muslim.uz

muslim.uz

Понедельник, 01 Ноябрь 2021 00:00

Илоҳий таърифлар, аломатлар ва белгилар

  1. Тақводор кишиларга берилган таърифлар, уларнинг аломатлари ва алоҳида белгилари.

Бу дунё даъволар дунёси. Дунёда яшаб турган ҳар бир инсоннинг ўз даъвоси бор. Кимдир яхши одам эканлигини даъво қилади. Яна кимдир эса самимийликни, кимдир саҳийликни ёки соддаликни, яна кимдир эса тақводорликни даъво қилади.

Лекин, бу даъволарнинг аксари ушбу жамиятда яшаб турган, даъво қилаётган кишини яхши танийдиган солиҳ одамлар тарафидан эътироф этилмайди. Балки, аксар даъволар бошқалар тарафидан инкор қилинади. Чунки, дунёда савиялар, билимлар ва дунёқарашлар ҳар хил. Кимдир даъво қилган, ўзига нисбат берган сифатни бошқалар инкор қилиши мумкин. Ёки бир кишига бошқа бир киши тарафидан берилган таърифлар бошқа бир кишилар томонидан эътироф қилинмаслиги ҳам мумкин. Чунки, бу меъзонларнинг барчаси инсоният томонидан ўрнатилган меъзонлардир. Ҳар ким ақлига, илмига ва савиясига қараб ўз меъзонини яратиб олиши мумкин.

Бироқ, дунёда шундай меъзон борки, уни ҳеч бир мусулмон инкор қилолмайди. Кишиларга берилган таърифлар, уларни ўзгаларга танитиб турадиган аломатлари баён қилинган бир китоб борки, у китобни нозил қилган Зот, барча махлуқотларнинг Роббиси Аллоҳ таолодир.

Роббимиз Ўзининг Каломи орқали мусулмон кишига  илоҳий меъзонни ўрнатиб берди. Ўз бандаларини таърифлади. Аломатларини, белгиларини баён қилди. Ушбу таърифларни, аломат ва белгиларни ёлғонга чиқаришга эса ҳеч бир мусулмон журъат қилолмайди.

Қуйида биз Қуръони каримда зикри келган кишилар, уларга берилган таърифлар ва у кишиларни бошқа инсонлардан ажратиб турадиган белгиларини ўрганиб чиқамиз. Мақсадимиз, кимнидир таърифламоқчи бўлганда, ўз нафсимизга ёки бошқаларга баҳо бермоқчи бўлганда, кишиларнинг қадрини ўлчашда,  Роббимиз ўрнатиб берган меъзондан фойдаланишдир.

Аллоҳ таоло айтади: “Ушбу (илоҳий) Китоб (Қуръон) шубҳадан холи ва (у шундай) тақводорлар учун ҳидоят (манбаи)дирким, 3. улар ғойиб (диний хабарлар)га имон келтирадиган, намозни мукаммал ўқийдиган ва Биз ризқ қилиб берган нарсалардан (садақа ва) эҳсон қиладиганлардир. 4. Яна, улар Сиз (Муҳаммад)га ва Сиздан илгари (ўтган пайқамбарларга) нозил қилинган нарса (илоҳий китоблар)га имон келтирадиган ҳамда охират (қиёмат)га қатъий ишонч ҳосил қиладиганлардир. 5. Айнан улар Парвардигорлари томонидан (ато этилган) ҳидоят узрадирлар ва айнан улар нажот топувчилардир”.  (Бақара сураси 2-3—оятлар)

Айтинг (эй Муҳаммад): «Сизларга булардан яхшироқ нарса ҳақида хабар берайми? Тақводор кишилар учун Парвардигорлари ҳузурида улар абадий қоладиган, тагларидан дарёлар оқиб тургувчи боғлар, покиза жуфтлар ва Аллоҳнинг ризолиги бор. Улар: «Парвардигоро, бизлар сенга иймон келтирганмиз, бас, гуноҳларимизни мағфират айла ва бизни жаҳаннам азобидан асра!» — дейдиган, сабр-қаноатли, иймонларига содиқ, ибодат-итоатли, инфоқ-эҳсонли бўлган ва саҳарларда Аллоҳдан мағфират тилайдиганлардир. (Оли имрон сураси 15-16-17-оятлар)

