Аллоҳ таолога битмас-туганмас ҳамдлар бўлсинки, соғинч ва иштиёқ билан кутилган ойларнинг султони эзгулик ва раҳмат ойи, кўп-кўп Қуръон тиловатлари ўқиладиган, инсонлар савобларини кўпроқ қиладиган, саховату дуо, таровеҳу Қуръон тиловотлар ойи бўлмиш муборак моҳи рамазон ўзининг таровати, саховати ва баракоти билан давом этмоқда.

 Мусулмонлар бу фазилатли ойни бир олам шодлигу қувонч билан кутиб олдилар. Кимдир бу ойда масжидларга чиқиб, таровеҳ намозларида қатнашиб, хатми Қуръонларга сомеъ бўлиб унинг савобидан умидвор бўлиш ниятида бўлса, яна кимдир бу ойда кўп хайрли ишларни амалга ошириш ниятида бўлмоқдалар. Кимлардир қалбидаги гиналардан фориғ бўлиб, ўзи учун покиза ҳаёт саҳифасини очиш ниятида бўлса, кимдир саховат ва силаи раҳмда бўлиш ниятида. Бу муборак ойда инсонлар Аллоҳ учун рамазон рўзасини астойдил адо этадилар.

Аллоҳ таоло: “Рўза мен учун. унинг мукофотини Ўзим бераман, Банда таомини, ичимлигини ва шаҳватини мен учун тарк қилади”, деб марҳамат қилган.

Бу жумлада қудсий ҳадис ривоят қилинмоқда. Бошқа бир ривоятда Аллоҳ таоло: “Одам боласининг барча амали ўзи учун, фақат рўза Мен учун ва уни мукофотини Ўзим бераман”, деган.

Рўзадор банда рўза кунларида сабру қаноатда бардавом бўлиб, Парвардигорининг амрига бўйсуниш учун барча неъматлар: таом ва ичимликларни истеъмол қилишдан ва ўз жуфти ҳалолига (аёли) яқинлик қилишдан шаҳватини тияди.

Рўзадан бошқа амалларга озгина бўлса-да, риё аралашади, яъни банда бажараётган ибодатларини бошқалар ҳам кўради. Фақат рўза бундан мустаснодир. Абу Ҳурайра розияллоҳу анҳудан ривоят қилинади: “Рўзада риё йўқдир. Аллоҳ: фақат рўза мен учун … деган”.

Бир инсоннинг рўза эканини бошқалар билиши қийиндир. Шу боис Аллоҳ таоло рўзанинг мукофотини Ўзи беришини билдирди.

Имом Зуҳрий розияллоҳу анҳу айтади: “Рўзадан бошқа барча амаллар инсон ташқи ҳаракатисиз бўлмайди, фақат рўза қалбдаги ният билан бошқалар кўзига кўринмайдиган амалдир”.

Рўза – улуғ ибодат. Рўзадор куни бўйи еб-ичишдан ўзини тияди. Айниқса, ёз фасли келган рамазон ойида кунлар узун ва ҳаво ҳарорати иссиқ бўлиши сабабли машаққатлироқ кечади. Шунда ҳам рўзанинг ҳурматидан рўзадор ўзини назорат қилади, ҳеч ким кўрмайдиган жойларда ҳам манъ қилинган нарсалардан сақланади. Бу билан рўзадорнинг сабру бардоши синалади.

Аллоҳ биз мўминларга фарз қилган рамазон рўзасининг инсон учун фойдалари жуда ҳам кўп. Жумладан:

