Асли касбим ўқитувчи. 40 йилдан ортиқ ёшларга таълим-тарбия бердим. Аллоҳ насиб қилиб, ҳаж ибодатини адо этиш бахтига муяссар бўлиш арафасида турибман. Ҳар гал Каъбани тавоф қилар эканман, раҳматли онамнинг бир сўзлари ёдимга тушади. – Болам, одамларни корига яраган, уларни рози қилган, Яратганни ризолигини топади. Элим десанг, эл ардоқлайди, Аллоҳ десанг Ўзи яхши ниятларингга етказади, дерди онам. Мен ҳам онамнинг пурмаъно сўзларига амал қилиб, озми-кўп эл корига ярашга интилдим. Муборак сафар олдидан, маҳалламиздаги эҳтиёжмандларга қўлимдан келганча ёрдам бердим. Ажрашиш арафасида турган бир ёш оилани сақлаб қолишга эришдим. Маҳалла аҳлининг дуосини олиб муборак сафарга келдим. Илоҳим, элу юртимиз тинчлиги, осойишталиги, фарзандларимиз камолотини сўраб қилаётган дуоларимизни Яратган ижобат қилсин.
Фазлиддин НАЖМИДДИНОВ,
Наманган вилоятидан.

Эҳтиромдан бошимиз кўкда
«Мен автомобилларга техник хизмат кўрсатиш соҳасида 30 йилдан кўпроқ меҳнат қилдим. Аллоҳ насиб қилган экан, бу йил ҳаж сафарига келдим. Келишимдан олдин, маҳалламизда бир ночор оилани уйини битказишга, яна бир боқувчисини йўқотган оилага қўлдан келганча ёрдам кўрсатдим. Аллоҳга ёққан бир эзгу ишим бор экан-ки, Ўзини улуғ байтини зиёрат қилиш, ҳаж ибодатини адо этиш бахтига муяссар қилди. Шу ўринда бир нарсага эътиборингизни қаратмоқчиман: мен Мадина ва Макка шаҳарларида ўзбекистонлик ҳожиларимиз учун ажратилган меҳмонхоналар ва улардаги шарт-шароитлардан, очиғи, ҳайратга тушдим. Чунки, юряпмиз, кўряпмиз, эшитяпмиз, солиштиряпмиз бошқа давлатларнинг ҳожиларига бундай эътибор йўқ. Бу эҳтиромдан бошимиз кўкда. Ҳар гал Каъбани тавоф қилар эканмиз, ана шундай қулайликларни бизга ҳозирлаб берган давлатимиз Раҳбарини, барча-барчани дуоларимизда эслаяпмиз, юртимизга тинчлик-осойишталик, барқарорлик, халқаро майдонда номимиз ва ўрнимиз бундан-да сарбаланд бўлишини сўраяпмиз».
Толибжон ИМОНҚУЛОВ, Андижон вилояти, Марҳамат туманидан.

