muslim.uz
Пайғамбаримизга муҳаббат иймондандир
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
«Муҳаббат» сўзи аслида мойиллик, севиш, суйиш, яхши кўриш, кўнгил қўйиш, ишқ, хоҳлаш, талпиниш, интилиш маъноларини англатади. Муҳаббат қалбдаги туйғу бўлиб, инсон ҳаётида жуда катта аҳамиятга эга. У кишининг сўзу амалларини бошқаради, тасарруфларини ҳаракатлантиради. Инсон муҳаббатсиз яшай олмайди, кимларнидир севиб, нималаргадир меҳр қўйиб яшайди. Ислом дини ушбу туйғуни ҳам тўғри ўзанда бўлишини талаб қилади.
Аллоҳга бўлган чин иймон У Зотга нисбатан муҳаббатнинг ҳосиласидир. Айни пайтда бу иймон ва муҳаббат Аллоҳнинг элчисини ‒ пайғамбарини севишни тақозо этади. Шу боис, Расулуллоҳ соллаллоҳу алайҳи васалламни яхши кўриш иймоннинг бир қисми ҳисобланади. Муҳаббатсиз кишининг иймони ва саодати тугал бўлмайди. Шунинг учун Ислом уммати Пайғамбаримиз соллаллоҳу алайҳи васалламга муҳаббат ҳар бир мусулмон учун фарз эканига ижмоъ-иттифоқ қилган.
Буюк бобомиз имом Бухорий раҳматуллоҳи алайҳ шоҳ асари «Ал-жомеъус-саҳиҳ» тўпламидаги «Иймон» китобининг 8-бобини «Расулуллоҳ соллаллоҳу алайҳи васалламга муҳаббат иймондандир» деб номлаб, унда қуйидаги икки ҳадиси шарифни келтиради:
Абу Ҳурайра розияллоҳу анҳудан ривоят қилинади: «Расулуллоҳ соллаллоҳу алайҳи васаллам: «Жоним қўлида бўлган Зот (Аллоҳ)га қасамки, сизлардан ҳеч ким комил мўмин бўла олмайди, то мен унга отасию боласидан маҳбуброқ (севимлироқ) бўлмагунимча», дедилар».
Анас розияллоҳу анҳудан ривоят қилинади: «Набий соллаллоҳу алайҳи васаллам: «Сизлардан ҳеч ким комил мўмин бўлолмайди, токи мен унга отаси, боласи ва барча одамлардан маҳбуброқ бўлмагунимча», дедилар».
Демак, мусулмон киши Пайғамбаримиз соллаллоҳу алайҳи васалламни барчадан кўра кўпроқ севмагунча комил иймонга эриша олмайди.
Пайғамбаримиз соллаллоҳу алайҳи васалламга муҳаббат қуруқ даъво ёки юзаки гаплар билан эмас, балки чин қалбдан бўлиши ва амалда акс этиши лозим. Пайғамбаримиз соллаллоҳу алайҳи васалламга муҳаббат қуйидаги амалларни тақозо этади:
– у зотни яхши кўриш, севиш, суйиш;
– у зотга кўнгил қўйиш, мойил бўлиш, муштоқ бўлиш, ошиқ бўлиш;
– у зотни соғиниш, эслаш ва унутмаслик;
– у зотга интилиш ва рағбат қилиш;
– у зотни ҳаммадан устун қўйиш ва афзал кўриш;
– у зот яхши кўрган нарсани яхши кўриш, ёмон кўрган нарсани ёмон кўриш;
– у зотга эргашиш, итоат этиш, суннатларига амал қилиш, у зотнинг таълимотларига мувофиқ тарзда ҳаёт кечириш;
– у зотга ёрдам бериш, суннатларини, шариатларини ҳимоя қилиш;
– у зотни энг олий намуна деб билиш, у зотдан ўрнак олиш;
– у зотга кўп салавоту саломлар айтиш;
– у зотга хилоф иш қилишдан қўрқиш;
Пайғамбаримиз соллаллоҳу алайҳи васалламга муҳаббат банда учун дунё-ю охират саодати гаровидир. У зотга муҳаббат дўзахдан нажот ва жаннатга кириш учун сабабдир. У зотга муҳаббат Аллоҳнинг муҳаббатига ва жаннатига йўлдир.
