muslim.uz
Абитуриентлар учун яратилган имкониятдан фойдаланинг
Юртимизда сўнги йилларда миллий-диний қадриятларимизга бўлган эътибор янада кучайтирилиб, ислом дини равнақи йўлида улкан ислоҳотлар амалга оширилмоқда, буюк аждодларимизнинг бой илмий-маърифий асарларини ўрганишга кенг имкониятлар яратилмоқда.
Жумладан, олий маълумот оламан, ўз устимда ишлаб, илмли бўламан, деган, юрагида ўти бор, жўшқин ёшларимизнинг таҳсил олиши учун барча қулайликлар яратиб берилмоқда.
Давлатимиз раҳбари томонидан ислом дини ва ҳадис илми ривожига беқиёс ҳисса қўшган буюк аждодларимизнинг бой меросини чуқур ўрганиш, улар томонидан асос солган ҳадис мактаблари фаолиятини қайта тиклаш ва ривожлантириш, ҳадис ва унга доир илмларни чуқур ўзлаштирган етук мутахассисларни тайёрлаш мақсадида 2018 йил Самарқанд вилоятида Ҳадис илми мактаби олий диний таълим муассасаси шаклида ташкил этилди.
Маълумки, жорий йилнинг 20 июнидан qabul.muslim.uz расмий сайти орқали Ўзбекистон мусулмонлари идораси тасарруфидаги олий ва ўрта махсус ислом таълим муассасаларига 2020-2021 ўқув йили учун абитуриентларнинг ҳужжатларини онлайн қабул қилиш жараёнлари бошланди.
Ҳадис илми мактабига абитуриентларнинг ҳужжатлари онлайн тарзда қабул қилиш жорий йилнинг 20 июнидан 10 июлига қадар (шу куни ҳам) давом этмоқда.
Мактабнинг жорий йилдаги қабул имтиҳонлари ўтган йилги тажриба асосида, карантин тартибидан келиб чиқиб, жорий йилнинг 15 июлига қадар ўтказилиши режалаштиримоқда.
Қабул имтиҳонлари натижалари имтиҳон жараёнлари ўтганидан сўнг тезда эълон қилинишини инобатга олиб, Мактаб абитуриентлари имтиҳон натижаларидан келиб чиқиб, кириш учун етарли балл тўплай олмаган тақдирда ҳам, улар қабул имтиҳонларига қатнашиш орқали имтиҳон жараёнлари бўйича тажриба ҳосил қиладилар. Бундан ташқари 20 июлга қадар бошқа олий диний таълим муассасасига ҳужжат топшириб, қайта имтиҳон жараёнларига иштирок этиш имкониятига эга бўлишади.
Ҳадис илми мактаби қабул имтиҳонларида мувофақиятли ўтган абитуриентлар юртимиз ва жаҳонда ўз ўрни ва нуфузига эга бўлиб бораётган Мактабнинг талабаси деган шарафли номга эришишлиги билан бирга, муҳаддислар султони Имом Бухорий ҳазратларининг мақбаралари ёнида миллий ва замонавий услубда барпо этилган олий даргоҳда хорижий ва маҳаллий етук малакали ўқитувчилар орқали бошқа олий диний таълим муассасаларининг ўқув режасидаги барча мутахассислик фанларини тўлиқ ўзлаштиришлари билан бирга, сиҳоҳи ситта (ислом оламида эътироф этилган олтита ишончли ҳадис тўпламлари) ҳадис тўпламларидаги ҳадисларни мўътабар шарҳлари билан тўлиқ ўрганиш бахтига мушарраф бўлишади.
Шунингдек, Ҳадис илми мактабида ислом илмлари ривожида ўз ўрнига эга буюк аждодларимизга муносиб авлодлар етиштириб чиқариш учун замонавий компьютер техникалари билан жиҳозланган ўқув аудиториялари, Миср Араб Республикасидан келтирилган асосий ва қўшимча ўқув адабиётларига эга Ахборот-ресурс маркази, ёпиқ сув ҳавзаси ва спорт зали, шинам талабалар турар жойи ва замонавий ошхонага каби кулай шароитларга эга бинода таҳсил олиш имкониятига эга бўладилар.
Бир сўз билан айтганда, давлатимиз раҳбари томонидан ташкил этилган Ҳадис илми мактаби улуғ алломаларимизга бўлган эътибор ва эҳтиром рамзи ўлароқ, уларга муносиб авлодларни етиштириб чиқариш сари қўйилган муҳим ташаббусдир.
