muslim.uz
“Вақф” фонди 2022 йилнинг биринчи ярмида қандай ишлар амалга оширди?
Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлигида “Вақф” хайрия жамоат фонди ахборот хизмати раҳбари Саидаброр Умаров иштирокида брифинг ташкил этилди.
Қайд этилишича, жорий йилнинг олти ойи давомида “Вақф” фонди томонидан қарийб 7 миллиард сўм маблағ хайрия қилинган.
Жумладан, диний таълим муассасалари, илмий-тадқиқот марказлари фаолиятини молиялаштириш учун 37 миллион 217 минг 520 сўм, диний таълим муассасалари профессор-ўқитувчилари, ўқувчи-талабаларини моддий ва ижтимоий қўллаб-қувватлаш учун 721 миллион 402 минг 550 сўм, Ногиронлар жамияти аъзолари ва Махсус мактаб интернатларда таҳсил олаётган кўмакка муҳтож ҳамюртларимиз учун – 38 миллион 962 минг сўм, масжидлар қурилиши учун 211 миллион 550 минг сўм, масжидлар ва зиёратгоҳлар ходимларини моддий ва ижтимоий қўллаб-қувватлаш учун 71 миллион 900 минг сўм ажратилган.
ЎзА хабарига кўра, шу билан бирга, ночор, кўмакка муҳтож фуқароларга турли моддий кўринишда берилган ёрдамлар учун 2 миллиард 472 миллион 951 минг 31 сўм, аҳолининг ижтимоий ҳимояга муҳтож қатламлари, шу жумладан имконияти чекланган, ногиронлиги бор бўлган шахсларни моддий қўллаб-қувватлаш учун 1 миллиард 613 миллион 578 минг сўм, фонд томонидан ташкил этилган турли хайрия тадбирлари учун – 1 миллиард 134 миллион 938 минг 600 сўм, вилоят вакилликларининг маъмурий ҳаражатлари учун 131 миллион 257 минг сўм ҳамда сув танқис ҳудудлардаги аҳолига ичимлик суви чиқаришга қаратилган “Вақф сувлари” лойиҳаси учун – 245 миллион 400 минг сўм сарфланди.
Шунингдек, “Қуръони карим ва тажвид” курси тингловчиларини моддий қўллаб-қувватлаш учун 10 миллион 800 минг сўм, масжидлар ва диний таълим муассаларига тарқатилган диний-маърифий китоблар ҳамда дарсликлар учун 134 миллион 577 минг сўм сарфланган.
Қурбон ҳайити муносабати билан 2 минг 200 га яқин оилаларга 436 миллион 500 минг сўмлик озиқ-овқат маҳсулоти хайрия қилинган. Фонднинг 14 та ҳудудий филиаллари томонидан ҳомийларни жалб қилган ҳолда 8 та қора мол ва 72 та қўй қурбонлик қилиниб, ҳақдорларга улашилган.
Ўзбекистон мусулмонлари идораси Матбуот хизмати
Суннат: Ислом шариатининг иккинчи манбаси (1-қисм)
Пайғамбаримиз соллаллоҳу алайҳи васалламнинг суннатлари Ислом шариатининг муҳим манбаси сифатида Қуръони каримдан кейинги ўринда туради. Шу сабабли, суннатнинг ўрни асрлар ўтиши билан ўзгармади ва асло ўзгармайди ҳам.
Мусулмонлар орасида фиқий масалаларда турли хилма-хиллик мавжуд бўлсада, бироқ Қуръони карим ва Расулуллоҳ соллаллоҳу алайҳи васаллам суннатларининг аҳамияти бирор фақиҳ томонидан рад этилмаган. Аҳли сунна вал жамоадан ажралиб чиққан фирқалардан ташқари, ҳеч ким суннат Ислом шариатининг муқаддас манбаси эканини инкор қилмади.
Бугунги аҳвол ҳам шу тариқа давом этмоқда. Аммо афсуски сўнгги йилларда баъзи тоифалар суннатни шариат манбаи эканини инкор этиб, ҳадиси шарифларга тош отишга, суннатга нисбатан асоссиз шубҳаларни уйғотишга қаттиқ ҳаракат қилишмоқда. Натижада Ислом таълимотини асл манбадан ўргана олмайдиган баъзи мусулмонларда суннатга нисбатан шубҳали фикрлар пайдо бўлмоқда.