Бир аъробий киши Пайғамбаримиз соллаллоҳу алайҳи васалламдан: «Қиёмат қачон бўлади?» деб сўради. У зот: «Қиёматга нима тайёрладинг?» деб сўрадилар. У: «Аллоҳ ва Расулига муҳаббатни!» деб жавоб беради. Шунда у зот: «Сен муҳаббат қилганинг билан бирга бўласан», дедилар.
Анас розияллоҳу анҳу айтади: «Биз мусулмон бўлишдан кейин Пайғамбаримиз соллаллоҳу алайҳи васалламнинг «Сен муҳаббат қилганинг билан бирга бўласан», деган гапларидан хурсанд бўлганимизчалик хурсанд бўлмаганмиз. Мен Аллоҳни, Расулини, Абу Бакрни, Умарни яхши кўраман. Гарчи уларчалик амал қила олмаган бўлсам-да, (муҳаббатим туфайли) улар билан бирга бўлишни умид қиламан» (Бухорий ва Муслим ривояти).
Оиша розияллоҳу анҳо айтади: «Бир киши Пайғамбаримиз соллаллоҳу алайҳи васалламнинг ҳузурларига келиб: «Ё Расулуллоҳ! Сиз менга ўзимдан ҳам, аҳли-оиламдан ҳам, бола-чақаларимдан ҳам севимлироқсиз. Мен уйда бўлганимда сизни эслайман ва сабр қилолмасдан олдингизга келиб, сизни кўраман. Аммо бу дунёдан ўтишимизни эсласам, биламанки, сиз жаннатда пайғамбарлар билан олий даражаларга кўтарилиб кетасиз. Мен эса жаннатга кирсам-да, сизни кўра олмасам керак, деб қўрқаман», деди. Пайғамбаримиз соллаллоҳу алайҳи васаллам унга ҳали жавоб бермай туриб қуйидаги ояти карима нозил бўлди:
«Ким Аллоҳ ва Расулга итоат этса, ана шулар Аллоҳнинг инъомларига эришган зотлар, яъни пайғамбарлар, сиддиқлар, шаҳидлар ва солиҳ кишилар билан бирга бўлурлар. Улар қандай ҳам яхши ҳамроҳдирлар» (Нисо сураси, 69-оят). (Табароний, Байҳақий, Ибн Мардавайҳ, Мақдисий, Абу Нуайм, Ҳайсамий ва Воҳидийлар ривояти).
Аллоҳ таоло барчамизга Пайғамбаримиз соллаллоҳу алайҳи васалламга ҳақиқий муҳаббат қилиш, у зотни чинакам севиш бахтини насиб этсин.
Абдул Азим Зиёуддин,
Тошкент Ислом институти «Ҳадис ва ислом
тарихи фанлари» кафедраси катта ўқитувчиси
Манба: https://islom.uz
Тасаввур қилиб кўрингчи!
Аллоҳ таоло Қуръони Каримда Набий соллаллоҳу алайҳи васаллам ҳақларида шундай марҳамат қилган:
وَإِنَّكَ لَعَلى خُلُقٍ عَظِيمٍ
“Ва албатта, сен улкан хулқдасан” (Қалам сураси, 4-оят).
Ҳа, у зот алайҳиссалом барча гўзал хулқлар билан зийнатланган эдилар. Ана шундай гўзал хулқларидан бири каттаю кичикка бирдек салом беришларидир.
Анас розияллоҳу анҳудан ривоят қилинади: «Росулуллоҳ соллалоҳу алайҳи ва саллам бир боланинг олдидан ўтдилар ва унга салом бердилар».
Имом Муслим ривоятлари.
Расулуллоҳ соллаллоҳу алайҳи васаллам “Бу ёш бола-ку. Шунга салом бераманми?” демасдилар. Балки ҳаммага салом берардилар. Биз ҳам бу суннатга амал қилиб, каттаю кичикка салом беришни кенг ёйишимиз керак.
Ўша бола нақадар бахтли экан-а?! Пайғамбаримиз соллаллоҳу алайҳи васаллам унга салом берган эканлар.
Тасаввур қилинг, кўчада кетяпсиз. Ёнингиздан Расулуллоҳ соллаллоҳу алайҳи васаллам ўтаётганларида сизга “Ассалому алайкум ва роҳматуллоҳи ва барокатуҳ” дея салом беряптилар.
