Саидаҳмад домла Сайдаралиев

Ўзбекистон элчиси Улуғбек Мақсудов Саудия Арабистони Миллий ривожланиш компанияси бош директори Носир бин Ҳаммад ал-Жаийдий билан музокаралар ўтказди, деб хабар бермоқда «Дунё» АА.

Учрашувда Ўзбекистон ва Саудия Арабистони ўртасида икки томонлама алоқаларни янада чуқурлаштириш масалалари муҳокама қилинди.

Ўзбекистонда хорижий инвесторлар учун яратилган шарт-шароитлар ва уларга тақдим этилаётган имтиёзлар тўғрисида батафсил сўзлаб берилди.

Суҳбатдошлар Ўзбекистонда ўз фаолиятини олиб бориш истагида бўлган саудиялик инвесторлар сонининг ортиб бораётгани икки мамлакат ўртасида савдо-иқтисодий ва сармоявий соҳалар ривожига салмоқли ҳисса қўшаётганини қайд этди.

Носир ал-Жаийдий Ўзбекистонни жуғрофий жиҳатдан қулай ҳудудда жойлашгани хорижий ивесторлар учун жуда муҳим эканини таъкидлади. У республика раҳбарияти томонидан мамлакатда ишлаш ниятида бўлган хорижий инвесторлар учун яратиб берилган имкониятларни юқори баҳолади.

– Ўзбекистонда ишлаб чиқарилаётган барча турдаги маҳсулотлар сифат жиҳатидан ажралиб туради, - деди Носир ал-Жаийдий. - Бу хорижий инвестицияларни фаол жалб қилишда муҳим ўрин тутади. Бизнинг компанияда ҳам Ўзбекистон билан соғлиқни сақлаш, таълим, кимё, қишлоқ хўжалиги, туризм ва бошқа бир қатор соҳаларда ҳамкорлик қилиш истаги мавжуд.

Музокаралар якунида Саудия Арабистони Миллий ривожланиш компанияси бошқарув кенгашининг навбатдаги мажлисида элчихона вакиллари томонидан Ўзбекистон, хусусан, Қорақалпоғистон Республикаси, Қашқадарё, Наманган, Фарғона ва Тошкент вилоятларидаги инвестицион лойиҳаларининг тақдимотини ўтказиш тўғрисида келишиб олинди.

Ўзбекистон мусулмонлари идораси матбуот хизмати

Жорий йилнинг 7 февраль куни Ўзбекистон Миллий матбуот марказида “Халқаро алоқаларнинг янги босқичи: ўзаро ҳамкорликдан амалий натижалар сари” мавзусида матбуот анжумани бўлиб ўтди. У Ўзбекистондаги Ислом цивилизацияси маркази, Ахборот ва оммавий коммуникациялар агентлиги ва Миллий матбуот маркази ҳамкорлигида ташкил этилди. Унда Ўзбекистондаги Ислом цивилизацияси маркази раҳбарияти ва илмий ходимлари ҳамда ОАВ вакиллари иштирок этди.

Марказнинг халқаро алоқалар соҳасидаги фаолияти ва келгусидаги режалари ҳақида Марказ директори Шоазим Миноваров сўз юритди.

Унинг қайд этишича, Жаҳон ҳамжамиятига Ўзбекистондаги ислом цивилизацияси маркази ҳақида маълумот етказиш, унинг мақсад ва вазифалари мазмун-моҳиятини тарғиб қилиш мақсадида Марказ томонидан мунтазам тақдимотлар, мулоқотлар ҳамда конференциялар ўтказиб келинмоқда. Жумладан, Марказ ташкилотчи ва ҳамкор бўлган жами қирқдан ортиқ халқаро тадбир ва учрашувларни амалга ошириб, умумий ҳисобда 25 ташкилот билан ҳамкорлик Меморандумлари имзоланди.

Хусусан, Ислом ҳамкорлик ташкилотининг Фан ва технологиялар соҳаларида ҳамкорлик қилиш бўйича доимий қўмитаси – COMSTECH ва Марказ ўртасида имзоланган меморандум доирасида дунё кутубхоналари фондларида сақланаётган исломга оид ҳамда мусулмон мамлакатлари олимлари томонидан яратилган манбалар, қўлёзма, тошбосма ва замонавий нашрларнинг ягона электрон базасини яратиш бўйича келишувга эришилди.

Шу билан бирга ЮНЕСКО, АЙСЕСКО, ИРСИКА каби бир қатор халқаро ташкилот вакиллари билан бевосита қурилиш майдонида учрашувлар ўтказилиб, Марказ биноси лойиҳаси, ички ва ташқи дизайни, музей экспозициялари мазмуни бўйича таклифлар олинди.