Ҳадис илми мактабига қабул тўғрисидаги тўлиқ маълумотни www.hadith.uz сайтидан олишингиз мумкин.
Ўзбекистон халқаро ислом академиясида янги ва замонавий йўналиш очилди!
Ўзбекистон халқаро ислом академиясида замон талаблари эҳтиёжидан келиб чиққан ҳолда янги — “Ахборот хавфсизлигини бошқариш” мутахассислик йўналиши очилди(!).
Зарурат. Бугун ҳаётимиз ва бутун иш фаолиятимизни ахборот-коммуникация технологияларисиз тасаввур қилиш қийин. Юқори технологияларнинг жадал ривожланиши мавжуд ахборотдан самарали ва ўрнида фойдаланиш баробарида нотўғри ва хато хабарни саралашни ўрганиш ҳамда фойдаланувчини кибер таҳдидларнинг ҳар қандай кўринишидан ҳимоя қилишни ҳам тақозо этмоқда.
Мақсад. Шу нуқтаи назардан, Ўзбекистон халқаро ислом академиясида тайёрланадиган Ахборот хавфсизлигини бошқариш йўналиши битирувчиси — ахборот маконида юзага келиши мумкин бўлган таҳдидлар — технологик, иқтисодий, сиёсий, ижтимоий, мафкуравий, диний ва ҳоказо. бошқаришда зарур билим ва тажрибага эга мутахассис бўлиши кутилмоқда. Шунингдек, у ҳар қандай ташкилотнинг ижобий Имижини яратиш (PR технология), жамоатчилик билан алоқаларини мустаҳкамлаш ҳамда фаолият самарадорлигини таъминлашда ахборот ва зарур маълумотларни таҳлил этадиган кадр ҳисобланади.
Билим ва кўникма. Мазкур мутахассисликда таълим олишда талаба ахборот тизимлари, ресурслар ва дастурий таъминот яратиш, электрон тизимларнинг заиф жойларини аниқлаш ва назорат қилиш, ахборот хавфсизлигига доир кенг билим ва малакани эгаллайди.
Иш ўрни. Шу боис академиянинг мазкур мутахасислик йўналиши битирувчиси давлат ва жамият бошқаруви ҳамда халқ хўжалигининг барча соҳа ва тармоқлари фаолиятида энг эҳтиёж юқори бўлган мутахассис-кадр бўлиши шубҳасиз.
Таклиф. Ахборот-коммуникация технологиялари ҳамда ижтимоий-сиёсий, диний-маърифий билимлар ва хорижий тилларни ўрганишга қизиқувчи абитуриентларни мазкур янги йўналишга ҳужжат топширишга таклиф этамиз.
Имконият. 2020-2021 ўқув йилида давлат буюртмаси асосида ўқишга қабул қилиш параметрларига кўра “Ахборот хавфсизлигини бошқариш” мутахассислик йўналишига жами 25 нафар талаба қабул қилиниши назарда тутилмоқда. Шундан 12 нафар талаба давлат гранти асосида таълим олиш имкониятига эга бўлади.
Шошилинг!
Ўзбекистон халқаро ислом академияси
Матбуот хизмати
Манба: http://iiau.uz
Ўзбекистон мусулмонлари идораси раиси, муфтий Усмонхон АЛИМОВ ҳазратларининг Матбуот ва оммавий ахборот воситалари ходимларига байрам табриклари
Ассалому алайкум ва раҳматуллоҳи ва барокатуҳу!
Ҳурматли фидокор ва жонкуяр ижодкорлар!
Аллоҳ таолога чексиз ҳамду саноларимиз, Ҳазрати Пайғамбаримиз Муҳаммад мустафо соллаллоҳу алайҳи васалламга беҳисоб саловоту саломларимиз бўлсин.
Сиз азизларни “27 июнь – Матбуот ва оммавий ахборот воситалари ходимлари куни” муносабати билан чин қалбимдан самимий муборакбод этаман.
Муҳтарам Президентимизнинг шахсий ташаббуслари билан аксарият соҳалар каби оммавий ахборот воситалари фаолиятида ҳам эътирофга лойиқ янгиликлар, ўзгаришлар ва юксалишлар жорий этилди.
Куни кеча эълон қилинган муҳтарам Юртбошимизнинг Матбуот ва оммавий ахборот воситалари ходимларига йўллаган табрикларида: “Жаҳон миқёсида юз берган пандемия туфайли вужудга келган бугунги мураккаб вазият ва қийинчиликларга қарамасдан, аҳолига тезкор ва ишончли ахборот етказиб бериш, мамлакатимизда амалга оширилаётган демократик ислоҳотларни атрофлича акс эттириш йўлида ўз профессионал бурчини сидқидилдан адо этиб келаётган сиз, журналистлар аҳлига чуқур миннатдорчилик билдираман, деган илҳомбахш сўзлар барча ижод аҳли чексиз мамнун этди.
