Тошкент вилояти бош имом-хатиби Хайруллоҳ домла Турматов вилоятнинг Юқори Чирчиқ, Бўстонлиқ, Зангиота, Янгийўл, Қуйи Чирчиқ  туманларида қурилиш бошланган ва давом этаётган масжидларни бориб кўрди.

Жорий йилда Тошкент вилоятида янгидан қурилаётган 29 та масжиднинг 8 таси мазкур тмунларда жойлашган. Барча масжидларда иш қизғин. Қишнинг қиронли кунларигача томлар ёпилиб, ташқи таъмир ишларини имкон қадар якунлаш лозим.

Қуйи Чирчиқ туманидаги саккизбурчак шаклида қурилаётган “Олмазор” масжиди асосий биноси юқори қисмининг металл конструкция ишлари якунланиб, гумбаз ўрнатилиши арафасида. Минг кишилик сиғимга эга мазкур хонақоҳ ўзининг баландлиги ва ёруғлик тизими билан алоҳида ажралиб туради. Гумбазнинг баландлик шакли таралаётган товушни акс-садо ёрдамида бинонинг ҳамма қисмига тенг тақсимланишига ёрдам беради.

Хайруллоҳ домла Турматов катта йўл ёқаларида қурилаётган масжидлар ва таҳоратхоналар лойиҳалари билан танишди. “Ал Иймон”, “Абдужалилбоб” масжидлари қайта қурилаётган бўлса, “Ҳузайфа” масжидининг таҳоратхонаси янгидан барпо этилмоқда. 

Бу масжидлар ҳудуд аҳолиси, қолаверса, йўлдан ўтувчи зиёратчилар,  мусофирларга хизмат қилади. Шунинг учун лойиҳани пухта ўйлаб, намозхонларга ҳар томонлама юқори шарт-шароитларни таъминлашимиз зарур. Иссиқ сув заҳираси, имконияти чекланганлар учун махсус шароит ва бошқалар.  Зотан йўловчиларга хизмат қилсак, Аллоҳ ишларимизга барака ато этади, деди бош имом-хатиб. 

Аллоҳнинг байтини қуришдек савоби улуғ ишларда меҳнат қилаётган, елиб югураётган фидоий ходимлар, уста ҳунармандлар, ишбошилар, ҳомийлар ҳаққларига дуо қилиниб, янги ибодат уйларини тез орада халқимизга туҳфа этишларига тилак билдирилди.

Ўзбекистон мусулмонлари идораси Масжидлар бўлими

1. Кийимни кийишда “Бисмиллаҳ” дейиш.

Расулуллоҳ соллаллоҳу алайҳи васаллам: «Аллоҳнинг зикри ва “Бисмиллаҳир роҳманир роҳийм” билан бошланмаган аҳамиятли ҳар бир ишнинг орқаси кесикдир», деганлар.

2. Либосни кийишда ўнг тарафдан бошлаш.

Набий соллаллоҳу алайҳи васаллам: “Агар кийинсангиз ўнгдан бошланг”, деганлар (Имом Термизий, Имом Абу Довуд, Имом Ибн Можа ривояти).

3. Либосни кийганда қуйидаги дуони қилиш:

الْحَمْدُ لِلَّهِ الَّذِي كَسَانِي هَذَا وَرَزَقَنِيهِ مِنْ غَيْرِ حَوْلٍ مِنِّي وَلا قُوَّةٍ

“Алҳамду лиллаҳиллазий касаний ҳаза ва розоқанийҳи мин ғойри ҳавлин минний ва лаа қувватин”.

“Менга ушбу либосни менинг тарафимдан ҳеч қандай куч-қудратсиз кийдирган Аллоҳ таолога ҳамду санолар бўлсин”.

4. Кийимни ечишда чап тарафдан бошлаш.

Расулуллоҳ соллаллоҳу алайҳи васаллам “Сизлардан бирортангиз пойабзал кийса, ўнгдан, ечганда чапдан бошласин. Кийганда ҳар иккисини кийсин, ечганда ҳар иккисини ечсин”, дейилади (Имом Муслим ривояти).

5. Ечганда ҳам “Бисмиллаҳ” ни айтиб ечиш.

Расулуллоҳ соллаллоҳу алайҳи васаллам айтадилар: «Одам болаларининг аврати билан жинларнинг кўзлари ўртасидаги парда кийимни ечганда “Бисмиллаҳ” дейишдир» (Имом Тобароний ривояти).

