muslim.uz
Количество участников конкурса чтецов Корана превысило 3500 человек
Как сообщили пресс-службе Управления мусульман Узбекистана в Оргкомитете республиканского конкурса чтецов Корана, с учетом большого количества желающих принять участие в конкурсе дата регистрации участников продлена до 19.00 часов 14 января.
По данным Оргкомитета, по состоянию на 14 января 3502 участников подали свои заявки.
Напоминаем, что по состоянию на 8 января этот показатель составлял 733, по состоянию на 9 января – 1101, по состоянию на 10 января - 2079, по состоянию на 11 января – 2255, по состоянию на 13 января - 2770 человек.
Пресс-служба Управления мусульман Узбекистана
Ушалган орзулар: ҳар гўшада Қуръон тиловати
Қуръони карим мусобақаси ўтказилади, мусобақада истаган кишилар қатнашиши мумкин, деб эълон қилингандан бошлаб юртимизда ажиб бир байрам шукуҳи кеза бошлади. Бундай фараҳбахш шукуҳки, унинг тароватини сўз билан таърифлай олмайсиз. Ўша кундан эътиборан Ватанимизнинг ҳар бир гўшасида Қуръон тиловатлари бошланиб кетди: энг чекка қишлоқлардаги қориларимиз ҳам танловга қатнашиб, шу баҳонада билимларини кўрикдан ўтказиб олишни орзу қилиб, яқин-атрофдаги устозларга қатнаб, уларнинг тавсиясига кўра ё шу йилнинг ўзидаёқ ҳужжат топширяпти ёки келаси йилгача янада пухтароқ тайёрланишга аҳд қиляпти. Ахир энг номдор қорилар билан беллашиш, “бу майдон ичра туриш” осон иш бўлибдими!..
Яратганнинг марҳаматини қарангки, юртимизда Қуръони каримни ёд олган, тажвиду тартиласини жойига келтириб ўқишни биладиган қориларнинг ҳисоби йўқ экан. Бугунги ҳолатга кўра, мусобақада қатнашишга журъат қилган, яъни ўзининг билимига, қувваи ҳофизасига ишонган 18 ёшдан 40 ёшгача бўлган қори ва қорияларимиз сони салкам тўрт мингга яқин экан. Бундан қувонмай бўладими! Яна ҳам тўлиқ ва якуний маълумотни эртага сайтимизда эълон қиламиз.
Муҳтарам Президентимиз айтганидек, “Қуръонни эшитиш, эшита олиш юксак маънавият, маърифат. Қуръон ҳеч қачон ёмонликка даъват қилмайди. Агар, Қуръони каримни эшита олсак, эшиттира олсак бу муваффаққият бўлади. Элимизга нур келади”.
Бинобарин, Қуръони каримни ўқиш, тинглаш шунчаки, унинг оҳангларига мафтун бўлиш билан ниҳоясига етмайди, балки инсоннинг қалбини юмшатади, ҳидоятга чорлайди. Унга амал қилиш орқали инсон икки дунё саодатига эришади. Зотан, илм ҳам, маърифат ҳам юмшаган қалбга йўл топади. Юмшаган қалб билан, кўзда ёш билан қилинган дуолар ҳам ижобат бўлади: элимизга нур, юртимизга барака киради.
“Аллоҳнинг Китобини тиловат қиладиган, намозни баркамол адо этадиган ва Биз уларга ризқ қилиб берган нарсалардан махфий ва ошкора эҳсон қиладиган зотлар сира касод бўлмайдиган тижоратдан (ажру савоб бўлишидан) умидвордирлар. Зеро, (Аллоҳ) уларнинг ажрларини комил қилиб берур ва Ўз фазлини уларга янада зиёда қилур. Албатта, У мағфиратли ва ўта шукур қилувчидир”(Фотир сураси, 29-30-оятлар)
Ушбу ояти каримада Қуръон ўқиган, тинглаган ва эҳсонлар қиладиган бандаларнинг ризқу насибасида асло танглик бўлмаслиги, фазилати эса тобора юксалиб боришининг хабари берилган.