Ўз навбатида биз дин пешволари ҳам ушбу фидойи, мураккаб, масъулиятли ва олижаноб касб вакилларини шарафлаймиз. Бу касб байрами сўнгги йилларда янгича мазмун касб этди. Муҳтарам Президентимизнинг кучли иродаси, унинг халқ билан мулоқотни йўлга қўйиш, сўз ва ахборот эркинлигини таъминлашдаги тинимсиз ташаббуслари натижасида ташкилот ва муассасаларнинг очиқлиги ва шаффофлиги таъминланмоқда.
Ишонч билан айтиш мумкинки, журналистлар ва блогерлар мамлакат ҳаётининг ажралмас қисмига айланди, аҳоли орасида уларнинг нуфузи ошди. Бу эса уларнинг халқимиз ҳурмати ва эҳтиромига сазовор бўлаётганидан дарак беради. Бу ҳолат ҳеч кимга хотиржамликка берилишга йўл қўймаяпти, доим воқеа-ҳодисалардан хабардор бўлишни ва мутасаддиларга эса жамият олдидаги вазифаларини мунтазам эслатиб турибди.
Аллоҳ таолога шукрки, муборак динимизни кенг ёйиш, диний-маърифий ишларни халқимизга тўлақонли етказишда ижод аҳлининг жуда ҳам катта ўрни бор, албатта.
Мўмин-мусулмонлар манфаати, дин ғами ва Ватан тақдирини юрагидан ўтказиб ишлайдиган Сиз каби ижод аҳлининг даъваткор сўзи, ибратли фаолияти жуда ҳам таҳсинга лойиқдир. Зеро, Қуръони азимуш-шаънда шундай марҳамат қилинади:
«Эй Муҳаммад, Раббингиз йўли-динига ҳикмат ва чиройли насиҳат билан даъват қилинг! Улар билан энг гўзал услубда мунозара қилинг! Албатта, Парвардигорингизнинг ўзи Унинг йўлидан чалғиган кимсаларни яхши билувчи ва ҳидоят топганларни ҳам У билувчироқдир» (Наҳл, 125).
Шунинг учун ижод аҳлини Аллоҳ таолонинг мана шундай хитобига амал қилган ҳолда эзгуликни ёйиш, илму маърифатни тарқатишда энг гўзал услубни танлаган ҳолда имкониятлардан унумли фойдаланиш лозимдир.
Ҳазрати Алишер Навоий бобомиз “Муҳокаматул-луғатайн” асарида қуйидаги мисраларни келтиради:
Чу мен назм аро тортиб алам,
Айладим ул мамлакатни якқалам.
Олиб мен тахти фармонимға осон,
Черик чекмай Хитодин то Хуросон.
Яъни, Ҳазрати Навоий назм ила мамлакатни якдил қилдим, Хитойдан то Хуросонгача бўлган ҳудудни қўшинсиз эгалладим, деган мазмунни ифода этганлар.
Марҳум шоиримиз Абдулла Орипов шу мисралар таъсирида “Темур тиғи етмаган жойни қалам билан олди Алишер”, деб бежизга қайд қилмаган эдилар.
Демакки, кишиларни ҳамжиҳатликка чақиришда, ҳидоят йўлига бошлашда, илму маърифатини кенг ёйишда ижод аҳлининг панду насиҳати ва мазмунли чиқишларининг ўрни жуда ҳам каттадир.
Ҳурматли ижодкорлар!
Таъкидлаш жоизки, сўнгги йиллар давомида ахборот хизматлари фаолияти такомиллашиб, медиа маконда юзага келаётган чақириқларга тезкорлик билан муносиб жавоб кайтариш ишлари шаклланди.
Мамлакатда амалга оширилаётган ислоҳотлар тўғрисидаги маълумотларни ўз вақтида тақдим этиш, аҳолига тезкор ва тўлиқ ахборот етказиш, очиқлик ва шаффофликни таъминлашда сезиларли натижаларга эришилди.
Жаҳоннинг илғор давлатларида матбуот котиблари аллақачон жуда муҳим шахсларга айланиб улгурган. Жамоатчилик уларнинг баёнотини кутади, уларни излайди ва қадрлайди. Юртимизда ҳам бу йўналишда кўрилаётган чора-тадбирлар натижасида келгусида матбуот котибларимиз том маънода жамиятимиздаги муҳим шахсларга айланишига ишонаман.
