muslim.uz
Нишонга урилган гаплар: “Туннинг зулмати кучайгани тонг яқинлигидан дарак!”
Қуйида келтириладиган фикрлар, ҳикматлар ижтимоий тармоқлардаги турли саҳифалардан олиб таржима қилинган. Бундан ташқари саҳобаи киромлар, улуғ олимлар, Яқин Шарқ, Осиё, Европа ва Америка мутафаккирларининг бир қатор фикрлари ҳам берилган.
*****
Фақирлар бойлардан кўра кўпроқ қўли очиқроқ, сахийроқ бўлишади. Чунки, улар эҳтиёж сезгиси нималигини жуда яхши билишади.
"Ховатир роқия журнали"
*****
Савол берувчилар турлича бўлар экан. Шундай хулосага келинди.
- Билмаганини билиш учун сўровчилар.
- Домланинг билимини синаш учун сўровчилар.
- Жавобни бошқа домланинг жавоби билан солиштириш учун сўровчилар.
- Қайсидир масалада рухсат олмагунча кўплаб домлалардан сўровчилар.
- Бошқалар эшитиб, билиб олсин деган мақсадда сўровчилар.
- Домлани қийин вазиятга тушириш учун ихтилофли, фитнали саволларни сўровчилар.
- Ўртада туриб сўраб берувчи, воситачи сўровчилар.
- Реал воқеликда содир бўлмаган нарсаларни сўровчилар.
- Ўзига фойдасиз нарсалар хусусида сўровчилар.
- Сўрайдиган зарур нарсасини масжидга бориб сўраш ўрнига, кўчаларда, машинада домлага дуч келиб қолсагина сўровчилар.
*****
Жим туришларнинг барчаси ҳам розилик, хотиржамлик аломати бўлавермайди. Айрим жим турувчиларнинг ичида минг бир ҳикояси бўлади.
*****
Ортингиздан бақириб, шовқин кўтаришяптими? Кўпроқ сизни чайнашяптими? Парво қилманг, чунки улар сиздан орқада. Сиздек бўлолмагани учун ичини ҳасад кемириб ётибди. Чинорга, теракка кимдир тош отганини кўрганмисиз? Кўрмагансиз, тўғрими? Чунки, чинорнинг ва теракнинг еса бўладиган, мазали меваси йўқ. Олма, ўрикка кўпчилик тош отади. Керак бўлса, улар пишмасидан туриб ейишга қизиқиб, тош отилади.
Олдинга интилишдан, илмдан, ижоддан тўхтаманг.
*****
Ёзганингни ўқимайдиган одамга ёзишинг, олдингга келмайдиган кишини кутишинг, муҳаббатингни ҳис қилмайдиган одамни яхши кўришинг ва сенга эҳтиёжи тушмайдиган кишига эҳтиёжинг тушиши аламлидир.
*****
Гапираётганингда, сенга тикилиб, жим турганларнинг барчаси ҳам гапингни тинглаётган бўлавермайди. Айримлар гапириш навбатини кутиб жим туради.
*****
- Машаққатли ишингиз ҳар бир ишсизнинг орзусидир.
- Тўполончи фарзандингиз ҳар бир бефарзанднинг орзусидир.
- Кичкина уйингиз ҳар бир қочоқнинг орзусидир.
- Озгина молингиз ҳар бир қарздорнинг орзусидир.
- Офиятдалигингиз ҳар бир беморнинг орзусидир.
- Табассумингиз ҳар бир сиқилганнинг орзусидир.
- Аллоҳ сизни сатр қилгани ҳар бир шарманда бўлган кимсанинг орзусидир.
- Истиқоматда юрганингиз гуноҳ қилган айрим кишиларнинг орзусидир.
- Ҳамд ва ризони ҳаёт йўлингиз қилиб олинг.
- Берган неъматлари учун Аллоҳга ҳамд бўлсин!
*****
Эҳтиром заифлик эмас, тарбиядир.
Узр сўраш хорлик эмас, хулқдир.
