“Oʻztemiryoʻlyoʻlovchi” АЖ маъмурияти Қурбон ҳайити байрами кунларида кўпроқ йўловчиларга хизмат кўрсатиш мақсадида Тошкент-Урганч-Тошкент йўналишида 556/555 сонли қўшимча поездлар қатновининг йўлга қўйилганлигини маълум қилади. ЎзА билдиришича, бу ҳақда “Oʻztemiryoʻlyoʻlovchi” АЖ матбуот хизмати хабар берди.

Тошкент-Урганч йўналишида ҳаракатланадиган 556 – сонли қўшимча поезд 2019 йил 9, 11, 13 август кунлари Тошкент жанубий вокзалидан кундузи соат 14:22да, Урганч-Тошкент йўналишида ҳаракатланадиган 555-сонли қўшимча поезд эса 2019 йил 10, 12, 14 август кунлари Урганч вокзалидан эрталаб соат 10:10да жўнайди.

Шунингдек, 9 августдан бошлаб Тошкент-Самарқанд-Тошкент йўналишида қўшимча 764/763 сонли “AFROSIYOB” юқори тезликда ҳаракатланувчи поездининг қатновлари ҳам йўлга қўйилади.

Қўшимча маълумотларни Тошкент шаҳрида 1005 рақамига қўнғироқ ёки жойлардаги темир йўл вокзалларидаги маълумотхоналарга мурожаат қилиш орқали билиб олишингиз мумкин.

Ўзбекистон мусулмонлари идораси Матбуот хизмати

Ўзбекистон Республикаси Вазирлар Маҳкамаси ҳузуридаги Имом Бухорий илмий-тадқиқот марказида 8 август куни Мисрнинг Ал-Азҳар университети ҳузуридаги Ислом тадқиқотлари академияси Бош котиби Муҳаммад Назир Ийад билан видеоконференция бўлиб ўтди.

Марказ мутахассислари, олимлар, Ҳадис мактаби ўқитувчилари иштирок этган тадбирни Марказ директори Ш.Зиёдов очиб, Ўзбекистон Республикаси Президенти Шавкат Мирзиёев ва Миср Араб Республикаси Президенти Абдулфаттоҳ ас-Сисийнинг 2018 йил сентябрь ойида Тошкентда бўлиб ўтган учрашуви икки томонлама муносабатларда янги даврни бошлаб берганини, мамлакатларимиз ўртасидаги ҳамкорлик барча соҳаларда, жумладан, илм-фан ва аждодлар меросини ўрганиш ва тарғиб қилиш йўналишида изчил ривожланиб бораётганини таъкидлади.
ЎзА хабарига кўра, ушбу видеоконференция Ўзбекистон расмий делегациясининг 15 июль куни Қоҳирада мисрлик таниқли академик билан бўлиб ўтган учрашувининг мантиқий давоми бўлди.

Академик Муҳаммад Назир Ийад ўз тадқиқоти – Имом Мотуридий ҳаёти ва ижоди ҳақида маъруза қилди.

Видеоконференцияда Мовароуннаҳрдан етишиб чиққан буюк мутафаккирлар, ислом цивилизацияси ва илми ривожига беқиёс ҳисса қўшган алломалар меросини ўрганиш ва тарғиб қилиш масалалари юзасидан фикр алмашилди.
Академик Муҳаммад Назир Ийад анжуман қатнашчиларини қизиқтирган саволларга жавоб қайтарди.

Ўзбекистон мусулмонлари идораси Матбуот хизмати

Азизлар! Шу кунларда дунё мусулмонлари қаторида бизнинг юртимиздан борган ҳожиларимиз Исломнинг улуғ фарзларидан бўлмиш Ҳаж ибодатини адо этмоқдалар. Бугун ҳожиларимиз Ҳажнинг асосий рукни, фарзи ҳисобланган Арафот водийсида туриб, ибодат, зикр, дуо билан машғулдирлар. Ҳажга бориш насиб этмаган кишиларнинг қалбларини эса «Мен ҳам ҳажга борганимда, Арафотда туриб дуо қилардим» деган орзу тўлдириб тургандир. Ана шундай азизларимизга айтамизки:

Эҳромга кириш насиб қилмаган бўлса, гуноҳларнинг ҳаммасидан тийилайлик!

