muslim.uz

muslim.uz

Четверг, 01 Декабрь 2022 00:00

Қалблар мунаввар этилди

Бугун, 1 декабрь куни “Сиз бизга кераксиз” шиори остида “3 декабрь – халқаро ногиронлар куни” муносабати билан ногиронлиги бор ҳамюртларимиз иштирокида “Ezidiyor” мажмуасида дилдан маърифий суҳбат ва уларнинг қўл меҳнати маҳсулотлари кўргазмаси бўлиб ўтди.

Маросим Қуръон карим тиловоти ва хайрли дуолар ила бошланди.

Сўзга чиққан Ҳомиджон домла Ишматбеков юртимизда ногиронлиги бор кишилар қадр-қимматини кўтариш, турмуш шароитини яхшилаш борасида қилинаётган хайрли ишлар ҳақида сўзлаб, бу борада Ўзбекистон мусулмонлари идораси томонидан Республикамизнинг барча ҳудудларидаги марказий масжидларда диний-маърифий суҳбатлар ташкил этилаётгани, жума мавъизалари сурдо тилида онлайн узатилаётгани, диний соҳага оид адабиётлар билан таъминланаётганини қайд этдилар, муборак динимизда эҳтиёжманд кишиларга ёрдам қўлини чўзиш, ногиронлиги бор кишиларга меҳр-оқибатли бўлиш улуғ савобли амал, бу каби хайрли ишлар барчанинг вазифаси, инсоний бурчи эканини изоҳладилар.

Шунингдек, Абдуқаҳҳор домла Юнусов гапириш ва эшитиш борасида имконияти чекланган юртдошларимиз орасида миссионерлик ҳолатлари учраши мумкинлиги ва унинг олдини олиш борасида мавъиза қилди.

Маросим асносида ногиронлиги бор ҳамюртларимизнинг қўл меҳнати кўргазмаси ўтказилди. Унда иштирокчилар ушбу дўстларимизнинг қўл меҳнатлари асосида ишлаб чиқарилган маҳсулотлар кўргазмаси билан яқиндан танишди ва ижодларига юқори баҳо бериб, ўзларига ёққан буюмларни харид қилдилар.

Тадбирда қизиқарли савол-жавоблар викторинаси ўтказилиб, ғолиблар эсдалик совғалар билан тақдирланди. Жисмоний имконияти чекланганлар ижросидаги гўзал нашидлар ва ажойиб салавотлардан баҳраманд бўлди. Ҳомийлар кўмагида юртдошларимиз учун хайрия ош дастурхони ёзилди.

Бир сўз билан айтганда, дилдан суҳбат, Қуръон тиловати ва хайрли дуолар, ажойиб кўргазма, диний савол-жавоблар, нашид ва салавотлар, ҳадялар ва бир дастурхон атрофидаги дийдор қалбларга қувонч, ёруғлик ва мунавварлик бахш этди.

Аллоҳ таоло мана шундай манфаатли суҳбатларни бардавом айлаб, унга ҳисса қўшаётганларга икки дунё саодатини берсин.

 

 Ўзбекистон мусулмонлари идораси Матбуот хизмати

Вторник, 29 Ноябрь 2022 00:00

ҲАМДАРДЛИК БИЛДИРАМИЗ

Ўзбекистон мусулмонлари идораси жамоаси Тошкент вилояти Ўртачирчиқ тумани “Абу Ҳурайра” жоме масжиди имом-хатиби Фазлиддин домла Мусаховнинг акалари Баҳодир Қудратовнинг вафоти муносабати билан чуқур таъзия изҳор этади.

Аллоҳ таоло охират сафарига кузатилган марҳум отахоннинг барча солиҳ амалларини ўзларига ҳамроҳ айлаб, Ўз мағфиратига олсин.

Ҳақ таоло марҳумнинг яқинлари, фарзанду аржумандларига чиройли сабр бериб, бу мусибатларга ажру мукофотлар ато этсин.

Ўзбекистон мусулмонлари идораси жамоаси, уламолари, имом-домлалари ва ўқитувчи-мударрислари номидан марҳум отахоннинг яқинларига, хусусан, Фазлиддин домла Мусаховга ҳамдардлик билдирамиз.

Иннаа лиллааҳи ва иннаа илайҳи рожиъуун.

«Мусибат етганда «Албатта, биз Аллоҳникимиз ва албатта, биз Унга қайтувчимиз», деган сабрлиларга хушхабар беринг».