Матбуот котибларини янада фаолликка, дадилликка ва тезкорликка чақирган бўлардим. Ушбу касб эгалари энг зарур пайтда, энг зарур ва рост гапни айтиши лозим. Ахборот хизматлари ходимлари нафақат матн ёзишни, балки замонавий медиа усулларидан кенг фойдаланишлари ҳам зарурдир. Шу орқали медиа маконда тўғри маълумотлар етказилиб, нохолис ва нотўғри хабарлар тарқалиши ҳолатлари ўз вақтида бартараф этилади.
Ўз ўрнида айтиш керакки, ижодкорларга муносиб шарт-шароит яратиб берилса, меҳнатларини муносиб тақдирланса, улар эркин ижод қилади, шунда кўзлаган мақсадларга эришилади, инша Аллоҳ.
Ижод аҳли меҳнатини нақадар машаққатли эканини англаган киши сифатида камина, сизларнинг саъй-ҳаракатингизни доимо қўллаб-қувватлайман, сизларни энг асосий таянчим ва энг яқин ёрдамчим деб биламан. Ҳар бир инсоннинг юрак-юрагига кириб борувчи ва ҳаётимизни янада яхшилашга хизмат қилувчи сўзингиз учун сиздан чин дилдан миннатдормиз. Сизларни доимо яхши кўриб қолишимни изҳор қилишдан эса жуда ҳам бахтиёрман. Ўз навбатида Ўзбекистон мусулмонлари идораси барча ижодкорлар билан яқиндан ҳамкорлик қилишга тайёр эканини маълум қиламан.
Имкониятдан фойдаланиб, ўта муҳим ва масъулиятли вазифаларни амалга оширишда барча оммавий ахборот воситалари вакиллари, ахборот соҳасида иш юритаётган жонкуярларимизга сиҳат-саломатлик, куч-ғайрат ҳамда улкан зафарлар тилайман.
Барча ижодкор ходимларни яна бир бор касб байрамлари билан муборакбод этаман.
Қаламингиз ўткир, сўзларингиз равон, чиқишларингиз таъсирчан бўлиб, доимо мўмин-мусулмонларимиз ардоғида бўлинг, барчангизга бахту саодат, ижодий ютуқлар тилайман.
Вассалому алайкум ва раҳматуллоҳи ва барокатуҳу.
Уламоларнинг самимий мулоқоти икки элни янада жипслаштирди
Бугун, 26 июнь куни Қирғизистон мусулмонлари идораси раиси, муфтий Мақсадбек Токтамушев бошчилигидаги Қирғизистон делегациясининг Фарғона вилояти Сўх туманига ташрифи доирасида маҳаллий аҳоли вакиллари билан мулоқотлар ўтказилди.
Меҳмонларга Ўзбекистон мусулмонлари идораси раиси, муфтий Усмонхон Алимов ҳазратлари ва Дин ишлари бўйича қўмита раиси Абдуғофур Аҳмедов ҳамроҳлик қилдилар. Ушбу самимий мулоқотларни маҳаллий аҳоли вакиллари чексиз мамнунлик ва катта олқишлар билан қарши олдилар.
Таъкидлаш жоизки, Фарғона вилояти Сўх тумани тарихи узоқ ўтмишга бориб тақалади. Хусусан, чашма булоғи ҳам шундай. Бу ерда азалдан аҳил-иноқ ва ўзаро тотувликда яшаб келаётган ўзбек, тожик ва қирғиз халқлари шу булоқ сувидан бирдай фойдаланади. Сўнгги вақтлардаги Чашма қишлоғида содир бўлган нохуш воқеада бир қанча одамлар азият чекди. Аллоҳга шукрки, бундай қалтис вазиятга ўз вақтида барҳам берилди. Икки давлат раҳбарлари ҳар қандай масалани музокаралар асосида тинчлик йўли билан ечим топишди.
Муҳтарам Президентимиз ташаббуслари билан ташкил этилган икки давлатнинг чегарадош вилоятлари мутасаддилари мажлисларида бу каби масалаларга эътибор қаратилиб, ҳал этиш йўллари муҳокама қилинди.
