muslim.uz

muslim.uz

28 октябрь куни Ўзбекистон мусулмонлари идораси раиси, муфтий Нуриддин домла Холиқназаров ҳазратлари “Шамсуддинхон Бобохонов” нашриёт-матбаа ижодий уйи фаолияти билан яқиндан танишдилар.
Ташриф аввалида мўмин-мусулмонларнинг диний адабиётларга бўлган талаби, олий ва ўрта махсус ислом билим юртлари талабаларининг дарсликларга бўлган эҳтиёжини қондириш мақсадида, “Мовароуннаҳр” нашриёти негизида “Шамсуддинхон Бобохонов” нашриёт-матбаа ижодий уйи ташкил этилгани ҳақида маълумот берилди.
Нашриёт ижодий ходимлари билан танишиш асносида муфтий ҳазратлари қалам аҳлининг хайрли ишларига, мўмин-мусулмонларга зиё тарқатиш йўлидаги хизматларида муваффақиятлар тиладилар. Дарҳақиқат, Ислом таълимотини кенг ёйиш, нашрларни халқимизга етказишда ижод аҳлининг катта ўрни бор. Халқ манфаати, дин ғами ва Ватан тақдирини юрагидан ўтказиб ишлайдиган ижод аҳлининг ибратли фаолияти таҳсинга лойиқдир.
Муфтий ҳазратлари босмахона фаолияти билан танишар эканлар 60 минг нусхада чоп этилаётган “Никоҳнома” китобини кўздан кечириб, шундай дедилар: “Бугун турмуш қуриш остонасида турган ёш келин-куёв “Никоҳнома” китобини ўқиб, оила ва никоҳнинг муқаддас эканини, бу борада динимизнинг аҳкомларини ўзлаштириб олиши учун яхши манба бўлади. Бу китоб келин-куёвнинг никоҳи ўқилаётган-да тақдим этилиши эса мақтовга сазовордир”.
Шунингдек, босмахонада айни дамда “Қуръони карим шафоати”, “Мен ҳам тафаккур қиламан” каби рисолаларнинг чоп этиш жараёни ва тайёр маҳсулотлар билан танишган муфтий ҳазратлари уларнинг сифатига юқори баҳо бердилар. Халқимизга севимли бўлган “Ҳидоят”, “Мўминалар” журналлари ва “Ислом нури” газетаси ҳам ушбу жойда чоп этилаётгани барчани мамнун этди.
Таъкидлаш жоизки, “Шамсуддинхон Бобохонов” нашриёт-матбаа ижодий уйи қисқа фурсат ичида яхши натижаларга эришди, олий ва ўрта махсус ислом билим юртлари ҳамда масжидлар имом-хатибларини моддий қўллаб-қувватлаш ишига ҳам муносиб ҳисса қўшиб келмоқда.
Нашриёт ва босмахона билан яқиндан танишган муфтий ҳазратлари ташкилот фаолиятини такомиллаштириш ва диний адабиётлар чоп этишни юқори даражага олиб чиқиш юзасидан тавсияларни бердилар.
Хулоса ўрнида айтиш мумкинки, Давлатимиз раҳбари ташаббуслари ила китобхонлик маданияти ва китоб тарғиботига ислоҳотларнинг ажралмас қисми сифатида катта эътибор қаратилаётгани мана шундай эзгу ишларга йўл очмоқда.

 

Ўзбекистон мусулмонлари идораси Матбуот хизмати

Пятница, 29 Октябрь 2021 00:00

Макка фатҳидан кейин ҳижрат йўқ!

Наманган шаҳар бош имом хатиби Мусохон Аббасиддинов

Бугун юртимизнинг қориси, "Имом Бухорий" номли Тошкент ислом институти талабаси Ҳабибуллоҳ қори Олимжонов Қирғизистон Республикаси Бишкек шаҳрида МДҲ республикалари Қуръон ҳофизлари иштирокида ўтказиладиган I Халқаро Қуръони карим мусобақасида қатнашиш учун Бишкек шаҳрига жўнаб кетди.

Ушбу мусобақа “Қуръон баҳори” шиори остида 2021 йилнинг 30 октябрь куни Бишкек шаҳридаги “Имом Сарахсий” номли Марказий жоме масжидда ўтказилади. Унда МДҲ давлатларидан келган Қуръон ҳофизлари тажвид қоидаси асосида Қуръони каримни ёддан ўқиб бериш бўйича мусобақалашади.

