www.muslimuz

Субота, 10 августь 2019 00:00

Қурбон ҳайити муносиб нишонланади

Мамлакатимизда фуқароларнинг эмин-эркин ибодат қилишлари, мусулмонларнинг ўз зиммаларидаги диний арконларни бекаму кўст адо этишлари учун зарур барча шароитлар яратилган.

Тинч-осойишта мамлакатимизда ҳайит намозлари, муборак ҳаж зиёратини адо этишда катта қулайликлар яратиб берилаётганидан барча юртдошларимиз мамнун.

Ўзбекистон Республикаси Президентининг жорий йил 2 августдаги “Қурбон ҳайитини нишонлаш тўғрисида”ги қарорида мамлакатимизда Қурбон ҳайитини муносиб нишонлаш, байрамни тартибли ва юқори даражада, халқимизнинг миллий ва диний қадриятларига мос равишда ўтишини таъминлаш учун тегишли тадбирларни амалга ошириш юзасидан вазифалар белгиланган. Мазкур қарор ижросини таъминлаш учун Андижон вилоятида ҳам зарур барча ишлар амалга оширилмоқда.

Айни кунларда вилоятнинг ҳар бир маҳалласи, кўчасида тозалик, ободонлаштириш ишлари олиб борилмоқда, имконияти чекланган, бева-бечораларга хайру саховатлар кўрсатилаётир.

Вилоятдаги ҳайит намозлари ўқиладиган масжидларда байрамга пухта ҳозирлик кўрилмоқда. Муборак байрам кунида халқимиз, фуқароларимиз қалбига байрам шукуҳини сингдириш, зиммаларидаги диний амалларни адо этишлари учун яратиб берилаётган имкониятларни тушунтириш мақсадида диний идоралар, Фуқароларнинг ўзини ўзи бошқариш органлари, Ёшлар иттифоқи, Маънавият-тарғибот маркази, ички ишлар бўлимлари, жамоатчилик вакиллари ҳамкорлигида маҳаллаларда, масжидларда кенг кўламли тарғибот ишлари олиб борилмоқда

– Қурбон ҳайити намози вилоятдаги 171 та жомеъ масжид ҳамда “Сайид Муҳйиддин маҳдум” ўрта махсус ислом билим юртида ўқилади, – дейди Ўзбекистон мусулмонлари идорасининг Андижон вилоятидаги вакили, вилоят бош имом-хатиби ўринбосари Хайрулло Сулаймонов. – Ҳайит намозлари ўқиладиган масжидлар тахт ҳолатга келтирилиб, намозхонлар учун зарур шарт-шароит ва қулайликлар яратилди.

Ҳайит намози ўқиладиган масжидларда тозалик, фуқаролар хавфсизлигини таъминлаш мақсадида ички ишлар, ёнғин хавфсизлиги, санитария-эпидемиология назорат маркази ходимлари билан ҳамкорликда зарур чора-тадбирлар кўрилди. Бу борадаги аниқланган камчиликлар бартараф этилди.

Бундан ташқари, аҳолига байрамона ва кўтаринки кайфият улашиш мақсадида масжидларга киши руҳиятини кўтарувчи шиор ва паннолар ўрнатилди.

Фахриддин УБАЙДУЛЛАЕВ, ЎзA

Published in Ўзбекистон янгиликлари

П'ятниця, 09 августь 2019 00:00

Ҳаж-2019: 400 мингга яқин ҳарбий хавфсизлик учун жалб этилган

Саудия Арабистони Ҳаж ва Умра вазирлиги берган маълумотга кўра, жорий йилги «Ҳаж-2019» мавсумини тартибли, хавфсиз, кўнгилдагидек ўтказиш мақсадида ҳарбийлар, ички тартибни сақлашга масъул ташкилотлар, хавфсизлик хизматларидан иборат жами 400 мингга яқин масъул жалб этилган.

Вазирлик мутасаддиларидан бирининг айтишича, улар миллионлар орасида кўзга кўринмаса-да, лекин хизматлари жуда ҳам муҳим. Улар ҳожиларга ўз пайтида керакли ёрдам кўрсатишга ва ҳаж амалларини хотиржам, тартибли адо этишларига яқиндан кўмак бериш мақсадида, ҳукумат томонидан, биринчи маротаба, шу каби катта ададда жалб этилмоқда. Уларни Мино, Арафот, Муздалифа ва Жамаротда ҳар 20-30 метр оралиқ масофада жойлаштириш тажрибаси ҳам ушбу мавсумда ўтказилмоқда, деб хабар беради Дин ишлари бўйича қўмита матбуот хизмати Kun.uz’га.

Вазирлик берган маълумотга кўра, жорий мавсум мамлакат тарихида энг кўп ҳожилар келиши кутилаётгани айтилади.

Кеча, 7 август куни Жидда шаҳрида мазкур мавзуга бағишланган матбуот анжумани бўлиб ўтди. Унда паспорт назорати бошлиғи, генерал Сулаймон ибн Абдулазиз ал-Яҳё шу кун соат 16:00 га қадар Саудияга кирган ҳожилар сони 1 838 339 нафарни ташкил этганини қайд этди.

Матбуот анжуманида таъкидланишича, бу йил 3-3,5 миллион инсон ҳаж ибодатини адо этиши кутиляпти.