6. Янги либос кийганда дуо қилиш.

Набий соллаллоҳу алайҳи васаллам иштон, кўйлак, ридо ёки салла кийсалар, қуйидаги дуони ўқир эдилар:

اللَّهُمَّ لَكَ الْحَمْدُ، أَنْتَ كَسَوْتَنِيهِ، أَسْأَلُكَ مِنْ خَيْرِهِ وَخَيْرِ مَا صُنِعَ لَهُ، وَأَعُوذُ بِكَ مِنْ شَرِّهِ وَشَرِّ مَا صُنِعَ لَهُ

“Аллоҳумма лакал ҳамду анта касавтанийҳи асалука мин хойриҳи ва хойри ма суниаъ лаҳу ва аъузу бика мин шарриҳи ва шарри ма суниаъ лаҳу”.

“Аллоҳим, сендан ушбу либосдаги яхшиликни ва унга боғлиқ яхшиликни сўрайман. Ундаги ёмонликдан ва унга боғлиқ ёмонликдан паноҳ сўрайман” (Имом Термизий, Имом Абу Довуд, Имом Аҳмад ривояти).

7. Янги либос кийган кишининг ҳаққига дуо қилиш:

“Бахтли ҳаёт кечиринг, шаҳодат билан вафот этинг” (Имом Термизий ривояти).

“Кийиб эскиртираверинг, Аллоҳ ўрнига бошқасини бераверсин” (Имом Абу Довуд ривояти).

Даврон НУРМУҲАММАД

11 ноябрь куни Ўзбекистон мусулмонлари идораси ташаббуси билан ўзбекистонлик имомлардан иборат делегация Қозоғистонга жўнаб кетди. Ушбу делегация аъзолари қўшни мамлакатда 15 ноябрга қадар бўладилар.

Куни кеча Қозоғистон Республикаси Туркистон шаҳри бош имом-хатиби Юсуфбек Қасимбеков Ўзбекистон делегацияси вакилларини кутиб олди. Пешин намози Туркистон шаҳридаги "Интимоқ" жоме масжидида, шом намози "Туркистон" жоме масжидида ҳамда ҳуфтон намози "Жума" жоме масжидида адо этилди.

Ҳар бир масжидда вакилларимиз Ислом маърифати, динимиз софлигини асраш ва бузғунчи ғояларга қарши кураш бўйича мавъизалар қилдилар. Сафар тафсилотлари билан muslim.uz портали ва унинг ижтимоий тармоқлардаги саҳифаларида танишинг.

Ўзбекистон мусулмонлари идораси Матбуот хизмати

Аллоҳ таоло Қуръони каримда шундай марҳамат қилади:

“Дарҳақиқат, сизлар учун – Аллоҳдан ва охират кунидан умидвор бўлган ҳамда Аллоҳни кўп зикр қиладиганлар учун Аллоҳнинг Расулида гўзал ўрнак бордир” (Аҳзоб сураси, 21-оят).

Мусулмон одам Пайғамбаримиз соллаллоҳу алайҳи васалламнинг ҳаётларини ўрганар экан, у ўзи учун  ҳаётнинг барча жабҳаларидаги фаолиятида энг олий даражадаги одоб-ахлоқ намунасини кўради. Шу боис, Пайғамбаримиз алайҳиссаломга ҳақиқий уммат бўлишни истаган одам, у зотнинг ҳаётларини ўрганиши ва ўзи учун  намуна қилиб олиши лозим бўлади.

Ҳа, Расулуллоҳ соллаллоҳу алайҳи васаллам бутун инсоният учун, хусусан, мўмин-мусулмонлар учун энг олий ўрнакдирлар. Мана шу ҳақиқатдан келиб чиқиб, Ислом уммати қадимдан Пайғамбаримиз алайҳиссаломнинг ҳаётларини атрофлича, қунт билан ўрганиб, ўргатиб келган. Саҳобаи киромлар у зот алайҳиссаломнинг ҳар бир сўзу амалларини, ҳаракату ҳолатларини диққат билан кузатиб, ёдлаб борганлар ва ўзларидан кейинги авлодларга бекаму кўст етказганлар. Уларнинг нақлларини қоғозга тушириш натижасида ҳадис китоблари, сийрат асарлари вужудга келган.