(У тақводор зотлар) яхши-ёмон кунларда инфоқ-эҳсон қиладиган, ғазабларини ичларига ютадиган, одамларнинг (хато-камчиликларини) афв этадиган кишилардир. Аллоҳ бундай яхшилик қилувчиларни севади. (У тақводор зотлар) қачон бирон-бир нолойиқ иш қилиб қўйсалар ёки (қандайдир гуноҳ иш қилиш билан) ўзларига зулм қилсалар, дарҳол Аллоҳни эслаб, гуноҳларини мағфират қилишни сўрайдиган. — Ҳар қандай гуноҳни ёлғиз Аллоҳгина мағфират қилур, — билган ҳолларида қилган гуноҳларида давом этмайдиган кишилардир.  (Оли имрон сураси 134-135  -оятлар)

Демак, ҳақиқий тақводор киши:

 1.  Ғайбга иймон келтиради.
 2.  Намозни мукаммал адо этади.
 3.  Инфоқ ва эҳсон беради.
 4.  Барча пайғамбарларга иймон келтиради.
 5.  Барча илоҳий китобларга иймон келтиради.
 6.  Қиёмат кунига қатъий ишонади.
 7.  Гуноҳлари учун истиғфор айтиб кечирим сўрайди.
 8.  Жаҳаннам азобидан паноҳ сўрайди.
 9.  Сабр қаноатли бўлади.
 11. Иймонига содиқ бўлади.
 12. Роббисига ибодатли ва итоатли бўлади.
 13. Саҳарларда истиғфор айтади.
 14. Ғазабини ичга ютади.
 15. Кишиларнинг хато ва кмчилигини кечиради.
 16. Гуноҳ иш қилиб қўйганда дарҳол тавба қилиб, истиғфор айтади.
 17. Гуноҳ ишларда бардавом бўлмайди.

Хулоса:

Тақводорликнинг белгилари ушбу оятларда зикр қилинган сифатлардир. Юздаги соқол, бошдаги салла, эгнида турган чопон ёки қўлидаги тасбеҳи кишининг тақводор эканлигини билдирмайди. Бу кўриниш ёлғончи бўлиши ҳам мумкин. Тақвонинг жойи эса қалбда бўлади. Кимки, ушбу меъзонга тушмас экан, айтаётгани қуруқ даъво холос. “Қуруқ қошиқ оғиз йиртади”, деганларидек, қуруқ даъво ҳам фақатгина надомат келтиради холос.

Аллоҳ таоло барчамизни ҳақиқий тақводорлардан қилсин.

 

Тошкент шаҳар, Олмазор туманидаги

“Мевазор” жоме масжиди имом ноиби:                       Исломов Ёрбек

Туркия Республикаси Президенти Aдминстрацияси ҳузуридаги Диёнат ишлари бошқармаси Доктор Али Эрбош жаноблари муфтий Нуриддин домла Холиқназаров ҳазратларига табрик йўллади. Унда жумладан шундай дейилади:
– Ўзбекистон мусулмонлари идораси раиси, муфтий вазифаси Сизга топширилганинг хабарини чексиз мамнуният ила эшитдим. Сизнинг бу муборак вазифага келишингиздан бошимиз кўкка етди.
Фурсатдан фойдаланиб, ўзбекистонлик мўмин-мусулмон қардошларимизга кўрсатиладиган руҳий-маънавий хизматларда Туркия диёнат ишлари бошқармаси сифатида доимо Ўзбекистон мусулмонлари идораси билан елкадош эканимизни, идораларимиз ўртасида кўп йиллик дўстона, самимий, қардошликка хос алоқаларимизнинг янада кенг миқёсда давом этишига бўлган ишончимизни изҳор этаман.
Сизни бундай муҳим ва шарафли мақомга сайланганингиз муносабати ила яна бир бор табриклаб, идораларимиз ўртасидаги алоқаларнинг кучайтирилиши, диний соҳада биргаликда амалга оширишимиз мумкин бўлган режалар борасида фикр алмашиш ҳамда икки томонлама ҳамкорликни муҳокама қилиш мақсадида, Сиз ва сизга ҳамроҳлик этадиган делегацияни энг қисқа фурсатда Туркия давлатида кутиб олишдан ғоятда мамнун бўлишимизни маълум қиламан.

Энг самимий салом ва ҳурматлар ила.