Ўзбекистон мусулмонлари идораси ҳузуридаги “Muslim-tour” сайёҳлик фирмаси дунёдаги муборак қадамжолар бўйлаб, зиёратлар уюштиришни бошлади.
Муҳтарам Президентимиз томонидан туризмни ривожлантиришга оид қабул қилинган фармон ва қарорлар зиёрат туризмини ривожлантиришга катта хизмат қилмоқда. Ушбу зиёрат туризмини ривожлантиришга ҳисса қўшиш ва сайёҳларга қулай шарт-шароитлар ташкил этиш мақсадида, “Muslim-tour” сайёҳлик фирмаси ҳам ўзининг муносиб ҳиссасини қўшиб келмоқда.
Шу кунларда “Muslim-tour” сайёҳлик фирмаси томонидан бир гуруҳ юртдошларимиз мўмин-мусулмонлар учун энг табаррук жойлардан бири бўлган Қуддуси шариф шаҳри зиёратини амалга оширишмоқда.
Зеро, Абу Ҳурайра розияллоҳу анҳудан ривоят қилинган ҳадиси шарифда: «Набий соллаллоҳу алайҳи васаллам: «Кўч боғлаб бориш фақат уч масжидгагина бўлади: менинг ушбу масжидимга, Масжидул ҳаромга ва Масжидул Ақсога», дедилар». Демак, зиёратидан савоб умид қилиб, алоҳида ният билан сафар қилиш мумкин бўлган масжид учта экан. Улар: Мадинаи мунавварадаги Пайғамбаримиз Муҳаммад Мустафо соллаллоҳу алайҳи васалламнинг масжидлари, Маккаи мукаррамадаги Масжидул ҳаром ва Қуддус шарифдаги Масжидул Ақсодир. Бу нарса мазкур уч масжиднинг фазли нақадар юксак эканини кўрсатади.
Шу ҳадиси шарифга монанд равишда айни кунларда 20 нафар фуқароларимиз Қуддус шаҳридаги азиз ва мўътабар масканлар, осори атиқалар ва энг асосийси “Ақсо” масжиди зиёратини амалга оширишмоқда.
Мўътабар масканлар зиёратидан руҳий-маънавий қувват олган диёримиз кишилари энг табаррук жойларни зиёрат қилганлари ва уларга кўрсатилган хизматлардан жуда ҳам мамнун бўлганларини изҳор қилишди.
Ўз навбатига айтиш керакки, “Muslim-tour” фирмаси юртимиздаги ички туризмни ривожлантириш бўйича ҳам ўз фаолиятини олиб бормоқда. Бундан аввалроқ, Бухоро, Самарқанд ва Фарғона вилоятларидаги қадамжолар бўйлаб зиёратлар ташкил этилган эди.
“Muslim-tour” сайёҳлик фирмаси мана шундай илғор ташаббусларни амалга оширишда давом этади.

Ўзбекистон мусулмонлари идораси Матбуот хизмати

2 август куни Ўзбекистон мусулмонлари идорасида жорий йилда Саудия Арабистони Подшоҳининг меҳмони сифатида ҳаж сафарига кетаётган зиёратчилар билан мулоқот ўтказилди.
Учрашувда Шайх Абдулазиз Мансур меҳмон сифатида танланган зиёратчиларни қутлаб, ушбу сафарга энг муносиб уламолар, илм-фан соҳасининг етук намоёндалари танлаб олинганини алоҳида таъкидлади. Муборак сафарга подшоҳнинг меҳмони сифатида бориш шараф экани, бутун умрини Ислом дини ривожи, мўмин-мусулмонлар хизмати ва илму ирфон тарқатишга сарфлаган кишилар мана шундай илтифотга муносиб кўрилганини Шайх ҳазратлари алоҳида қайд этдилар.
Ўзбекистон мусулмонлари идораси раиси маслаҳатчиси Абдуҳаким қори Матқулов меҳмон сифатида кетаётган уламоларни сафар мобайнида уюштириладиган анжуманлар, маърифий тадбирлар ва мулоқотларда фаол қатнашишни билдирди. Шунингдек, суҳбатлар давомида Ўзбекистонда сўнгги йилларда Ислом дини ривожи йўлида қилинаётган хайрли ишлар тўғрисида маълумотлар тақдим этишни қўшимча қилди.
Ўзбекистон мусулмонлари идораси Котибияти мудири Муҳаммад Аюбхон домла Ҳомидов мезмонлар томонидан тақдим этиладиган сафар дастурига амал қилиш, сафар давомида юзага келадиган масалаларни маслаҳатлашган ҳолда ҳал этиш ва ташкилий ишлар билан боғлиқ масалаларни баён этди.
Шунингдек, бу йилги меҳмонлар сафида Муҳаммад Шариф домла Жуманов, Исмоилжон домла Ҳамроқулов, Абдумалик домла Мамадалиев ва Абдували домла Исажонов каби устозларнинг борлиги барчамизни мамнун этмоқда.
Аллоҳ таборака ва таоло меҳмонларнинг ҳажларини мабрур айласин!