Ҳижрий тўртинчи-бешинчи асрларга келиб, кишиларда илмга бўлган рағбат ва муносабатлардаги ўзгаришларни сезган айрим уламоларимиз мусулмонларнинг амирлари кўпчилик билан ўзаро маслаҳатлашган ҳолда Расулуллоҳ соллаллоҳу алайҳи васалламнинг шахслари ва ҳаётларини, суннатлари ва сийратларини яхшироқ ўрганиш ва халққа етказиш мақсадида у зот таваллуд топган рабиъул-аввал ойини сийратни ўрганиш мавсуми ўлароқ ўтказишни йўлга қўйганлар. Шундай қилиб, бу ойни Расулуллоҳ соллаллоҳу алайҳи васалламни яхшироқ таниш, одамларнинг у зот ҳақларидаги билимларини ошириш, муҳаббатларини сайқаллаш маъносидаги бир маърифий ойга айлантирганлар. Бунинг учун турли кўринишдаги мавлид маросимларини ташкил қилганлар. Бу иш бугунги кунгача бутун Ислом оламида анъана сифатида давом этиб келмоқда.

Мавлид муносабати билан қилинадиган йиғинлар икки хил шаклда тус олган. Баъзи бир жойларда бу тадбир байрамона кайфиятда, шодлик изҳор қилиш, совғалар улашиш, наът ва нашидлар куйлаш каби ишлар билан ўтказилади. Иккинчиси эса илмий анжуман шаклида ўтказиладиган мавлид йиғинларидир. Булар мавлид ойини сийратни ўрганиш мавсуми сифатида ўтказишга қаратилган тадбирлардир. Бугунги кунда ҳар иккала усулни жамлаган ҳолда мавлид йиғинлари қилиш ҳам кенг ёйилган.

Инсоният тарихидаги энг фасоҳатли, балоғатли ва олиймақом шеърий асарлар “Мадийҳун-Набий” – “Набийнинг мадҳи” дея аталган, Набий соллаллоҳу алайҳи васалламнинг мадҳларида ёзилган шеърлардир. Мусулмон халқларнинг шоирлари ўзлари ва элатларининг Расулуллоҳ соллаллоҳу алайҳи васалламга бўлган муҳаббатларини у зотнинг мадҳларида битган шеърларида намойиш этганлар. Уларнинг энг сара шеърлари ҳам айнан шу мавзуда бўлган. Бу буюк уммон тинимсиз равишда янги-янги “Зилол сувлар” – Расулуллоҳ соллаллоҳу алайҳи васалламнинг мадҳларида битилган шеърлар, қасидалар билан тўлиб келмоқда. Бу асарларнинг ҳар бири Набиюллоҳга бўлган муҳаббатнинг рамзи ва намунаси ҳамдир.

Бугунги кунда Пайғамбаримиз соллаллоҳу алайҳи васаллам таваллуд топган муборак кунларини нишонлаш ва у зотнинг сийрати санияларини ўқиб-ўрганиш ва эшитиш билан бирга, бутун оламга раҳмат этиб юборилган Расулуллоҳ соллаллоҳу алайҳи васаллам ҳаёт тарзлари, хулқ-ободларидан ўрнак олиб яшамоқлигимиз керак. Юртимиз равнақи ва тараққиёти, халқимизнинг тинч ва осойишталиги йўлида баракали меҳнат қилишимизда Пайғамбаримиз соллаллоҳу алайҳи васалламнинг гўзал одоб ахлоқлари, илм олишга тарғиботлари, хайр-у саҳоватлари, инсонийлик фазилатлари бизларга ҳамиша илҳом бериши лозим.

Бутун дунёда бўлганидек, диёримиз мусулмонлари орасида ҳам қадимдан мавлид кунини байрам қилиш одат тусига кирган. Шу муносабат билан робиъул аввал ойи келгач, барча жоме масжидларимизда Пайғамбаримиз соллаллоҳу алайҳи васалламнинг сийратлари, юксак одоб-ахлоқлари ва олий фазилатлари ҳақида мавъизалар қилинади, мавлиди шарифлар ўқилади.

Бу каби хайрли тадбирларнинг ўсиб келаётган ёш авлодни гўзал ахлоққа йўғрилган азалий қадриятларимиз руҳида тарбиялашда, уларнинг маънан баркамол бўлиб етишишларидаги аҳамиятлари беқиёсдир.