Ўзбекистон мусулмонлари идораси

 

Аввал хабар берганимиздек, бугун, 29 ноябрь куни Ўзбекистон мусулмонлари идорасида Республикамиздаги масжидларда фаолият юритаётган имом-хатиблар ўртасида “Йил имоми – 2022” кўрик танловининг республика босқичи бўлиб ўтди. Унда Қорақалпоғистон Республикаси, вилоятлар ва Тошкент шаҳридаги ҳудудий босқичларда ғолибликни қўлга киритган имом-хатиблар беллашдилар.

Мусобақанинг Республика босқичи қатнашчилари тафсир, ақоид, фиқҳ, ислом тарихи, ҳадис илмлари, Мовароуннаҳр алломалари ҳаёти ва ижодига оид саволларга жавоб беришди ҳамда ўз фаолиятлари давомида амалга оширган ишларини тақдим қилишди. Мусобақа қатнашчиларининг чиқишлари малакали ҳакамлар ҳайъати томонидан адолат мезонлари асосида муносиб тарзда баҳолаб борилди.

Танловда қатнашган имом-хатиблар орасидан қуйидагилар 1-, 2-, 3-ўринларни қўлга киритдилар:

1-ўрин – Андижон вилояти Андижон шаҳридаги “Ғиштли” жоме масжиди имом-хатиби Ботиржон домла Тожибоевга I даражали диплом ва Ҳаж сафари йўлланмаси;
2-ўрин – Наманган вилояти Косонсой туманидаги “Эшон бобо” жоме масжиди имом-хатиби Ибодулло домла Усмоновга II даражали диплом ва Умра сафари йўлланмаси:
3-ўрин – Тошкент шаҳар Шайхонтоҳур туманидаги “Ислом Нури” жоме масжиди имом-хатиби Аҳадхон домла Собировга III даражали диплом ва 10 млн 500 минг сўм пул мукофоти топширилди.

Маълумот учун, республикамизда 2 116 та масжид фаолият юритмоқда. Жорий йилда шу вақтга қадар 12 та янги масжид давлат рўйхатидан ўтказилиб, мўмин-мусулмонлар ихтиёрига топширилди. Айни кунларда юртимизда 325 та масжид қайтадан қурилмоқда.

Таъкидлаш жоизки, масжидлар ҳолатини яхшилаш ва имом-хатиблар томонидан халқимизнинг диний-маърифий билимларини ошириш, маънавиятини юксалтириш, жаҳолатга қарши маърифат билан курашиш борасида салмоқли ишлар қилинмоқда. Мазкур йўналишда йил бошидан шу пайтга қадар 170 минг маротаба учрашув ва давра суҳбатлари ўтказилди.

Имом-хатиблар ташаббуси билан ҳомийларни жалб қилган ҳолда “Саховат”, “Мурувват” ва “Меҳрибонлик” уйларига, ижтимоий кўмакка муҳтож, меҳнат фахрийлари, нуроний кексалар ҳамда боқувчисини йўқотган оилаларга 30 млрд. сўмлик хайриялар қилинди.

Аллоҳ таоло барчаларига ғолибликни муборак айласин, қолган иштирокчиларга ҳам келгусида муваффақиятлар ато этсин.

Ўзбекистон мусулмонлари идораси Масжидлар билан ишлаш бўлими

Вторник, 29 Ноябрь 2022 00:00

ҲАМДАРДЛИК БИЛДИРАМИЗ

Ўзбекистон мусулмонлари идораси жамоаси "Шамсуддинхон Бобохонов" нашриёт-матбаа ижодий уйи бўлим мудири Толибжон домла Низомовга падари бузрукворлари Насриддин ҳожи отанинг вафоти муносабати билан чуқур таъзия изҳор этади.

Аллоҳ таоло охират сафарига кузатилган марҳум ҳожи отанинг барча солиҳ амалларини ўзларига ҳамроҳ айлаб, Ўз мағфиратига олсин.

Ҳақ таоло марҳумнинг яқинлари, фарзанду аржумандларига чиройли сабр бериб, бу мусибатларга ажру мукофотлар ато этсин.

Ўзбекистон мусулмонлари идораси жамоаси, уламолари, имом-домлалари ва ўқитувчи-мударрислари номидан марҳум отахоннинг яқинларига, хусусан, Толибжон домла Низомовга ҳамдардлик билдирамиз.

Иннаа лиллааҳи ва иннаа илайҳи рожиъуун.