Доктор Али ЭРБОШ,
Туркия Республикаси Президент Aдминстрацияси ҳузуридаги
Диёнат ишлари бошқармаси раҳбари

Ўзбекистон мусулмонлари идорасининг muslim.uz сайтида “Муфтий минбари” номли янги рукн ташкил этилди. Ушбу рукнда муфтий Нуриддин домла Холиқназаров ҳазратларининг жума мавъизалари, файзли суҳбатлари, онлайн чиқишлари, таҳлилий мақола ва таъсирли аудио маърузалари эълон қилиб борилади.
Азиз мухлисларимизнинг руҳий тарбиясини сайқаллайдиган, мўмин-мусулмонларни маънавий комиллик бошлайдиган, имону ихлосларини мустаҳкамлайдиган Муфтий ҳазратларининг панду насиҳатларини ушбу янги очилган рукн орқали танишиб боришларини тавсия этамиз.
Қуйида муфтий Нуриддин домла Холиқназаров ҳазратларининг биринчи жума суҳбатларидан бахраманд бўлишни таклиф этамиз.

Ўзбекистон мусулмонлари идораси раиси, муфтий Нуриддин домла Холиқназаров ҳазратларининг биринчи жума суҳбатлари

 


Ўзбекистон мусулмонлари идораси Матбуот хизмати

28 октябрь куни Ўзбекистон мусулмонлари идораси раиси, муфтий Нуриддин домла Холиқназаров ҳазратлари “Шамсуддинхон Бобохонов” нашриёт-матбаа ижодий уйи фаолияти билан яқиндан танишдилар.
Ташриф аввалида мўмин-мусулмонларнинг диний адабиётларга бўлган талаби, олий ва ўрта махсус ислом билим юртлари талабаларининг дарсликларга бўлган эҳтиёжини қондириш мақсадида, “Мовароуннаҳр” нашриёти негизида “Шамсуддинхон Бобохонов” нашриёт-матбаа ижодий уйи ташкил этилгани ҳақида маълумот берилди.
Нашриёт ижодий ходимлари билан танишиш асносида муфтий ҳазратлари қалам аҳлининг хайрли ишларига, мўмин-мусулмонларга зиё тарқатиш йўлидаги хизматларида муваффақиятлар тиладилар. Дарҳақиқат, Ислом таълимотини кенг ёйиш, нашрларни халқимизга етказишда ижод аҳлининг катта ўрни бор. Халқ манфаати, дин ғами ва Ватан тақдирини юрагидан ўтказиб ишлайдиган ижод аҳлининг ибратли фаолияти таҳсинга лойиқдир.
Муфтий ҳазратлари босмахона фаолияти билан танишар эканлар 60 минг нусхада чоп этилаётган “Никоҳнома” китобини кўздан кечириб, шундай дедилар: “Бугун турмуш қуриш остонасида турган ёш келин-куёв “Никоҳнома” китобини ўқиб, оила ва никоҳнинг муқаддас эканини, бу борада динимизнинг аҳкомларини ўзлаштириб олиши учун яхши манба бўлади. Бу китоб келин-куёвнинг никоҳи ўқилаётган-да тақдим этилиши эса мақтовга сазовордир”.
Шунингдек, босмахонада айни дамда “Қуръони карим шафоати”, “Мен ҳам тафаккур қиламан” каби рисолаларнинг чоп этиш жараёни ва тайёр маҳсулотлар билан танишган муфтий ҳазратлари уларнинг сифатига юқори баҳо бердилар. Халқимизга севимли бўлган “Ҳидоят”, “Мўминалар” журналлари ва “Ислом нури” газетаси ҳам ушбу жойда чоп этилаётгани барчани мамнун этди.
Таъкидлаш жоизки, “Шамсуддинхон Бобохонов” нашриёт-матбаа ижодий уйи қисқа фурсат ичида яхши натижаларга эришди, олий ва ўрта махсус ислом билим юртлари ҳамда масжидлар имом-хатибларини моддий қўллаб-қувватлаш ишига ҳам муносиб ҳисса қўшиб келмоқда.
Нашриёт ва босмахона билан яқиндан танишган муфтий ҳазратлари ташкилот фаолиятини такомиллаштириш ва диний адабиётлар чоп этишни юқори даражага олиб чиқиш юзасидан тавсияларни бердилар.
Хулоса ўрнида айтиш мумкинки, Давлатимиз раҳбари ташаббуслари ила китобхонлик маданияти ва китоб тарғиботига ислоҳотларнинг ажралмас қисми сифатида катта эътибор қаратилаётгани мана шундай эзгу ишларга йўл очмоқда.

 

Ўзбекистон мусулмонлари идораси Матбуот хизмати

Страница 7 из 1744

Мақолалар

Top