Куни кеча, 13 декабрь куни Ўзбекистон мусулмонлари идораси раиси, муфтий Усмонхон Алимов ҳазратлари Қашқадарё вилояти Қарши туманидаги “Абу Муин Насафий” ҳазратларининг мангу қўним топган мақбараларига ташриф буюриб, зиёратгоҳда олиб борилаётган қурилиш ва ободончилик ишлари билан яқиндан танишдилар.

Маълумки, шу йилнинг январь ойида муҳтарам Президентимиз Қашқадарё вилоятига ташрифлари чоғида Абу Муин Насафий мақбарасини обод зиёратгоҳга айлантириш, зиёратчиларга зарур шароитлар яратиш, бу масканда кутубхона ташкил этиш, буюк олим асарларини таржима қилиб, халққа етказиш бўйича тавсиялар берган эдилар. Шунга мувофиқ бу ерда катта бунёдкорлик ишлари амалга оширилмоқда, ақида илми бўйича мактаб, кутубхона ҳам қурилмоқда.

Давлатимиз раҳбари Абу Муин Насафий асарлари бугунги кун учун ҳам ғоят аҳамиятли экани, уларни нашр қилиб, мазмун-моҳиятини ёш авлодга етказиш зарурлигини алоҳида таъкидлаган эдилар. Мана шу топшириққа биноан аллома Абу Муин Насафийнинг бугунги кунда ҳам долзарб аҳамиятга эга бўлган “Табсиратул адилла” ва бошқа бир қатор асарлари ўзбек тилига таржима қилиниб, халқимизга туҳфа этилди.

Ўзбекистон мусулмонлари идораси Матбуот хизмати