1. Рўза тутган кишининг тақводорлиги ошади. Аллоҳ таоло рўза ҳақидаги оятнинг охирида «Шоядки, тақводор бўлсангиз», дейди. Аллоҳ таолонинг «Шоядки» дегани эса «Албатта бўласиз» мазмунидадир. Очлик ила кишиларни даволовчи табиблардан бирига: «Сиз рўза туфайли топган энг улкан фойда нима?» деб савол берилганда: «Аллоҳни ҳис этиш, ибодат қилишга ҳавас, қисқаси, тақводорлик», деб жавоб берди.
2. Рўзанинг энг машҳур ҳикматларидан бири соғликдир. Рўза ихтиёрий оч қолишнинг энг яхши намунасидир. Рўза нафақат соғликни сақлаш учун, балки беморликларни даволаш учун ҳам ўта зарурлиги таъкидланмоқда. Ҳозирги кунда кенг тарқалган беморликларнинг кўпларини мусулмон бўлмаган юртларнинг табиблари очлик – рўза тутдириш йўли билан даволамоқдалар. Якинда ўрис олимлари рўза тутдириш йўли билан даволанган беморлар рўйхатини эълон қилишди. Натижалар, кишини ҳайратда қолдиради. Ҳатто саратон касалига мубтало бўлганлар ҳам шу усулдан шифо топганлар.
3. Рўзанинг фойдаларидан яна бири ҳавои нафсни синдиришидир. Маълумки, ҳавойи нафснинг айтганини қилавериш инсонни унга қул қилиб қўяди. Бора-бора инсон ҳавои нафси нима деса шуни қиладиган бўлиб қолади. Ҳавои нафс эса инсонни ҳеч качон яхши нарсага буюрмайди. Рўза тутган киши эса иштаҳаси келиб турган ҳолда турли таом, ичимликлар, шаҳвоний нарсалар ва истаклардан ўзини тийиш билан ҳавои нафсининг хоҳишини синдиради.
4. Рўза тутган кишиларнинг гуноҳлари мағфират қилинади. Бу маълум ва машҳур ҳақиқатдир. Рўза ҳақидаги ҳадиси шарифларни ўрганиш давомида бу ҳақиқатни яна ҳам очиқ-ойдин кўрамиз.

Рамазон раҳмат ойидир. Рамазонда Аллоҳ таолонинг раҳмати жўш уради. Имом Муслим ривоят қилган ҳадисда: «Рамазон бўлганда раҳмат эшиклари очилади», дейилган. Рамазоннинг аввалги ўн кунлиги нафақат ойнинг, балки йилнинг «раҳмат кунлари» ҳисобланади.

Рамазон мағфират ойи. Унинг ўртадаги ўн куни нафақат ойнинг, балки йилнинг «мағфират кунлари» ҳисобланади. Рамазон фазилати ҳақида Салмон Форсий розияллоҳу анҳу қилган ривоятда Расулуллоҳ соллаллоҳу алайҳи васаллам: «У аввали раҳмат, ўртаси мағфират ва охири дўзахдан озод бўлиш фурсати бўлган ойдир», деганлар.

Рамазоннинг охирги кечаси мағфират кечасидир. Абу Ҳурайра розияллоҳу анҳу айтади: «Расулуллоҳ соллаллоҳу алайҳи васаллам: «У (Рамазон)нинг охирги кечасида рўзадорларнинг гуноҳлари кечирилади», дедилар. Улар: «Эй Аллоҳнинг Расули, у Қадр кечасими?», деб сўрашди. Расулуллоҳ соллаллоҳу алайҳи васаллам: «Йўқ, лекин ишчи ишини адо этганидан сўнг ажри – ҳақи тўла қилиб берилади», дедилар (Имом Аҳмад ривояти).

Рамазон дўзахдан озод бўлиш ойидир. Рамазон ойида жаннат дарвозалари очилиб, дўзах эшиклари ёпилади. Чунки, бу ойда жаннатга кириш учун сабаб бўлган хайрли ишлар ва солиҳ амаллар кўпроқ бажарилади, дўзахга кириш учун сабаб бўлувчи гуноҳ-маъсиятлар ишлар камроқ содир этилади. Жаннат дарвозалари мусулмонларни хайрли ишларга шошилишга тарғиб қилиб ҳам очилади. Дўзах эшиклари эса, гуноҳлардан қайтган, истиғфор айтган, афсус-надомат чеккан, қайта қилмасликка ният қилган ҳолда тавба қилишга тарғиб қилиб ёпилади. Натижада бу ойда вафот этган ва руҳи дўзахга маҳкум қилинган кимсалар, бу ойнинг шарофати ила шу ойнинг охиригача дўзахга киритилмай туради. Жаннатнинг барча дарвозалари очилиши рамазон ойида ер юзига Аллоҳнинг раҳмати кўп нозил бўлишига ҳам ишорадир. Унинг охирги ўн кунлиги «дўзахдан озод бўлиш» кунлари саналади. Шу билан бирга, рамазонда ҳар кеча сон-саноқсиз кишилар дўзахдан озод қилинади. Имом Термизий ривоят қилган ҳадисда Расулуллоҳ соллаллоҳу алайҳи васаллам: «Рамазонда ҳар кеча Аллоҳнинг дўзахдан озод қилинадиган бандалари бор», деганлар.

