muslim.uz
Тўй маросимларидаги дабдабабозлик, исрофгарчиликларга барҳам беришда кексаларимизнинг ўрни катта
Маълумки, октябрь ойининг биринчи ҳафтаси Республикамизда “Кексалар ҳафталиги” этиб белгиланди. Мазкур ҳафталик доирасида шундай ҳам доимий ҳурмат ва ардоғимизда бўлган дуогўй кексаларимизга янада илтифот кўрсатилиб, меҳнат жамоалари, маҳаллаларда учрашув ва тадбирлар ўтказилмоқда.
Миробод тумани бош имом-хатиби Одил Холмуродов тумандаги меҳнат фахрийлари, кексалар билан ўтказилган тадбирда маъруза қилди.
Имом-хатиб Пайғамбаримиз соллаллоҳу алайҳи васалламнинг кексаларни ҳурматлаш ҳақидаги ҳадиси шарифларидан айтиб ўтиб, кекса-нуронийлар хонадонимиз кўрки, дастурхонимизнинг файзу-баракоти эканлигини билдирди. “Уларнинг дуолари ватанимиз, ҳаётимиз, оилаларимизни нурафшон этиб туради ва яхши ишларга ундайди. Биз айни вақтда ташвиқот олиб бораётган тўй ва маросимлардаги дабдабабозлик, исрофгарчиликларга барҳам беришда кўпни кўрган ёши улуғларимизнинг панду насиҳатлари катта ёрдам беради, сабоқ бўлади”, дейди имом-хатиб.
Ўзбекистон мусулмонлари идораси Масжидлар бўлими
Масжидларни обод қилинг
Масжидлар – Аллоҳ таоло эъзоз қилган гўшалардир. Масжидлар – Аллоҳ таолонинг уйидир. Чунки Роббимиз илк қурилган масжидни “Менинг уйим” деб номлади. Бу ҳақда Қуръони каримда шундай дейилади: “Биз Иброҳимга Байтнинг жойини белгилаб бериб: “Менга ҳеч нарсани шерик қилма, Байтимни тавоф қилувчилар, (ибодатда) қоим тургувчилар ҳамда рукуъ, сужуд қилувчилар учун поклагин...” деганимизни эсла!” (Ҳаж сураси,26-оят)
Бошқа бир оятда эса: “(У) бир уйлардаки, Аллоҳ уларнинг кўтарилишига ва уларда Ўз исми зикр қилинишига изн бергандир. Уларда Унга эртаю кеч тасбеҳ айтурлар”, дейилади. (Нур сураси, 36-оят)
Оятдан кўриниб турибдики, ер юзидаги илк қурилган масжид бўлган Каъбаи Муаззаманинг бино бўлиш жойини Аллоҳ таолонинг Ўзи белгилаб бергани, ҳамда ушбу жойни ибодат қилувчилар учун доимо пок тутишга амр қилгани, Ўзининг муборак исмини зикр қилишлик учун уларинг кўтарилишига изн бергани масжиднинг қадри қанчалар баланд эканини англатади.
Динимиз бизни масжидлар қуришга, уларни обод қилишга ва асраб авайлашга буюради.
Усмон розияллоҳу анҳудан ривоят қилинган ҳадисда Росулуллоҳ соллаллоҳу алайҳи васаллаш айтадилар: “Ким Аллоҳнинг розилиги учун бир масжид қурса, Аллоҳ у банда учун жаннатда бир қаср қуради” , дедилар. (Имом Бухорий ва Муслим ривояти)
Ушбу ҳадис мутавотир ҳадислар сарасига киради. Яъни, рад этиб бўлмас даражадаги аниқ маълумотлар ва ишончли бир нечта кишилардан етиб келган. Ҳадисни шарҳида Ибн Ҳажар Асқалоний роҳимаҳуллоҳ шундай дейдилар: “Кимгаки, Аллоҳ таоло жаннатда қаср қурадиган бўлса, ўша банда у қасрга киритилади. Чунки Аллоҳ таоло шунчаки, фойдаланилмайдиган қасрни қуриб қўймайди. Демак, Аллоҳ таоло бировнинг номига бир қаср қурса, албатта у бандани қасрга киргизади”.
