muslim.uz
Ўзбекка номуносиб “ўзбекчилик”
Бугун жамиятимиз турли ютуқларга эришмоқда. Аммо, нуқсонларимиз ҳам кўпайишда давом этяпти. Қуйида барчамизни ўйлантирадиган “камчиликларимиз” ҳақида сўз юритилади.
- Ўзи қилолмаган ишни бошқалардан талаб қилиш.
- Ақл ўргатишга усталик, ўрганишга нўноқлик.
- Майда гапларнинг қули бўлиш.
- Ош учунгина бирлашиш.
- Саволни “Унга қандай ёрдам, далда бера олдим?” деб эмас, “Нега у менга ёрдам, далда бермади?” шаклида қўйиш.
- Ўзини осмоннинг устуни деб билиш.
- Бойга бўйин эгиш, уларга давранинг тўрини бериш.
- Ўз тарихи, ўзлигини билмаслик, биладиганни эса “миллатчи” ва “фалоний”га чиқариш.
- Қўрқоқлик.
- Яхшилик қилганга ёмонликни раво кўриш.
- Бир-бирини кўролмаслик.
- Яхши одамни тиригида тепиб, ўлгандан кейин улуғлаш.
- Қаттиққўл раҳбарни севиш.
- Динда чаласавод бўлиш, бидъатларни маҳкам тутиш, Худога ишониб, лекин ердагиларни ундан устун қўйиш.
- Топган-тутганини тўй ва уй қуришга “инвестиция” қилиш.
- “Нозик” меҳмонларни отасидан улуғ деб билиш.
- Одамларга ақл-заковатига қараб эмас, уй-жойига қараб баҳо бериш.
- “Орзу-ҳавас”лар жиловини хотинларга тутқазиб, сўнгра уларни рўёбга чиқариш учун жонни жабборга бериш, буни умр мазмуни, деб билиш.
- Дўстликнинг ҳаққини билмаслик.
- Бошига иш тушган одамдан юз буриш.
- “Менга нима?” шиори билан яшаш.
- Хато қилишни оддий нарса, кечирим сўрашни ўлим билан тенг кўриш.
- Йиқилганни яна бир марта тепиш.
- Манфаат учун дўстни, миллатни, Худони ва бутун борлиқни осонгина сотиб юбориш.
- Билим олишда кимўзарлик қилиш эмас, чаласаводлик пойгасига кириш.
- Баҳслашиш маданиятини билмаслик.
- Сўкиниш борасида ўзга сайёраларни ҳам забт этиш.
- Бугуни, келажаги ҳақида эмас, ўтмиши, тарихи ҳақида гапириш.
- Фақатгина ўз гапини ҳақ деб билиш.
- ”Ҳап сеними, кўрасан ҳали!” хаёли билан яшаш.
- Мансабдорни тиригида оёғини ўпиб, ўлгандан кейин гўрига тош қалаш.
- Буларнинг ҳаммасини ўқиб ё эшитиб, “шу ҳам гап бўлдими?”, дейиш.
- Ўзига ёқмайдиган ҳақиқатни рад этиш.
- Ўзига ёқадиган ёлғонга ишониш.
- Юзинг бурилдими, орқадан гапириш.
- Бетига айтгандан хафа бўлиш.
- Танқидни “Душманнинг иши”, иғво деб билиш.
- Мақтаса, шайтоннинг ҳам шериги бўлиш.
- Туҳматга мойиллик.
- Китоб ўқимаслик.
- Маишатни севиш (гап-гаштак, чойхона, ҳар қандай ютуқ ёки янгиликни “ювиш” ва ҳ.к.).
- Машваратсиз иш қилиш.
- Мансабга миниб қолса, тобутга мингунча тушмаслик.
- Кўчада ётган чўпдан ҳам шубҳа қилиш.
- Бировдан бир нарса ундиришга уста бўлиш.
- Ўз қонуний ҳақ-ҳуқуқларини билмаслик.
- Ёмонлик қилишдан ҳузурланиш.
- Кўнглида тан олиб турганини ҳам тилида писанд қилмаслик.
- Бировга нон бермасдан уни нонкўрликда айблаш.
- Гуноҳини хаспўшлаш учун гуноҳ қилиш.
- Ўзганинг ҳаққидан қўрқмаслик
- Гап тагидан “гапча” қидириш.
- Бойликни савлатим деб билиш.
- Бировни ёмон кўрса, ўлаётганда ҳам ўшани қарғаб ўлиш.
- Айтилган жойга айтилган вақтда бормаслик.
- ”У ким бўлибдики?” саволини тез-тез такрорлаш.
