Ўзбекистонда COVID-19 тарқалишининг олдини олиш бўйича кўрилаётган чора-тадбирларга бағишлаб Покистонда виде мулоқот шаклида давра суҳбати ўтказилди, деб хабар бермоқда «Дунё» АА мухбири.
Давра суҳбати Ўзбекистоннинг Исломободдаги элчихонасида покистонлик экспертлар, давлат ва жамоат ташкилотлари раҳбарлари, журналистлар иштирокида ташкил қилинди.
“Дунё” АА мухбири тадбир иштирокчиларининг Ўзбекистонда коронавирус тарқалишига қарши кураш бўйича олиб борилаётган чора-тадбирлар ҳақидаги фикрлари билан қизиқди.
Тоҳир ФАРУК, «Daily Ittehad» газетаси бош муҳаррири:
– COVID-19 пандемияси 200 дан ортиқ давлатда қайд этилди ва тарқалишда давом этмоқда. Хусусан, ушбу касаллик Ўзбекистонга ҳам кириб борди. Аммо Президент Шавкат Мирзиёев раҳбарлигида мамлакатда коронавирусга қарши ўз вақтида ва самарали чоралар кўрилмоқда. Шаҳарларда ва вилоятлараро ҳаракатлар тўхтатилиб, аҳолининг кундалик эҳтиёжлари учун савдо шохобчалари одатдаги тартибда, аммо карантин қоидаларига риоя қилган ҳолда хизмат кўрсатишда давом этмоқда.
Сўнгги йилларда мамлакат раҳбарияти ташаббуси билан соғлиқни сақлаш тизимида олиб борилган муваффақиятли ислоҳотлар натижасида республикада мазкур юқумли касалликнинг тез тарқалишига қарши муносиб курашилмоқда. Ишонч билан айтиш мумкинки, Президент Шавкат Мирзиёевнинг алоҳида ғамхўрлиги, малакали шифокор ва тиббиёт ходимларининг саъй-ҳаракатлари натижасида Ўзбекистон ушбу муаммони бартараф эта олади.
Шунингдек, эпидемияга қарши курашда ўзбек халқининг юксак маънавияти, уюшқоқлиги ҳам қўл келмоқда. Жумладан, ҳукумат томонидан қабул қилинаётган барча мажбурий ва самарали чоралар аҳоли томонидан ижобий қарши олинмоқда.
Ана шундай юксак маърифат эгаси бўлмиш дўст Ўзбекистон халқига тинчлик, омонлик тилаб қоламан!
Ансар Меҳмуд БХАТТИ, «The Islamabad Post» газетаси бош муҳаррири:
– Президент Шавкат Мирзиёев томонидан COVID-19 эпидемиясининг Ўзбекистон фуқаролари орасида кенг тарқалишининг олдини олишга қаратилган барча саъй-ҳаракатларни қўллаб-қувватлайман. Шундай оғир вазиятда Ўзбекистон раҳбарияти бошқа давлатлардан ўз фуқароларини олиб келиш, улар учун зарур шароитларни яратишга алоҳида эътибор бераётгани ибратли.
Замонавий тиббий ускуналар билан жиҳозланган махсус карантин муассасаларининг қисқа фурсатда қуриб, фойдаланишга топширилгани мени ҳайратда қолдирди. Боиси бугун бундай ташкилотчилик ва карантин билан боғлиқ чораларни ўз вақтида амалга оширишда ривожланган давлатларнинг ғафлатда қолаётганига гувоҳмиз.
Сўзим сўнгида айтишни истардимки, ҳаётнинг бу синовли кунлари яқин вақтларда ортда қолади, Покистон – Ўзбекистон ўртасидаги кўп қиррали ҳамкорлик яна янги руҳда давом этади.
Сабаҳ АСЛАМ, Исломобод низоларни ҳал қилиш институти ижрочи директори:
– Дунёда фавқулодда вазият ҳукмрон. Барча давлатлар пандемия билан курашмоқда.
Ўзбекистонда COVID-19 тарқалишининг олдини олиш бўйича ўз вақтида амалга оширилган ташаббуслар нафақат республикада, балки бутун минтақада минглаб одамларнинг ҳаётини хавфдан сақлаб қолди. Ушбу чора-тадбирлар халқаро ҳамжамият томонидан юқори баҳоланмоқда.
Мамлакатда умуммиллий карантин эълон қилинди, барча ўқув муассасалар, шу жумладан мактаб ва университетлар ёпилди, эпидемия тарқалишининг олдини олиш учун жамоат ва диний йиғинлар ўтказилиши тақиқланди.
Мамлакатда барча зарур товар ва дори-дармонлар учун солиқларнинг камайтирилганини муҳим қарорлардан бири дейиш мумкин. Бундан ташқари, ҳукумат кўрсатмаларига мувофиқ, аҳолини давлат томонидан қўллаб-қувватлашнинг ноёб тажрибаси – нархларни назорат қилиш, унинг сунъий равишда ошиб кетишига йўл қўймаслик бўйича назорат тизими жорий этилди.
Шу ўринда таъкидлаш жоиз, Ўзбекистон раҳбарияти ўз халқи хавфсизлигини таъминлаш учун зарур чораларни кўраётган бир пайтда, фуқаролар ҳам карантин тартибларига қатъий риоя қилишлари керак.
Бугун дунё бўйлаб янграётган «Уйда қолинг ва хавфсиз бўлинг» чақириғига амал қилиб, вирусга қарши курашишга ўз ҳиссамизни қўшишимиз даркор.