Ўзбекистон мусулмонлари идораси Матбуот хизмати

Ким Набий саллаллоҳу алайҳи васалламнинг шафоатларини хоҳламайди?

Ким Набий саллаллоҳу алайҳи васалламнинг жаннатда қўлларидан кавсар сувини ичишни истамайди?

Ким Набий саллаллоҳу алайҳи васалламнинг жаннатда қўшнилари бўлишни хоҳламайди?

Ким Набий саллаллоҳу алайҳи васалламни хурсанд қилишни хоҳламайди?

Ким Набий саллаллоҳу алайҳи васалламнинг суннатларида бардавом бўлишни истамайди?

Буларнинг барчасини қўлга киритишимиз учун Пайғамбаримиз саллаллоҳу алайҳи васалламга доим саловот айтишимиз лозим бўлар экан.

Аллоҳ Ўзининг муборак каломи Қуръони каримда ҳам биз бандаларига Набий саллаллоҳу алайҳи васалламга саловот айтишимиз таълимотини бериб, шундай хитоб қилади:

إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا

“Албатта, Аллоҳ ва Унинг фаришталари Пайғамбарга саловат айтурлар. Эй, мўъминлар! (сизлар ҳам) унга саловат ва салом айтинг!” (Аҳзоб,56)

“Саловот” сўзи – дуо, раҳмат, улуғлаш ва мақташ маъноларидадир. “Салом” сўзи эса – барча бало ва офатлардан омонда бўлиш демакдир. Аллоҳ таоло томонидан бўладиган саловат ва салом – раҳмат ва мақтов маъносида. Фаришталар томонидан бўладиган саловат ва саломлар эса – истиғфор ва дуо маъносидадир.

Юқорида келтирилган ояти каримада оламлар Раббиси ва яратувчиси бўлмиш Аллоҳ таолонинг шахсан Ўзи Пайғамбаримиз Муҳаммад саллаллоҳу алайҳи васалламга саловат айтишга буюрмоқда. Бу эса Пайғамбаримизнинг мартабалари ҳамда у зотга нисбатан саловат ва саломларнинг ўрни нақадар олий эканидан далолатдир.

Зеро, Расулуллоҳ саллаллоҳу алайҳи васаллам шундай марҳамат қиладилар: "Ким менга бир марта саловат айтса, Аллоҳ унга ўнта саловат айтади (яъни, ўнта гуноҳини мағфират қилади)".

Абу Толҳа розияллоҳу анҳудан ривоят қилинади:
"Бир куни Набий соллаллоҳу алайҳи васаллам хурсанд ҳолда келдилар. Биз: "Юзингизда хурсандчиликни кўряпмиз! (нима бўлди?), – дедик. Расулуллоҳ саллаллоҳу алайҳи васаллам: "Менинг олдимга фаришта (Жаброил алайҳиссалом) келди ва: "Эй, Муҳаммад! Роббингиз шундай деди: "Мен сизга бир марта саловот айтган кишига ўнта саловот айтишим ва сизга бир марта салом айтган кишига ўнта салом айтишим сизни рози қилмайдими", – деб хабар берди.

Пайғамбаримиз соллаллоҳу алайҳи васаллам шундай марҳамат қиладилар: "Қиёмат кунида умматларимнинг менга энг яқини, менга уларнинг саловотни энг кўп айтувчиларидир".

Имом Саноний бу ҳадиси шарифдаги "инсонларнинг менга энг яқини" деган гапни "инсонларнинг менга турар жойи ва шафоатимга ҳақли бўлиш жиҳатидан энг яқини" деб, бошқа муҳаддис уламолар эса "жаннатдаги ўрин жиҳатидан менга энг яқини" деб шарҳлаганлар. Ҳаммамизга маълумки, қиёмат кунида ҳеч бир инсон учун шафоатчи, ёрдамчи бўлмайди.