*****
Инсоннинг бадани, кийими кир бўлса, уни совун, шампун ва яна бошқа воситалар билан тозалайди. Аммо қалб кирланса, уни совун билан поклашнинг иложи йўқ. Қалбнинг совуни - истиғфордир. Истиғфорни кўп айтиш билан қалб покланади. Аста-секин бу поклик баданга ҳам ўтади. Танадаги асосий аъзо бўлмиш қалб яхши бўлса, қолган барча аъзолар ҳам яхши бўлади. Агар қалб бузилса, бошқа аъзолар ҳам бузилади.
*****
Эҳтимол, ота-онанг сенга сен истаган нарсангни беролмагандир. Лекин, шуниси аниқки, улар сенга ўзларидаги бор нарсаларини беришган!
*****
Туннинг зулмати кучайгани тонг яқинлигидан дарак!
*****
Интернет материалларидан тўплаб, таржима қилувчи
Нозимжон Иминжонов
Ўзбекистонда диний таълим соҳаси: рақамлар ва таҳлиллар
ЎМИ Матбуот хизмати
“Меҳр-мурувват карвони” йўлга чиқди
Ислом – меҳр-мурувват ва саховат дини. Инсонларга моддий кўмак бериш, уларнинг оғирини енгил қилиш, қалбларига хурсандчилик киритишга дини мубинимизда тарғиб этилади. Ҳазрати Пайғамбаримиз соллаллоҳу алайҳи васаллам “Модомики бир банда ўз биродарига ёрдам беришга уринар экан, Аллоҳ таоло ўша бандасига ёрдам беради”, деганлар.
Муҳтарам Юртбошимиз ташаббуслари билан ташкил этилган “Вақф” хайрия жамоат фонди томонидан халқимизнинг оғирини енгил қилиш, муаммоларини бироз бўлсада аритиш, дилларига хушнудлик олиб кириш мақсадида кўплаб хайрия ишлари олиб борилмоқда. Шу мақсад доирасида меҳрибонлик, саховат ва нуронийлар уйлари, шифохоналар, беморлар, мактаб-интернатлари, моддий етишмовчилиги бор хонадонлар, боқувчисини йўқотган оилаларга беғараз ёрдамлар кўрсатиб келинмоқда.
Ана шундай хайрия ишларнинг давоми сифатида “Вақф” хайрия жамоат фонди ўзнинг янги “Меҳр-мурувват карвони” номли республикамиз бўйлаб хайрия тадбири бошлади.
Кеча автомашинага ортилган озиқ овқат маҳсулотлари, кийим-кечаклар, ногиронлик аравачалари ва диний-маърифий адабиётлар Қорақалпоғистон ва Хоразм вилояти томон йўлга тушди. Ушбу мурувват туҳфалари орасида “Тафсири Ирфон”, “Ҳазрати Қусам ибн Аббос”, “Ўзбекистон уламолари” сингари диний-маърифий китоблар, спорт кийимлари, ногиронлик аравачалари ҳамда шакар ва ўсимлик ёғ кабиларнинг бўлиши ўксик қалбларга қувонч улашади, албатта.
Ҳафта охирига қадар мана шундай хайриялар юзлаб меҳрга ташна оилаларга тақдим этилади.
Ўзбекистон мусулмонлари идораси Матбуот хизмати
Мақтовга арзигулик ташаббус
Самарқанд вилояти имом-хатиблари ҳафтанинг ҳар бир кунини ўзига хос тарзда турли хил савоб ишлар қилишни ўзларига дастурил амал қилиб олганлари ўзининг ижобий самарасини бермоқда. Жумладан, ҳафтанинг чоршанбаси Самарқанд вилояти имом-хатиблари учун халқ турмуш тарзини ўрганиш куни ҳисобланади. Ўтган йилнинг ёз фаслидан бошлаб самарқандлик имомлар ҳар ҳафтанинг чоршанба куни аҳоли яшаш уйларига ташриф буюриб, турмуш тарзлари билан яқиндан танишиш, мавжуд муаммоларини бартараф этишга кўмаклашиш ишларига катта эътибор қаратиб келмоқдалар.
