muslim.uz

Суббота, 25 Август 2018 00:00

Австралияда Қурбон ҳайити намозида Аллоҳ таолодан ёмғир сўралди

Бу йил Австралиянинг 16 масжидида қурбон ҳайити намозлари адо этилди. Энг катта жамоат Сидней шаҳрининг “Лакемба” масжидида йиғилди. Бу масжиддда ўттиз мингдан ортиқ мусулмон ҳайит намозини адо қилдилар. Шунингдек, ҳозирда Австралияда давом этаётган қурғоқчилик сабаб, йиғилган жамоат Аллоҳ таолодан ёмғир баракасини нозил этишини сўраб дуо қилишди.

манба: kamolon.uz

Бўлим Дунё янгиликлари

Суббота, 25 Август 2018 00:00

Ҳажингиз мабрур ҳаж бўлсин!

Аллоҳ таолога беҳад ҳамдлар, ўзининг ҳабиби бўлган Пайғамбаримиз Муҳаммад мустафо соллаллоҳу алайҳи васалламга дуруд ва саловотларимиз бўлсинким, ҳар йил диёримиз мусулмонлари муқаддас динимизнинг бешинчи рукни бўлган муборак Ҳаж ибодатини жуда катта хурсандчилик, шукроналик кайфиятида адо этиб келмоқдалар.

Ҳаж Ислом арконларидан бири бўлиб, қодир бўлган кишиларга ушбу ибодатни умри давомида бир маротаба адо қилиш фарз ҳисобланади. Аллоҳ таоло ўзининг Каломи шарифида: “Йўлга қодир бўлган одамлар зиммасида Аллоҳ учун Байтни ҳаж қилиш (фарзи) бордир” (Оли Имрон сураси 97-оят).

Ҳаж луғатда қасд қилиш маъноларини англатади. Уламоларимиз таърифида эса махсус вақтда, махсус маконда, ният билан махсус ибодатларни адо этишга “Ҳаж” дейилади.

Ўзбекистонимиздан бу йилги Ҳаж зиёратига кетган юртдошларимиз арафа кунидан бир кун аввал ҳожилик либоси бўлган оппоқ эҳромларини боғлаб, Ҳаж ниятларини қилиб, Мино водийсига йўл олдилар. У ерда дуо, ибодат билан машғул бўлдилар. Чунки Пайғамбаримиз алайҳиссалом шундай қилганлар. Сўнг у ерда тунаб, эртаси куни Бомдод намозини адо этганларидан кейин Арафотга бордилар.

Зулҳижжанинг биринчи ўн кунлиги улуғ фазилатларга эга. Бу ойда муборак Ҳаж ибодати бажарилишлиги асносида Ҳажнинг энг катта рукнларидан бири бўлган Арафа кунида Арафот тоғида турилади.

Ибн Аббос розияллоҳу аҳудан ривоят қилинади, Пайғамбаримиз саллоллоҳу алайҳи васаллам: “Ҳаж – арафадир” деганлар.
Арофотда ҳам дуои хайрлар, ибодатлар ила туришиб, Арафа кунининг Пешин ва аср намозларини жам қилиб ўқидилар. Дуо ва тавбаларда бардавом бўлдилар. Арафотдаги вуқуфдан сўнг қуёш ботганидан кейин эса Муздалифага бордилар. Аллоҳ таоло ўзининг каломида: “Арафотдан тушганингизда, Машъари Ҳаромда (Муздалифада) Аллоҳни (талбия, таҳлил, такбир, сано билан) зикр этинг” деб марҳамат қилди. (“Бақара” сураси, 198-оят)

Муздалифа водийсида эса, шом ва хуфтон намозларини жам қилиб ўқидилар, у ерда ҳам ибодат ва зикларда бўлдилар. Бу ерда ҳожиларимиз тунни ўтказиб, эртаси куни, яъни ҳайит куни эрталаб Мино водийсига қайтдилар. У ердан эса Жамарот (шайтонга тош отадиган макон)га бориб, шайтонга тош отдилар ва қурбонликлар қилдилар. Сочларини олдириб ёки қисқартириб, эҳромлардан чиқдилар. Шу кундан эътиборан уч кун Жамаротда шайтонга тош отдилар. Ҳайит кунининг иккинчи ва учинчи кунларида эса Каъбаи муаззамада тавофи ифоза, яъни зиёрат тавофини адо этдилар. Ифоза тавофи эса ҳажнинг рукларидан ҳисобланади.

