muslim.uz
Дунёдаги ягона ёғоч Қуръон Туркия президенти Ражаб Тоййиб Эрдўғонга ҳадя қилинди
Истанбулдаги "Адолат ва тараққиёт" партияси маҳаллий бўлимининг 7-йиғилишида Туркия президенти Ражаб Тоййиб Эрдўғон ноодатий совға - ёғочдан ясалган Қуръон олди. Қуръоннинг бу ғаройиб нусхасини 79 ёшли турк рассоми Мунир Эрбёрю яратган. Қуръон 30 жилддан иборат. Ҳар бир ҳажмнинг қалинлиги 4,5 см. Қуръон қайин ёғочидан қилинган.
Islam.ru маълумотларига кўра, муқова чармдан қилинган. Ёғоч "саҳифалар" да Қуръон матни куйдириш услуби билан туширилган. Бу дунёда бундай техникада қилинган ягона Қуръон. "Саҳифалар қалинлиги 3 мм бўлган қайин тахтачаларидан тайёрланган. Россия ва у билан чегарадош айрим мамлакатларда ўсади. У ердан тахталар олиб келинди. Унинг ёғочлари оқ ва қаттиқ бўлгани учун қайинни афзал кўрдик", - дейди Мунир Эрбёрю.
Рассом ёғочга Қуръонни туширганини гапириб берди: "1978-1980 йилларда қўлимга куйдириш аппарати тушиб қолди. Ўша пайтда савдо билан шуғулланардим. Кечқурунлари уйга қайтгач, телевизор томоша қилмай, куйдириш билан шуғулландим. 1982-1983-йилларда катта қизиқиш уйғотган кўргазмамни ўтказдим. 1998 – йилда устахона очдим. Ҳозир Туркиянинг турли бурчакларида шогирдларим бор".
Совғани олгач, Ражаб Тоййиб Эрдўғон Мунир Эрбёрюни саҳнага таклиф қилди ва унга миннатдорчилик билдирди. Рассомнинг сўзларига кўра, шахсий учрашув чоғида у давлат раҳбарига ўз тилакларини билдирган: "Президентим, илтимос, уни яхши жойда сақланг". "Албатта", - ишонтирди уни Эрдўғон.
Ўзбекистон мусулмонлари идораси матбуот хизмати
Шаъбоннинг сўнгги ярми
Абу Ҳурайра розияллоҳу анҳудан ривоят қилинади: «Набий соллаллоҳу алайҳи васаллам:
«Рамазон олдидан бир-икки кун олдин рўза тутманглар. Магар бир киши бирор рўза тутиб юрган бўлса, ўшани тутсин», дедилар». Бешовлари ривоят қилганлар.
«Сунан» эгаларининг ривоятида: «Шаъбон ярмига етганда, рўза тутманглар», дейилган.
Шарҳ: Аҳли китоб бўлмиш кофир қавмлар ўзларига фарз қилинган рўзанинг қайси кун бошланишига шубҳа қилиб, бир-икки кун олдин тутишар, оқибатда нафл ибодат билан фарз ибодатни аралаштириб юборишар эди.
Исломда эса иккиланишга, нафл ва фарзларни аралаштириб юборишга рухсат йўқ. Мусулмонлар ҳар бир ибодатни жазм билан, азму қарор билан нафлни нафл ўрнида, фарзни фарз ўрнида адо этишлари лозим.
Шунинг учун ҳам Пайғамбаримиз соллаллоҳу алайҳи васаллам Рамазон киришидан олдин бир-икки кун қолганда рўза тутишдан қайтарганлар.
Аммо бир одам маълум кунларда, мисол учун, душанба ва пайшанба кунларда нафл рўза тутиб юришга одатланган бўлса-ю, ўша кун Рамазондан олдинги кунларга тўғри келиб қолса, тутса бўлаверади.
Шунингдек, баъзи бир кишилар назр рўза ният қилиб қўйган бўлсалар-у, ўша назр рўзани тутишлари Рамазондан бир-икки кун олдинги кунларга тўғри келиб қолса, улар ҳам тутсалар бўлаверади.
Юқорида зикр этилган сабабларга ҳамда Пайғамбаримиз соллаллоҳу алайҳи васалламнинг «Шаъбон ярмига етганда, рўза тутманглар», деган ҳадисларига биноан, Шаъбон ойининг ўн олтинчи кунидан бошлаб, то Рамазони шариф киргунча нафл рўза тутиш макруҳ бўлади.
Ушбу тафсилотларни яхши тушунмаслик оқибатида Одамлар ичида Шаъбон ойида рўза тутиб бўлмас экан, деган тушунча юзага келган. Аслида эса гап Шаъбон ойининг иккинчи ярмида эканлигини билиб олдик. Шаъбон ойининг аввалида рўза тутиш масаласини эса келгуси ҳадисларни ўрганиш жараёнида билиб оламиз, иншааллоҳ.
«Ҳадис ва ҳаёт» китобидан
IV Халқаро Қуръони карим мусобақаси ғолибларига 1,5 миллион риял (412 минг доллор) берилади
“Катара” маданият муассасаси “Қурони каримни ўз овозинг билан зийнатла” шиори остида ўтказилаётган IV Халқаро Қуръони карим мусобақасининг якуний саралаш босқичида қатнашиш ҳуқуқини 2004 нафар қори ичидан 100 нафари қўлга киритганини маълум қилди.