Тасаввур қиляпсизми?! Роббул оламийннинг Ҳабиби, икки олам сарвари, барча Пайғамбарлар алайҳимуссаломнинг гултожи бўлган зот сизга салом беряптилар.
Нима аҳволга тушардингиз? Ўша онда нималарни ҳис қилардингиз? “Ва алайкум ассалом ва роҳматуллоҳи ва барокатуҳу” деб йўлингизда давом этармидингиз ёки тўхтаб, у зот алайҳиссаломнинг бағриларига ўзингизни отармидингиз?
Ўйлаб кўришга, кўз олдингизга келтиришга уриниб кўринг-чи!
Ўйлаб кўрдингиз-а? Тасаввурнинг ўзи билан бошқача ҳислар чулғаб олдими? Энди саҳобаи киромлар у зот соллаллоҳу алайҳи васалламни ҳар куни кўришган, суҳбатлашишган, қўлларидан тутишган. Уларнинг мақомларини, қанчалик саодатли даврда яшашганини англаяпсизми?
Аллоҳ таоло барчамизга севикли Пайғамбаримиз соллаллоҳу алайҳи васалламнинг барча суннатларига ихлос билан амал қилиб, бу дунёда у зот соғинган умматларидан, охиратда эса шафоатларига эришувчилардан бўлишимизни насиб этсин!
Нозимжон Ҳошимжон тайёрлади
Татаристонда Мавлид тадбири ташкил этилди
Жорий йилнинг 30 октбярь куни Қозон шаҳрида "Аждодлар мероси" анъанавий дўстлик кечаси ташкил этилди. Тадбир Татаристон мусулмонлари идораси ҳамда Доғистон мусулмонлари идораси ҳамкорлигида ўтказилган.
Мавлид Қуръони карим тиловати билан бошланиб, қироатни Бутунроссия Қуръони карим мусобақаси ғолиби Илёс қори Собиров қилган.
Тадбирда икки диний идора раҳбарлари йиғилганларни Аллоҳ таолонинг ҳабиби, Сарвари коинот, Буюк муаллим, Юксак хулқлар ва камтарлик тимсоли дейилган Зот ва оламларга раҳмат қилиб юборилган суюкли Пайғамбаримиз Муҳаммад Мустафо саллаллоҳу алайҳи васалламнинг таваллуд ойлари барчани муборак этганлар.
Ўзбекистон мусулмонлари идораси Матбуот хизмати
Андижонда сайёр семинар ташкил этилди
Бугунги кун имом-хатиби ҳам мана шундай ривожланиш, янгиланиш, ислоҳатлар бўлган бир даврда бир жойда туриб қолиши асло мумкин эмас. Зеро динимизда ҳам янгиланиш, ривожланишга интилиб яшашлик кўрсатмалари бир неча бор таъкидланган.
Имом-хатибларнинг касбий маҳоратини ошириш, масжид иш юритиш ҳужжатлари, молиявий ва хўжалик ишлари, имомларнинг воизлик маҳорати ҳамда уларнинг ҳозирги кун талабларига жавоб бера оладиган шахс сифатида шакллантириш мақсадида жорий йилнинг 30 октябрь куни Андижон вилояти Олтинкўл туманидаги "Олтинкўл" жоме масжидида сайёр семинар ўтказилди. Бу ҳақда вилоят вакиллиги масъуллари хабар берди.
Семинарда вилоятнинг барча шаҳар ва туман бош имом-хатиблари ҳамда Олтинкўл туманида фаолият кўрсатиб келаётган имом-хатиблар ҳам иштирок этди. Даставвал, режага кўра, барча шаҳар ва туман бош имом-хатиблари тумандаги масжидларнинг ҳозирги кундаги ҳолати, ободончилиги, иш юритиш жиҳатларини ўргандилар.
Ушбу ўрганишларнинг хулосалари билдирилди. Олтинкўл туманидаги масжидлар фаолиятига доир ҳужжатларидаги баъзи камчиликлар юзасидан баёнотлар берилди.
Шунингдек, диний соҳа фаолиятини янада ривожлантириш борасидаги туманнинг иш тажрибалари бошқа туманларга ҳам тадбиқ қилинишлиги келишиб олинди. Мажлис сўнггида мана шундай сайёр семинарлар режа асосида вилоятнинг ҳар бир туманида ҳам ўтказиб борилишига келишиб олинди.