Ҳамид МАҲМУД, Исломободдаги Ўзбекистон сайёҳлик маълумотлари маркази директори:
– COVID-19 коронавируси барчамизнинг ҳаётимиз учун бирдек хавф солмоқда. Давлатлар фуқаролар саломатлигини ҳимоя қилиш чораларини кўрмоқда. Бу жараёнда Ўзбекистон Президенти раҳбарлигида юртингизда амалга оширилаётган ишларни ижтимоий тармоқлар, телевидение ва оммавий ахборот воситалари орқали кузатиб боряпман. Айтишим мумкинки, Покистон томони Ўзбекистоннинг инсонлар ҳаётини ҳимоя қилиш борасидаги саъй-ҳаракатларини юқори баҳолайди.
Ҳукумат глобал пандемия динамикасини ўз вақтида ва холис баҳолаб, мамлакатда коронавирус кириб келиши ва тарқалишининг олдини олиш учун махсус комиссия тузди. Ҳудудларда махсус мутахассислардан иборат тезкор гуруҳлар жойлаштирилди.
Ўзбекистоннинг ушбу қийин даврдан тез орада ўтиб олишига, мамлакатларимиз ўртасидаги дўстлик ришталари эса ҳар қачонгидан-да, мустаҳкамланиб боришига шубҳа йўқ.

Ўзбекистон мусулмонлар идораси матбуот хизмати

Глобал аҳамият касб этаётган коронавирус пандемияси дунёнинг 200 дан зиёд мамлакатларини қамраб олди. Бугун ушбу вирусга қарши давлатлар нафақат ички чора-тадбирларни амалга оширмоқда, балки икки ва кўп томонлама ҳамкорлик асосида масалага биргаликда ечим топишга интилмоқда.
Ўмон Султонлигининг Ўзбекистондаги Фавқулодда ва мухтор элчиси Аҳмад Саид Ал Катири «Дунё» АА мухбирига берган интервьюсида юртимизда ушбу эпидемияга қарши кураш мақсадида амалга оширилаётган ишлар ҳақида фикр билдирди.
– Коронавирус пандемияси дунёнинг ўзаро боғлиқлиги, ҳеч бир мамлакат глобал муаммони якка ўзи ҳал қила олмаслигини яққол кўрсатди. Ушбу умумий муаммони бартараф этиш учун барчамиз бирдамлик руҳида ҳаракат қилишимиз керак.
Ўзбекистон коронавирус тарқалишининг олдини олиш учун қатъий чоралар кўриб, тадбирларни изчиллик асосида амалга оширишга қаратилган назорат стратегиясини ишлаб чиқди. Қабул қилинган баъзи тартиблар инсонлар учун бироз ноқулайликлар келтириши мумкиндир. Аммо ушбу юқумли вирус тарқалишининг олдини олиш учун шу каби тадбирлар жуда зарур. Ўз навбатида, таъкидлаш жоиз, ушбу чоралар нафақат Ўзбекистон, балки дунёнинг бошқа мамлакатлари томонидан ҳам амалга оширилмоқда.
Ишончим комилки, тегишли глобал ҳаракатлар ушбу пандемияни бартараф эта олади. Айни пайтда эса ўзбек халқи карантин тадбирларига яхши риоя қилишларини намойиш этишмоқда.
Фурсатдан фойдаланиб, Ўзбекистон раҳбарияти ва халқига мустаҳкам соғлиқ ва фаровонлик тилайман.

Ўзбекистон мусулмонлар идораси матбуот хизмати

Ўзбекистон мусулмонлари идораси ташаббуси билан имконияти чекланган юртдошларимиз учун 2018 йилдан буён Республикамиз вилоятлари марказий масжидларида сурдо таржимаси асосидаги суҳбатлар ва жума мавъизалари олиб борилмоқда.
Бундан кўзланган мақсад имконияти чекланган кишилар орасида диний муҳитни соғломлаштириш, уларнинг динимизни ўрганишга бўлган эҳтиёжини таъминлаш, Ислом динининг инсонпарвар ғояларини тарғиб қилиш орқали ёт ғояларга барҳам бериш, шунингдек, ногиронлиги бўлган шахсларнинг ижтимоий фаоллигини ошириш, уларни тушкунликдан асраш ва жамиятда фуқаролар тенглигини таъминлаш саналади.
Ушбу тадбирлар эшитиш ва нутқида камчилиги бўлган инсонлар алдамчи ғоялар таъсирига тушиб қолмаслиги, турли секталарга кириб кетмаслиги, уларнинг оилавий, маиший ва ижтимоий муаммоларни ҳал қилишда муҳим аҳамият касб этади. Бу борада сурдо таржимонларнинг меҳнати алоҳида аҳамиятга эга.
Куни кеча ана шу суҳбатларни сурдо тилига таржима қилувчи – Рустам Бердиев ва Ойдин Худойбергановага “Ўзбекистон Республикаси халқ таълими аълочиси” кўкрак нишони топширилди. Бу юртимизда сурдо таржимонларга кўрсатилаётган улкан эътибор намунаси бўлди.
Аллоҳ таоло сурдо таржимонларимизга юксак мукофотни муборак қилсин, қилаётган хайрли ишларига улкан ажру савоблар ато этсин!