(Эҳромга кирган одам сўкиниш, ҳақорат қилиш, ўз танасига ва бошқаларга озор бериш, ўсимлик юлиш, шох синдириш, бирор жонзотни овлаш, ўлдириш каби ишлардан йироқ туриши керак. Эҳромдагилар гуноҳлардан ва юқоридаги ишлардан тийиладилар. Биз эҳромда бўлмасак-да, гуноҳларнинг ҳаммасидан тийилиб юрайлик!)

Арафотда дуо қилиш насиб қилмаган бўлса, уйда, масжидда дуо қилиш имконимиз бор! Зеро, бугун қаерда туриб дуо қилинса ҳам, иншаа Аллоҳ, ижобат бўлади.

Минода тунаш насиб қилмаган бўлса, уйда тунни ибодат ила бедор ўтказиш имконимиз бор!

Муздалифага юриб бориш ва Минога юриб келиш насиб қилмаган бўлса, масжидга юриб бориш ва масжиддан юриб келиш имконимиз бор!

Шайтонга тош отиш насиб этмаган бўлса, Аъузу биллаҳи минаш шайтонир рожийм деб, Аллоҳ таолодан шайтоннинг ёмонлигидан паноҳ сўраш имконимиз бор!

Аллоҳ таоло бизга ҳам ихлос билан Байтини ҳаж қилишни насиб этсин!

Нозимжон Ҳошимжон

Муҳтарам ватандошлар!

Халқимиз бутун мусулмон уммати билан биргаликда катта шоду хуррамлик ила кутиб олаётган Қурбон ҳайити билан сизларни, гўзал диёримиздаги барча мўминларни чин қалбимдан самимий табриклаб, энг эзгу тилакларимни билдираман.

Асрлар давомида эл-юртимизнинг маънавий ҳаётида беқиёс ўрин эгаллаб, жамиятимизда ўзаро ҳурмат, меҳр-оқибат ва бағрикенглик тамойилларини янада мустаҳкамлаб келаётган ушбу қутлуғ байрам барчамизга муборак бўлсин! 

Мана шундай шукуҳли ва саодатли айёмда ҳаммамиз аввало Аллоҳ таборака ва таолога беадад шукроналар айтишимиз табиийдир.

Сиз, азизларга яхши маълумки, Ўзбекистонда сўнгги йилларда миллий-диний қадриятларимизни тиклаш ва ривожлантириш, эътиқод эркинлигини таъминлашга алоҳида эътибор қаратилмоқда, турли миллат ва элатлар ўртасида тотувлик, аҳиллик ва ҳамжиҳатлик муҳити тобора юксалиб бормоқда. 

Айниқса, халқимизнинг ислом маданияти ва цивилизациясига қўшган улкан ҳиссасини мамлакатимиз ва дунё жамоатчилигига етказиш, табаррук қадамжоларни обод қилиб, зиёратгоҳларга айлантириш, буюк аждодларимизнинг илмий-маънавий меросини чуқур ўрганиш ва тарғиб этиш борасида бошлаган хайрли ишларимиз илму маърифатнинг қадрига етадиган эл-юртимиз ва халқаро ҳамжамият томонидан тўлиқ қўллаб-қувватланмоқда. 

Фуқароларимиз учун яратилган янги имконият ва шароитлар туфайли ушбу мўътабар ва улуғ айём кунларида Маккаи мукаррамада муқаддас ҳаж амалларини адо этаётган 7 мингдан зиёд ватандошларимиз бугунги тинч-осойишта, эркин ҳаёт учун Парвардигори оламга ҳамду санолар айтиб, юртимизга равнақ, халқимизга хайр-барака сўраб, дуои фотиҳалар қилишмоқда. 

Ҳожиларимизнинг барчасини самимий муборакбод этиб, уларнинг она диёримизга соғ-саломат қайтиб келишларини тилаймиз. Улар ўзларининг ибратли фазилатлари, жамият ҳаётидаги фаол иштироки билан ёш авлодимизни эл-юртга садоқатли ва фидойи, ҳидоят йўлидан борадиган ҳалол ва пок инсонлар этиб тарбиялашга муносиб ҳисса қўшадилар, деб ишонамиз.

Яратганнинг неъматлари зиёда бўлаётган ва шукроналик ҳислари қалбларимизни нурафшон қилаётган ушбу айёмда узоқ ва яқин ҳудудларда жойлашган барча мусулмон мамлакатларининг халқларини, хорижий дўст ва ҳамкорларимизни қутлаб, уларга тинчлик, бардавом тараққиёт ва фаровонлик ёр бўлишини тилаймиз.

Қадрли юртдошлар!