Ўзбекистон мусулмонлари идораси Матбуот хизмати

Published in Дунё янгиликлари

П'ятниця, 09 августь 2019 00:00

Ҳайит куни метро ҳам соат 4:30 дан ишлайди

Қурбон Ҳайити муносабати билан жорий йилнинг 11 август куни Тошкент метрополитенининг барча йўналишида поездлар ҳаракати соат 4:30 дан бошланади. Бу ҳақда метрополитен матбуот хизмати маълум қилди.

Эслатиб ўтамиз, Тошкентда Қурбон Ҳайити намози тонг соат 5:45 да ўқилади. Аввалроқ Ҳайит муносабати билан «Тошшаҳартрансхизмат» компанияси таркибига кирувчи автосаройлар автобусларни 4:30 дан йўналишларга чиқаришини эълон қилган эди.

Ўзбекистон мусулмонлари идораси Матбуот хизмати

Published in Ўзбекистон янгиликлари

П'ятниця, 09 августь 2019 00:00

Мино водийсида ҳожиларимиз тоату ибодатда

9 август, зулҳижжа ойининг саккизинчи куни ўзбекистонлик зиёратчилар ҳаж амалларини бажаришга киришиб, оппоқ эҳромларини боғлаган ҳолда “лаббайка” айтиб Мино водийси томон йўл олдилар.
Дунёнинг турли ўлкаларидан келиб, муқаддас Макка шаҳрида жам бўлган миллионлаб мусулмонлар Ҳазрати Пайғамбаримиз соллаллоҳу алайҳи васалламнинг “Мабрур ҳажнинг мукофоти фақат жаннатдир” деган ҳадиси шарифларидан умидвор ҳолда, ҳаж ибодатларини бошлашди.
Ишчи гуруҳи аъзолари Мино водийсида уларни кутиб олиб, ўзлари учун ажратилган чодирларга жойлаштирдилар. Зиёратчиларимиз аввалдан ҳозирлаб қўйилган саранжом ва саришта чодирларга кириб, зикру дуо ва ибодатларни бошлаб юбордилар. Уламолар томонидан қилинган мазмунли маърузаларни тингламоқдалар.
Муборак Мино водийсида ҳам юртдошларимиз учун барча шарт-шароитлар муҳайё қилинган. Хусусан, таомларни тарқатиш, тиббий хизмат кўрсатиш, ичимли суви ва чой улашиш жойлари ҳозирланган.
Ислом тарихидан маълумки, Мино Макка ва Муздалифа оралиғидаги қишлоқнинг номи бўлиб, у Масжид ал-Ҳарам шимолидан 7 км. узоқликда жойлашган. Иброҳим алайҳиссалом шу ерда шайтонга тош отганлар ва қурбонлик қилганлар. Расулуллоҳ соллаллоҳу алайҳи ва саллам ҳам видолашув ҳажини адо этганларида тош отиб, қурбонлик сўйганлар. Ва: “Мана шу ерда қурбонлик қилдим. Минонинг барча ерида қурбонлик сўйилур”, деганлар.
Ҳожилар Арафа кунининг бомдод вақтигача шу ерда истиқомат қиладилар. Сўнгра Арафотга кетиб, Зулҳижжа ойининг ўнинчи куни яна Минога қайтадилар ва икки кун шайтонга тош отишни давом эттирадилар.
Юртимиздан жўнаб кетган ҳожилар ҳам Набий алайҳиссаломнинг суннати санияларига амал қилиш ниятида шундай улуғ, муборак масканга йўл олдилар. Бу ерда ибодатнинг мағизи бўлган дуо билан машғул бўлиб, юртимиз, халқимиз тинчлиги ва фаровонлиги сўраб дуолар қиладилар.
Аллоҳ таоло ҳожиларимизнинг дуолар мақбул бўладиган лаҳза ва маконларда қилаётган дуоларини қабул этсин. Сўраганларидан ҳам афзалини берсин.

Ўзбекистон мусулмонлари идораси Матбуот хизмати

Published in Ўзбекистон янгиликлари

П'ятниця, 09 августь 2019 00:00

АРАФА КУНИДАН БОШЛАБ БАЖАРИЛАДИГАН ВОЖИБ АМАЛНИ БИЛАСИЗМИ?

Арафа кунининг бомдод намозидан бошлаб ҳайитнинг тўртинчи куни аср намозигача, яъни 23 вақт намоз мобайнида ҳар бир фарз намоздан кейин ташриқ такбирини айтиш вожиб амаллардан ҳисобланади. Ташриқ такбири ушбудир:

اَللهُ أَكْبَرُ , اَللهُ أَكْبَرُ , لَا إِلَهَ إلَّا اللهُ , وَاللهُ أَكْبَرُ , اَللهُ أَكْبَرُ وَ لِلهِ الْحَمْدُ

Аллоҳу акбар! Аллоҳу акбар! Ла илаҳа иллаллоҳу валлоҳу акбар! Аллоҳу акбар ва лиллаҳил ҳамд!

Ушбу такбирни хоҳ жамоат билан, хоҳ ёлғиз ўқилган ҳар бир фарз намозидан кейин айтамиз. Жамоат намозидан кейин имом айтишни унутса ҳам қавм айтаверади.

Фарз намоздан кейин айтиладиган ушбу ташриқ такбирини эркаклар ҳам, аёллар ҳам айтадилар.

Бундан ташқари, юрган, ўтирган пайтларда такбир айтишнинг зарари йўқ, балки мустаҳаб амалдир. Валлоҳу аълам.

Ўзбекистон Мусулмонлари идораси матбуот хизмати

Published in Мақолалар