Фақатгина, Расулуллоҳ саллаллоҳу алайҳи васалламгина Аллоҳ таолонинг розилиги билан Ўзлари хоҳлаган умматларини шафоат қиладилар. Ўша шафоатга сазовор бўладиганларнинг бир тури Расулуллоҳ соллаллоҳу алайҳи васалламнинг ҳақларига саловот ва саломни кўп айтувчилардир.

Пайғамбаримиз соллаллоҳу алайҳи васалламга саловот ва салом айтиб туриш – ҳар бир банданинг бурчи. Аллоҳ таоло шунга амр қилган. Аммо жума куни Пайғамбаримиз соллаллоҳу алайҳи васалламга саловот айтиш яна ҳам зарур ва алоҳида фазилатга эгалигини ушбу ҳадисдан билиб оламиз.

Абдуллоҳ ибн Абу Вафо розияллоҳу анҳудан ривоят қилинади:
«Набий соллаллоҳу алайҳи васаллам: «Жума куни менга саловотни кўпайтиринглар. Албатта, менга етказинглар ва мен эшитурман», дедилар».
Шофеъий ва Ибн Можа ривоят қилишган.

Расулуллоҳ соллаллоҳу алайҳи васаллам: «Сизларнинг жаннатда менга энг яқин бўладиганларингиз менга саловотни кўпроқ айтадиганларингиздир. Бас, ёруғ кеча ва нурли кунда менга саловот айтишни кўпайтиринглар», дедилар.
Шофеъий ва Байҳақий ривоят қилишган. Аллоҳ билувчи.

Ҳадиси шарифдаги «ёруғ кеча»дан мурод жума кечаси, «нурли кун»дан мурод жума кунидир.

Ана шундоқ бир кунда Пайғамбаримиз соллаллоҳу алайҳи васалламга кўп саловот айтмоқ жуда ҳам марғуб иш. Умматларнинг айтган саловотлари Пайғамбаримиз соллаллоҳу алайҳи васалламга арз қилинур. Аллоҳнинг амри ила у Зот соллаллоҳу алайҳи васаллам бу саловотларни эшитадилар, улардан хурсанд бўладилар.

Ким Пайғамбаримиз соллаллоҳу алайҳи васалламни Шафоатларига мушарраф бўлишни хоҳлайди – унда Расулуллоҳ саллалоҳу алайҳи васалламга саловотни кўпайтирсин!

Ким Пайғамбаримиз саллаллоҳу алайҳи васалламни қўлларидан кавсар сувини ичишни хоҳлайди – унда Расулуллоҳ соллалоҳу алайҳи васалламга саловотни кўпайтирсин!

Ким суннатга амал қилишни хоҳлайди – унда Расулуллоҳ саллалоҳу алайҳи васалламга саловотни кўпайтирсин!

Ким Пайғамбаримиз саллаллоҳу алайҳи васалламни хурсанд қилишни хоҳлайди – унда Расулуллоҳ саллалоҳу алайҳи васалламга саловотни кўпайтирсин!

Ким жаннатда Набийимиз саллаллоҳу алайҳи васалламга энг яқин бўлишни хоҳлайди – унда Расулуллоҳ саллалоҳу алайҳи васалламга саловотни кўпайтирсин!

"Ас – Солату вас – саламу алайка я Росулаллоҳ" (яъни, Эй, Расулуллоҳ! Сизга саловот ва саломлар бўлсин!


Жамшид НАЗАРОВ

2019 йил 29 июль куни Имом Бухорий халқаро илмий-тадқиқот марказида Миср Араб Республикасидаги Ал-Азҳар Университетининг моҳир қироит илми устози Алижон Қори Файзуллоҳ Махдум ўғли билан учрашув бўлиб ўтди. Учрашувда Марказ илмий ходимлари ва Ўзбекистон халқаро ислом академияси ҳузуридаги малака ошириш маркази Самарқанд вилояти минтақавий филиали тингловчилари иштирок этди. Бу ҳақда ИБХИТМ Матбуот хизмати хабар берди.