Қурбон ҳайитининг мамлакатимизда мустақиллик байрами арафасида кенг нишонланиши халқимизнинг руҳи ва кайфиятини янада кўтармоқда.

Айни шу кунларда эл-юртимизга хос бўлган меҳр-мурувват, шафқат ва саховат туйғулари яққол намоён бўлиб, барчамизни эҳтиёжманд, кам таъминланган ва боқувчисини йўқотган оилалар, ногиронлар, ёлғиз кексаларнинг ҳолидан хабар олиш, уларга моддий ва маънавий ёрдам кўрсатиш, зиёратгоҳлар, муқаддас қадамжолар ва қабристонларни обод қилиш каби савобли ишларга даъват этмоқда. 

Бундай хайрли амаллар мамлакатимизда ижтимоий ҳаётнинг турли соҳаларида рўёбга чиқарилаётган, инсонни азиз ва мукаррам деб билишга, жамиятимизда қонун ва адолат устуворлигини таъминлашга қаратилган ислоҳотларимизга ҳар томонлама уйғун ва ҳамоҳангдир.

Биз уларнинг замирида ислом динининг инсонпарварлик моҳияти ва қудратини кўрамиз, буюк маънавий мерос ворислари эканимиздан ҳақли равишда фахрланамиз.

Ҳурматли ватандошлар!

Барчангизни Қурбон ҳайити байрами билан яна бир бор чин юракдан муборакбод этаман.

“Дилинг – Аллоҳда, қўлинг – меҳнатда бўлсин”, деган олижаноб эътиқод билан яшаётган халқимиз доимо омон бўлсин!

Жонажон Ватанимиз, хонадонларимиздан хотиржамлик, аҳиллик, файзу барака ҳеч қачон аримасин!

Эзгу интилиш ва ишларимизда Яратганнинг ўзи ҳамиша мададкор бўлсин!
                                                                                                                                   

                                                                                                                                             Шавкат Мирзиёев

                                                                                                                                              Ўзбекистон Республикаси Президенти

Арафа шундай улуғ кунки, унинг ҳурматидан Аллоҳ таоло наинки Арафотдагиларни, балки у ерларга етиша олмаган барча мўминларнинг илтижоларини қабул қилади.
Ҳаж ибодатининг энг муҳим маносикларидан бири Арафот майдонида бир муддат туришдир. Зилҳижжа ойининг 9 куни фаришталар мисоли оппоқ кийимли ҳожилар Мино водийсидан Арафот майдонига кўчиб ўтишди. Арафотда бир муддат туриш ҳажнинг энг муҳим фарз амалларидан ҳисобланади. Ҳазрати Пайғамбаримиз соллаллоҳу алайҳи васаллам “Ҳаж – арафадир”, дея марҳамат қилганлар.
Арафот саҳроси Макка шимолида жойлашган Жабалур-раҳма тоғи этагидаги текстликдир. Макка шаҳри билан Арафот саҳроси ўртасидаги масофа 25 километрни ташкил этади.
Арафот шундай маконки, унинг шарофатидан Аллоҳ таоло ўша ерда умидли қўлларини самога кўтариб, зор йиғлаб турганларнинг тилакларини бермасликка, қўлларини бўш қайтаришга ҳаё қилади.
Шундай экан ҳамма ҳожилар Арафот тоғига бориб, Аллоҳ таолодан гуноҳларининг кечиришини сўраб ёлвордилар. Юртдошларимиз ўзлари, аҳли оилалари, ёру дўстлари ва барча мўмин-мусулмонларнинг ҳақларига дуолар қилиб, Улуғ Мавлога илтижо қилмоқдалар. Юртимизнинг тинч, халқимизнинг фаровонлиги бундан ҳам зиёда бўлишини, уларни мана шундай муқаддас заминда ибодатга қоим бўлиб, дуога қўл очиб туришларига ҳисса қўшган, хизматларида камарбаста бўлиб турган барча мутасаддиларнинг ҳам қалбларидаги эзгу ниятлари рўёбга чиқишини сўрадилар...
Уларнинг дилларида шундай улуғ ибодатга мушарраф бўлганлари учун чексиз қувонч, тилларида шукр, юзларида эса маънавий покланиш бахш этган ажиб нур порламоқда...
Ҳожиларимиз кун ботгунга қадар Арафот майдонида тоат-ибодат ва дуою илтижолар билан банд бўладилар.

Ўзбекистон мусулмонлари идораси Матбуот хизмати