Фурсатдан фойдаланиб Ҳабибуллоҳ қорига Аллоҳдан муваффақият ва омадлар тилаб қоламиз.

ЎМИ Халқаро алоқалар бўлими

Бугун, 28 октябрь куни Ўзбекистон мусулмонлари идораси раиси, муфтий Нуриддин домла Холиқназаров ҳазратлари диний таълим муассасаларига бўлган илк ташрифларини Имом Бухорий номидаги Тошкент ислом институтидан бошладилар.
Ташриф дастлаб институт тарихига оид маълумотлар билан танишишдан бошланди. Унда институт ташкил этилиши, таълим даргоҳининг мақсад-вазифалари, собиқ муфтийлар тарихи ва ректорлар тўғрисида маълумотлар берилди. Сўнгра институт биносида ташкил этилган китоблар кўргазмаси ва ҳаттотлик ишлари билан яқиндан танишилди.
Севимли Пайғамбаримиз соллаллоҳу алайҳи васаллам таваллуд топган Робиъул аввал ой муносабати билан институтда Сийрат ойлиги ўтказилаётгани ҳақидаги хушхабар кўнгилларни шод этди.
Муфтий Нуриддин домла Холиқназаров Расулуллоҳ соллаллоҳу алайҳи васалламнинг муборак ҳадиси шарифларидан таълим берилаётган дарс хонасига ташриф буюриб, талабалар билан суҳбат қурдилар. Талабалар дарс жараёнларидан, айниқса Мисрнинг Ал-Азҳар олийгоҳининг фазилатли устозларидан Шайх Жамолиддин Ҳошим каби мударрисларнинг замонавий усуллар орқали дарс беришаётганини жуда ҳам мамнун эканликларини изҳор этишди.
“Қиз болага таълим бериш, бутун умматга таълим бериш билан баробардир”. Шундан келиб чиқиб, Муфтий ҳазратлари институтда аёл-қизлар учун ҳам яратилган шарт-шароитлар билан қизиқдилар. Айниқса, қизлар учун алоҳида кутубхона, мажлислар зали, ўқув хоналари ва намозхона ташкил этилгани айни муддао бўлгани қайд этилди.
Албатта талабаларнинг илмли ва ўз касбининг етук мутахассиси бўлиб етишишларида китобнинг ўрни алоҳида. Муфтий ҳазратлари институт кутубхонасининг фаолияти билан ҳам танишдилар. Ахборот-ресурс маркази ходими Камолиддин Маҳкамов институт кутубхонаси ҳақида батафсил маълумо берди. Жумладан, ахборот-ресурс марказига етук мутахассислар жалб этилган ҳолда модернизация қилингани, китобларни сақлаш, уларнинг хавфсизлигини таъминлаш ва талабаларга китобларни етказиш халқаро талаб даражасида экани ҳақида сўзлаб берди.
Институтнинг асосий биносига қўшимча равишда бунёд этилган 15 та талабалар ўқув аудиторияси, мажлислар зали, кутубхона, ўқитувчи ва талабалар ошхонасини ҳам Муфтий ҳазратлари кўздан кечирди. Шунингдек, ушбу ўқув даргоҳи ҳудудида қад ростлаган 4 қаватли бинодаги 30 ўринлик таҳоратхона ва 30 та хонадан иборат замонавий ва шинам ҳолатга келтирилган талабалар турар жойи – ётоқхонани билан ҳам танишдилар.
Мана шундай ўзгаришлар ва янгиланишлар Янги Ўзбекистон шароитида Давлатимиз раҳбари ташаббуслари билан таълим-тарбия соҳасида амалга оширилаётган ислоҳотларнинг амалдаги яққол ифодаси экани ташриф давомида алоҳида эътироф этилди.
Муфтий ҳазратлари талабалар илм олиши, динимиз, халқимиз манфаати йўлида хизмат қилиши учун барча шароитлар муҳайё этилгани, толиби илмлардан эса фақатгина бир нарса – ихлос билан илм олиш, яратилган қулайликлардан тўғри ва оқилона фойдаланиш, Аллоҳ таолонинг неъматларга шукрона сифатида ҳам илму ирфон эгаллаш зарурлигини ёдга солиш бугунги ташрифдан кўзланган бош мақсад экани алоҳида таъкидладилар.

 

Ўзбекистон мусулмонлари идораси Матбуот хизмати

Страница 8 из 1745

Мақолалар

Top