- Пора бериш ва пора олишни яхши кўриш.
- Пора олмайдиган ва пора бермайдиган одамни “порахўр” деб айблаш.
- Қарз беролмаган дўсти ёки танишидан юз ўгириш.
- “Ўзингга ақл ўргатсанг-чи?” деган ҳукмнинг ҳукмдори бўлиш.
- Одамларни ўзидан паст санаш.
- Илмига ва билганларига амал қилмаслик.
Фақат ўзимизга хос фазилат ва қусурлар омухтаси бўлмиш (“трагикомедия”га ўхшаш) “ўзбекчилик” рўйхатини яна узундан-узоқ давом эттириш мумкин…
“Инсоннома” китоби асосида
Саидаброр Умаров тайёрлади
Юксак фазилатли инсон
1483 йил 14 февраль куни буюк шоҳ ва шоир Заҳириддин Муҳаммад Бобур таваллуд топган. Буюк ватандошимиз ҳақида машҳур инсонларнинг фикрларини эътиборингизга ҳавола этамиз:
- Машҳур тарихчи Мирзо Муҳаммад Ҳайдар “Тарихи Рашидий” китобида бундай дейди: “Бобур турли фазилатлар билан безанган ва мақтовли хислатларга эга бўлган бир подшоҳ эди. Ушбу барча фазилатларидан шижоат ва муруввати устун турарди. Туркий шеърни Навоийдан кейин ҳеч ким Бобур ёзган даражада ёзган эмас”.
- Жавоҳарлаъл Неру “Ҳиндистоннинг кашф этилиши” китобида: “Бобур дилбар шахс эди. Уйғониш даврининг ажойиб султони, кучи, тадбиркор кишиси бўлиб, санъат, адабиётни гўзалликни севарди”, дейди.
- “Бобур феъли-сажиясига кўра Цезарга қараганда севишга арзигуликдир. Унинг манглайига юксак фазилатли инсон деб битиб қўйилган”, деган эди инглиз тарихчиси Эдуард Холден.
- “Бобурнома”ни инглиз тилига таржима қилган Уильям Эрскин бундай дейди: “Саховати ва мардлиги, истеъдоди, илм-фан, санъатга муҳаббати ва улар билан муваффақиятли шуғулланиши жиҳатидан Осиёдаги подшоҳлар орасида Бобурга тенг келадиган бирорта подшоҳ топилмайди”.
Ўзбекистон мусулмонлари идораси матбуот хизмати
Нишонга урилган гаплар: “Агар сенга кимдир зулм қилса, Аллоҳ таолонинг адолатини унутма!”
Қуйида келтириладиган ҳадис, фикрлар, ҳикматлар сайтлардан ва ижтимоий тармоқлардаги турли саҳифалардан олиб таржима қилинган.
Абдуллоҳ ибн Амр розияллоҳу анҳумодан ривоят қилинади: “Расулуллоҳ соллаллоҳу алайҳи васаллам шундай дедилар: “Раҳмлиларга Раҳмон ҳам раҳм қилади! Ердагиларга раҳм қилинглар, осмондаги Зот сизларга раҳм қилади!” Абу Довуд, Термизий ривоят қилишган.
*****
Тоиф аҳли Расулуллоҳ соллаллоҳу алайҳи васалламга тош отиб, жароҳатладилар. Шунда у зот соллаллоҳу алайҳи васаллам уларнинг ҳақига “Эй Аллоҳ, қавмимни мағфират қилгин! Чунки улар нима қилаётганларини билмаяптилар” деб дуо қилдилар. У муборак зотнинг қалбларига қандай ўрнашган раҳматнинг улканлигини қаранг!
“Ховатир роқия журнали”
*****
Барча эшиклар беркилса ҳам, Аллоҳ таолонинг эшиги ҳеч қачон беркилмайди.
“Ховатир роқия журнали”
*****
Агар сенга кимдир зулм қилса, Аллоҳ таолонинг адолатини унутма!
Агар ўзинг кимгадир зулм қилаётган ёки қилмоқчи бўлсанг, Аллоҳ таолонинг иқоби шиддатли эканини унутма!
*****
Гуноҳлар ўчирилиб, ғам-ташвиш кетиб, ризқда кенгчилик бўлишини истайсизми?
Истиғфорни лозим тутинг!!!
Астағфируллоҳаллазий лаа илаҳа илла ҳувал Ҳаййул Қоййууму ва атубу илайҳи.