Анжуман сўнггида Марказ раҳбарияти ва журналист ўртасида қизиқарли савол-жавоблар бўлиб ўтди.

Ўзбекистон мусулмонлари идораси матбуот хизмати

Динимизда белгиланган ҳар бир амални ўз вақтида адо этиб, имкони етганидан ортиқ ишга буюрилмайди. Яқин-яқингача умра ва ҳаж амаллари каби муборак сафарлар кўпчилик юртдошларимиз учун етиб бўлмайдиган озру эди. Бутун дунё бўйича тарқалган пандемия сабабли орада умра ва ҳаж зиёратларига бориш тўхтаб қолган эди.

Милодий сана – 2022 йил ҳисобидан юртдошларимиз учун қувончли бошланди, деса хато бўлмайди. Айни йилдан бошлаб умра ва ҳаж зиёратларига боришга рухсат берилди. Бунинг учун ҳукуматимиз томонидан етарли шарт-шароит ва ташкилий ишлар йўлга қўйилди. Шу боис бу йилги умра зиёратини ташкиллаштиришда олдинги умра сафарлари тажрибасидан келиб чиққан ҳолда, зиёратчиларга етарлича қулайлик яратиб берилмоқда.

Шу кунларда Тошкент шаҳри, Андижон, Самарқанд, Бухоро ва Тошкент вилоятидан зиёратчилар умра сафарга йўл олиб ибодатларини бажаришга киришганлар.

Ҳамюртларимиз Мадинаи мунавварага Масжидул Набавийда, яъни Расулуллоҳ соллаллоҳу алайҳи ва салламнинг Равзаи мутоҳҳараларидан зиёратни бошлаш учун етиб бордилар. У ерда Пайғамбаримиз саллоллоҳу алайҳи ва салламга саволату саломлар айтишиб, намозларида хайрли дуолар қилиб, муборак зиёратни насиб этган Аллоҳ таоло беҳад шукрона айтдилар.

Мазкур зиёрат давомида Пайғамбаримизнинг завжаи мутаҳҳоралари, саҳоба икромлар қўним топган “Бақи” қабристонидаги ҳақларига дуолар қилиб чин ихлос билан зиёратга киришдилар. Барчанинг кўзида қувонч, қалбида муҳаббат, тилида эзгу дуо билан кейинги манзил томон йўл олинди.

Умра ибодатининг ўзига хос бир қанча фазилатлари бор.  Абу Ҳурайра розийаллоҳу анҳу Пайғамбаримиз соллаллоҳу алайҳи ва салламдан ривоят қилиб айтади: Расулуллоҳ соллаллоҳу алайҳи ва саллам дедилар: “Бир умра кейинги умрагача бўлган оралиқдаги гуноҳларга каффоратдир. Мабрур ҳажнинг мукофоти эса фақат жаннатдир” (Имом Бухорий).

Муборак сафарда бўлиб турган юртдошларимизнинг бошқалари эса “Қубо” ва “Қиблатайн” масжидлари ва Ухуд, Арофат тоғи зиёратида бўлдилар.

Муборак сафарининг энг орзиқиб кутилган зиёрати эса Маккаи мукаррамада – Каъбаи муаззамада давом этди. Умрани адо этишда зиёратчиларимиз Каъбани етти марта тавоф этиб, Сафо ва Марва ўртасида саъй қилишиб, соч олдиришди. Бу амалларни бажарганларидан кейин эҳромдан чиқадилар.

Хусусан, юз эликка яқин самарқандлик зиёратчилар ҳам Самарқанд вилояти бош имом-хатиби Зайниддин домла Эшонқулов бошчилигида умра амалларини адо этмоқдалар. Уларнинг ибодатлари мукаммал бўлишида Зайниддин домланинг йўл-йўриқлари, амри маъруф ва наҳйи мункарлари яхшигина асқатди.

Юртимиздан борган бир гуруҳ зиёратчилар муборак умра сафарини адо этиб изларига қайтишлари билан бошқа гуруҳ зиёратчиларимиз уни давом эттирадилар.

 Аллоҳ таоло барча зиёратчиларимизнинг дуоларини қабул этиб, ибодатларини мақбул қилсин. Муқаддас заминга боришни ният қилган барча юртдошларимизга умра ва ҳаж сафарларини насиб қилсин!

Ўзбекистон мусулмонлари идораси матбуот хизмати