Масжидларни ҳурматини, қадр қиммати ва шаънини улуғлаб айтилган оятлар ва ҳадислар жудаям кўпдир. Шунингдек, масжидга борувчилар учун ҳам бир қанча ваъдалар берилган.
Абу Ҳурайра розияллоҳу анҳудан ривоят қилинади:
“Набий соллаллоҳу алайҳи васаллам: “Ким эртами-кечми масжид томон борса, Аллоҳ таоло унга ҳар эрта ва кеч юрганида жаннатдан манзил тайёрлайди”, дедилар”. (Икки Шайх ривоят қилишган)
Демак, инсоннинг жаннатдаги манзили, мартабаси масжидга боришига қараб бўлади. Инсон масжидга ҳар боргани сабабидан, Аллоҳ таоло унга жаннатда манзил тайёрлайди. Қанча кўп борса, жаннатдаги мартабаси шунча ортиб бораверади.
Динимизда масжиднинг улуғланиши, уни обод қилганларга, хусусан жамоат намозига тарғиб қилиниши бежиз эмас албатта. Чунки, Ислом дининиг энг катта таълимотларидан бири бу – бирдамлик, аҳиллик, тафриқага тушмасдан жамоат бўлиб, ҳамжиҳат бўлиб, ўзаро фикр ва маслаҳатлашиб ҳаёт кечиришдир. Ушбу кўрсатмаларга амал қилиш учун эса масжид энг яхши жойдир. Демак, масжид қуриш – одамларни жамлаш, жамиятни ҳамжиҳатликка ундаш, кишиларни бир-бирига бўлган муҳаббати ва меҳрини зиёда бўлишига сабаб, душманларнинг қалбига қўрқув солишдир. Қолаверса, “Кўпчиликнинг дуоси – кўл” деганларидек, жамоат бўлиб қилинган дуолар бесамар кетмайди. Масжидга борган инсонлар Аллоҳ таолодан юрт учун офият, хотиржамлик, халқ учун барака, форовонлик, ўзгалар учун ҳам яхшилик, иймон – инсоф, хуллас, шу халқ учун, миллат учун, дин ва ватан ривожи учун нимаики зарур бўлса барчасини сўраб дуолар қилишади.
Масжидга душманлик қилиш, уни ёмон кўриш эса, юқорида айтилган барча яхшилик омиллариниг аксидир. Қолаверса, асло унутмаслик керакки, масжидни вайрон қилиш учун қдам босган Абраҳа исмли шахснинг ҳолатини Аллоҳ таоло қиёматгача эслатиб қўйди.
Унутманг! Аллоҳ Ўз байтини қандай ҳимоя қилиб олишни Ўзи билади. Тарих яна такрорланаверади. Кимдир яхшилик билан, яна кимдир эса ёмонлик билан эсланаверади. Хулоса ўзингиздан !!!
Олмазор туманидаги “Мевазор” масжиди имом ноиби:
Исломов Ёрбек
ТАЪЗИЯ БИЛДИРАМИЗ
Ўзбекистон мусулмонлари идораси жамоаси Жиззах вилояти Зомин тумани "Маърифатли" жоме масжиди имом-хатиби Равшанов Аброрнинг падари бузруквори Нарзулла ота Равшановнинг вафоти муносабати билан чуқур таъзия изҳор этади.
Аллоҳ таоло охират сафарига кузатилган марҳумнинг барча солиҳ амалларини ўзларига ҳамроҳ айлаб, Ўз мағфиратига олсин.
Ҳақ таоло марҳумнинг яқинлари, фарзанду аржумандларига чиройли сабр бериб, бу мусибатларга ажру мукофотлар ато этсин.
