Аллоҳ ва Унинг Расулидан  100 ўгит 

2-ўгит: Ғазаб қилманг!

Аллоҳ таоло айтади: “Улар енгилликда ҳам, оғирликда ҳам нафақа қиладиганлар, ғазабини ичга ютадиганлар ва одамларни авф қиладиганлардир. Аллоҳ яхшилик қилувчиларни ёқтирадир”.   (Оли имрон сураси, 134-оят)

Абу Ҳурайра (р.а.) айтадилар: “Бир одам: “Эй Аллоҳнинг расули! Менга қисқача насиҳат қилинг, узайтириб юборманг, унутиб қўйишим мумкин” деди (ва бу сўзини бир неча марта қайтарди). Расулуллоҳ (с.а.в.) (бир сўз билан) “Ғазабланма!” деб жавоб бердилар” (Бухорий ва Термизий ривояти).

Хулоса:

1. “Улар”дан мурод тақводорлардир. Чунки, бундан олдинги оятда Аллоҳ таоло тақводор бандалари ҳақида сўз бошлаган.
2. Тақводор бандалар яхши кунида ҳам, ёмон кунида ҳам, борида ҳам, йўғида ҳам нафақа қиладилар.
3. Тақводор кишилар Аллоҳ таолога маъсият бўлмайдиган ҳар қандай ҳолатда ғазабларини жиловлай биладилар.
4. Тақводорлар ўзгалардан хато содир бўлганда ёки улардан кечирим сўралганда уларни авф этадилар.
5. “Ғазабланма” деган сўз бу бизга Росулуллоҳ соллаллоҳу алайҳи васалламдан энг қисқа ва лўнда насиҳатдир.

Аллоҳ таоло барчамизни Ўзи сифатлаган тақводор бандаларидан қилсин ҳамда Росулимизнинг насиҳатларига амал қилишга тавфиқ берсин! 

Олмазор туманидаги    “Мевазор” масжиди имом ноиби:           

Ёрбек Исломов

 Ўзбекистон мусулмонлари идораси тасарруфидаги олий ва ўрта махсус диний таълим муассасаларида абитуриентларнинг ҳужжатларини онлайн қабул қилиш бошланди.

Диний таълим муассасаларида 2020-2021 ўқув йили учун абитуриентларни онлайн рўйхатга олиш Ҳадис илми мактаби ва ўрта махсус ислом таълим муассасалари бўйича 2020 йилнинг 20 июнидан 10 июлигача (шу куни ҳам), Тошкент ислом институти ва Мир Араб олий мадрасаси бўйича 2020 йилнинг 20 июнидан 20 июлигача (шу куни ҳам) давом этади.

Мазкур тизим мамлакатимизда пандемия шароитида карантин тартибларидан келиб чиқиб, абитуриентлар ва уларнинг ота-оналарига қулайликлар яратиш мақсадида Ўзбекистон мусулмонлари идорасининг muslim.uz сайтида qabul.muslim.uz сайти орқали онлайн шаклда амалга оширилмоқда.

Қабул жараёнлари ва қабул имтиҳонлари бўйича абитуриентлар ва уларнинг ота-оналарини қизиқтирган саволларга батафсил маълумот бериш мақсадида ҳар бир таълим муассасасида “Кол-марказ”лар ташкил этилди. “Кол-марказ”лар душанбадан шанбагача ҳар куни соат 09:00 дан 17:00 гача фаолият олиб боради.

Шунингдек, таълим йўналишлари, қабул имтиҳонлари ва таълим муассасалари фаолияти тўғрисида таълим муассасаларининг интернет сайтлари ва телеграм каналлари орқали маълумотлар бериб борилмоқда.

Таълим муассасаларида абитуриентларни онлайн рўйхатга олиш
2020-2021 ўқув йилидан бошлаб илк бор жорий қилинган бўлиб, абитуриентлардан фақатгина маълумоти тўғрисидаги ҳужжати ва паспортининг электрон нусхаси талаб этилади.

Абитуриент томонидан сайт орқали тўлдирилган аризалар таълим муассасалари Қабул ҳайъати томонидан кўриб чиқилади ҳамда абитуриентнинг ҳужжатлари қабул қилингани ёки маълум сабабларга кўра рад этилгани тўғрисида “СМС” хабарнома жўнатилади ёки сайтни ўзида “Ариза ҳолатини текшириш” қисмига паспорт серияси ва рақами ҳамда туғилган санасини киритиш орқали билиб олади.

Таълим ва илмий-тадқиқот бўлими

Фузайл ибн Иёз розияллоҳу анҳуга бир киши келиб: “Менга насиҳат қилинг”, деди. Фузайл ибн Иёз розияллоҳу анҳу шундай дедилар:

“Сенга беш нарсани насиҳат қиламан уни ёд ол ва доимо унга амал қил:

1. Сенга нима етса, Аллоҳнинг тақдиридан деб бил, халқни маломат қилма;
2. Тилингни сақла, халойиқ ундан саломат бўлсин. Шунда Аллоҳнинг азобидан саломат бўласан;
3. Аллоҳнингсенга ризқ бераман деган ваъдасини рост бил, шунда мўмин бўласан;
4. Ўлимга тайёр тур, шунда ғофил ҳолда ўлмайсан.
5. Қаерда бўлсанг ҳам, Аллоҳ таолонинг зикрини кўпайтир, шунда гуноҳлардан сақланасан”.

Абу Лайс Самарқандийнинг

 “Танбеҳул ғофилийн” китобидан

Ўзбекистон мусулмонлари идораси тасарруфидаги Олий ва ўрта махсус ислом таълим муассасаларига абитуриентларнинг ҳужжатларини қабул қилиш жараёнлари техник сабабларга кўра

• Ҳадис илми мактаби ва ўрта махсус ислом таълим муассасаларида

2020 йилнинг 20 июнидан 10 июлигача (шу куни ҳам),

• Тошкент ислом институти ва Мир Араб олий мадрасасида 2020 йилнинг 20 июнидан 20 июлигача (шу куни ҳам) бўлиб ўтиши белгиланди.