Ҳозирда эса юрдошларимиз ҳожилик мақоми ила меҳмонхонага қайтдилар. Уларга бу ибодатлар муборак, ҳожилик мақоми муборак бўлсин деб қоламиз.

Аллоҳ таоло ҳаммаларимизни ўзининг Байтига чақирсин. Юртимизни тинч, халқимиз хаётини янада фаровон айласин. Ҳожиларимизнинг эса эсон-омон юртимизга қайтиб келишларини ўзи насиб айласин.

Ўзбекистон мусулмонлари идорасининг

Андижон вилояти вакиллиги

ходими Нурилло Қодиров

Бўлим Ўзбекистон янгиликлари

Суббота, 25 Август 2018 00:00

Президент ҳаж сафарига юборган отахон билан дилдан суҳбат

Кеча, 24 август куни Макка шаҳридаги ўзбекистонлик зиёратчилар жойлашган “Аброж ал-Ҳидоя” меҳмонхонасида муҳтарам Президентимизнинг тавсияси билан бу йилги ҳаж сафарига келган Сирдарё вилояти Сайхунобод туманилик Бахтиёр ота Тоғаев Ўзбекистон мусулмонлари идораси раиси, муфтий Усмонхон Алимов ҳазратлари билан самимий суҳбат бўлиб ўтди.
Муфтий ҳазратлари муҳтарам Юртбошимиз томонларидан она-Ватанимиз равнақи, халқимиз фаровонлиги, ёшлар тарбияси ва адашган кишиларни тўғри йўлга бошлашда жонбозлик кўрсатган фуқароларимизни ҳар жиҳатдан қўллаб-қувватлаш ишлари доимо эътиборда эканини таъкидладилар. Жумладан, Сирдарё вилояти Сайхунобод туманилик Бахтиёр ота Тоғаев ва унинг турмуш ўртоғи мана шундай юксак эътиборга тушиб, барча мўмин-мусулмонлар орзу қиладиган ҳаж сафарига келиш бахтига муваффақ бўлганларини муфтий ҳазратлари алоҳида изоҳладилар. Бунинг учун Аллоҳ таборака ва талога шукроналар келтириш, давлатимиз Раҳбари ҳақларига кўп дуолар қилиш лозимлигини айтдилар.
Маълумки, шу йил 13 апрел куни Сирдарё вилояти Сайхунобод туманида бўлиб ўтган видеоселектор йиғилишида муҳтарам Президентимиз Бахтиёр ота Тоғаевга юзланиб: “Бир эзгу ният қилдингиз, “юртимизнинг тинчлиги, осойишталигага кўз тегмасин”, дедингиз. Барчамиз одамларимизнинг бағрига озгина бўлсада манфаат тегсин, озгина бўлсада тирикчилиги ўзгарсин, деган ниятда яшаймиз. Менинг бир ниятим, истагим бор. Биз сизни оилангиз билан ҳар бир мўмин-мусулмон ният қилган ҳаж сафарига, ўзимнинг ҳисобимдан жўнатамиз”, дея рағбатлантирган эдилар.
Мана шу рағбат амалга ошди, Президентимиз ўз сўзидан чиқди. Бахтиёр ота Тоғаев ва унинг турмуш ўртоғи бу йилги ҳаж сафарига имтиёзли равишда келиб, барча амалларни мукаммал адо этишди. Уларнинг мамнунлиги жуда ҳам улкан. Буни Бахтиёр ҳожи ота қуйидагича изҳор қилди:
– Аллоҳ таолога беҳисоб шукрки, муҳтарам Президентимизнинг тавсиялари билан бу йилги ҳаж сафарига келиш шарафига муяссар бўлдик. Ҳаж амалларини жуда ҳам чиройли шаклда адо этдик. Ҳарами шарифларда, табаррук манзилларида, меҳмонхоналарда, автобусларда, ошхонада ва тиббиёт марказларида кўрсатилган хизматларнинг савияси жуда ҳам юқори бўлди. Муфтий ҳазратлари ва имом-домлаларимизнинг ваъзу иршодлари мунтазам олиб борилди. Биз, қанийди мана шундай мавъизалар доимий бўлса, деган ниятларни қилдик. Буларнинг барчаси учун муҳтарам Президентимизга, муфтий ҳазратларига, ишчи гуруҳларига, шифокорларга ва барча-барча мутасаддиларга ўз ташаккуримизни билдираман ва доимо уларнинг ҳақларига хайрли дуоларда бўламиз. Она-Ватанимизга қайтгач, шахсий ҳаётда, ижтимоий фаолиятда бошқаларга намуна бўлишга, ёшларни фидойи ва ватанпарвар этиб тарбиялашга, адашган инсонларни тўғри йўлга бошлашдек савоб ишларда бор куч-ғайратимизни сарфлаймиз, иншоаллоҳ.