Албатта, Пайғамбаримиз Муҳаммад алайҳиссаломга уммат бўлиш айни пайтда сизу бизларнинг зиммамизга масъулият ҳам юклайди. Бу масъулият у зот келтирган динни мусаффолигини сақлаб, келажак авлодга омонат билан етказиш, турли хилдаги бидъат ва хурофотларга берилмай, бузуқ эътиқодларга эргашмай, аксинча, адашганларни тўғри йўлга солиб, чин мўмин-мусулмон бўлиб яшашдан иборатдир.

Ҳусниддин ТУРСУНЗОДА,

Фарғона шаҳар “Янги чек” масжиди имом-ноиби

Ҳазрати Умар Ибн Ҳаттоб розияллоҳу анҳу шундай деганлар: “Аллоҳ таоло юртларни ватан муҳаббати ила обод қилди. Агар, Ватан муҳаббати бўлмаганида юртлар хароб бўларди”.

Аслида, заминдаги барча юртлар Аллоҳнинг инояти ила обод бўлади, фақатгина шу юртнинг халқи, одамлари қалбида ўз “УЙ”ларига нисбатан яхшилик, муҳаббат бўлса бас. Агар бунинг акси бўлса – юртни севадиган фарзандлар бўлмаса унда у ерга мусибатлар йоғилади. Тарих ҳам бугунги кун ҳам бунга гувоҳ. Айни кунларда бутун бошли давлатларнинг парчаланиб, жанг майдонига айланаётганининг бош сабаби ҳам ўша мамлакат аҳлининг ватанига нисбатан муҳаббати озлигидадаир, эҳтимол. Чунки, оиласини, юртини севган инсон уни вайрон бўлишига олиб келадиган турли фитналарга учмайди. Иғволарни тингламайди, бўхтонларга қўшилмайди, ёлғонларни қабул қилмайди, аксинча, агар оиласи – ватанида камчилик, нуқсон пайдо бўлса уни бартараф этишга, уни ривожлантиришга, тинчлик чамани бўлишига, оиладошлари, ватандошлари ҳамжиҳатликда яшашлари учун, дунёнинг энг бахтли оилалари жам бўлган юртга айланиши учун жидду-жаҳт билан ҳаракат қилади. Уни асраб авайлайди.

Бугун, ижтимоий тармоқларда ин қурган бир гуруҳ ёвуз ниятли нусхалар олислардан туриб ўз оиласи – ватанига қарши турли фитналар уюштириб, иғво-ю бўхтонларни тарқатишмоқда. Бу манфур кимсалар тарихда ҳам бўлишган, бугун ҳам бор, келажакда ҳам бўлади. Чунки, уларнинг онгларини шайтон бошқаради. Улар фитна қилмаса, уруш-жанжал чиқармаса дунё кўзларига қоронғу бўлиб кетади. Фитнакорлар учун ватан, оила, инсонлар шани ва қадри деган тушунчалар мутлақо бегонадир.

Энг аянчлиси, бузғунчиларнинг аксарияти динни ўзларига ниқоб қилиб, Исломнинг номидан гапириб халқни тўғри йўлдан адаштириш пайида юрибди. Улар учун инсонларнинг жони ва моли қадрсиз. Улар моддий манфаат учун ҳеч қандай айбсиз, асоссиз равишда инсонларнинг, гўдакларнинг умрларига зомин бўлиб қотилга айланишмоқда.

Абу Ҳурайрадан ривоят қилинади: “Набий соллаллоҳу алайҳи вассаллам: “Жоним қўлида бўлган зот ила қасамки, токи одамлар бошига қотил нима учун қатл қилганини ва мақтул нима учун қатл қилинганини англамайдиган кун келмагунича бу дунё кетмас”, дедилар.
“Эй Аллоҳнинг расули Ул қандоқ бўлур?” дейилди.
“Ҳараж. Қотил ҳам, мақтул ҳам дўзахдадир”, дедилар”.
Шарҳ: Ҳараж-фитна ва одам ўлдиришнинг кўплиги.
Қиёматнинг аломатларидан бири одам ўлдиришнинг кўпайиши ва одам ўлдирган одам нима учун ўлдирганини ва ўлдирилган одам ҳам нима учун ўлдирилганини била олмай қоладиган ҳолатнинг пайдо бўлиши экан.

Бу юрт, бу тупроқ Аллоҳ таолонинг бизга инъом этган улуғ неъматларидандир. Бу неъматга шукр қилиш уни обод қилиш билан, уни турли фитналардан асраш билан амалга оширилади. 

Саидаброр Умаров тайёрлади