Ўзбекистон мусулмонлари идораси Котибияти ва Ахборот-таҳлил бўлими ташаббуси билан “Ёғду” нашриётида инконияти чекланган ватандошларимиз учун навбатдаги махсус «40 фарз баёни» номли брайл ёзувидаги китоб нашр этилди. Кўзи ожиз, лекин қалб кўзи очиқ мўмин-мусулмонларимиз учун ушбу китоб катта туҳфа бўлди.
Ушбу китобда динимизнинг устуни бўлган 40 та фарзнинг содда ва тушунарли баёни тақдим қилинган.
“40 фарз баёни” китоби нафақат мамлакатимизда, балки Марказий Осиёда кўзи ожизлар учун ягона нашр бўлди. Ўтган вақт мобайнида “Сиз бизга кераксиз” хайрия тадбирларининг таҳлили шуни кўрсатдики, кўзи ожиз ўқувчиларнинг ушбу китобга эҳтиёжи жуда ҳам катта. Ўлкамизда 60 минг нафарга яқин кўриш бўйича ногиронлиги бўлган шахслар истиқомат қилишини инобатга олсак, ушбу китобнинг аҳамияти нақадар катта эканини англаб етамиз.
Ҳазрати Пайғамбаримиз соллаллоҳу алайҳи ва салламнинг саҳобаларидан бири, кўзлари аъмо бўлган Абдуллоҳ ибн Умму Мактум розияллоҳу анҳуга ўзларини издош дея таъриф берган бундай инсонларимизнинг хурсандчиликларини кўриб, биз ҳам чексиз қувондик. Мана шундай кишиларнинг синиқ кўнгилларини кўтариб, эътибор бераётган барча инсонларга ташаккур айтамиз.
Аллоҳ таоло мазкур китобни муборак айлаб, хайрли ишларда бардавом қилсин!

Ўзбекистон мусулмонлари идораси Матбуот хизмати

Долзарб мавзу

Бу дунёда бахтиёр, саодатманд яшаш – ҳар бир инсон орзуси. Бу йўлда ҳар ким кунни тунга, тунни тонгга улаб меҳнат қилади, изланади, талпинади. Лекин ҳаммага ҳам тақдирида битилганидан ортиғи бўлмайди.

Аммо пешонасига ёзилганига рози бўлмасдан, юртимизда яратилаётган кенг имкониятлар, шароитларга қаноат қилмасдан мўмай даромад илинжида чет элларга иш излаб кетаётган юртдошларимиз, афсуски, теерорчи тўдаларнинг ғаламислари тузоғига тушиб қолганини кеч англаб етишмоқда.

Эсингизда бўлса, шу йил Рамазон ҳайити арафасида муҳтарам Президентимиз Шавкат Мирзиёев топшириғига асосан “Меҳр” номли тадбир доирасида 156 нафар юртдошимиз Яқин Шарқ мамлакатларидаги оловли жанггоҳлардан мамлакатимизга қайтарилган эди.

Яқинда “Меҳр-2” номли инсонпарварлик тадбири натижасида 64 нафар бола Ватанимизга олиб келинди. Маълумотларга кўра, уларнинг ота-оналари Ироқ давлатига террорчилик гуруҳлари ва тақиқланган ташкилотлар таркибида бўлганликлари сабабли 10-20 йилга, айримлари эса умрбод озодликдан маҳрум этилибди.

Бу норасидаларда нима айб?! Улар шу пайтгача ўзбекистонлик бошқа тенгдошлари қатори шу азиз юртдаги мактабгача таълим муассасаларида, умумий ўрта таълим мактабларида таҳсил олишлари мумкин эди-ку! Наҳотки, катталар, яъни ота-оналар шуни англаб етмаган бўлсалар!

Яқинда Тошкент вилояти Қибрай туманидаги “Бўстон” санаторийсига жойлаштирилган ана шу болалардан бир гуруҳи билан мулоқот қилдик. Қақраб-қуриб бораётган гулга, чечакка сув қуйсангиз, яна секин-аста кўкара бошлагани каби бу болажонлар ҳам тинч диёрга қайтганидан мамнун эканлигини уларнинг кўзларидан англаш мумкин. Энди улар жажжигина юракларини ларзага солувчи мудҳиш ўқ товушларини эшитмасдан, сокин хотиржам диёрда униб-улғаядилар.