Илмий суҳбат самимий ва эркин тарзда кечди шайх Алижон қори томонидан қироат илми аҳамияти, қироат имомлари ҳаётидаги ибратли воқеалар, хусусан, бизга замондош бўлган қироат устозларининг панд-насиҳатлари ҳақида таъсирли маъруза қилинди. Айниқса, устоз қорилар ҳаётидаги мўъжизавий ҳолатлар ҳақидаги ҳикоялар йиғилганларда ўзгача таассурот қолдирди.

Учрашув давомида юртимиздаги қироат илми ҳолати, уни ривожлантиришдаги режалар, бу борадаги имом хатиблар ва диний соҳа ходимлари зиммасидаги вазифа ҳамда масъулиятлар ҳақида фикр-мулоҳазалар билдириб ўтилди. Тажвид қоидалари амалиётига оид умумий тушунча берилиб, айрим қоидалар намуна тариқасида амалий ифодаланди.

Маълумот ўрнида, Алижон Қори Файзуллоҳ Махдум ўғли (Ҳайдаров Алижон Файзуллаевич) ўзбекистонлик, Жиззах вилоятининг Ғаллаорол тумани фарзанди. 1995-йилда Ўзбекистон Мусулмонлари идораси томонидан Миср Араб Республикасидаги Ал-Азҳар Университетига илк бора ўқишга юборилган. 1996-йилда Ўзбекистон Республикасига қайтиб келиб, 1997-йилда Ўзбекистон Республикаси Вазирлар маҳкамасининг 478-чи фармойишига мувофиқ Ўзбекистон Республикаси Вазирлар маҳкамаси қошидаги Диний қумита томонидан Ал-Азҳар Университетига ўқишини давом эттириш учун қайта юборилган. Қуръони карим илмлари ва қироат бўйича катта устоз бўлиб етишган. Ўн қироат бўйича ижоза соҳиби, мазкур қироатларнинг бир нечта ривоятлари ила моҳири бўлган, Мисрдаги ўнлаб уламолардан таҳсил олган шайх Алижон қори, ўзи ҳам кўплаб шогирдлар чиқариб келмоқда.

Жорий йилда шайх Алижон қори “Қуръон ила сафар” сарлавҳаси остида юртимизнинг кўплаб диққатга сазовор жойларига ташриф буюриб, халқимиз қалбига Қуръон нурларини улашмоқда. Шунинг билан бирга унинг иштирокида “muslim.uz” сайтида “Қуръон қалб шифоси” мавзусидаги туркум маърифий суҳбатлар тайёрланмоқда.

Илмий учрашув якунлангач Марказ директори ўринбосари Ш.Умаров ва шайх Алижон қори ўртасида алоҳида мулоқот ўтказилди. Мулоқот давомида марказ фаолияти ҳақида батафсил маълумот берилди, хусусан буюк алломаларимиз ҳаёти ва меросини ўрганиш, уларнинг нодир асарларини ўзбек тилига ўгириб, халқимизга етказиш йўлида хизмат қилаётган “таржимонлик гуруҳи”нинг амалга оширган ва ошираётган ишлари Шайх Алижон қорида ўзгача таассурот қолдирди.

Шайх Алижон қори Марказни ташкил этилишида ташаббус қилиб, мазкур иншоатни барпо этиб, халқаро майдонларда ҳам Марказ ҳақида фикр билдириб келаётган Президентимиз Ш.Мирзиёевнинг ташаббус ва таклифларини қўллаб-қувватлашини билдириб ўтди. Марказ билан яқиндан алоқада бўлиши, доимий ҳамкорлик ва истиқболли режаларни биргаликда амалга оширишда ёрдамга тайёр эканини билдириб, самимий учрашув учун ташаккур изҳор этди.

Ўзбекистон мусулмонлари идораси Матбуот хизмати