Ўзбекистон мусулмонлари идораси жамоаси, уламолари, имом-домлалари ва ўқитувчи-мударрислари номидан Равшанов Аброрга ва марҳумнинг яқинларига ҳамдардлик билдирамиз.
Ўзбекистон мусулмонлари идораси
Муфтий ҳазратлари Германия элчисини қабул қилди
8 октябрь куни Ўзбекистон мусулмонлари идораси раиси, муфтий Усмонхон Алимов ҳазратлари Германия давлатининг Ўзбекистондаги фавқулодда ва мухтор элчиси Гюнтер Оверфельд билан мулоқот ўтказдилар. Учрашувда муфтий ҳазратлари Ўзбекистон ва Германия ўртасидаги муносабатлар мустаҳкамланиб бораётгани, муҳтарам Президентимиз раҳнамоликларида юртимиздаги хайрли ислоҳотлар, илғор ташаббуслар, ҳаж ва умра зиёратчилари ва охирги уч йилда диний-маърифий соҳада жуда катта ишлар қилинганини сўзлаб бердилар.
Шунингдек, муфтий ҳазратлари Диний идоранинг халқаро алоқалари ривожланиб бораётгани, диний соҳа ходимлари АҚШ, Россия, Украина давлатларидаги тадбирларида фаол қатнашаётгани ва Россиянинг бир қатор ҳудудларида меҳнат мигрантлари билан учрашувлар ташкил этиб келинаётганини алоҳида қайд этдилар. Бундан ташқари, нуфузли ташкилотлар, хорижий давлатлар мусулмонлари идоралари ва элчихоналари билан алоқалар тараққий этаётганига катта урғу қаратдилар.
Элчи Гюнтер Оверфельд жаноблари самимий қабул учун миннатдорлик билдириб, қуйидаги масалаларга алоҳида эътибор қаратди:
– Ҳақиқатан, Ўзбекистон ва Германия ўртасидаги муносабатлар мустаҳкамланиб бормоқда. Элчихона вазифаларига диний ташкилотлар ва етакчилар билан ҳам ҳамкорлик алоқаларини яхшилаш ҳам киради. Шу мақсадда, биз Ўзбекистондаги диний ташкилотлар билан муносабатларни ўрнатишдан манфаатдормиз.
Айни пайтда Ўзбекистонда 400 минг киши немис тилини ўрганмоқда, 50 дан ортиқ турли йўналишларда келишувларга эришилган. Иқтисодий алоқалар 20 фоизга, савдо айланмаси 56 фоизга кўтарилган. Табиийки икки давлат раҳбарларининг ҳамкорликда олиб борган ишлари мана шундай муваффақиятларга замин бўлди.
Ўзбекистонлик диний соҳа ходимлари меҳнат мигрантларининг имон-эътиқоди мустаҳкамлигини таъминлаш йўлидаги саъй-ҳаракатларини юқори баҳолайман. Биз ҳам бундай ишларда яқиндан ёрдам беришга тайёрмиз. Германияда ҳам ўзбек маданий марказлари, миллий меросига оид асори атиқалар жуда кўп. Бу йил Ўзбекистондаги фаолиятимга икки йил тўлди. Шу давр ичида мамлакатингиз жуда катта натижаларга эришганига гувоҳ бўлдим. Хусусан, ёшлар тарбиясига алоҳида эътибор қаратилмоқда. Айниқса, Ислом дини маърифатини ўргатиш ва ривожлантириш борасида жуда катта ишлар қилинди. Ташкил этилаётган турли халқаро марказлар ва илмий-тадқиқот муассасалари фикримни тасдиқлайди.
Элчи ўзининг қизиқтирган саволларига муфтий ҳазратларидан тўлиқ жавоб олди.
Учрашув дўстона ва самимий руҳда ўтди.