(Ҳай ва Қаййум сифатли Зотдан бошқа илоҳ йўқ, Унга истиғфор айтаман, Унга тавба қиламан)
“Фикр дурдоналари” саҳифасидан
*****
Отангизнинг ёнида юрганингизда у билан ихтилофга бормайдиган, тортишмайдиган, қўлидан узилмайдиган ҳасса каби бўлинг. Чунки эртага унинг поябзалини ҳам тополмайсиз.
“Ховатир роқия журнали”
Интернет материалларидан тўплаб, таржима қилувчи
Нозимжон Иминжонов
Ислом цивилизацияси маркази раҳбари: «Жамият аъзоларига Аллоҳни танитишимиз зарур»
Куннинг мулоҳазаси
Ҳозиргина "Муносабат" кўрсатувининг навбатдаги сони намойиш қилинди. Нега болалар, ўсмирлар, ёшлар тарбиясиз? Нега янги туғилган чақалоқлар ўлдирилиб ёки тириклай ташлаб кетиляпти? Нега аёл жазман эркак жазманни пичоқлаб ўлдиряпти? Нега келинлар уй ишларини қилиш, боласини тарбиялаш ўрнига сериаллардан ва телефонидан кўз узмайди? Нега қарияларнинг қадри ва ўрни йўқолиб боряпти? Нима қилиш керак, нега? деган саволлар ҳурматли Қуддус Аъзам томонидан бир неча марта айтилди?
Ҳақиқатга яқинроқ жавоб кўрсатувда иштирок этган Жасур домла томонидан айтилди: Биз фарзандларимизга илм беришимиз, диёнатни ўргатишимиз керак ва Қуддус Аъзамнинг ўзи тез айтиб ўтди: Ислом дини чақалоқларни тириклайин кўмишга чек қўйган дин бўлди. Шундай қилиб, нима қилиш керак? Болаларимизни китобга қайтаришимиз керак, болаларимиз (ва катталаримиз) албатта Аллоҳдан қўрқишлари керак, яъни номаъқул ишларни қилишдан тийилишларига асос, қўрқув бўлиши керак. Демак, жамият аъзоларига Аллоҳни танитишимиз зарур. Иккинчи томондан, қонунларни ўргатишимиз, тушунтиришимиз керак. Ҳар иккала ҳолатда номаъқул иш учун жазо муқаррарлигини инсон албатта билиши, ҳис қилиши керак.
Шу ўринда, ҳар ҳафтада Умра зиёратига бориб келаётган минглаб (!) юртдошларимиз ҳеч бўлмаса ўз яқинларига маънавий руҳий покланиш нима, бировнинг ҳақини емаслик, сабр, шукур, Аллоҳдан қўрқиш нима эканини тушунтириб берсалар аъло иш бўлар эди.
PS: Айни дамда телевизорда аэробика тўғрисида кўрсатув бўляпти. Кўрсатув бекаси "Мен ҳар куни бир соат (?) миллий рақс ва бир соат (?) аэробика ҳаракатларини бажараман. Албатта болалар тарбиясига вақт топмайди.
Шоазим Миноваров,
Ислом цивилизацияси маркази директори
Отинойилар малакасини оширди
Юртимизнинг турли жойларида фаолият юритаётган отинойилар билим ва малакасини янада ошириш мақсадида икки ҳафталик (72 соатли) малака ошириш ўқувлари ташкил этилмоқда.
Жорий йил январь ойи охири февраль ойи бошида Ўзбекистон халқаро ислом академияси ҳузуридаги Малака ошириш марказининг Самарқанд вилояти минтақавий филиалида отинойлар учун ўқув машғулотлари бўлиб ўтди. Унда Иштихон, Каттақўрғон, Ургут туманлари ва Самарқанд шаҳрида фаолият кўрсатаётган 32 нафар отинойи иштирок этди.
Ушбу ўқув машғулотларига Самарқанд вилояти ҳокимлиги, Адлия бошқармаси, Оила илмий-амалий маркази, Имом Бухорий халқаро илмий-тадқиқот маркази ва Ҳадис илми мактаби мутахасислари жалб этилди. Дарслар давомида малакали профессор-ўқитувчилар семинар-тренинг, давра суҳбати каби интерфаол методларни замонавий ахборот технологияларидан фойдаланган ҳолда олиб бордилар.
Малака ошириш ўқувлари якуни бўйича ўтказилган тест синовларида намунали натижа кўрсатган 32 нафар тингловчи отинойиларга 72 соатлик “Исломшунослик” курсини муваффаққиятли тугатгани тўғрисида махсус сертификат топширилди.
Н.Темирова,
Самарқанд вилояти бош имом-хатибининг
хотин-қизлар масалалари бўйича ёрдамчиси
Видеолавҳалар