«Мусибат етганда «Албатта, биз Аллоҳникимиз ва албатта, биз Унга қайтувчимиз», деган сабрлиларга хушхабар беринг».

Ўзбекистон мусулмонлари идораси

Бугун, 28 ноябрь куни Ўзбекистон халқаро ислом академиясида Имом Бухорий қаламига мансуб “Саҳиҳи Бухорий” асарининг ўзбек тилидаги шарҳи китобининг тақдимоти ўтказилди.

Унда Президент маслаҳатчиси, Ўзбекистон халқаро ислом академияси ректори Музаффар Комилов, Республика Маънавият ва маърифат маркази раҳбари Минҳожиддин Ҳожиматов, IRCICA Бош директори маслаҳатчиси, тарих фанлари доктори, профессор Аширбек Мўминов, Ўзбекистон мусулмонлари идораси раисининг биринчи ўринбосари Ҳомиджон Ишматбеков, Академия профессор-ўқитувчилари, таниқли олимлар, диний-маърифий соҳа вакиллари ҳамда илмий-тадқиқот марказлари ходимлари иштирок этишди. Шунингдек, тадбирда қатнашчилар ZOOM дастури орқали орқали онлайн тарзда иштирок этишди.

Тадбир Ўзбекистон халқаро ислом академияси, Ўзбекистон мусулмонлари идораси, Имом Бухорий халқаро илмий-тадқиқот маркази ҳамда “Ҳилол-нашр” матбаа нашриёти билан ҳамкорликда ташкил этилди.

Маросимни Имом Бухорий халқаро илмий-тадқиқот маркази директори Шовосил Зиёдов олиб борди.

Тақдимотни Ўзбекистон халқаро ислом академияси ректори Музаффар Комилов кириш сўзи билан очиб, ўз нутқида Ўзбекистон – дунё тамаддуни ва ислом дини ривожига улкан ҳисса қўшган улуғ алломалар, азиз-авлиёлар юрти сифатида шуҳрат қозонганини таъкидлади. Давлатимиз раҳбари ташаббуси билан аждодларимиз меросини илмий асосда чуқур ўрганиш, миллий қадриятларимизни асраб-авайлаш юзасидан амалга оширилаётган эзгу ишлар юртимизнинг дунё ҳамжамиятидаги нуфузини янада оширишга хизмат қилаётганини алоҳида эътироф этди.

Тадбир давомида Ўзбекистон мусулмонлари идораси раисининг биринчи ўринбосари Ҳомиджон Ишматбеков сўзга чиқиб, Ислом оламида “Имом ал-Муҳаддисийн” (Барча муҳаддисларнинг пешвоси) деб ном берилган ҳадис илмининг буюк олими Имом ал-Бухорий раҳимаҳуллоҳнинг “Ал-Жомеъ ас-Саҳиҳ” асари Аллоҳ таолонинг каломи Қуръони каримдан сўнг асосий манба сифатида эътироф этилиши, бирор ҳадис манбаси “Саҳиҳ ал-Бухорий” китоби каби шарҳланишга мушарраф бўлмагани, унга бир юз элликка яқин шарҳлар ёзилгани, турли тилларга таржима қилингани, хусусан, мазкур нашр тадқиқот, асл матн, илмий-изоҳли таржима ва зарур шарҳлардан иборатлиги, кўп жилдлик шарҳнинг илк тадқиқот қисми эса муҳаддислар султонининг ҳаёти ва ижоди, ҳадис илми тарихи, унинг ривожланиши, у ҳақдаги назарий масалалар, мазкур соҳада қалам тебратган олимлар ва уларнинг асарлари, айниқса, санад силсилаларига бағишланганини алоҳида таъкидлаб, мазкур мўътабар тўплам – “Саҳиҳи Бухорий”нинг илмий-изоҳли таржимаси ва шарҳининг илк нашрини барчамизга манфаатли қилишини сўраб хайрли тилакларни билдирди.

Шунингдек, тақдимотда сўзга чиққанлар буюк алломанинг ибратли ҳаёт йўли ва бой илмий-маънавий меросини ҳар томонлама чуқур ўрганиш, тадқиқ этиш, кенг афкор оммага, хусусан, ёшларга етказиш муҳим эканини таъкидлашди.

Тадбир ниҳоясида қатнашчилар ўзларини қизиқтирган саволлар билан мурожаат қилишди.

 

Ўзбекистон мусулмонлари идораси Матбуот хизмати

Страница 1 из 1828

Янгиликлар

Top