Ўзбекистон мусулмонлари идораси Матбуот хизмати
Тўй – бир кунлик, “жароҳати” бир умр тузалмаяпти
Долзарб мавзу
Бир ҳолатни барчамиз кузатганмиз: қўнғиз ўзидан бир неча баробар катта гувалакни тепаликка олиб чиқишга чиранади. Минг бир машаққат билан суриб кетилаётган гувалак охир-оқибат ортга юмалаб, қўнғизни босиб қолади. Жонивор ҳалок бўлмаса-да, оёғидан, “қўли”дан айрилиши ёки ногирон бўлиб қолиши мумкин.
Бу бироз қўполроқ ўхшатиш бўлсада, аммо бугун тўйларда урчиётган дабдабабозликка, исрофгарчиликка айнан мос тушади. Йиллар давомида мисқоллаб йиғган маблағини ёки “отдан қолма, эшагим” қабилида иш тутиб, қулоғигача қарзга ботиб тўй қилаётган оила бошлиқлари, минг афсуски, ақлга ҳам, мантиқга ҳам, шариатга ҳам сиғмайдиган бир кунлик “орзу-ҳаваслар”нинг қурбонига айланишиб, бир умрлик азоб-уқубатга гирифтор бўлишяпти.
Жамиятда илдиз отаётган бу иллатлар қачон пайдо бўлди, бунга кимлар ва қайси омиллар сабаб бўляпти?
Бизни кемиргувчи иллатлар
Одамзод ҳар доим эзгу ниятлар, улкан мақсадлар оғушида яшаб, хайрли тилакларининг рўёбга чиқишини Яратгандан сўраб яшаган... “Эзгу ният”, “улкан мақсад” фақат ўғил уйлантириб, қиз узатишдангина (!) иборат эмас. Афсуски, бугун дабдаба билан тўй қилиш, асъаса билан аза маросимларини ўтказиш аксариятимизнинг умримиз мазмунига айланиб кетди. Бу йўлда чекилган заҳматлар, меҳнату машаққатлар, саъй-ҳаракатлар фарзандларимизнинг таълим-тарбиясига сарфланса эди, ишонинг, бугун сафимизга яна бухорийлар, термизийлар, ибнсинолар, берунийлар, хоразмийлар, навоийлар, улуғбеклар қайтган бўларди...
Динимиз таълимотларига мутлақо зид, тараққиётимизга тушов, келажагимизга ғов бўлаётган тўй-маъракалардаги, таъзиялардаги дабдабалар, исрофгарчиликларнинг ҳадди-ҳисоби, чек-чегараси йўқ...
Беҳисоб шукрки, еганимиз олдимизда, емаганимиз ортимизда! Лекин айримларнинг тўқликка шўхлик қилиб, дабдабага берилаётгани юз хил жилва билан ҳаётимизни издан чиқариб, фақатгина муаммоларни чиқармоқда.
Илоҳий қонунни бузишга ҳеч кимнинг ҳаққи йўқ!
Мутахассислар Янги Зеландияда кўнгилли олти минг оила ўртасида синов-тажриба (эксперимент) ўтказишибди. Уч мингта оилага эркакларни, қолган ярмига эса аёлларни оила бошлиғи қилиб тайинлашибди. Оила раҳбарларининг айтгани – айтган, дегани – деган бўлиш шарти остида. Орадан 12 кунча вақт ўтгач, текшириб кўришса, эркаклар бошлиқ бўлган хонадонларда оила аъзоларининг бир-бирига меҳр-оқибати кучайиб, фарзандларнинг таълим-тарбияси сезиларли даражада ижобий томонга ўзгариб, фароғат қасрининг мустаҳкам пойдевори ўрнатилибди. Аёллар бошлиқ бўлган оилалар эса инқирозга учраб, хонадон аъзолари ўртасида асаб касалликлари, инфаркт (юрак хуружлари), инсульт (мияга қон қуйилиш) ҳолатлари кўпайиб кетибди. Таълим-тарбия издан чиқибди.