Ташкил этилган қўшни мамлакатлар таниқли уламолари ва дин пешволарининг маҳаллий аҳолиси билан бўлган учрашувларида ҳудуддаги барча муаммолар тинч ва муроса йўли билан ҳал этилишини алоҳида таъкидланди. Узоқ йиллар давомида қирғизлар, ўзбеклар ва тожиклар азалдан ўзаро тинч-тотув, қуда-анда бўлиб яшаб келгани, бундан кейин ҳам шундай давом этиши аждодларимиз тутган йўл – чин мўминлик, биродарлик сифати эканини алоҳида баён этилди.
Сўз олган нотиқлар ўз навбатида, бугунги мураккаб даврда зиддиятли масалаларни ҳал этишда турли фитналарга берилмаслик, гап-сўзларга учмаслик ва ҳар қандай вазиятда оғир-босиқ бўлиш кераклигини алоҳида қайд этдилар.
Дарҳақиқат, ҳозирги кунда сўхликлар муҳтарам Президентимизнинг катта ғамхўрлигини ҳамиша ҳис қилиб яшамоқда. Ушбу туман юртимизнинг энг обод ва фаровон масканига айланиб, бу каби ишларнинг натижаси одамлар ҳаётида акс этишига шубҳа йўқ. Бунинг учун икки мамлакат муфтийлари таъкидлаганларидек, тинчлик-тотувлик, ўзаро тушуниш ва эзгу мақсад йўлида сидқидилдан ҳамкорлик қилиш талаб этилади, холос.
Ўзбекистон мусулмонлари идораси Матбуот хизмати
Муфтий ҳазратлари: динимиз ва мазҳабимиз бирлиги йўлида ҳамжиҳат бўлайлик!
Бугун, 26 июнь куни Қирғизистон мусулмонлари идораси раиси, муфтий Мақсадбек Токтамушев бошчилигидаги бир гуруҳ мутасаддилар Фарғона вилояти Сўх туманига ташриф буюрдилар. Меҳмонларни Ўзбекистон мусулмонлари идораси раиси, муфтий Усмонхон Алимов ҳазратлари ва Дин ишлари бўйича қўмита раиси Абдуғофур Аҳмедов кутуб олди.
Куннинг биринчи ярмида икки давлат уламолари иштирокида “Динимиз ва мазҳабимиз бирлиги йўлида бирдам бўлайлик” мавзусидаги давра суҳбати бўлиб ўтди.
Мулоқотда муфтий Усмонхон Алимов ҳазратлари мазҳабга эргашиш бирлик рамзи экани, мўмин-мусулмонларнинг иттифоқлигини мустаҳкамлашни алоҳида таъкидладилар. Шунингдек, дини мубинимизда қўшни ҳақларига риоя қилиш муҳимлиги, меҳр-оқибат ришталарини яхшилашда қўшниларнинг ўрни беқиёс экани ҳақида тўхталдилар. Қуръони каримни маҳкам тутсак, мўмин-мусулмон эканимизни унутмасак, ҳеч қачон орамизга бегона кучлар киролмайди. Чунки мусулмон одам ўз диндошига фақат яхшиликни раво кӯради, дея муфтий ҳазратлари ўз сўзларини якунладилар.
Давра суҳбатида Дин ишлари бўйича қўмита раиси Абдуғофур Аҳмедов, Қирғизистон мусулмонлари идораси раиси, муфтий Мақсадбек Токтамушев, Ислом цивилизацияси маркази директори ўринбосари Шайх Абдулазиз Мансур ва бир гуруҳ мутасаддилар маъруза қилдилар.
Сўзга чиққан нотиқлар қўшниларнинг миллати ва ирқига қарамасдан уларга яхшилик қилишга буюрилгани, қўни-қўшниларга озор бермаслик, ҳурматларини сақлаш зарурлиги, қўшнилари билан тинч-тотув яшаган, уларга озор бермаган одам катта бахт-саодатга эришиши, аксинча, ёмон муносабатда бўлиш эса, хуник оқибатларга олиб келиши тўғрисида сўз қилдилар.
Қўшни ҳақларини адо этиш ўзаро меҳр-муҳаббатнинг ошиши, тинчлик, ҳотиржамликнинг мустаҳкамлашишига замин яратади. Халқимизда “қўшнинг тинч сен тинч” деган мақол бежизга айтилмаган. Агар икки юрт вакиллари ўзаро ҳамжиҳат бўлиб, динимиз кўрсатмаларига амал қилсалар нафақат савоб оладилар, балки бир қанча ютуқларга ҳам эришишлари мумкин.
Мулоқот ва учрашувлар давом этади.
Ўзбекистон мусулмонлари идораси Матбуот хизмати
Видеолавҳалар
