muslim.uz
Мадҳия – миллий ғуруримиз
Давлат рамзлари мамлакат суверенитетини ифодаловчи муқаддас тимсоллардир. Ўзбекистоннинг Давлат рамзлари халқимизнинг шон-шарафи, тарихий хотираси ва интилишларини ўзида мужассам этиб, ҳар биримизга фахру ифтихор бағишлайди. Улар маънавиятнинг энг муҳим тимсолларидир. Шу боис мадҳиямиз янграганда биз руҳан жўшқинликни, азму шижоатимиз ошганини қалбимизда ғурур ва буюк истиқболга ишонч туйғусини ҳис этамиз.
Ўзбекистонда мустақиллик йилларида халқимизнинг маънавиятини юксалтириш, ёшларни ватанпарварлик руҳида тарбиялаш масаласига алоҳида эътибор қаратилмоқда. Ўзбекистон Республикаси Мадҳияси ёшларда Ватанга муҳаббат, бой тарихимизга, миллий ўзлигимизга чуқур ҳурматни шакллантиришда, фарзандларимизнинг ҳар томонлама баркамол ва етук инсонлар бўлиб вояга етишида муҳим тарбиявий восита бўлиб ҳизмат қилмоқда. Мадҳияда мардона ва шарафларга бой ўтмишимиз, миллий анъана ва қадриятларимиз, тинчлик, осойишталик, миллатлараро тотувлик ва биродарлик каби умуминсоний туйғуллар тараннум этилган.
Давлат рамзларининг муқаддаслигини, улар бизга юрт манфаати ҳар нарсадан устунлигини англатиб, эслатиб туришини ҳар биримиз, айниқса, ёш авлоднинг ёдда тутиши мақсадга мувофиқдир.
Одилжон Нарзуллаев,
Зангиота туманидаги «Имоми Аъзам» масжиди имом-хатиби
Муфтий ҳазрат Париждаги элчихонага ташриф буюрди
Аввал, муфтий Усмонхон Алимов ҳазратлари Франциянинг Париж шаҳрида бўлиб ўтадиган Халқаро мусулмонлар форумида иштирок этиш учун жўнаб кетганлари ҳақида маълумот берган эдик.
Муфтий ҳазратлари Тошкент – Москва – Париж йўналиши орқали Парижга етиб келдилар. Муфтий ҳазратни Париж шаҳри аэропортида Россия мусулмонлари диний идораси вакиллари ҳамда Ўзбекистоннинг Франциядаги элчиси Сардор Рустамбоев бошчилигидаги элчихонамиз ходимлари кутиб олди.
Куни кеча, 9 декабрь куни Ўзбекистон мусулмонлари идораси раиси, муфтий Усмонхон Алимов ҳазратлари Франция давлатига ташрифлари доирасида Париж шаҳридаги Ўзбекистон элчихонаси фаолияти билан яқиндан танишдилар.
Муфтий ҳазратларига Ўзбекистоннинг Франциядаги элчиси Сардор Рустамбоев томонидан олиб борилаётган кенг кўламли фаолият тўғрисида маълумотлар тақдим этди.
Бугунги кунда Ўзбекистон ва Франция ўртасидаги муносабатлар янада кенг кўлам касб этмоқда. Ҳамкорлик алоқаларининг ривожланганини Франция Президенти Эммануэль Макроннинг таклифига биноан Президентимиз Шавкат Мирзиёевнинг жорий йилда ушбу мамлакатга расмий ташрифи, икки томонлама муносабатларнинг юқори даражага кўтарилганидан далолат беради. Ушбу учрашувлар натижаси ўлароқ, кўплаб ҳамкорликлар юзасидан шартномалар ва келишувлар имзоланган эди.
Франция сафари давом этмоқда.
Ўзбекистон мусулмонлари идораси Матбуот хизмати
Нишонга урилган гаплар: “Ичи кир одам пок инсонларнинг борлигини ҳазм қила олмайди”
Қуйида келтириладиган фикрлар, ҳикматлар ижтимоий тармоқлардаги турли саҳифалардан олиб таржима қилинган. Бундан ташқари саҳобаи киромлар, улуғ олимлар, Яқин Шарқ, Осиё, Европа ва Америка мутафаккирларининг бир қатор фикрлари ҳам берилган.
*****
Яхши кўришимиз хатоларни кўришдан кўзларимизни “кўр” қилиб қўяди. Ёмон кўриш эса ҳақиқатларни кўришдан кўзларимизни “кўр” қилиб қўяди.
