Тошкентда “МДҲ мамлакатлари II Ислом банкчилиги ва молияси форуми” бугун ўз ишини бошлади. Бу ҳақда Ўзбекистон банклари ассоциацияси ахборот хизмати хабар тарқатди.

Форумда йигирмадан ортиқ давлатлардан келган мутахассислар иштирок этмоқда. Тадбир “AlHuda” ислом банкчилиги ва иқтисодиёти маркази ва Хусусий секторни ривожлантириш бўйича Ислом корпорацияси ташаббуси билан Ўзбекистон банклари ассоциацияси ва қатор ташкилотлар кўмагида ўтказилмоқда.

Тадбирдан кўзланган асосий мақсад МДҲ мамлакатларидаги иқтисодий бозорни ўрганиш, минтақадаги ислом банкчилиги ва молия соҳасидаги тенденциялар, имкониятлар ва соҳадаги учраётган қийинчиликларни таҳлил этишдан иборатдир.

Форум доирасида 22-23 октябрь кунлари Ўзбекистон банклари ассоциацияси биносида ислом банкчилиги, такафул ва ислом микромолияси мавзуларига бағишланган икки кунлик махсус интенсив семинар тренинг ташкил этилади.

Маълумот учун: “AlHuda” маркази 15 йилдан бери ислом банкчилиги ва молиясини тарғиб этиб келмоқда. Хорижий ташкилотнинг асосий мақсади фоизсиз банк хизматларини кўрсатишдир. Ҳозирда дунёнинг етмишдан ортиқ мамлакатларида айнан ушбу марказда таълим олган битирувчилар иш олиб бормоқда.

azon.uz

ЎМИ матбуот хизмати

Бугунги кунда интернет тармоқлари орқали ёшларга диний илмларни билдириш, ўргатиш мақсадида очилган баъзи бир сайтлар, ижтимоий тармоқларнинг баъзилари тўғри, ҳақ йўлни кўрсатса, баъзиларида эса қандайдир ғаразли ният бўлиб, сиёсий куч олиб, ўша мамлакат ёки ҳудудга қаратилган маълум бир мақсад билан айтилган маърузалар бўлади. Шулардан бири - сайловга қатнашиш куфр, деган сўзларни тарқатиш. Сайлов бу - халқнинг фикрини жамлаб, ўша фикрлардан хулоса қилишни айтилади. Ҳамма ўз фикрини айтади. Барчанинг фикрини йиғиб, кўпчиликнинг фикри қайси тарафда бўлса, ўша тараф фикри инобатга олинади. Мана шуни сайлов ёки сайлаш дейилади. Бунда ҳеч қандай куфрни ёки Аллоҳнинг динига нисбатан тескариликни кўрмаймиз. Бугунги кунда интернет тармоқлари орқали аввал бундай гапларни айтмаган тоифалар юртимизда яқин кунларда бўлиб ўтиши кутилаётган сайловни эътиборидан, ўша жойда парокандалик, ихтилоф ва фитна чиқариш учун шундай сўзлар тарқатмоқда. Бу нарсага асло алданмаслик керак. Пайғамбаримиз соллаллоҳу алайҳи васалламдан кейинги халифалар ҳам сайландилар. Ҳазрати Абу Бакр Сиддиқ, ҳазрати Умар, ҳазрати Усмон, ҳазрати Али розияллоҳу анҳумларни саҳобалар тасдиқладилар.

Бугунги кунда мусулмонлар зийрак бўлиши керак. Тинчлик осойишталикни таъминотларидан бири ҳам - сайлов. Эл юрт сайлаганни ҳеч ким инкор қилмайди, ҳурмат қилади. Сайлов бу - халқ фикрини жамланмаси ҳисобланади ва биз буни ҳурмат қилишимиз, тўғри талқин қилишимиз, халқни манфаати учун қилинаётган иш эканини ёшларга тушунтиришимиз керак. Чунки ташқи залолат, ташқаридан жўнатилган фитна оз бўлса ҳам фарзандларимизга ўз тасирини ўтказади.

Аллоҳ Таоло юртимизни ҳамиша тинч, осойишта қилсин, барчаларимизни иймонда, исломда барқарор қилиб, адашишдан ҳам адаштиришдан ҳам сақласин!

