Бугун, 12 апрел душанба куни Таровеҳ намозини ӯқиш бошланади.

Бисмиллаҳир Роҳманир Роҳим.

Таровиҳ – истироҳат маъносидаги "тарвиҳа" сўзининг кўплигидир. Тўрт ракат ўқиб, ортидан дам олингани учун бу намоз шундай номланган.
Рамазон ойи фазилатларга бойдир. Унинг фазилатларидан бири ой давомида хуфтон намозидан кейин таровеҳ намози ўқишдир. Пайғамбаримиз саллаллоҳу алайҳи васаллам таровеҳ намози ҳақида шундай деганлар:
"إِنَّ اللهَ فَرَضَ صِيَامَ رَمَضَانَ وَسَنَنْتُ لَكُمْ قِيَامَهُ فَمَنْ صَامَهُ وَقَامَهُ إِيْمَاناً وَاحْتِسَابًا خَرَجَ مِنْ ذُنُوبِهِ كَيَوْمٍ وَلَدَتْهُ أُمُّهُ" (رواه الإِمامُ النسائى عن عَبْدِ الرَّحْمَنِ ابن عوف، رَضِيَ اللَّهُ عَنْهُ).
яъни: “Аллоҳ таоло Рамазон рўзасини фарз қилди ва мен унинг қиёмини сизлар учун суннат қилдим. Кимки имон ва ишонч билан, савоб умидида рўза тутса ва кечалари қоим турса, онадан туғилган кунидагидек гуноҳлардан пок бўлади” (Имом Насоий ривоятлари).
Рамазоннинг кечаларида қоим бўлиш, деганда таровиҳ намозини адо этиш тушунилади. Демак, ихлос билан савоб умидида Рамазон рўзасини тутиб, таровиҳ намозларини ўқисак, Рамазон ойи тугаши билан онадан туғилган боладек гуноҳлардан фориғ бўламиз, иншааллоҳ.
Таровеҳ намозини ўқиш эркакларга ҳам, аёлларга ҳам таъкидланган суннатдир. Таровиҳни ёлғиз ўқиш мумкин, лекин жамоат бўлиб ўқилса, жамоатга ваъда қилинган ажру савобга эришилади. Икки киши ҳам жамоат ҳисобланади. Қанча жамоат кўп бўлса шунча савоби ҳам кўп бўлади.
Таровиҳ намозига азон ва такбир айтилмайди.
Таровиҳнинг ракатлари: Таровеҳ йигирма ракатдир. Ҳар икки ракатдан сўнг салом берилади. Тўрт ракатдан ўқиш ҳам жоиз. Ҳар тўрт ракат ўқилгандан сўнг тўрт ракат намоз ўқиладиган муддатча дам олиш мустаҳаб. Ушбу истироҳат пайтида тасбиҳ, таҳлил айтиш афзал. Бизнинг юртимизда қуйидагича тасбиҳни уч марта айтиш одат бўлган: Субҳаана зил мулки вал малакут. Субҳаана зил ъиззати вал ъазомати вал қудроти вал кибрияяяи вал жабарут. Субҳаанал маликил ҳаййиллази лаа янааму валаа ямуут. Суббуҳун қуддусун роббунаа ва роббул малааикати варруҳ. Лаа илааҳа иллаллоҳу настағфируллоҳ, насалукал жанната ва наъузу бика минан-наар.
Ушбу тасбиҳни бир киши ўқийди, қолганлар қулоқ солади. Тасбиҳни ёд олгунга қадар китобдан ўқиса ҳам бўлади. Юқоридаги тасбеҳнинг ўрнига киши ўзи билган дуоларини ўқиши ёки жим туриши ҳам мумкин.
Таровиҳнинг вақти – Хуфтон ва унинг суннатидан кейин бошланиб тонг отгунгачадир. Таровиҳни витрдан олдин ўқиш афзал. Витрдан кейин ўқиса ҳам жоиз. Ёлғиз намоз ўқигувчи киши Рамазонда ҳам витрни ёлғиз ўқиши мумкин.
Таровиҳнинг нияти – “Икки ракат таровеҳ намозини ўқишни ният қилдим, юзимни қиблага қаратдим, холисан лиллаҳи таоло Аллоҳу акбар”. Агар имомга иқтидо қиладиган бўлса, ниятга “ушбу имомга иқтидо қилдим” деган жумлани қўшади.
Таровиҳда қироат – Рамазон ойида Таровеҳ намози ўқиш давомида Қуръони каримни бир марта хатм қилиш суннатдир. Қуръони каримни тўла ёд олмаган киши ҳар ракатда “Фотиҳа” сурасидан сўнг ўзи яхши билган сурани ўқиши мумкин, ҳатто “Фотиҳа” сурасидан бошқа фақат битта сурани билган киши Таровиҳнинг ҳар ракатида шу сурани зам сура қилиши мумкин.
Таровиҳ намозини жамоат бўлиб ўқилса, имом овоз чиқариб қироат қилади. Унга иқтидо қилганлар қироат қилмасдан тинглаб туради. Таровиҳни ёлғиз ўқувчи эркак кишилар эса ихтиёрли, хоҳласа овоз чиқариб, хоҳласа овозсиз қироат қилади.
Витр намозини фақат Рамазон ойида жамоат бўлиб ўқилади. Бунда имом витрнинг ҳар уч ракатида жаҳрий қироат қилади. Қунут дуосини имом ҳам, муқтадийлар ҳам ичларида ўқийдилар (“Ал-Фатовол ҳиндийя” ва “Фатҳу бобил иноя” китоблари). Валлоҳу аълам.