“Тарих муҳрлаган сўзлар”
*****
Умрим ўтгани сайин одамларнинг гапларига эътиборим камайиб бориб, (айтадиган гапларига нечоғли) амал қилишларини кўриш билан кифояландим.
“Тарих муҳрлаган сўзлар”
*****
Қолоқликнинг энг муҳим сабабларидан бири – бирор вазифани ўша ишнинг мутахассиси бўлмаган кишига топширишдир.
“Тарих муҳрлаган сўзлар”
*****
Ичи кир одам (жамиятда) пок инсонларнинг борлигини ҳазм қила олмайди.
“Тарих муҳрлаган сўзлар”
*****
Бахил кимса очликдан вафот этса, унинг фарзандлари меъда сустлиги (овқатни ҳазм қила олмаслик) касаллигидан ўладилар.
“Тарих муҳрлаган сўзлар”
*****
Ҳар қандай муносабатнинг бошида ҳиссиётлар, охирида эса ахлоқ кўринади.
Нажиб Маҳфуз
*****
Ақлнинг қуввати ҳақиқатни кўтаришига қараб ўлчанади.
“Тарих муҳрлаган сўзлар”
*****
Орзу тузга ўхшайди. Туз ўзи қоринни тўйдирмайди, лекин таомга маза киритади.
“Тарих муҳрлаган сўзлар”
*****
Оқил одам фикрлари ҳақида гапиради. Закий одам амаллари ҳақида гапиради. Аҳмоқ эса еган таомлари ҳақида гапиради.
“Тарих муҳрлаган сўзлар”
*****
Сенинг ёнингда юрадиган баъзи шахслар аслида сенга эмас, ўзларининг сендаги эҳтиёжларига мухлисдирлар. Ишлари битиши билан ихлослари ҳам ўзгаради.
“Тарих муҳрлаган сўзлар”
*****
Гоҳ-гоҳида ҳаммадан узоқлашиб, бирорта одам тополмайдиган жойга кетиб, ёлғиз бўлишни истаб қоламиз.
Шамс Табризий раҳимаҳуллоҳ
*****
Ўғлинг сенинг иккинчи имкониятингдир. Йўқотганларингни у билан тўлдир.
“Тарих муҳрлаган сўзлар”
*****
Модомики тирик экансан, нафсинг билан курашишни тўхтатма!
“Тарих муҳрлаган сўзлар”
*****
Фарзандларни бино қилиш (тарбия қилиш) уларга бино қуришдан муҳимроқдир.
“Тарих муҳрлаган сўзлар”
*****
Интернет материалларидан тўплаб, таржима қилувчи
Нозимжон Иминжонов
Исломий фанлар бўйича Бутунроссия олимпиадаси натижалари эълон қилинди
Қозон шаҳрида Россия Ислом институтининг 20 йиллиги доирасида исломий фанлар ва араб тили бўйича XI Бутунроссия олимпиадаси бўлиб ўтди. Унда «Ислом қонунлари», «Ислом асослари» ва «Араб тили» фанлари бўйича энг кучлилар аниқланди.
Азон интернет нашрининг хабар беришича, олимпиадада Татаристон, Бошқирдистон, Доғистон, Чеченистон, Мордовия ва Россиянинг бошқа ҳудудларининг диний таълим муассасаларидан келган толиби илмлар иштирок этишди. Олимпиада толибларнинг араб тилида сўзлашиш ва ёзишдаги билиш даражасини аниқлаш ҳамда Қуръони Каримни тўғри ва чиройли ўқиш бўйича ўтказилди.
Жорий йилнинг 7 декабрь куни олимпиада ғолибларини тантанали тақдирлаш маросими бўлиб ўтган. Ғолиблар қуйидаги номинациялар бўйича тақдирланди:
Араб тили
1. Салимов Муҳаммад (Доғистон Ислом университети)
2. Малаков Шамиль (Россия Ислом университети, Грозний)
3. Шарапов Эльдар (Россия Ислом институти, Қозон)
Ислом асослари
1. Омаргажиев Исмаил (Имом Ашъари номли Ислом университети)
2. Мисехожиев Баудин (Россия Ислом университети, Грозний)
3. Нуриддинов Муҳаммад (Муҳаммад Ариф номли Ислом университети)
Ислом қонунлари
1. Зубаиров Саид-Афанди (Доғистон Ислом университети)
2. Сабуров Зурибек (Қозон инновация университети)
3. Алиев Расул (Имом Ашъари номли Ислом университети)
Ислом қонунлари (мадраса)
1. Муҳаммадов Муҳаммад (Муҳаммад Ариф номли мадраса)
2. Вадзижев Исраил (Ингушетия Ислом коллежи)
3. Салимов Шоҳимардон (Марям Султонова номли мадраса)
Қозон шаҳри ҳокимлигининг махсус совғаси
1. Загаев Али (Чеченистон Республикаси)
2. Мусаев Фарҳад (Доғистон Республикаси)
3. Шураев Аскар (Қабардин – Болқор Республикаси)
Ўзбекистон мусулмонлари идораси Матбуот хизмати
Турмуш ўртоғингиздан шикоятингиз бор-ми?