Рамазон – дуо ойи. Рамазон ойининг ҳар кунида қабул бўладиган бир дуо бор. Расулуллоҳ соллаллоҳу алайҳи васаллам марҳамат қилиб дедилар: “Албатта, Рамазоннинг ҳар кунида барча мусулмонлар учун қабул бўладиган бир дуо бор” (Имом Аҳмад, Баззор ва бошқалар ривояти).

Агар бу дуо рўза пайтида, айниқса, ифтордан салгина олдин қилинса, мақсадга мувофиқ бўлади. Яна Расулуллоҳ соллаллоҳу алайҳи васаллам айтадилар: “Уч кишининг дуоси қайтарилмайди: адолатли имом, рўзадор то ифтор қилгунича ва мазлумнинг дуоси” (Ибн Можа, Термизий, Аҳмад ибн Ҳанбал, Байҳақий, Ибн Ҳиббон, Таёлисий, Ибн Хузайма ва Исҳоқ ибн Роҳавайҳ ривояти).

Бу зикр қилинганлар рамазон ойининг барча фазилатларини тўла қамраб ололмайди, балки мазкур фазилатлар олдида дарёдан айрим томчилар, холос. Йўқса, унинг фазилату хусусиятларини санаб адоғига етказиш мушкулдир. Аллоҳ таолодан дуо қилиб сўраймизки, бу муборак ойни, раҳмат ва мағфират ойини, дўзахдан нажот бериладиган, дуолар ижобат қилинадиган рамазон ойини барчамизга хайрли ва баракотли қилсин!

Рашидбек  ЭРНАЗАРОВ,

Хоразм вилояти Боғот тумани  бош имом-хатиби 

Фото: «Returnofkings.com»

Эҳтимол, қуйидаги мавзу қиёматгача давом этиши мумкин: қачонгача қилинаётган зўравонликлар учун дин (баъзилар иймон ҳам дейди) ҳаракатланувчи куч бўлиб хизмат қилади?

Бир қараганда, айтилган сўзлар мантиқсиз кўриниши мумкин. Зўравонликларни (уруш, теракт, бомбардимонлар) қилаётганларнинг аксари ўз ҳаракатларини муқаддас матнлар билан асослаб турса, ўзларини динни барпо қилувчи қилиб кўрсатса ва қилаётган зулмларини диний шиорлар билан асосласа, яна қандай шубҳа бўлиши мумкин?

Балки физика бўйича Нобель мукофоти совриндори Стивен Вайнберг шуларни назарда тутиб айтгандир: «Дин ичида ёки ташқарисида яхши одамлар ўзини тўғри тутиши мумкин, ёмонларлар эса зулм қилаверади. Яхши одам зулм қилиш учун дин керак» («With or without religion, good people can behave well and bad people can do evil; but for good people to do evil — that takes religion»).

Шунчаликми?

Насронийлар насронийларга қарши? Мусулмонлар мусулмонларга қарши?

Тортишмайман, жаҳон майдонида бўлаётган ҳамда диний шиорлар кўтариб чиқилган барча ваҳший жараёнларда фақат диний омилни кўраётганлар, масалан, XVII-XVIII асрларда яшаб ўтган либерализм назариётчиларидан саналган Жон Локка суянишлари мумкин. У масалани қуйидагича баён қилган: «Нега насронийлик бошқа динларга қараганда кўп даражада жуда кўп фирқа, уруш ва фуқаролик жамиятидаги тартибсизликлар келиб чиқишига сабаб бўлди. Ва диний бағрикенглик ва дунёқарашнинг кенг бўлиши бу фожиаларнинг олдини олиши мумкинми?»

Эҳтимол, бироқ, мана буларга нима дейсиз, жаҳон тарихидаги бу шармандали воқеаларни қандай изоҳлаш мумкин? 1204 йили насронийлар Рими «Муқаддас замин»ни «кофирлар»дан (мусулмонлардан) тозалаш учун навбатдаги (тўртинчи) салибчилар юришини эълон қилди. Бироқ, бунинг оқибатида Византия пойтахти ва ўзларига ўхшаган насронийларнинг шаҳри Константинопол ҳужумга учради. Ва яна қай тарзда-а?!