Ўзбекистон мусулмонлари идораси
Фатво ҳайъати.

Бугун соат 15:30 да ижоза соҳиби Алижон қори Файзулла Махдум ўғли томонидан видеотасмага ёзилган 30 порали Қуръони карим тиловатининг онлайн тақдимоти muslim.uz сайти ва ижтимоий тармоқлардаги саҳифаларида ўтказилади. Унда ушбу хайрли иш ҳақида батафсил маълумотлар берилади.
Тақдимотда Алижон қори Файзулла Махдум ўғли ва бошқа нуфузли меҳмонлар иштирок этади.

Ҳурматли Қуръон шайдолари, muslim.uz портали жамоаси моҳи Рамазон муносабати билан мухлис халқимизнинг талаб ва истакларини инобатга олган ҳолда ижоза соҳиби Алижон қори Файзулла Махдум ўғлининг Қуръони каримнинг 30 жуз тиловатини ҳар куни саҳарлик чоғида Тошкент вақти билан эрталабки соат 04:00 дан бошлаб, бир порадан намойиш этишни режа қилинган.

Мана шундай ҳузурбахш кунларда Аллоҳ таолонинг каломи тиловатини қуйидаги линклар орқали томоша қилинг! Бу файзли онларни яқинларингиз ва аҳли оилангизга ҳам тортиқ этинг!

Аллоҳ таоло ушбу лойиҳамизни муборак қилсин!

Афғонистоннинг Ҳирот шаҳрида буюк шоир ва мутафаккир, атоқли давлат ва жамоат арбоби Мир Алишер Навоий таваллудининг 580 йиллигига бағишланган халқаро анжуман бўлиб ўтди, деб хабар бермоқда «Дунё» АА.

Тадбирда Навоий меросини ўрганиш бўйича дунёнинг етакчи адабиётшунослари, олимлари, илмий тадқиқотчилари ва оммавий ахборот воситалари ходимлари иштирок этди.

Ўзбекистондан таниқли навоийшунос олимлар, тадқиқотчилар, филологлар ва Алишер Навоий ижоди билимдонлари қатнашди. Улар ўз чиқишларида улуғ шоир шеърий ва насрий асарларида инсонпарварлик, маърифат, тинчликсеварлик каби юксак умуминсоний ғояларни куйлагани, ўзбек тилининг беқиёс сўз бойлиги ва чексиз ифода имкониятларини бутун жозибаси ва латофати билан намоён этиб, ер юзидаги миллионлаб китобхонлар қалбидан муносиб ва мустаҳкам ўрин эгаллаганини таъкидлади.

Анжуманда Ўзбекистон президенти номидан афғон халқига совға сифатида чоп этилган Алишер Навоийнинг «Хамса» асари тақдим этилди. Уни давлатимиз раҳбарининг Афғонистон бўйича махсус вакили Исматилла Эргашев топширди.

Ўзбекистон делегацияси вакиллари Ҳиротга амалий ташрифи давомида буюк шоир мақбарасини зиёрат қилди. Қуръон тиловат қилиниб, Алишер Навоий қабрига гуллар қўйилди.

Ўзбекистон мусулмонлари идораси матбуот хизмати

Ўзбекистон туризм ва спорт вазирлиги, Халқаро ислом академияси ва Ошпазлар ассоциацияси вакилларидан иборат мамлакатимиз делегацияси Санкт-Петербург шаҳрида бўлди, деб хабар бермоқда «Дунё» АА.

Ўзбекистон Бош консулхонаси маълумотига кўра, мамлакатимиз сайёҳлик салоҳияти тақдимоти ва икки давлат туроператорларининг “В2В” шаклидаги учрашуви бўлиб ўтди. Тадбирлар давомида иштирокчилар Ўзбекистон туризм саноатининг янги ютуқлари ва йўналишлари, хорижий сайёҳларни жалб қилиш имкониятлари билан яқиндан танишди.

Ўзбекистонда тарихий меъморий ёдгорликларни сақлаш ва замонавий меҳмонхона инфратузилмасини ривожлантиришга катта аҳамият берилаётгани, виза режимини либераллаштириш, чет эл фуқароларини рўйхатдан ўтказиш тартибини соддалаштириш, мамлакат туризм саноатининг ривожлантириш мақсадида имтиёз ва преференциялар бериш бўйича ишлар олиб борилаётгани таъкидланди.

Шунингдек, Ўзбекистон ва Санкт-Петербург шаҳарлари ўртасида туризм соҳасида ҳамкорликни ривожлантириш истиқболлари муҳокама қилинди. Россиянинг шимолий пойтахтида фаолият юритаётган сайёҳлик компаниялари мамлакатнинг Шимоли-Ғарбий федерал округи аҳолиси учун Ўзбекистонга янги тур пакетларни йўлга қўйишни режалаштираётганини маълум қилди.

Ўзбекистон делегацияси муфтий, Санкт-Петербург ва Россиянинг Шимоли-Ғарбий минтақаси мусулмонлари диний идораси раиси шайх Равиль ҳазрат Панчеев билан ҳам учрашди.

– Ўзбекистон мусулмонлари идораси билан зиёрат туризми, ислом қадамжоларини зиёрат қилиш йўналишидаги саъй-ҳаракатлар фаол ривожлантирилмоқда, – деди муфтий Р.Панчеев. – Шу маънода Ўзбекистон ўзининг тарихий ва муқаддас обидалари билан алоҳида мавқега эга. Мамлакатингизда Бухоро, Самарқанд ва бошқа кентлар каби инсонлар зиёрат қилишни истаган манзиллар жуда ҳам кўп”.

Ўзбекистон мусулмонлари идораси матбуот хизмати