Хўш, нега шундай бўлган? Сабаби – илоҳий қонун бузилди. Бежиз Аллоҳ таоло “Нисо” (Аёллар) сурасида: “Эркаклар хотинлар устидан (оила бошлиғи сифатида доимий) қоим турувчилардир. Сабаб – Аллоҳ уларнинг айримлари (эркаклар)ни айримлари(аёллар)дан (баъзи хусусиятларда) ортиқ қилгани ва (эркаклар ўз оиласига) ўз мол-мулкларидан сарф қилиб туришларидир”(34-оят), деб марҳамат қилмаган.
Эркак зотининг аёлдан баъзи хусусиятларда ортиқ қилиб яратилганида бир неча ҳикматлар мужассам. Тафсирларда, жумладан, қуйида шаръий нуқтаи назардан эркакларга хос хусусиятлар қайд этилган: пайғамбарлик, раҳбарлик, жисмоний куч-қувват, оила нафақасига масъуллик, ақлу идрок, хотира ва тафаккурнинг зиёдалиги, имомлик, муаззинлик, жамоат билан намоз ўқиш, жума намозининг вожиб бўлиши, ташриқ такбирини айтиш, Ватан ҳимояси, тўлиқ гувоҳлик, талоқ бериш ҳуқуқига эга бўлиш, оила номини унга нисбат берилиши, намоз ва рўзани узрсиз адо этиш ва бошқалар. Шу ва бошқа жиҳатларини ҳисобга олиб, аёл кишининг эрига нисбатан итоатли, ҳимоятли ва иффатли бўлиб, оила тотувлиги йўлида доимий ҳаракатда бўлиши диёнат жиҳатидан талаб этилган.
Демак, Аллоҳ таоло жорий қилиб қўйган илоҳий қонун – оилада эркакнинг раҳбар бўлишига монелик қилишга ҳеч кимнинг ҳаққи йўқ экан!
“Ҳаёт формуласи”
Оддийгина, ҳамма биладиган бир формула бор. Буни англаб етиш учун катта иқтидор ёки ноёб истеъдод талаб этилмайди. Буни, таъбир жоиз кўрилса, “ҳаёт формуласи” дейиш ҳам мумкин. Доно халқимиз нафақат ҳар бир иборасида, ҳатто ҳар бир сўзида ҳам ҳамма нарсани ўз жойига, ўз ўрнига муносиб (!) қўйиб келган:
- йигит – қиз ёки аксинча: қиз – йигит (тил қоидасига кўра, тире (–) билан бериляпти. Чунки бу иккаласи жуфт сўз эмас);
- келин-куёв (келинга эҳтиром бор);
- эр-хотин (оила қурилгандан кейин);
- ота-она (фарзандли бўлгандан кейин);
- чол-кампир ёки бобо-буви(набирали бўлгандан кейин).
Агар диққат билан эътибор берсак, турмуш қурилгунча халқимизнинг ҳатто талаффузида ҳамаёл билан эркакни ифода этувчи сўзларини ўринлари аҳамиятсиз, хар хил. Лекин оила тузилгандан кейин эса биринчилик факат эркак(!) кишини зиммасида! Шунинг учун ҳам доно халқимиз эркак кишини ифодалайдиган сўзини аёлни ифода этувчи сўздан олдин (!)айтади – ЭР-хотин, ОТА-она, ЧОЛ-кампир ёки БОБО-буви деб. Оқимга қарши сузган киши чўкканидек, қонун-қоидаларга зид иш қилган киши, албатта, панд ейди. “Ҳаёт формуласи”ни бузган, яъни аёл эркакдан олдинга ўтиб кетса ёки иккаласининг ўрни алмашса ҳам, оилалар барбод бўлади. Бир дона гугурт бутун бошли ўрмонни кулга айлантирганидек, оилаларнинг инқирозга учраши – жамиятга, жамиятнинг таназзулга юз тутиши – давлатга жуда катта зарар келтириши турган гап.
Динимиз нима дейди?