Келинглар, ўша вақт Рим Папаси бўлган Иннокентий III мактубларининг бирига назар солиб кўрайлик: «Ёши, жинси ва динларни фарқ қилмай баъзи (салибчилар) одамлар кўз ўнгида зўравонликлар, фаҳш ва бошқа разолатларга қўл уришди. Аскарларнинг шаҳватини қондириш учун эри бор аёллар, бевалар ва ўзини Худога бағишлаган қизлар ҳам бериб юборилди. Буларга салтанат бойликлари, бой ва камабағал одамларнинг мол-мулклари, черков пуллари ва ундаги икона, хоч ва бошқа муқаддас ашёларни талон-торож қилиш камлик қилди» (Иқтибос Иннокентий III маркиз Монферратга ёзган мактубидан олинди).

Эслатиб ўтамиз, насронийлар насронийларга қарши урушган: Католик Рими православ Византияни жойига ўтқазиб қўймоқчи бўлган. Бироқ, қани холис айтайлик-чи, бу зўравонликларнинг асосида ҳақиқатан ҳам диний омил бор эдими? Ёки бўлиб ўтган воқеаларнинг замирида геосиёсий сабаблар бор эдими?

Агар бир насронийларнинг бошқа насронийларга бўлган қарши ҳаракатларини сиёсий омил бошқарган бўлса, хунрезликларга сабаб қилиб насроний динини кўрсатиш қанчалик адолатдан бўлар эди? Майли барча ҳужумлар Худонинг номи билан бошланган бўлса ҳам, насронийлар ўзларига ўхшаган насронийларга ҳужум қилган-ку. Демак, бу ерда динни геосиёсий манфаатлар йўлида ниқоб қилиб олишмаганми?

Энди бошқа ва ҳозирги муҳитга бир назар солиб кўрамиз. Бироқ, гапни бошлашдан олдин бугун жуда машҳур бўлиб кетган «Ислом радикализми», «Ислом терроризми» ва шу каби шиорларни эслаб кўрайлик. 2017 йил май ойида Саудия Арабистонига ташриф буюрган АҚШ президенти Доналд Трамп 50 га яқин мусулмон давлатлари раҳбарлари олдида чиқиш қилди. Ҳозирги АҚШ раҳбарига ким қандай муносабатда бўлишидан қатъи назар жуда кўпчилик унинг қуйидаги гапларини беэътибор қолдирмаган бўлса керак. Трампнинг сўзларига кўра, террористик актларда «энг кўп қурбон бўлганлар» ва «Яқин Шарқ, мусулмон мамлакатлари ва бегуноҳ араб халқлари» энг кўп жабр кўрган экан. «Энг кўп ўлганлар ҳамда мутаассиблик тўлқини остида энг кўп зўравонликлар натижасидаги вайронагарчиликлар ҳам шулар жумласидан». Баъзи маълумотларга кўра, «терроризмнинг 95 фоиз қурбонлари – мусулмонлардир» (Иқтибос АҚШ президентининг Саудия Арабистонида қилган маърузасидан олинди).

Хўш, қани бу ерда мантиқ? Мусулмонлар ўзларига ўзлари террор қилмоқдами? Худди насронийлар насронийларни ўлдирганларидек, мусулмонлар ҳам мусулмонларни қатл қилишяптими?

Ким кимга қарши? Ва ким ким билан?

Бироқ, Вайнберг мантиғига кўра фикрлайдиган бўлсак, (қайси динга мансуб бўлишидан қатъи назар) одамлар динга кириши биланоқ дарғазабликнинг уйғониши, «ўзига» қарши қаратилган бўлиб чиқадими? Демак, мана бир неча йилдан бери Суриядаги «жиҳод»га чақириқлар бошқа мусулмонларга қарши янграётган чақириқ бўлиб чиқадими? Яъни, бошқа бир тоифага қарши қуролли қаршилик кўрсатиш ёки бунинг акси ҳамда уларга ҳам буларга ҳам қарши курашишга бўлган чақириқларда динни ўзларининг ғаразли мақсадлари йўлида фойдаланиш бўлмаяптими?

Бироқ, бу жараёнларни янада чуқур ўрганиш билан бу нарсалар тегида жаҳоннинг етакчи мамлактларининг сиёсий манфаатлари бор эмасмикан? Агар жавоб ижобий бўладиган бўлса, диний омилни саҳна ортидаги сиёсатчилар бошқараётган экан-да ва конфессионал формат фақат чиройли бир фантик экан-да, деган савол туғилади.