Қўлингиздаги ушбу рисола Ислом таълимотининг асл манбаларига таянган ҳолда суннатнинг асл ва холис таърифини баён этишга хизмат қилади. Бу рисола билан фойдасиз ҳамда бехуда баҳс-мунозара қилиш эмас, балки ҳақиқатни очиқ-ойдин қўрсатиш ният қилинди.
Муфтий Муҳаммад Тақий Усмоний ҳафизаҳуллоҳнинг
"Ислом шариатида суннатнинг ўрни" китобидан
Таржимон: Даврон НУРМУҲАММАД
Давоми бор...
Ўзбекистоннинг тарихий мероси Германия ОАВ нигоҳида
Германиянинг «Berliner Zeitung» газетасида Ўзбекистон бўйлаб саёҳат қилишнинг афзалликларига бағишланган мақола чоп этилди, деб хабар бермоқда “Дунё” АА мухбири. Унда бугунги кунда Ўзбекистон пойтахтидан республиканинг гўзал тарихий шаҳарларига қатновчи “Афросиёб” тезюрар поездида Ипак йўли йўналишлари бўйлаб саёҳат қилиш мумкинлиги таъкидланган. Шунингдек, Самарқанд шаҳридаги янги аэропорт бир неча ой олдин иш бошлагани ҳақидаги маълумот ўқувчилар эътиборига ҳавола қилинган.
Муаллифнинг ёзишича, Тошкент меъморий жиҳатдан Ўрта аср ёдгорликлари, замонавий кўп қаватли бинолари ва собиқ иттифоқ меъморчилиги анъаналари уйғунлиги билан ҳайратга солади.
«Тошкентдан мамлакат бўйлаб саёҳатчилар нафақат равон автомобиль йўллари, балки поездда ҳам саёҳат қилиши мумкин, — дейилади мақолада. – Йилнинг барча фаслларида эрталаб ва кечқурун Тошкентнинг бош вокзалидан Бухоро ва Самарқанд йўналишига қулай тезюрар “Афросиёб” поезди қатнайди. Максимал тезлиги 230 км/соат бўлган ушбу поезд Бухорогача бўлган 600 км йўлни уч соату 40 дақиқада босиб ўтади – бу авиапарвоздан кўра қулай ва арзондир”.
Муаллиф Бухоро ва Самарқанд шаҳарлари Марказий Осиёнинг маданий дурдоналари ҳисобланишини қайд этган. “Бухоро шаҳри 1997 йилда 2500 ёшга тўлди. Эски шаҳар марказида Бухоронинг диққатга сазовор жойи - 1127 йилда қурилган Минораи Калон жойлашган. Унинг баландлиги 47 метр, пойдевори эса 10 метр, - дея қайд этади манба. – Самарқанд 2750 йилдан бери мавжуд бўлиб, ушбу шаҳар дунёдаги энг қадимий масканлардан биридир. Ушба қадимий кент ўнлаб босқинчилардан омон қолган ва қатор вайронагарчиликларни бошдан ўтказганига қарамай, у эртакнамо улуғворлигини йўқотмаган”.
Мақолада қадимий ўзбек шаҳарларининг тарихий ва меъморий диққатга сазовор жойлари, турли табиат манзаралари ҳақида батафсил маълумотмотлар ўрин олган. Улар саёҳатчиларда катта қизиқиш уйғотади.
«Сайёҳ сифатида қаерга борманг, хоҳ меҳмон уйларида, хоҳ бозорларда ёки шунчаки кўчада маҳаллий аҳоли билан учрашсангиз, сиз таъсирчан меҳмондўстликни ва илиқликни ҳис қиласиз», деб ёзади «Berliner Zeitung».
Ўзбекистон мусулмонлари идораси Матбуот хизмати
Ҳожилик мартаба эмас! (видео)
Наманган шаҳридаги
"Яҳёхон Тўра" жоме масжиди имом хатиби
Хиромантия ёҳуд “келажак башоратчи”ларидан огоҳ бўлинг!
Хиромантия сўзи қадимги грек тилидаги χείρ-қўл ва μαντεία-фол очиш, гумон қилиш, тахмин қилиш сўзларидан келиб чиққан бўлиб, истелоҳда қўл тузилиши ва кафт изларига қараб инсон тақдирини олдиндан айтиб бериш билан шуғулланишликка айтилади.