Одамларимизнинг ўзларининг айтишларига, Идорамизга хатлар орқали келаётган нолаларга, фуқароларимиздан бўлаётган турли мавзудаги арз-додларга қараганда, тўйлардаги дабдабалар асосан оилада “раҳбар” бўлган аёлларнинг “ташаббуслари”билан амалга ошмоқда.Тўй ва маросимлар дабдабаси, сохта мақтовлар, маҳаллалардаги дув-дув гаплар ҳар қанча чиройли кўринмасин бу – аввало катта исроф, динимизга ёт тушунчалардир. Қуръони каримда: “Исрофгарчиликка мутлақо йўл қўйманг!Чунки исрофгарлар – шайтонларнинг биродарларидир”(Исро сураси, 26–27-оятлар), деб марҳамат қилинган.
Пайғамбаримиз саллаллоҳу алайҳи ва саллам: “Ким тежамли бўлса, қашшоқлик кўрмайди”, – деб марҳамат қилганлар (Имом Термизий ривоятлари).
Тўйлар, маърака-маросимларда “беш хил, баъзан етти хил таом тортилиши керак” деган тушунчалар кўпчилигимизнинг қорин ғамига муккасидан кетганимиздан дарак эмасмикан? Аслида ортиқча овқат еган ёки ичимлик ичган одамнинг танаси оғирлашади, тоат-ибодатида ҳаловат йўқолади, меҳнат қилишга малолланиб қолади.
Расулуллоҳ саллаллоҳу алайҳи ва саллам: “Одамзод қориндан кўра ёмон бирор идишни тўлдирмаган. Одам боласига гавдасини тик тутишга бир-икки луқма озуқа етади. Агар кўпроқ егиси келса, унда ошқозонининг учдан бири овқатга, учдан бири ичимликка, учдан бири ҳавога тўлдирилиши керак” – деганлар (Имом Термизий ривоятлари).
Боболаримиз оиласи эҳтиёжидан ортса, қўни-қўшниси, ёрдамга муҳтож кишилар билан баҳам кўришган. Машойихлар: “Яхшилик қанча кўп қилинса ҳам, исроф бўлмайди. Аммо исрофнинг зарраси ҳам – ҳаромдир” деб таъкидлаганлар.
Эпли келин – сепли келин!
Инсон бахтли ҳаёт кечириши учун икки нарса: маънавий ва моддий таъминоти етарли бўлиши керак. Моддий томонини ўта “олий” даражада таклаб қўяпмиз – келин-куёвлар учун “орзу-ҳавас” деб, миллионлаб маблағ сарфлаб, 5-6та КамАЗга сиғадиган мебеллар, 7 ухлаб эмас, 77 ухлаб ҳам тушимизга кирмаган уй жиҳозларини олиб беряпмиз... Лекин бахтли ҳаёт учун керакли бўлган иккинчи нарса-чи? Шарқона одоб, оиладаги муносабатлар одоби, келин-куёвларнинг бурч ва вазифалари, дин-диёнат масалалари, ибо, хаё, сўзлашиш одоблари, салом бериш одоблари, ота-она, қайнота-қайнонага муносабат одоблари, миллий қадриятлар – булар бахтли ҳаёт учун керакли бўладиган иккинчи нарса. Лекин, минг афсуслар бўлсинким, шу нарсалардан келин-куёвларимизга тақдим этаёганимизни ҳисоблаб кўрсак, ёш болачаларнинг уч ғилдиракли велосипедини юк қўядиган жойига қўйсак, яна анча жой ортиб ҳам қолади.
Мебеллар, уй жиҳозлари, бошқа моддий нарсалар ҳар қанча зўр ва кўркам бўлмасин, вақт ўтиб эскириши, борингки, модадан қолиб кетиши мумкин. Лекин бебаҳо ва бетакрор маънавий меросимиз – миллий ва диний қадриятларимизни ўз ичида сақлаб келаётган китоблар ҳар доим зарур ва ҳеч қачон модадан қолмайди.