Масалан, Шарқ бўйича тадқиқотчи мутахассис, америкалик тарихчи Бернард Люис Ислом анъанасида терроризмдан фойдаланганлик ҳақида ҳеч қандай гувоҳликлар йўқ, чунки «мусулмонларга аёллар, болалар ёки қарияларни на ўлдириш, на қийноққа солиш ва асирларга номуносиб муносабатда бўлиш буюрилган».

Айтилганларга қўшилмаслик мумкинми? Бироқ исломий шиорлар билан баралла айтилиб, амалга оширилаётган террористик ҳаракатларнинг ҳаммаси олдиндан пухта ўйланган сценарийларнинг амалга оширилиши бўлиб чиқмаяптими?

Шундай экан, кимдир тан оладими ёки йўқ, асрлар оша давом этиб келаётган диний фон фақат ва фақат етакчи мамлакатларнинг геосийсий тўқнашувлар учун чироқ экан.

Ҳамма бирдек, жаҳон майдонида бўлаётган воқеаларга юқорида зикр қилинган нуқтаи назар билан қарамасликлари ҳам мумкин. Бироқ, бу ерда бошқа гап бор. Бугун биз дунёда бўлаётган жараёнларнинг илдизига назар ташлай олмасак эртага ҳолимиз вой бўлиши мумкин. Дунё миқёсидаги геосиёсий масалаларни таҳлил қила олмасак, эртага бу масалалар ўз долзарблигини йўқотади ва кўпчилик ўз атрофида бўлаётган нарсалар ва шу ҳақда олаётган ахборотларини, оз бўлса-да, таҳлил, фикр қилиб кўрмай ҳазм қилиб юбораверади... Демак сизни, аниқроғи, бизни бошқариш жуда осон бўлиб қолади...

Теймур Атаев мақоласи асосида тайёрланди

Манба: xabar.uz

Рамазон – жаннат эшиклари очиладиган, дўзах эшиклари ёпиладиган, шайтонлар занжирланадиган, Аллоҳ солиҳ бандаларини ўтдан озод этадиган  улуғ ой. Бу ой ибодатсиз, тоатсиз, куну соатлари ҳавода тўзғиган заррадек зое бўлиб кириб-чиқиб кетмасин. Бу ойда ибодатни тавбадан бошлаш мақсадга мувофиқ бўлади.

Тавбадан бошлашга маслаҳат бериш билан бирор кишини айбдорсиз демаймиз. Чунки йўлнинг аввали ҳам, ниҳояси ҳам тавбадир. Тавба – Аллоҳ субҳанаҳу ва таоло томонга интилаётган кишининг биринчи ўриндаги амалидир. Демак, тавба кўпчилик ўйлаганидек, фақат осий ва хато қилувчиларнинг илтижо қилишидан иборат эмас. Набий соллаллоҳу алайҳи васаллам:

“Эй одамлар! Аллоҳга тавба қилинглар. Чунки мен Унга бир кунда юз бор тавба қиламан”[1], дедилар. Аллоҳ бандаларини тавбага буюрганда уларга иймон номи билан нидо қилиб деди:

“Барчаларингиз Аллоҳга тавба қилинглар, эй мўминлар! Шоядки (шунда) нажот топсангизлар”[2].

Барчамиз гуноҳкор бандалармиз. Аллоҳ субҳанаҳу таоло гуноҳларни кўп кечирувчи зот. Кундузда гуноҳ қилган тавба қилсин деб кечаси қўлини узатади, кечада гуноҳ қилган тавба этсин учун кундузи қўлини чўзади. Тавба қилувчиларнинг тавбасидан, осий ва гуноҳкорларнинг пушаймонидан мамнун бўлади. Шунинг учун Пайғамбаримиз соллаллоҳу алайҳи васаллам айтганларидек, “Аллоҳ субҳанаҳу тавба қилмоқ учун Мағриб томондан эни етмиш йиллик бўлган эшик қилиб қўйди. Уни то қуёш Мағрибдан чиққунгача бекитмайди”[3]. Тавба осон ва енгил ишдир. Унда машаққат ва ҳаракат кўрсатиш йўқ. Тавба тийилиш ва пушаймондан иборат. Гуноҳ ишлардан тийилиш, буларнинг ўтмишда қилганига пушаймон, келгусида уларга қайтмасликка қарор қилиш бўлади.