IV Халқаро Қуръони карим мусобақасининг якуний саралаш танлови Рамазон ойида Доха шаҳрининг Ислом оламидаги маданият пойтахти мақомига сазовор бўлгани муносабати билан ташкил этиладиган тантаналар билан бир вақтда ўтказилади.
“Катара” маданият муассасаси Бош директори Холид бин Иброҳим ал-Сулаити бундай деди: “Қуръони каримни ёддан ўқиб бериш бўйича “Катара” мукофоти ташкил этилган 2017 йилдан бошлаб 4 йил ичида Ислом дунёсида катта қизиқиш уйғотмоқда. Мукофот ҳайъати тўртинчи даврада қатнашиш учун 62 давлатга таклифномалар жўнатган.
Маълумот учун: номзодлар 2019 йил 1 октябрдан 2020 йил 31 январгача ўзаро рақобатлашди, унда 14 та араб давлатидан 70 нафар ва 20 та хориж давлатидан 30 нафар, жами 100 нафар иштирокчи якуний саралаш мусобақасида қатнашади.
“Катара” мукофоти ҳайъати мусобақадаги бўлажак ғолиблар учун бир ярим миллион риял (412 минг доллор) ажратди. Унга кўра биринчи ўрин 500 минг риял (137 минг доллор), иккинчи ўрин 400 минг риял (110 минг доллор), учинчи ўрин 300 минг риял (82 минг доллор), тўртинчи ўрин 200 минг риёл (55 минг доллор) ва бешинчи ўрин соҳиби эса 100 минг риал (27 минг доллор) миқдоридаги пул мукофотига сазовор бўлади.
Ўзбекистон мусулмонлари идора
Халқаро алоқалар бўлими
Онлайн: Муфтий Усмонхон Алимов ҳазратлари "Доруссалом" жоме масжидининг янги биноси очилиш маросимида қатнашмоқдалар
Бугун, 8 апрель куни пойтахтимизнинг Шайхонтоҳур туманидаги "Доруссалом" жоме масжиди янги биносининг очилиш маросими бўлиб ўтмоқда.
Тадбирда Ўзбекистон мусулмонлари идораси раиси, муфтий Усмонхон Алимов ҳазратлари бошчилигидаги уламолар, мутасадди вакиллар ва намозхонлар иштирок этмоқдалар.
Маросим тафсилотларини сайт ва ижтимоий тармоқдаги саҳифаларимиз орқали кузатиб боринг.
Ўзбекистон мусулмонлари идораси матбуот хизмати
Даврий нашрларда: Савоби йўққа чиқмасин!
Халқимиз саховатли, эҳтиёжманд кишиларга ёрдам беришга доимо шай. Юртдошларимиз орасида савоб ишлар қилиб, одамларга, элга нафи тегишини ҳаётининг мазмунига айлантирган солиҳлар кўп. Бироқ орамизда яхшиликларини миннат қилиб, савоб амалларини йўққа чиқарувчилар ҳам учраб туради.
Миннат туфайли қилган эзгу амалларимизга соя тушади, саховатимизга путур етади. Бу ҳақда Аллоҳ таоло Қуръони каримда бундай дейди: «Остидан анҳорлар оқиб турадиган, хурмою узумлари бор, турли хил мевалари мўл боғ эгаси кексайиб, нотавон (ёш) болалари билан қолган пайтида ўша боғини оловли тўфон уриб, ёниб кетишини хоҳлайдими?! Тафаккур қилурсиз деб, Аллоҳ Ўз оятларини сизларга шундай баён қилади» (Бақара сураси, 266-оят).
Оятда Аллоҳ йўлида қилинган хайрли ишлар, савоб амаллар мевазор боққа қиёсланиб, ўтли бўрон боғни куйдирганидек, садақа ва саховат кетидан қилинган миннат солиҳ амалларни йўққа чиқариши айтилган. Демак, мўмин киши, “мен сенга фалон яхшиликни қилган эдим, лекин сен билмадинг”, деб ҳеч қачон миннат қилмаслиги керак. Аввало, яхшилик биров билиши учун қилинмаслигини теранроқ англаш зарур. Зеро, “Яхшилик қил – дарёга ташла, балиқ билади, балиқ билмаса – Холиқ”, “Ўнг қўлинг берганини чап қўлинг билмасин” каби ҳикматли гаплар бежиз айтилмаган.
Миннат яхшилигимиздан манфаат кўрган кишига салбий таъсир кўрсатади. Кўнгли ўксийди, қаттиқ ранжийди. Бобомиз Алишер Навоий “Маҳбубул қулуб” асарида бундай кишиларнинг кўнглидан нималар кечишини гўзал тарзда баён қилган:
Бу бедод аҳлидин гар жон бериб махлас эрур мумкин,
Қилиб жонни фидо, биллаҳки, миннат қўйғамен жонға.
Яъни, мутафаккир шоир миннат қилувчи кимсаларни золимга тенглайди. Улардан ҳатто жонини бериш эвазига халос бўлиш мумкин бўлса ҳам, бунга бажонидил тайёр эканини айтади.
Миннат барча хайрли амалларимизни ювиб кетар экан, бунга доимо эътиборли бўлайлик. Беш кунлик дунёда билиб-билмай бировнинг кўнглини оғритиб қўйишдан ўзимизни тияйлик. Яхшилигимизни пеш қилиб, Яратганга гуноҳкор бўлмайлик.
Каримқул МАВЛОНОВ,
Бекобод тумани
Мақолалар