Муқаддас Ислом динида жамиятнинг ҳар бир аъзосига, ким бўлишидан қатъи назар, алоҳида эътибор билан қаралади. Махлуқни, яъни инсонни Холиқ туфайли яхши кўрамиз. Чунки барчамизнинг яратувчимиз яккаю ягона Аллоҳ таоло.

Ҳар бир инсон ҳурмат-эҳтиромга лойиқ. Меҳр-мурувватга ташна, моддий-маънавий кўмакка муҳтож, ота-онасидан айрилган етимларга икки карра кўпроқ меҳр улашиш динимизнинг асосий кўрсатмаларидан. Бежиз Саҳл розияллоҳу анҳудан ривоят қилинган ҳадиси шарифда Пайғамбаримиз соллаллоҳу алайҳи ва саллам:

عَنْ سَهْلٍ رَضِيَ اللهُ عَنْهُ قَالَ، قَالَ رَسُولُ اللهِ صَلَّى اللهُ عَلَيْهِ وَ سَلَّمَ:

 « أَنَا وَكَافِلُ الْيَتِيمِ فِي الْجَنَّةِ هَكَذَا »  وَأَشَارَ بِالسَّبَابَةِ وَالْوُسْطَى وَفَرَجَ بَيْنَهُمَا شَيْئًا

Яъни: “Мен ва етимни кафиллигига олган киши жаннатда мана шундай бўлади”, дедилар ва кўрсаткич ҳамда ўрта бармоқларига ишора қилиб, бу бармоқлари орасини бир-бирига яқин тутдилар” (Имом Бухорий ривояти), демаганлар.

Бугун жуда хунук эшитиладиган ибора – “тирик етимлар” сўзи қулоққа бот-бот чалиняпти. “Тирик етим” деганда отаси тирик бўлатуриб, фарзандларини ташлаб кетган, уларни нафақасиз, тарбиясиз, қийин шароитда яшашга мажбур қилган инсофсиз, виждонсиз, оталарнинг фарзандлари тушунилади. Ахир, ўзининг роҳатини кўзлаб, оиласини ва фарзандларини қаровсиз қолдириб кетаётган инсонларни комил мусулмон деб бўладими!?

Ваҳоланки, Абу Ҳурайра розияллоҳу анҳудан ривоят қилинган ҳадисда Пайғамбаримиз алайҳиссалом дедилар:

عَنْ أَبِي هُرَيْرَةَ رَضِيَ اللهُ عَنْهُ، عَنِ النَّبِيِّ صَلَّى اللهُ عَلَيْهِ وَ سَلَّمَ قَالَ:

« خَيْرُ بَيْتٍ فِي الْمُسْلِمِينَ بَيْتُ فِيهِ يَتِيمٌ يَحْسَنُ إِلَيْهِ . وَشَرُّ بَيْتٍ فِي الْمُسْلِمِينَ بَيْتُ فِيهِ يَتِيمٌ يَسَاءُ إِلَيْهِ »

 “Мусулмонларнинг уйи ичида энг яхшиси етимга яхши муносабатда бўлинган уйдир. Мусулмонларнинг уйи ичида энг ёмони етимга ёмон муносабатда бўлинган уйдир” (Имом Ибн Можа ривояти).

Шу ҳадиси шарифдан келиб чиқиб айтиш мумкинки, бир эмас, ўн эмас, 64 нафар маъсум болага бошпана бўлган жаннатмонанд Ўзбекистон, ҳеч шубҳасиз, Ер юзидаги энг яхши маъводир.

Яқин Шарқ мамлакатларидаги қонли тўқнашувлардан, жанггоҳлардан 64 нафар болани тинч-осуда юртга қайтаришнинг савоби жуда улуғ, ота-онасидан, яқинларидан айрилган болаларни оталиққа олишнинг ажри жуда юксак. Албатта, бундай юртга Аллоҳ таолонинг раҳмати, файзу баракаси ёғилиши шубҳасиз. 

Миродил МИРЖАЛИЛОВ,

Қибрай тумани бош имом-хатиби.

Хожа Абдулхолиқ Ғиждувоний Бухоро вилояти Ғиждувон Қалъасида 1103 йилда  туғилган, буюк мутасаввуф олим, нақшбандия тариқатининг ривожига муҳим ҳисса қўшган аллома, соҳиб каромат авлиё бўлиб,  Хўжаи Жаҳон(Жаҳон ҳожаси) номи билан бутун дунёга машҳур ва маълум. Унинг отаси Имом Абдулжамилдир. Имом Абдулжамил Имом Молик (713—795) авлодларидан ҳисобланади.