Ўтган гуноҳларга пушаймон бўлиш, келгусида гуноҳларни тарк қилиш, сиз учун умрингизни қадрлаш ва ўтмиш билан келгуси вақт ўртасида ҳозир турган вақтингизни ислоҳ қилишни вожиб қилади. Чунки вақтни зое қилиб қўйиш нажотни бекор қилгандек бўлади. Агар уни юқорида зикр қилинган нарсалар билан сақлаб қолинса нажот топилади, роҳат, неъмат ва лаззатга эришилади. Инсон ўзининг вужудлигини фаҳмлай олиши зарур. Сафар озиғини тайёрлаш ва юриш учун ҳозирлик кўриш билан банд бўлиши лозим. Амал мавсуми бўлган рамазон ойида савобга эришиш учун ҳаракат қилиш, вақтни бой бермаслик керак. Ҳар бир киши ўз замони ва вақтининг қадру қийматини билмоғи зарурдир. Ундан биргина лаҳзасини ҳам бекорга ўтказмасин.

Аллоҳга ибодат қилишда улуғларимизнинг аҳволларидан хабардор бўлиб қўйишимиз зарар қилмайди. Уларни ёдга олсак, шоядки, бизда олийҳимматлик ва ибодатга мойиллик пайдо бўлса:

Муғийра розияллоҳу анҳу бундай дейдилар: «Набий соллаллоҳу алайҳи васаллам кечаси намозда шунчалик узоқ турардиларки, ҳатто оёқлари шишиб кетар эди. Одамлар Расулуллоҳ соллаллоҳу алайҳи васалламга: Аллоҳ таоло сизнинг ўтган ва келгуси хатоларингизни мағфират қилган-ку, нега ўзингизни бунчалар қийнайсиз?” дейишганида, у зот: “Аллоҳ таолонинг шу меҳрибончилигига шукр қилувчи банда бўлмайманми?»  дердилар»[4].

Абу Бакр розияллоҳу анҳу, хоссатан намозда ва Қуръон қироат қилганда кўп йиғлагувчи киши эдилар.

Умар розияллоҳу анҳунинг юзида йиғининг кўплигидан икки қора чизиқ пайдо бўлган эди.

Усмон розияллоҳу анҳу Қуръонни намозда узоқ ўқирди.

Али розияллоҳу анҳу меҳробида йиғлар, ҳатто соқоли кўз ёшлар билан ҳўл бўлиб кетарди. У: “Эй дунё! Мендан бошқани алда, сени қайтиши йўқ бўлган уч талоқ қўйдим”[5], дер эди.

Қатода Қуръонни доимо ҳар ҳафтада, Рамазонда ҳар уч кунда хатм қиларди.

Суфён Саврий қўрққанидан йиғларди.

Саид ибн Мусаййиб масжидни лозим тутган киши эди. Қирқ йил муддат давомида жамоат билан бир намоз ҳам у кишидан ўтиб кетмаган.

Рамазон ойи фурсатдир. Аллоҳ билан савдо қиладиган ойдир. Шундай экан, солиҳ амалларга, яхшиликларга, тоатга шошилайлик, Аллоҳ томонидан кўп фойда ва улкан савобларга эришамиз.

Рамазон иш бошловчилар енг шимариб киришадиган, тақводорлар ўз тайёргарлигини кўрадиган, ҳушёр инсонлар қўлга киритадиган энг улуғ фурсатдир. У қалби саломат, аъзолари тўғри, вақтини зарарли ва фойдасиз ишларда зое қилмайдиган киши учун гуноҳлар кечирилиш ойидир.  Қуйида бу ой фурсатларини ғанимат билишга, уларни солиҳ амаллар билан обод этишга ёрдам берадиган баъзи ишларни ҳавола қиламиз:

Рўза одат эмас, ибодатдир. Набий соллаллоҳу алайҳи васаллам: “Кимки рамазонда иймон ва эҳтисоб билан рўза тутса ўтган гуноҳи кечирилур”[6], дедилар. “Иймон билан”нинг маъноси – Аллоҳга ва У рўза тутган кишиларга тайёрлаб қўйган нарсаларга ишониб, дегани, “эҳтисоб билан”нинг маъноси – Аллоҳнинг савобини излаб демакдир. Яъни, уни рўза тутишга риё, овоза қилиш, молу обрў талаби ундамаган.

