар ҳисобига қурилган ва энди ибодат қилишни истаган ҳар бир кишини сиғдирмай қолди.
"Илгари 200 нафарга яқин одам намозга келган. Энди масжид барча намозхонларни сиғдирмайди. Кўчада кўпчилик намоз ўқийди", - дейди мусулмонлар жамоаси вакили Расул Муҳаммад Шуайб.
Масжид ёнида 2000 квадрат метр майдонга эга маданий-маърифий марказ қурилиши режалаштирилган. Марказ биносида спорт зали, ўқув хоналари, ошхона ва меҳмонхона бўлади.
"Бизнинг энг муҳим мақсадимиз-ёшларимизни тўплаш учун ҳудудни кенгайтириш. Улар барча таълим муассасалари бўйича тарқалган. Ҳамма бориб ўқийди. Жума кунлари ҳам уларда ўқув машғулотлари бўлади. Уларнинг масжидга қатнашга имкони йўқ. Шундай қилиб, бу ерда овқатланиш хонаси бўлади, шунинг учун улар оч қолганда бу ерда овқатланишлари мумкин. Шу билан бирга улар футбол ва баскетбол ўйнашади",-дейди Улан-Удэ масжидининг имоми Ҳамид Сафиуллоҳ.
Islamisemya.com хабарига кўра, қурилишнинг тахминий қиймати 60 миллион рубль бўлади. Бундан ташқари, улар ҳудудни кўкаламзорлаштиришни режалаштирмоқдалар. Мажмуанинг лойиҳаси республика энг яхши архитекторларининг бири томонидан тайёрланмоқда.

Ўзбекистон мусулмонлари идораси матбуот хизмати

Сўнги йилларда оммавий ахборот воситалари орқали ва кўплаб интернет сайтларида ҳамда баъзи аҳли илмлар орасида салафлар ва салафийлик ҳақида турли хил гап сўзлар тарқалмоқда. Аслида “Салаф” сўзи арабча сўз бўлиб луғатда “аввалгилар”, “аждодлар” ва “аввал яшаб ўтганлар” маъносини билдиради. Истилоҳда эса маълум бир даврга ва маълум бир инсонларга айтилади. Ҳадиси шарифда Росулуллоҳ соллаллоҳу алайҳи васаллам «Замонни яхшиси менинг замонимдир, сўнг уларга яқин бўлганларнинг замони, сўнг уларга яқин бўлганларнинг замонидир» - деб марҳамат қилганлар.

Мазкур ҳадисни далил қилиб аҳли сунна уламолари ушбу уч даврни “саодат асри” деб атайдилар. Ушбу уч даврда яшаган зотлар, шундай инсонлар эдики, уларнинг барчалари динда йўлчи юлдузлар каби эдилар. Улар барчалари инсонларга нисбатан адолатли, махлуқотларга эса меҳрибон, фақирларга нисбатан хайри саховатли, ожизларга нисбатан мурувватли, ёши катталарга ҳурматли, кичикларга шафқатли эдилар. У зотлар ҳеч кимга ва ҳеч нарсага қўллари билан ёки тиллари билан озор бермас эдилар. Ҳеч кимни токи куфри ва нифоқи аниқ бўлмагунча куфрда ёки нифоқда айбламас эдилар. Ва яна бир қанча фазоиллари бор эдики, уларни тил билан айтиб қалам билан ёзиб тугатиб бўлмайди. Шунинг учун ҳам у зотларни салафи солиҳинлар дедилар.

Аммо охирги вақтларда салафлар номи билан салафийликни даъво қилувчи «сохта салафийлар»  пайдо бўлиб, ўзларининг бўлмағур пуч ғоялари билан, ёшларимизни ўзларининг бузуқ ақидаларига жалб қилмоқда. Улар келтирган оят ва ҳадислар бир қараганда тўғридай кўринсада, аммо асли улар таъвил қилган маънони бермайди.  Масалан Имом Муслим ривоят қилган ҳадисда «Сўзларнинг энг яхшиси Аллоҳнинг китоби, йўлларнинг яхшиси Муҳаммад алайҳис саломнинг йўли ва ишларнинг энг ёмони,  янги пайдо бўлганидир,  ҳар бир бидъат залолатдир»  дейилган.  Ушбу ҳадисда ислом гуёки янгиликка қаршидек, аслида эса ундай эмас. Аҳли сунна уламолари бидъатни бир неча турга булганлар,  шундан бидъат ҳасана (яхши бидъат ) ва бидъати саййиа (ёмон бидъат). Бунга далил қилиб Пайғабаримиз алайҳис саломнинг  «Ким исломда бир яхши ишни бошлаб берса, унга ўша ишга амал қилганларнинг савобидан камаймасдан етиб туради, ким исломда бир ёмон ишни бошлаб берса унга амал қилганларнинг гуноҳидан камаймасдан етиб туради.» дейилган ҳадисини келтирадилар. Бунга мисол қилиб ҳазрати Умар розиёллоҳу анҳу таровеҳ номозини жам қилиб ўқиш ёки  Абу Бакр Сиддиқнинг Қуръони каримни  жам қилиши ёки ҳазрати Усмон розияллоҳу анҳуни жумъа кунидаги иккинчи азонни қўшишини далил қиладилар. Сохта салафийлар эса мавлуди шарифни инкор қиладилар.  Ваҳоланки, мавлуди шарифда соловатлар жўр бўлиб айтилади,  ўқигувчини ҳам эшитгувчини ҳам ихлоси  этиқоди мукаммаллашади.

Шундай экан азизлар! Ҳар қандай хабарни ёки бирон-бир Ҳадисни эшитиб, ундан хулоса чиқаришга ва уни шарҳлашга шошилмаслик керак. Ишончли уламоларимизнинг ёзган шарҳларига асосан ўзимизда тушунча ҳосил қилишимиз мақсадга мувофиқ бўлади.

Йулдошев Баҳриддин

Пастдарғом тумани

"Эшонхужа" жоме масжиди имом хатиби