Қуръон мусобақасининг туман-шаҳар босқичи очилиш маросими эртага Жиззах вилоятининг сўлим Зомин туманидаги замонавий усулда қайта барпо этилган “Маърифатли” жоме масжидида бўлиб ўтади.
Шу билан бошқа ҳудудларга ҳам мусобақа бошланишига ҳам дуо берилади. Ушбу маросимга қатнашишни истаган барча юртдошларимиз таклиф этилади. Ахир эртага миллионлаб юртдошларимиз кутган орзуси ушалади – Ўзбекистон миқёсидаги очиқ турдаги қорилар мусобақаси бошланади.
Бундан мамнун бўлган ҳамюртларимиз қўлларини дуога кўтариб, унинг шукронаси учун Парвардигоримизга ҳамду санолар айтмоқда, бу ишга ташаббускор бўлган Давлатимиз раҳбари, ташкилий ишларга бош бўлиб турган муфтий ҳазратлари ва муҳтарам олиму уламоларимиз ҳаққига дуолар қилмоқда. Кўпнинг дуоси кўл бўлади, деганларидек, иншоаллоҳ, ана шундай хайрли ва фазилатли танловлар ўтаётган юртимизга яхшиликлар уруғи ёғилиб, кунларимиз бундан-да нурафшон бўлажак.
Мусобақа жараёни тўғридан-тўғри эфирга узатиб борилади. У ерга бора олмаган ватандошларимиз мусобақанинг очилиш маросимини muslim.uz портали ва ижтимоий тармоқлардаги саҳифалари орқали онлайн кузатиб боришлари мумкин.
Ўзбекистон мусулмонлари идораси Матбуот хизмати
Фарзанднинг ота-она устидаги ҳақлари (3-мақола): Фарзандга яхши исм қўймоқ
Фарзандга яхши исм қўмоқ. Фарзанд дунёга келганидан кейин ҳам ота-онанинг унинг наздидаги ҳақлари давом этади. Фарзанд ёруғ дунёга келиши билан ота-онанинг биринчи қиладиган вазифалари унга чиройли исм қўйишликдир. Зеро ҳадиси шарифда фарзандга чиройли исм қўйишга буюрилди. Исм ҳам болага руҳий жиҳатдан таъсир этиши илмий жиҳатдан исботланган. Болага қўйилган исм уни дўст-ёрлари, жамоат орасидаги обрўсига путур етказмаслиги лозим.
Ҳадис. “Сизлар қиёмат куни ўз исмларингиз ва оталарингизнинг исмлари билан чақириласизлар, шундай экан фарзандларингизга чиройли исм қўйинглар”. (Абу Довуд)
Шунинг учун Пайғамбаримиз соллаллоҳу алайҳи васалламнинг ўзлари ҳам гўдакларга чиройли исмлар қўйишга тавсия қилганлар. Болалигида чиройли исм берилмаган кўплаб саҳобаларнинг исмлари кейинчалик ўзгартирилган. Масалан, ҳузурларига “Заҳм” исмли бир саҳоба келганида унинг исмини “Башир” деб ўзгартирадилар. “Заҳм”нинг маъноси “сиқилиш”, “Башир” сўзининг маъноси “яхши хабар берувчи” дегани.