Хиромантия, яъни қўл кафтига қараб инсоннинг келажагини башорат қилиш фақатгина тахмин-гумонларга асосланган бўлиб, ҳеч қандай илмий асосга эга эмас. Хиромантия ёлғиз Аллоҳ таолонинг Ўзи билиши мумкин бўлган нарсалар ҳақида бўлгани ҳамда гумонга асослангани учун динимизнинг асосий таълимоти – тавҳидга зиддир. Ислом дини ақидасининг асосларидан бири ғайбга, яъни кўз кўриб, қўл билан тутиб бўлмайдиган нарсаларга ишонишдан иборат.
Ислом манбаларида мунажжим ва келажак ҳақида хабар берадиганларга мурожаат қилиш тақиқланади. Зеро, фақат Аллоҳ таологина ғайб илмларини билувчидир. Бу ҳақда Аллоҳ таоло бундай марҳамат этади:
«Ғайб (яширин иш ва нарсалар) калитлари Унинг ҳузуридадир. Уларни Ундан ўзга билмас. Яна, қуруқлик ва денгиздаги нарсаларни (ҳам) билур. Бирор япроқ (узилиб) тушса (ҳам) уни билур. Ер зулматлари (қаъри)даги уруғ бўлмасин, ҳўлу қуруқ бўлмасин, (ҳаммаси) аниқ Китоб (Лавҳул-маҳфуз)да (ёзилган)дир», (Ал-Аном сураси, 59-оят).
«Айтинг: Аллоҳдан бошқа осмонлар ва Ердаги бирор кимса ғайбни билмас», (Ан-Намл сураси, 65-оят).
«Дарҳақиқат, Аллоҳнинг ҳузуридагина қиёмат (қачон бўлиши тўғрисида) билим бордир. У (хоҳлаганича) ёмғир ёғдирур ва бачадонлардаги нарса (ҳомила)ни билур. Бирор жон эртага нима иш қилишини билмас. Бирор жон қаерда ўлишини ҳам билмас. Албатта, Аллоҳ (ҳамма нарсани) билувчи ва хабардор зотдир, (Луқмон сураси, 34-оят).
Аллоҳ таоло ҳатто пайғамбарларига ҳам ғайб ишларини билдирмаган экан, энди фолбинларнинг ғайбни билишликни даъво қилишликлари мутлақо ҳақиқатга зиддир.
Расулуллоҳ соллаллоҳу алайҳи васаллам ҳам ўзларининг муборак ҳадисларида сеҳр ва фолдан қайтарганлар ҳамда сеҳргар ва фолбин олдига бориш, уларнинг гапини тасдиқлаш куфрга олиб боришлиги ҳақида кўп бора таъкидлаганлар. Расулуллоҳ соллаллоҳу алайҳи васаллам айтадилар: “Кимки башоратгўй ёки фолбиннинг олдига бориб, айтаётган гапини рост деб билса, у шубҳасиз, Муҳаммадга тушган нарсага куфр келтирибди” (Имом Абу Довуд, Имом Насоий, Имом Ибн Можа ривояти).
Расулуллоҳ соллаллоҳу алайҳи васаллам яна айтдилар: “Кимки башоратгўйнинг олдига бориб, ундан бирон нарсани сўраса ва уни тасдиқласа, қирқ кунгача унинг биронта ҳам намози қабул қилинмайди”. (Имом Муслим ривояти).
Шунингдек, хиромантия билан жуда кўп салбий ҳолатлар боғлиқ бўлиб, бу ҳақда Канаданинг Торонто Ислом университетининг катта устози Аҳмад Катти қуйидаги фикрларини баён этади: “Хиромантия-лоқайдлик ва дангасаликка олиб келади. Ишонувчан одамлар фирибгарларнинг бойишларига сабаб бўладилар”.
Дархақиқат, фолбин ва сеҳргарлар зарари фақат одамларнинг вақти, моли ва ҳаракати бекорга кетаётгани билан чегараланиб қолмайди. Бу зарар жиддий ижтимоий зиддатларга ҳам сабаб бўлади. Бу зарарларнинг энг кичиги одамлар ўртасида душманлик руҳи, ишончсизлик пайдо бўлиши ҳисобланади.
Фолбин, коҳиннинг ғайбдан берган хабарини тасдиқлаш ояти карима ва ҳадиси шарифга асосан куфр ҳисобланиши юқорида айтиб ўтилди. Шундай экан, Аллоҳ таоло барчамизни Ўзининг тўғри йўлидан адаштирмасин, эътиқодимизга футур етишига сабаб бўладиган амаллардан Ўзи сақласин.
Даврон Нурмуҳаммад
тайёрлади
Видеолавҳалар