Ўзбекистон мусулмонлари идораси

Жиззах вилоят вакиллиги матбуот котиби

Усмонали ОРОЛОВ

Миср Президенти Пайғамбаримиз Муҳаммад соллаллоҳу алайҳи васаллам туғилган кунлари билан мусулмонларни табриклади.
Миср Президенти Абдул Фаттоҳ Ас-Сисий мисрликлар, араблар ва мусулмонларни Twitter саҳифасида Пайғамбаримиз Муҳаммад соллаллоҳу алайҳи васалламнинг туғилган кунлари билан табриклади, дея хабар бермоқда Ahram online нашри. Абдул Фаттоҳ Ас-Сисий ўз табригида бундай деб ёзган эди: "Миср халқини, араб ва Ислом халқларини у зотнинг туғилишлари инсоният тарихида бурилиш нуқтаси бўлган ҳақиқий Пайғамбаримизнинг таваллуд топган йиллиги билан чин қалбимдан табриклайман. Аллоҳнинг саломи ва раҳмати Муҳаммад соллаллоҳу алайҳи васалламга бўлсин. Бу муборак айёмда Мисрни, араб ва Ислом халқларини барча ёмонликлардан ҳимоя қилишини Аллоҳдан дуо қилиб қоламан".
Islam.ru хабарига кўра, аввалроқ Ас-Сисий ва Мисрнинг бошқа амалдорлари Мавлиди набий Расулуллоҳ соллоллоҳу алайҳи васалламнинг таваллуд топган кунларини нишонлашда иштирок этган эдилар.

Ўзбекистон мусулмонлари идораси Матбуот хизмати

— Мусулмон ва муслималар, мўмин ва мўминалар, деб айтамиз. Уларнинг қандай фарқлари бор? Кимни мўмин деймиз, кимни муслим деймиз? Саволим ноўрин бўлса, узр сўрайман.

— Пайғамбаримиз Муҳаммад соллаллоҳу алайҳи васаллам келтирган дин Ислом дини номи билан машҳурдир. Бу номни Пайғамбарнинг ўзлари танлаган эмас, балки уни Аллоҳ таоло ихтиёр қилган. Қуръони Каримда Аллоҳ таоло:

﴿وَرَضِيتُ لَكُمُ الإِسْلاَمَ دِيناً﴾

“Ва сизга Исломни дин деб рози бўлдим”, дейди (“Моида” сураси, 3-оят). Ислом сўзининг луғавий маъноси “ихлос”, “офатлардан саломат бўлиш”, “сулҳ ва омонлик”, “итоат ва бўйсуниш” каби маъноларни англатади.

Шундан мусулмон ва муслима Муҳаммад соллаллоҳу алайҳи васаллам келтирган дин Ислом динига мансуб, ихлосли, турли офатлардан саломат бўлган, сулҳли, омонатли, итоатли ва Аллоҳга бўйсунган шахс дегани бўлади.

Иймон сўзи луғатда омон бўлиш ва тасдиқлаш маъноларини билдиради. Уламолар истилоҳида Иймон Аллоҳ таолодан келган нарсани тасдиқлаб, унга иқрор бўлишдир. Шундан мўмин ва мўмина Аллоҳ таолодан келган ақидага оид нарсаларни тасдиқлаб ва уларга иқрор бўлиб, турли ёмонликлардан омонда бўлган шахсдир.

Ислом ва Иймон тушунчалари умумий тарзда бир-бирига қовушиб кетган, бири иккинчисини ифода этаверадиган тушунчалардир. Аммо иккисини алоҳида олиб қарайдиган бўлсак, Иймон ишониш-эътиқод назарий масалаларга, Ислом эса бўйсуниш-амалий масалаларга хосдир.

Ислом асослари шаҳодат, намоз, закот, рўза ва ҳаждан иборат. Иймоннинг асослари Аллоҳга, Унинг фаришталарига, китобларига, пайғамбарларига, охират кунига, яхши-ю ёмон қадар Аллоҳдан эканлигига ишониш, тасдиқлашдан иборатдир.

Улуғ ақоид илми олими Умар Насафий ўзининг китобида: “Иймон ва Ислом бирдир. Қачонки, бандада тасдиқ ва иқрор мавжуд бўлса, мен ҳақиқатда мўминман, демоғи тўғри бўлади”, деган.

Муҳаммад Айюб ҲОМИДОВ