 “Минор” масжиди ўзининг бетакрор меъморий услуби, маҳобати билан алоҳида ажралиб туради. Ўзига ҳос кўриниши ва кўкка бўй чўзган миноралари билан аллақачон одамлар тилига тушган ушбу масжиднинг қурилиш ишлари 2013-йил ёз ойларида бошланган эди. 2014-йилнинг 1-октябрида Қурбон ҳайити байрамида очилган. Анхор бўйида бунёд этилган иншоот нафақат юртимизда балки дунёда ҳам кенг эътироф этилган. Масалан Франсиянинг Париж шаҳрида дунёдаги масжидлар архитектураси бо`йича йирик лойиҳа – Абдуллатиф ал-Фавзан мукофоти ҳакамлари томонидан ҳам масжиднинг ўзига ҳос услуби, бетакрор безаклари алохида эътироф этилган. Масжид биноси анʼанавий шарқ ва оʻзбек услубида қурилган боʻлиб, икки минораси ва кенг гумбазга эга. Масжиднинг ичи эса нақшлар билан безатилган. Кенг ва улкан ойналар бино ичини янада ёрқин бўлишини таъминлайди. Унинг пойгумбазида ҳам ойналар мавжуд. Гумбаз ичидаги улкан нақшинкор безаклар хар қандай ташриф буюрувчининг эътиборини тортмай қўймайди. Масжид 2400 дан ортиқ намозхонлар учун моʻлжалланган. “Минор” масжиди Тошкентда ва бутун Оʻзбекистон боʻйлаб энг йирик мусулмон диний марказларидан бирига айланди. Масжидга кўплаб  сайёҳлар ташриф буюради. Бугунги кунда Минор масжиди азим пойтахтимизнинг кўркига кўрк қўшиб турибди. 

Шаҳзод Шомансуров тайёрлади

У танасига орқа томондан ёки ён тарафдан ўқ зарбаси келишига одатланиб қолганди.

Лекин уни хафа қилган, унга даҳшатли фожиа бўлиб таъсир қилган, жойида донг қотиб қолишига сабаб бўлган нарса — унинг юзига отишгани эди.

Гўё у овчига «Эй сайёд, бунчалар тошбағир ва аҳмоқ бўлмасанг! Юзимга отдинг-а! Юзимга ҳам отасанми?! Ахир бу юз шоирлар мақтаб ғазаллар битган юз эди-ку! Ахир бу кўз адиблар зарбулмасал қилган кўз эди-ку!» деб айтаётгандек.

Чунки, у юзига отишларига ҳеч ўрганмаган, бунга одатланмаган эди.

Айрим кимсалар ҳам бошқаларнинг қалбларига шунга ўхшаган ноодатий зарбаларни берадилар.

Аллоҳ таоло мўмин-мўминаларга озор берувчиларни ёмонлаб, шундай марҳамат қилган:

وَالَّذِينَ يُؤْذُونَ الْمُؤْمِنِينَ وَالْمُؤْمِنَاتِ بِغَيْرِ مَا اكْتَسَبُوا فَقَدِ احْتَمَلُوا بُهْتَاناً وَإِثْماً مُّبِيناً

“Мўмин ва мўминаларга, улар бирор нарса қилмасалар ҳам, озор берадиганлар, батаҳқиқ, ўз устларига очиқ бўҳтон ва гуноҳни олибдилар” (Аҳзоб сураси, 58-оят).

Азизлар, бир-биримизга, қалбларимизга озор беришдан, уни синдиришдан сақланайлик! Унинг ўрнига бир-биримизни хурсанд қилишга уринайлик! Зеро, Абдуллоҳ ибн Аббос розияллоҳу анҳумодан ривоят қилинган ҳадисда Расулуллоҳ соллаллоҳу алайҳи васаллам “Фарз амаллардан кейин Аллоҳга энг маҳбаб амал мусулмоннинг қалбига хурсандчилик киритишдир” деганлар. Имом Табароний ривояти.

Қаранг, бир диндош биродаримизнинг қалбига шодлик киришига сабаб бўлишимиз Роббимиз наздидаги маҳбуб амаллардан экан.

Аллоҳ таоло барчамизни дилозорликдан сақлаб, қалбларга хурсандчилик киришига сабаб бўлувчилардан қилсин!

Нозимжон Ҳошимжон тайёрлади