Ўзбекистон мусулмонлари идораси Матбуот хизмати

Ўзбекистон мусулмонлари идорасининг “Ҳаж” ва “Умра” сафарлари бўйича Саудия Арабистонидаги ҳамкор “ал-Ҳидоя” ширкати вакиллари Маккаи мукаррамадаги Ҳарами шарифда инсоният бошига келган бу хасталикни даф бўлишини сўраб, Ҳақ таолога ёлвориб қуйидаги дуо ўқидилар:
– Эй Аллоҳ, биз нуқсонга йўл қўйганлармиз, Сен эса Каримсан. Биз гуноҳкорлармиз, Сен эса Ҳалимсан. Биз Сенга муҳтожмиз, Сен эса биздан Беҳожат Зотсан. Сен Поксан.
Эй Аллоҳ, афвинг билан хатоларимизни кечиргин. Ғазабинг ила бизни азобламагин.
Эй Аллоҳ, бизни раҳматингга олгин. Зеро, Сен биз бандаларинга Раҳмлисан. Эй оламларнинг Робби, бизни азобламагин. Ваҳоланки, Сен бизни азоблашга Қодирсан.
Эй Аллоҳ, агар ушбу вабо бизнинг содир этган гуноҳларимиз, хатоларимиз ёки қилган зулмларимиз, адо этмаган фарзларимиз, ўқимаган нафлларимиз, йўл қўйган камчиликларимиз, номаҳрамга қараб қўйганимиз сабабли келган бўлса, биз ҳамма гуноҳларимиздан Сенга тавба қилувчилармиз, эй Роббимиз. Бизнинг тавбаларимизни қабул айлагин ва Ўзингга гўзал ҳолатда қайтаргин, эй Робб. Жонимизни, Сен биздан рози бўлиб турганингда олгин, эй Роҳман.
Эй Аллоҳ, эй бирор нарсага "Бўл!" деб, ўша ишни бўлдирувчи Зот, ЛАА ИЛААҲА ИЛЛАЛЛОҲ калимаси, Сенинг барча гўзал исмларинг ва уларнинг азамати ҳурматидан Ўзингнинг куч-қувватинг, қудратинг ила шарафли Каъбага, Ҳарам Уйингга ва Набиййинг соллаллоҳу алайҳи васалламнинг масжидларига зиёратчию умрачиларни қайтаргин!
Эй Аллоҳ, вабони, балони ва барча касалликларни хоссатан икки покиза, ҳарам шаҳардан ва омматан барча мусулмонларнинг мамлакатларидан кўтаргин, эй оламларнинг Робби!
Эй Аллоҳ Икки Ҳарам ходими подшоҳ Салмон бин Абдулазиз Ол Сауд ва у зотнинг ишончли валиаҳди амир Муҳаммад бин Салмонни ўз паноҳингда асра, уларни Икки Ҳарам хизматида бардавом айла, бу хизматларини яхши амаллари дафтарига ёзгин, эй оламлар Парвардигори!
Эй Аллоҳ, Ўзинг Ўзбекистон Президенти Шавкат Мирзиёев ва у кишининг атрофидагиларга, шунингдек, мамлакат муфтийсига, халқига ва ҳожи-умрачиларга қилаётган хизматларига муваффақият ато этгин!
Эй Аллоҳ, “Ҳидоя” халқаро ширкати мутасаддиларига, жумладан, маслаҳатчи Шайх Солиҳ Баҳвайний ва биродари Усома Тошкандийнинг Ўзингнинг меҳмонларинг ва умрачилар хизматидаги самарали фаолиятларига муваффақият ато этгин! Эй Аллоҳ, уларнинг хайрли амалларини даргоҳингда қабул айлагин!
Эй Аллоҳ, Набиййимиз, Ҳабибимиз Муҳаммад соллаллоҳу алайҳи васалламга дунёю охиратда салавот-салом ва баракотларингни нозил қилгин!
Эй Аллоҳ, биз ушбу дуони қилдик, ижобат этиш Сендандир. Биз ҳаракат қилиб, сабабларни ушлаймиз ва Ўзингга таваккул этамиз. Охирги дуоимиз оламларнинг Робби Аллоҳга ҳамд бўлсин!