Ўзбекистон мусулмонлари идораси Матбуот хизмати

Бўлим Ўзбекистон янгиликлари

Пятница, 24 Август 2018 00:00

Оролни қутқариш халқаро жамғармаси саммити бошланди

Туркманбоши шаҳридаги “Аваза” сайёҳлик зонасида Оролни қутқариш халқаро жамғармаси таъсисчи давлатлари раҳбарлари мажлиси бошланди.

ЎзА мухбири Матназар Элмуродов хабар қилади

Туркманбоши шаҳри, 24 август.

Президентлар аввал тор доирада учрашув ўтказди. Унда Ўзбекистон Республикаси Президенти Шавкат Мирзиёев, Туркманистон Президенти Гурбангули Бердимуҳамедов, Тожикистон Республикаси Президенти Эмомали Раҳмон, Қозоғистон Республикаси Президенти Нурсултон Назарбоев, Қирғизистон Республикаси Президенти Сооронбай Жээнбеков иштирок этди.

Мажлисда жамғарма фаолиятини такомиллаштириш, минтақадаги экологик вазиятни яхшилаш, сув ресурсларини мувофиқлаштирган ҳолда бошқариш, бу борада Марказий Осиё мамлакатларининг ҳамкорлигини мустаҳкамлаш масалаларига эътибор қаратилди.

Оролни қутқариш халқаро жамғармаси Ўзбекистон, Қозоғистон, Қирғизистон, Тожикистон ва Туркманистон раҳбарлари ҳамкорлигида Орол денгизи ҳавзасида экологик инқирозга барҳам бериш ва ижтимоий-иқтисодий вазиятни яхшилаш мақсадида тузилган минтақавий ташкилотдир. Таъсисчи давлатлар ушбу жамғармага галма-гал уч йил муддатга раислик қилади ва Марказий Осиё давлатлари раҳбарлари навбати билан Оролни қутқариш халқаро жамғармаси Президенти этиб сайланади. 2017 йилдан 2019 йилгача жамғармага Туркманистон раислик қилмоқда.

Таъкидлаш жоиз, мазкур саммит жамғарманинг 2009 йили Тошкентда ўтган тарихий мажлисидан сўнг ташкил этилаётгани билан аҳамиятлидир. Таъсисчи давлатлар раҳбарларининг Тошкент учрашувида минтақада экологик ҳалокатнинг олдини олиш йўлида муҳим саъй-ҳаракатларни амалга ошириш бўйича чора-тадбирлар белгилаб олинган эди.

Оролбўйи минтақасидаги экологик вазият ўнглаб бўлмайдиган ҳолатга келган, унинг салбий таъсири тобора кенгайиб бораётган бугунги шароитда давлат раҳбарларининг ижтимоий, иқтисодий, экологик хавфсизликни таъминлаш борасидаги ҳамфикрлилиги алоҳида аҳамият касб этади.

Ўтган даврда ОҚХЖ доирасида минтақада мураккаб сув хўжалиги масалаларини ҳал этиш, сув тақсимоти, Орол денгизи ҳавзасида сув ресурсларини биргаликда бошқариш, фойдаланиш ва муҳофаза қилиш бўйича ҳамкорлик борасида қатор шартномалар ҳамда битимлар имзоланди.

Ўзбекистон Оролбўйи минтақасида экологик вазиятни барқарорлаштириш, аҳолининг турмуш даражасини яхшилаш бўйича кенг миқёсли лойиҳаларни амалга оширди. Орол денгизи қуриган 350 минг гектар майдонга саксовул ва шўрга чидамли ўсимликлар экилиб, бутазорлар барпо этилди. Бундай ҳудудларнинг умумий майдони қарийб 700 минг гектарга етди.

Орол ҳалокати оқибатларини юмшатиш ва Оролбўйи минтақасини ривожлантириш бўйича 2013 – 2017 йилларга мўлжалланган комплекс чора-тадбирлар дастури доирасида 500 дан ортиқ лойиҳа амалга оширилди. Уларнинг ярмидан кўпи миллий лойиҳалардир.