Ўзбекистон мусулмонлари идораси Матбуот хизмати
Ўзбекистонда «Исломий дарча» тамойилининг дастлабки босқичи бошланди
Ислом корпорацияси қурол, спиртли ичимликлар, таваккалчиликка асосланган ўйинларни молиялаштирмайди. Хизматдан фойдаланган мижознинг маблағни ислом шариати қонунлари асосида сарфланиши ҳам назорат қилиб борилади.
Ўзбекистон Республикаси Президентининг 2017 йил 20 декабрдаги “Халқаро ва хорижий молия институтлари билан ҳамкорликнинг самарадорлигини янада ошириш чора-тадбирлари тўғрисида”ги ва Ўзбекистон Республикаси Вазирлар Маҳкамасининг 2019 йил 23 майдаги “Ислом тараққиёт банки гуруҳи ва араб мувофиқлаштириш гуруҳи жамғармалари билан ҳамкорликни янада ривожлантириш чора-тадбирлари тўғрисида”ги қарорлари ижросини амалга ошириш мақсадида, “Трастбанк” хусусий акциядорлик банки ва Хусусий секторни ривожлантириш бўйича Ислом корпорацияси ўртасида жорий йилнинг 22 август куни тузилган “Исломий дарча” хизматини банкда тадбиқ этиш бўйича келишувнинг шартларига мувофиқ, 2019 йилнинг 30-31 октябрь кунлари “Трастбанк” раҳбарияти ва Хусусий секторни ривожлантириш бўйича Ислом корпорацияси жамоаси вакиллари ўртасида ўзаро учрашув бўлиб ўтди.
Учрашувда “Трастбанк” хусусий акциядорлик банки раҳбарлари ва Хусусий секторни ривожлантириш бўйича Ислом корпорацияси жамоаси раҳбари Mohammed Maher Mannai, IT-лойиҳаларини бошқариш бўйича эксперти Ibrahim Al-Saywed ва лойиҳа менежери Музаффар Низомиддиновлар иштирок этди.
Таъкидлаш жоизки, исломий банкчилик – дунёнинг қатор мамлакатларида кенг қўлланиладиган молиялаштириш тамойилларига мос келадиган молиявий хизматларнинг муқобил туридир.
Учрашув давомида Хусусий секторни ривожлантириш бўйича Ислом корпорацияси жамоаси раҳбари Mohammed Maher Mannai ва лойиҳа менежери Музаффар Низомиддиновлар банк раҳбарияти ва тегишли бўлим мутахассисларига “Исломий дарча” тамойиллари ва ислом молияси тўғрисида ўз тақдимотларини намойиш қилдилар.
Бизнинг ташкилотимиз ва Ўзбекистон ўртасида ҳамкорлик алоқаларининг ўрнатилиши жуда шарафли бўлгани учун ҳам “Трастбанк” томонидан “Исломий дарча”ни очиш ташаббусини биз мамнуният билан қабул қилдик. Демак ўз навбатида шуни айтиб ўтишим жоизки, “Исломий дарча” бу фақат мусулмонлар учун эмас, балки мусулмон бўлмаган дин вакиллари учун ҳам қўлланилади. Исломий молиянинг асосий мақсадларидан бири, бу реал иқтисодиётга таъсир қилиш ва унинг ўсишини таъминлашдан иборат. Шу мақсадда “Трастбанк” орқали “Исломий дарча” фаолиятини йўлга қўйишни кўзда тутганмиз. Албатта, бу мамлакатда банк хизматларидан фойдаланмаётган мижозлар учун ҳам қўл келади. Чунки, бу “Исломий дарча”ни очиш орқали мижозларга ва жисмоний шахсларга уларнинг эътиқодидан келиб чиққан ҳолда муқобил молиявий хизмат турларини таклиф қилиш ҳамда уларнинг молиявий эҳтиёжларини қондириш мумкин бўлади.
Учрашув сўнгида “Трастбанк” хусусий акциядорлик банки ва Хусусий секторни ривожлантириш бўйича Ислом корпорацияси ўртасида “Исломий дарча”ни ишга тушириш бўйича йўл харитаси тасдиқланди.
Ўзбекистон мусулмонлари идораси Матбуот хизмати
Видеолавҳалар