Араб диёрларидан бирида қози бўлиб ишлайдиган киши ҳикоя қилади.
Кунларнинг бирида олдимга эри билан ажрашмоқчи бўлган аёл келди. Ундан: “Нима сабабдан эрингиз билан ажрашмоқчисиз?” деб сўрадим.
У: “Ҳозир, ҳаммасини айтиб бераман”, деди ҳаяжонланиб.
“Жуда яхши. Унда вараққа эрингизнинг салбий сифатларини ёзинг!” дедим.
Аёл бироз ўйланиб туриб, вароққа қуйидагиларни ёзди:
- Эрим мени ҳақорат қилади.
- Эрим жуда ҳам зиқна. Истаган нарсамни сотиб олишимга пул бермайди.
Унинг сўзларини тинглагач: “Ажрашишингизга шуми сабаб?” дедим.
Аёл: “Қандай қилиб бундай эр билан яшаш мумкин”, деди аччиқланиб.
Мен: “Энди бу қоғозга эрингизнинг ижобий сифатларини ёзинг!” дедим.
Аёл бироз уйланиб туриб: “Эримда бирорта ижобий сифат топа олмадим” деди-да, қоғозни қайтариб берди.
Мен ҳайрон бўлиб: “Наҳотки, оила қурганингизга қанча бўлди?” деб сўрадим.
У: “Ўн икки йил. Тўртта фарзандимиз ҳам бор”, деб жавоб берди.
“Эрингиз қаерда ишлайди?” дедим.
Аёл: “Нуфузли ташкилотда ишлайди. Маоши ҳам анчагина”, деди.
Ундан яна: “Одатда эрингиз уйга қачон қайтади?” деб сўрадим.
У: “Ҳамиша аср намозидан кейин қайтади. Келиши билан болаларим билан уйнайди”, деди.
Аёлнинг қўлига оқ қоғозни бериб, “Биринчи ижобий сифатни ёз”, дедим. У: “Эрим ҳар куни ишдан қайтгандан сўнг фарзандларим билан уйнайди”, деб ёзди. Сўнгра унинг сўзларидан улар ҳар йили бирор жойга дам олишга боришларини ҳам билдим. Ундан бирин-кетин бошқа саволларни сўрадим. У саволларимга жавоб берар ва эридан ижобий сифат деб топган ишларимни қоғозга туширар эди. Бир зумда вароқдаги ижобий сифатлар 12 тага етди.
Ижобий сифатлар ёзилган вароқни аёлнинг ўнг қўлига, салбий сифатлар ёзилган вароқни эса чап қўлига тутқазиб: “Энди эрингиздан ажрашасизми?” дедим.
Аёл бўлаётган ишдан ҳайрон бўлиб: “Нима дейишимни ҳам билмай қолдим. Аллоҳ гуноҳларимни кечирсин. Лекин ҳақоратлайдиган ва бахиллик қиладиган эр билан қандай ҳаёт кечириш мумкин? деди.
“Эрингиз сизни ҳақорат қилиши ёки сизга нисбатан бахиллик ила муомалада бўлишини ҳаргиз оқламайман. Бироқ, ҳар бир инсонда салбий сифатлар билан бирга ижобий сифатлар ҳам бўлади. Энди ҳақоратлаши ва бахиллигига келадиган бўлсак, уни муолажасини қилса бўлади. Аммо шуни аниқ билинг-ки, бу салбий сифатларнинг давоси ажрашиш эмас”.
Аёл қозининг сўзи тинглагач: “Менга эртагача вақт беринг, уйлаб кўрай, кейин жавобимни айтаман”, деб маҳкамадан чиқиб кетди. Шундан сўнг аёл қозининг олдига бошқа қайтиб келмади...
Доктор Ҳассон Шамси Бошанинг “Эр-хотин иккисига айтиладиган насиҳатлар” китобидан
Абдушукур МУРАДОВ таржимаси
Янгиликлар