“Мўмин-мусулмон одам, – Сўфи Оллоёр ҳазратлари айтганларидек, – бирор улуғ кишининг эмас, балки Пайғамбаримизнинг кўрсатмаларига риоя қилиши шарт. Расулуллоҳ саллаллоҳу алайҳи ва саллам ҳам ота бўлганлар, У Зот ҳам қиз чиқарганлар. У Зот ҳам қизларининг сепига рўзғор учун зарур нарсаларни қўшганлар. Хазрати Али разияллоҳу анҳудан ривоят қилинади: “Расулуллоҳ саллаллоҳу алайҳи ва саллам Фотимага бир чийдухоба, бир меш ва ичига изхир (хушбўй ўсимлик)солинган болишни жиҳоз(сеп)қилиб бердилар” (Имом Насоий ривоятлари).
Тасаввур қиляпсизми, бутун коинот, бутун борлиқ ҳурмати учун яратилган Зот – Муҳаммад саллаллоҳу алайҳи ва саллам жаннатий аёлларнинг саййидаси, қизлари Фотима разияллоҳу анҳонинг сепига нималар қўшганларини?!
Қаёққа кетяпмиз, кимга тақлид қиляпмиз?
Яқинда “Ўзбекистон” телеканалида тўғридан-тўғри эфирга узатилган “Муносабат” кўрсатувини ойнаи жаҳон орқали барчамиз томоша қилдик. Бу йил биринчи синфга борган фарзандини карнай-сурнай садолари остида мактабга кузатиб қўйган оила бошлиқларини, тўйларда муқаддас динимизга мутлақо зид, ўзбекона одатларимизга умуман тўғри келмайдиган қилиқлар қилаётган ёшларни, кимўзарга маросим қилаётган кишиларни кўриб, очиғи, уялиб кетдим. Негаки, бу кўрсатувни нафақат юртдошларимиз, балки сунъий йўлдош орқали бутун дунё кўрди... Тўй қиламан, деб оиласидан олисда, мусофир юртларда дуч келган қора меҳнатни бажараётган юртдошларимизга раҳмим келди.
Нафсиламрни айтганда, асъасаю дабдабалар, узундан-узун машиналар карвони, шовқин-суронлар, ғат-ғутлар, “севги тарихи”, “куёвнинг қайнона оғзига торт тутиши”, эрсираган қизлардей келин отган гулларни талашиб тутишлар, ҳисобсиз тоғоралар, ҳеч қачон ҳеч ким эгнига илмайдиган сарпо-суруқлар, маданиятининг асли йўқларга ақлсиз тақлидлар... ҳамманинг жонига тегди. Чунки булар ҳаммаси Худо учун эмас, балки риё (!) учун, хўжакўрсин (!) учун бўлгани сабабли одамлар безор бўлишди!
Хўш, бу бачкана одатлар қаердан кириб келяпти? Қандай урф бўляпти? Менимча, бундай бемаъни қилиқлар телеканаллар орқали намойиш этилаётган бемаъно чет эл сериаллари орқали ёшлар онгига сингдириляпти. Бунга қатъий чора кўрилмаса, миллий анъаналаримиздан ажралиб, ёшларни ҳам бой бериб қўямиз. Ёшлар бой берилдими, демак, келажагимизни қўш қўллаб бировларга топширган бўламиз.
Илоҳо ўзларимизни ҳам, фарзанд-зурриётларимизни ҳам Меҳрибон Парвардигоримиз буюрган, жаноб Пайғамбаримиз саллаллоҳу алайҳи ва саллам тавсия этган, ўтмишда ўтганларимизни руҳлари шод бўладиган, халқимиз хурсанд бўладиган, ота-оналаримиз рози бўладиган йўллардан юришимизни насиб этсин!
Иброҳимжон ИНОМОВ,
Ўзбекистон мусулмонлари идораси раиси ўринбосари
Манба: http://uza.uz
Видеолавҳалар