31 октябрь, чоршанба куни ҳам ушбу анъана давом эттирилди. Юзга яқин хонадонларга ташриф буюрилиб, аниқланган муаммоларга доир ечимлар ахтарилди. Кўплаб панду насиҳатлар қилинди. Узоқ муддатга хорижда ишлаб қайтганлар билан суҳбатлар ўтказилди. Жумладан, Самарқанд шаҳар “Оби Раҳмат” жоме масжиди имом-хатиби А.Маматқулов томонидан, ҳомийлар кўмагида “Оби Раҳмат” маҳалласида яшовчи, боқувчисини йўқотган Р.Абдуллоеванинг ҳолидан хабар олиниб, битта қўй эҳсон қилинди.
Каттақўрғон шаҳар “Муҳаммад Нақиббек” жоме масжиди имом- хатиби А.Назаров “Меҳржон” МФЙда яшовчи Бегматовлар хонадонига ташриф буюрди. Хонадонда 5 та хўжалик яшаётган бўлиб, ўзаро келишмовчиликлар юзага келгани маълум бўлди. Уларга қариндошлик ҳақлари борасида насиҳат қилиниб, кўпроқ меҳнат қилишга, бугунги кундаги имтиёзлардан фойдаланиб, уй жойли бўлишга чақирилди.
Самарқанд тумани “Хўжа Аҳрори Валий” жоме масжиди имом-хатиби Б.Шарипов “Хўжа Аҳрори Валий-1” маҳалласида истиқомат қилувчи, авф муносабати билан озодликка чиққан И.Бахтиёрзода билан суҳбат ўтказилди ва жамият ишларида фаол бўлишга ундалди.
Самарқанд вилояти бош имом-хатиби Булунғур тумани ҳожилари билан учрашиб, уларни ижтимоий-маънавий тадбирларда ўзларининг панду насиҳатлари билан иштирок этишларига чорлади.
Мана шундай ҳафтанинг ҳар бир кунида аҳоли орасида турфа хил маънавий-маърифий ишларни амалга оширишни белгилаш каби илғор тажрибани бошқа вилоятлар имом-хатиблари фаолиятида ҳам қўлланса, жуда ҳам яхши иш бўлар эди.
Ўзбекистон мусулмонлари идораси Матбуот хизмати
Пойтахтда яна бир масжид қайта чирой очди
Бугун, 1 ноябрь куни Тошкент шаҳри Чилонзор тумани “Муҳсинхон тўра” жоме масжиди биносининг янгидан бунёд этилиши муносабати билан очилиш маросими бўлиб ўтди.
Юртимиздаги таниқли уламолар, имом-хатиблар ва кўплаб намозхонлар ушбу масжидда пешин намозига жам бўлдилар ва ўзларининг илиқ сўзларини билдирдилар. Сўзга чиққан нотиқлар, мана шундай жомени қайтадан барпо этилиши муҳтарам Президентимиз томонларидан амалга оширилаётган диний-маърифий соҳадаги ислоҳотларнинг ёрқин намунаси экани, мўмин-мусулмонларга катта туҳфа бўлгани ва шундай гўзал масжидда ибодат қилишдан бахтиёр эканларини изҳор қилишди.
Қурилиш ишларига энг моҳир уста ва муҳандислар жалб этилди. Бундай эзгу ишга ҳисса қўшиш истагидаги қурувчилар ўз маҳоратларини кўрсатиб, бор куч-ғайрат билан меҳнат қилишди.
Очилиш маросимига ташриф буюрганлар масжиднинг гўзал шаклда, замонавий услублар ва миллий қадриятларимизни ўзида акс этган биносини кўздан кечириб, ушбу масжид мусулмонлар учун мўътабар маскан сифатида хизмат қилишини алоҳида таъкидлаб, хайрли дуолар қилдилар.
Ўзбекистон мусулмонлари идораси Матбуот хизмати
Янгиликлар
