Ўзбекистон Республикаси Президенти Шавкат Мирзиёев раислигида кеча, 10 октябрь куни мудофаа қурилиши ва Ўзбекистон Республикаси Қуролли Кучларини ривожлантириш масалаларига бағишланган хизмат йиғилиши бўлиб ўтди.

Йиғилишда қўшинларнинг жанговар шайлиги ва жанговар қобилиятини янада ошириш, уларни замонавий қурол-яроғ ва ҳарбий техника билан таъминлаш, мавжуд қурол-яроғ намуналарини модернизация қилиш, минтақа ва дунё мамлакатлари билан ҳарбий ва ҳарбий-техник ҳамкорликни фаоллаштириш, ҳарбий шаҳарчалар инфратузилма объектларини, қўшинларнинг техник ва фронт орти таъминоти тизимларини ривожлантириш, шунингдек, ҳарбий хизматчилар, уларнинг оила аъзолари ва Қуролли Кучлар фахрийларини ижтимоий муҳофаза қилиш масалалари муҳокама қилинди.

Ҳарбий округ қўмондонликларининг ҳарбий-маъмурий секторлар раҳбарияти билан ёшларни ҳарбий-ватанпарварлик руҳида тарбиялаш, қўшинларнинг кундалик самарали фаолиятини ташкил этишда қўшилма ва қисмлар командирларига кўмаклашиш, ҳарбий хизматчиларнинг ижтимоий ҳимоясини кучайтириш борасидаги ҳамкорлик фаолиятининг оралиқ якунлари ҳам кўриб чиқилди.

Мудофаа вазирлиги масъул мансабдор шахсларининг қўшинларнинг самарали жанговар ва маънавий-маърифий тайёргарлигини ошириш, бошқарув органлари, бирлашмалар, қўшилма ва қисмлар, олий ҳарбий таълим муассасалари, шунингдек, маҳаллий ҳарбий бошқарув органлари томонидан амалга оширилган ишлар тўғрисидаги маърузалари тингланди.

Мудофаа вазирлигининг ахборотига кўра, ҳисобот даврида жами 120 дан ортиқ тезкор-жанговар тайёргарлик тадбирлари ўтказилган, уларда тегишли вазирлик ва идораларнинг 15 мингдан зиёд ҳарбий хизматчилари, шунингдек, давлат ва хўжалик бошқаруви, маҳаллий давлат ҳокимияти органлари вакиллари иштирок этган.

Амалга оширилган ишлар натижасида ҳарбий округларнинг жанговар имкониятлари сезиларли даражада кенгайди, доимий шай ҳолатдаги ва махсус топшириқли мутлақо янги бўлинмалар тузилди. Кўрилган чора-тадбирлар туфайли қўшинларнинг жанговар тайёргарлик самарадорлиги ошди, бўлинмалар жанговар шайлигининг вақтга доир кўрсаткичлари икки баробар қисқартирилди, шахсий таркибнинг профессионаллик даражаси юксалди.

Қисқа муддатда хорижнинг илғор технологиялари ва замонавий ўқув воситаларини ўзида мужассам этган янгиланган Қуролли Кучлар академияси ташкил этилди.

Хизмат йиғилиши якунлари бўйича Президентимиз томонидан Қуролли Кучлар фаолиятини янада такомиллаштириш ва умуман мамлакат мудофаа қобилиятини юксалтиришнинг устувор йўналиш ва вазифалари белгилаб берилди. Қуролли Кучларни янада ислоҳ қилиш бўйича тегишли қарорлар қабул қилинди.

ЎМИ Матбуот хизмати

Туркиядаги қадимий музейлардан бирида изланиш олиб бораётган Термиз давлат университетининг илмий тадқиқотчиси Жўрабек Чўтматов буюк мутаффаккир Абу Абдуллоҳ Муҳаммад ибн Али ибн ал-Ҳасан ибн Башир ал-Ҳаким ат-Термизийнинг бугунгача “мафқуд”, яъни “йўқолган” деб келинган асарини топди. Асар Қуръондаги Фотиҳа ва Бақара сурасининг шарҳига бағишланган. Бу ҳақда Turon24 нашри хабар берди.

Топилган янги қўлёзма Мовароуннаҳрда Қуръон шарҳига бағишланган илк асар сифатида баҳоланмоқда. Ҳозирда мазкур асарни дунё тадқиқотчилари эътиборига ҳавола этиш учун араб тилида чоп этиш ишлари бошланган. Сўнгра ўзбек тилида нашрга тайёрланади.

Мисрлик олим шайх Абдулфаттоҳ Абдуллоҳ Бараканинг таъкидлашича, Термизий тўрт юздан ортиқ китоб ёзган бўлиб, улардан олтмишга яқини бизгача етиб келган. Алломанинг асарлари Париж, Қоҳира, Дамашқ, Искандария, Истанбул ва Лондон каби шаҳарлардаги қўлёзмалар жамғармаларида сақланади.

Тарих фанлари номзоди Жалолиддин Мирзаевга кўра, Ал-Ҳаким ат-Термизий юртимизда тасаввуф ва тафсир илмининг ривожланишини бошлаб берган қомусий олим саналади. Алломанинг Термиз шаҳри яқинида жойлашган мақбараси устида ўрнатилган қабртошдаги битикларда унинг вафот этган санаси ҳижрий 255 (милодий 869) деб ёзилган. Мутафаккир олимнинг 120 йил умр кўргани эътиборга олинса, аллома саккизинчи асрнинг ўрталарида (тахминан 750-760 йиллар оралиғида) таваллуд топган.

ЎМИ Матбуот хизмати

ЎМИ Матбуот хизмати

ЎМИ Матбуот хизмати