Президент Шавкат Мирзиёев ташаббуси билан қабул қилинган 2017 – 2021 йилларда Оролбўйи минтақасини ривожлантириш Давлат дастури доирасида Оролбўйида ижтимоий-иқтисодий ҳолатни, аҳоли турмуш шароитини яхшилаш, экологик фалокат асоратларини юмшатиш бўйича инвестиция лойиҳалари амалга оширилмоқда.

Ўзбекистон Республикаси Молия вазирлиги ҳузурида Оролбўйи минтақасини ривожлантириш жамғармаси тузилди ва унга 200 миллиард сўмдан ортиқ маблағ йўналтирилди. Бу маблағлар ҳисобидан Қорақалпоғистон Республикаси ва Хоразм вилояти аҳолисининг сув таъминоти, турмуш шароити яхшилаш чора-тадбирлари кўрилмоқда.

Учрашувда Марказий Осиёда сув соҳасидаги ҳамкорлик сезиларли даражада фаоллашгани, минтақа мамлакатларида сув ресурсларидан фойдаланиш ва бошқариш бўйича икки томонлама ва кўп томонлама лойиҳалар рўёбга чиқарилаётгани таъкидланди. Орол муаммоси оқибатларини юмшатиш, сувни тежаш ва ҳудуддаги экологик ҳолатни яхшилашда Марказий Осиё мамлакатларининг саъй-ҳаракатларини бирлаштириш, Оролбўйи ҳудуди учун экологик тоза технологиялар ишлаб чиқиш ва жорий этишга хорижий инвестицияларни жалб қилиш масалалари муҳокама қилинди.

ЎзА

Бўлим Ўзбекистон янгиликлари

Пятница, 24 Август 2018 00:00

Қардош халқлар уламоларининг Арофатдаги тарихий учрашуви

20 август куни Саудия Арабистонининг энг табаррук жойларидан бири бўлган Маккаи мукарраманинг Арофат водийсида Қозоғистон, Қирғизистон, Тожикистон ва Озарбайжон мусулмонлари идоралари вакиллари Ўзбекистон Республикасининг Жидда шаҳридаги консуллиги ташаббуси билан Ўзбекистон мусулмонлари идораси раиси, муфтий Усмонхон Алимов ва Дин ишлари бўйича қўмита раиси ўринбосари Нуриймон Абулҳасан билан мулоқот ўтказдилар. Уламолар бир-бирларини Қурбон ҳайити билан муборакбод этиб, энг яхши тилакларни изҳор қилдилар.

Ҳақиқатан, ушбу давлатлар раҳбарларининг саъй-ҳаракатлари билан ҳамкорлик алоқалари кейинги йилларда кенг қулоч ёйиб бораётир. Айниқса, мазкур мамлакатлар диний идоралари билан алоқалар янги босқичга кўтарилганини алоҳида қайд этиш керак. Минтақадаги мўмин-мусулмонлар бирдамлигини таъминлаш ва шаръий эҳтиёжларини қондириш йўлида самарали натижаларга эришилмоқда. Масалан, Рамазон ойи, икки ҳайит байрамларининг биринчи кунини белгилаш ва намоз вақтларини аниқлашда олиб борилган уламоларнинг ҳамкорлиги мўмин-мусулмонларнинг аҳиллигини янда мустаҳкамлади. Шунингдек, ўтган йили Озарбайжон ва Ўзбекистон давлатлари ҳамкорлигида ўтказилган “Ислом ҳамжиҳатлиги: Ўзбекистон ва Озарбайжон мисолида” номли халқаро анжуман фикримизни янада қўллаб-қувватлайди.

Арафотдаги ўзбекистонлик зиёратчилар жойлашган чодирдаги бўлиб ўтган ушбу мулоқотда ҳам мамлакатлар раҳбарлари томонидан бошлаб берилган кенг қамровли ҳамкорлик муносабатларининг узвий давоми сифати мана шундай учрашувлар ташкил этилгани ҳам алоҳида таъкидланди. Мазкур учрашув тарихий экани ва диний соҳадаги ҳамкорлик алоқаларининг ривожланиб бораётганини эътироф этилди.
Мулоқотда қардош халқлар ўртасидаги алоқаларни янада ривожлантириш, бугунги кундаги турли таҳдидларга қарши биргаликда курашиш, мўмин-мусулмонлар бирдамлигини таъминлаш ва шаръий эҳтиёжларини қондиришда кенгашиб ишлаш каби масалаларга алоҳида урғу қаратилди.
Мулоқот якунида мана шундай ҳамкорликларнинг истиқболи ва равнақи йўлида хайрли дуолар қилинди.