Яна бир саҳобанинг исми “ал-Осий”, яъни “исёнчи” деган маънони билдирган, унга Пайғамбаримиз соллаллоҳу алайҳи васалламга итоат қилувчи “Мўъти” деган исмни берадилар. (Бухорий, “Адаб-ул Муфрад”)
Ҳазрати Али каррамуллоҳу важҳаҳунинг фарзандларига исм бериш билан боғлиқ воқеа шундай ривоят қилинади:
“Биринчи ўғлим туғилганида унга уруш маъносини билдирувчи “Ҳарб” деб ном қўйган эдим. Шунда Аллоҳнинг Расули соллаллоҳу алайҳи васаллам келдилар ва: “Ўғлимни менга кўрсатинглар, унга нима деб исм қуйдингиз?”, дедилар. “Ҳарб” деб айтдик. Йўқ, унинг исми “Ҳасан” дедилар. (Бухорий, “Адаб-ул Муфрад”, Баззор)
Ривоят. Бир киши Умарнинг (розийаллоҳу анҳу) ҳузурларига ўғли билан келиб, ўғлидан шикоят қилади ва уни оқ этганини маълум қилади. Ҳазрати Умар (розийаллоҳу анҳу) ўғилни чақиртириб:
– Отангга қарши боришда, унга оқ бўлишликда Аллоҳдан қўқрмайсанми? Ваҳоланки, отангни сенда бир қанча ҳақлари бор, буларни билмасанми? – дебди.
Ўғил айтди:
– Эй мўминлар амири! Ўғилнинг отада ҳаққи йўқми?
Ҳазрати Умар:
– Ҳа, бор! дедилар.
Ўғил айтди:
– Нима у ҳақлар?”
Ҳазрати Умар:
– Ўғилнинг отадаги ҳақи – ота ёмон хотинга уйланмаслиги, фарзанд айбланмаслиги учун яхши исм қўймоғи ва Қуръонни ўргатмоғидир, – деди.
Бу гапларни эшитган ўғил:
– Эй мўминлар амири, Аллоҳга қасамки, отам онамни танлаб олмаган, унинг ахлоқи яхши бўлмаган, уни тўрт юз дирҳамга сотиб олган. Исмимни ҳам чиройли қўймади, яъни, менга Жуъал деб исм қўйди бу кўршапалак эркагининг исми, Қуръони каримдан ҳам бирорта оят ўргатмади, – деди.
Ҳазрати Умар розияллоҳу анҳу боланинг отасига қараб:
– Сен “ўғлим менга қарши чиқмоқда, осий бўлмоқда” дейсан, ваҳоланки у сенга осий бўлмасидан олдин сен унга осий бўлибсан-ку. Унга керакли тарбияларни бермабсан. Энди менинг ёнимдан чиқиб кетгинлар, – дейди.
Улуғбек Султоновнинг
"Ота-онага хизмат қилиш
одоблари" китобидан олинди
ЎМИ Матбуот хизмати
Қуръон мусобақаси иштирокчилари сони 3 ярим мингдан ошди
Ташкилий қўмита томонидан Матбуот хизматига маълум қилинишича, ушбу мусобақада қатнашишни хоҳловчилар кўплигини инобатга олиб, талаб-истаклардан келиб чиққан ҳолда иштирокчиларни рўйхатга олиш шу йил январь ойининг 14 санаси кечки соат 19:00 гача давом этади.
Ташкилий қўмита берган маълумотга кўра, 14 январь санасигача 3502 нафар иштирокчи ҳужжат топширган.
Эслатиб ўтамиз, ушбу кўрсатгич:
8 январда 733 нафар;
9 январда 1101 нафар;
10 январда 2079 нафар;
11 январда 2255ни ташкил этган эди.
13 январда 2770 ни ташкил этган эди.
Ўзбекистон мусулмонлари идораси Матбуот хизмати
Шарафли бурч
Ҳар бир инсон зиммасида бурч ва масъулиятлар мавжуд. Жумладан, бу вазифа касбга оид бўлиши мумкин ёки оилавий вазифалар бўлиши мумкин. Масалан, муаллимларнинг зиммасида келажак авлодга таълим бериш бўлса, шифокор беморларга дармон излайди. Оилада оталарнинг ўз бурчлари бўлса, фарзандларнинг ҳам зиммасида ўзига хос масъулиятлар мавжуд. Бироқ, бир касб эгалари борки, уларнинг шарафли хизматлари сабаб ҳар бир касб эгаси, шу юртнинг барча фуқароларининг эркин фаолият юритишида осойишталик муҳим аҳамиятга эгадир.