Рамазон шукри вожиб бўлган неъмат. Аллоҳ умрингизни узайтириб бу улуғ ойга етиб келдингиз ва Аллоҳ сизни бу ажру савобларни касб этишга муяссар қилиб қўйди. Бу шукр қилиш лозим бўлган энг катта неъмат ва буни берганига Аллоҳга ҳамду сано айтиш вожиб.

Уйқу ва уйқусизлик. Рамазон саноқли кунлар ва кузатиладиган кечалардир. Кириб келади, қарабсизки кетишга шай турибди. Шунинг учун бу ойда тоат-ибодатга жидду жаҳд қилинг. Набий соллаллоҳу алайҳи васаллам: “Рамазон кириб, гуноҳлари кечирилмасдан чиқиб кетган кишининг бурни ерга ишқалансин”, дедилар[7].

Қуръон тиловати. Рамазон Қуръон ойидир. Бу ойда Қуръон тиловатига ғайрат қилинг. Шошмасдан тартил, тадаббур ва хушуъ билан ўқинг. Имконингиз борича тиловат ҳукмларига риоя этинг.

Қиёмул-лайл (кечани қоим қилиш). Қиёмул-лайл асосан таровеҳ намози билан бўлади. Бу намозга рағбат қилиб, имом билан тўлиқ ўқимоқ лозим. Чунки Набий соллаллоҳу алайҳи васаллам: “Кимки имоми билан у кетгунига қадар турса, унга кечани қоим қилгани ёзилади”[8], деганлар.

Садақа. Рамазон ойидаги садақа бошқа ойлардагидан кўра фазилатлидир. Набий соллаллоҳу алайҳи васаллам рамазон кирса саховатлари ошиб кетар эди. Шундай экан, бу ойда ўзингизда эҳсону садақага шошилинг.

Рўзадорларни ифторлантириш. Рўзадорларни ифтор қилдиришга, мискин ва камбағалларни таомлантиришга қизиқиш керак. Чунки Набий соллаллоҳу алайҳи васаллам: “Кимки рўзадорга ифтор қилиб берса, унга рўзадорнинг ажридек савоб бўлади. Бу билан рўзадорнинг ажридан ҳеч бир нарса кам бўлмас”[9],  деганлар.

Шунингдек, ғанимат бўлган амаллар сирасига масжидни лозим тутиш, иложи бўлса рамазонда умра қилиш, рамазоннинг охирги ўн кунида ғайратни янада ошириш, Қадр кечасидаги ибодатлар, зикр, дуо ва бошқа тоат-ибодатларни қоим қилиш киради.

Бу ғанимат дамлардан фойдаланиб қолшимизга Парвардигоримиз кўмак беришини сўраб қоламиз!     

Рашидбек  ЭРНАЗАРОВ,

Хоразм вилояти Боғот тумани  бош имом-хатиби 

Юзлаб номзод бинолар ичидан чироқли шоуни ўтказиш учун дунёдаги энг баланд бино – “Бурж ал-Халифа” танланди. Мусулмонлар учун муқаддас бўлган Рамазон ойи муносабати билан “Аллоҳнинг 99 исми” номи остида янги лазерли шоу ўтказилмоқда.

Ушбу шоу муаллифи “Art Noor” ижодий гуруҳидир. Ранг-баранг чироқлардан иборат шоу куннинг турли вақтларида: шанбадан пайшанбагача 19:45 дан 22:45 гача ҳар соатда, пайшанбадан шанбагача эса 19:45 дан 22:45 гача ҳар ярим соатда бўлиб ўтади.

ЎМИ Халқаро алоқалар бўлими

Рамазон ойи шарофати билан “Pure Gold Group” заргарлик компанияси раҳбари Фироз Мерчант ноодатий усулда 650 минг дирҳам (177 минг АҚШ доллари) хайр-эҳсон қилди. Гап шундаки, у Бирлашган Араб Амирликлари  қамоқхоналарида жазо муддатларини ўтаётган 500 дан ортиқ маҳбуснинг қарзини тўлаб, уларни озод этди.

Фироз Мерчант тўлаган пул маблағи Ажмандаги 300 та ва бошқа ахлоқ тузатиш муассасаларидаги 260 нафар маҳбусни озод қилишга етди. Саховатпеша бой уларга уйларига етиб олиб, у ерда янги ҳаёт бошлашлари учун йўл чиптасини ҳам олиб берган.

ЎМИ Халқаро алоқалар бўлими