Пайғамбаримиз соллаллоҳу алайҳи ва саллам: “Аллоҳ таоло розилиги йўлида бир кун чегара ҳудудида посбонлик қилиш бир ой кечалари ибодат қилиб, кундузлари нафл рўза тутишдан афзалдир”, - деб марҳамат қилганлар. Дарҳақиқат, ушбу ҳадисдан маълум бўладики, инсон ўзи яшаб турган ватанини, динини, оила аъзоларини ҳимоя қилиши энг улуғ ва хайрли амаллар сирасига киради. Юртни асраш, қўриқлаш, Ватан ҳимояси учун ҳарбийлар сафида туриш эса динимиз таълимотида улкан савобли амал саналади. Бинобарин, шижоатли паллаларини, борингки, ҳаётларини ана шу шарафли бурч учун бахшида қилган ўғлонларнинг хизмати боис элу юрт хотиржам, заминимиз осойишта бўлади, тинчлик ҳукм суради.
Яна бир муборак ҳадиси шарифда Пайғамбаримиз Муҳаммад соллаллоҳу алайҳи васаллам юрт сарҳадларини қўриқлаш нақадар шарафли, унинг ҳимояси учун кечалари бедор ўтказишнинг савоби қанчалар улуғ эканлигини таъкидлаб: «Кечалари Аллохдан қўрқиб ёш тўкккан кўзни ва Аллох йўлида тунларни посбонлик килиб мижжа қоқмаган кўзни дўзах оташи куйдирмайди», деганлар. Яни бир бошқа ҳадисда: «Аллоҳ таоло розилиги йўлида бир кун чегара ҳудудида посбонлик қилиш бир ой кечалари (нафл) ибодат килиб, кундузлари нафл рўза тутишдан афзалдир» дея марҳамат қилинади. Ушбу ҳадислар қалбида имони бор ҳар бир мусулмонни сергак торттириши рост, қолаверса, қалбида она юртга бўлган муҳаббатини ҳам зиёда қилади.
Юртимизнинг тинч ва осойишталигида ана шу Ватан ҳимоячиларининг ўрни беқиёсдир. Улар тунни тун демай ҳамиша огоҳ ва сергак сарҳадларни қўриқлаб турибдилар.
Мустақилликка эришган илк йилларда 14 январь санасида Ўзбекистон Республикасининг Қуролли кучларига асос солинди. Айнан шу куни мамлакатимизда “Ватан ҳимоячилари куни” этиб белгиланиб, халқимизда кенг нишонланиб келинмоқда.
Юртимиз тарихида кўплаб мард ўғлонлар, ватанпарвар аждодларимиз ўтганлиги тарих китобларида қайд этилган. Бу ҳақида Ўзбекистон Республикаси биринчи Президенти Ислом Каримов ўзининг “Юксак маънавият – енгилмас куч” асарида шундай деган экан:
“Урганчни босқинчилардан ҳимоя қилишда байроқ тутиб жон берган Нажмиддин Кубронинг қаҳрамонлигида, дунёни тўфондек босган Чингизхон қўшинига қарши ўн бир йил муттасил мардона кураш олиб борган Жалолиддин Мангубердининг жанговар руҳида, юртимизни истилочилардан озод қилиб, буюк давлат барпо этган Амир Темур бобомизнинг бунёдкорлик салоҳиятида ҳам маънавий жасорат туйғуси буюк ва устувор аҳамият касб этгани шубҳасиз”. Чиндан ҳам, мардлик ва жасорат билан Ватанини ҳимоя қилган аждодларимиз ҳамиша авлодларнинг ёдида эҳтиром билан яшайдилар.
Шерзод СОЛИЕВ
“Кўкалдош” ўрта махсус ислом билим юрти талабаси
ЎМИ Матбуот хизмати
Видеолавҳалар
