muslim.uz
Шавкат Мирзиёев Индонезия халқига таъзия билдирди
Ўзбекистон Республикаси Президенти Шавкат Мирзиёев Индонезиянинг “Lion Air” компаниясига тегишли самолётнинг қулаши оқибатида кўплаб инсонлар ҳалок бўлгани муносабати билан таъзия билдирган.
Шавкат Мирзиёев Индонезия Президенти Жоко Видодога ва Индонезия халқига чуқур таъзия билдирган.
Индонезияда ҳалокатга учраган самолёт бортида 188 киши бўлган. Бу ҳақда маҳаллий ОАВ хабар бермоқда.
Воқеа жойига етиб келган қутқарувчилар «Боинг» бўлаклари ва йўловчилар буюмларини денгиздан чиқариб олишни бошлашган.
ЎМИ Матббуот хизмати
Нишонга урилган гаплар: “Ҳар қанча йиғласанг ҳам ота-онанг олдида ҳеч қачон йиғлама!”
Қуйида келтириладиган фикрлар, ҳикматлар ижтимоий тармоқлардаги турли саҳифалардан олиб таржима қилинган. Бундан ташқари саҳобаи киромлар, улуғ олимлар, Яқин Шарқ, Осиё, Европа ва Америка мутафаккирларининг бир қатор фикрлари ҳам берилган.
*****
- Хурсанд бўлиб турганингда ваъдалар берма.
- Ғазабланиб турганингда гапирма.
- Сиқилиб турганингда қарор қабул қилма.
«Тарих мухрлаган сўзлар»
*****
Келадиган манфаат тугагач, баъзиларнинг дўстлиги ҳам тугар экан.
*****
Муҳаббат фақат романтикадан иборат эмас. Балки у ҳурмат, эътибор ва ишончдан иборатдир.
*****
Мен бировни, ҳатто мени хўрлаган дўстларимни ҳам ёмон кўрмайман. Уларни ҳалиям яхши кўраман. Лекин энди уларни яна дўстликка қабул қилолмайман.
«Тарих мухрлаган сўзлар»
*****
Ҳар қанча йиғласанг ҳам ота-онанг олдида ҳеч қачон йиғлама!
*****
Аёлингиз сизнинг ҳар доим ҳамроҳ, суянчиқ ва сокинлик манбаи эканингизни ҳис этсин!
*****
Садақа бераётганингда, бу киши пулимга муҳтож, демагин! Балки, Роббимнинг мағфиратига ва садақанинг савобига мен муҳтожман, дегин.
*****
Ақл зиёда бўлгани сари узлат (ёлғизлик, холи қолиш)га майл ортиб борар экан.
«Тарих мухрлаган сўзлар»
*****
Ортингдан гапиришади. Чунки улар чиндан ҳам сендан орқада-да.
“Тарих мухрлаган сўзлар”
*****
Ота-онага қилинадиган яхшиликларнинг энг олийси – ғамларинг, муаммоларинг ва оғриқларингни уларга айтмаслигингдир. Чунки, улар ўша нарсаларга сендан кўра ўн чандон кўпроқ ғам-алам чекадилар.
“Сараланган гўзал ҳикматлар”
*****
Хурсанд кунингда сен билан бирга кулганни унутсанг ҳам, қийин вазиятда сен билан бирга йиғлаганни асло унутма.
“Қисқа насиҳатлар”
*****
Интернет материалларидан тўплаб, таржима қилувчи
Нозимжон Иминжонов
Умра мавсуми бошланди
Кеча, 28 октябрь куни ўзбекистонлик зиёратчиларнинг дастлабки гуруҳи Умра ибодатоларини адо этиш учун Саудия Арабистонига жўнаб кетдилар.
Фуқароларимизни “Ўзбекистон ҳаво йўллари” миллий авиакомпаниясининг замонавий самолётларида жорий йилнинг 28 октябридан бошлаб Саудия Арабистонига умра ибодатларини адо этиш учун жўнатиш ишлари бошланди.
Зиёратчиларимиз Макка ва Мадина шаҳарларида барча зарур шароитларга эга меҳмонхоналарда истиқомат қиладилар ҳамда уларга тажрибали ишчи гуруҳи, малакали шифокорлар ҳамда моҳир ошпазларимиз хизмат кўрсатишлари режалаштирилган.
Ўзбекистондан Умра зиёратини амалга оширувчи мўмин-мусулмонлар Маккаи Мукаррама шаҳрида 4 юлдузли Al Kiswah Hotel Towers, Мадинаи Мунавварада 5 юлдузли Pullman Zamzam Madina Hotel меҳмонхоналарига жойлаштирилади.
Зиёратчиларимизнинг сафар таассуротларини сайтимиз орқали ёритиб борамиз.
Ўзбекистон мусулмонлари идораси
Матбуот хизмати
Покликка тарғиб этилишининг ҳикматини биласизми?
Азизлар, Ислом динимиз поклик дини ҳисобланади. Инсоннинг танаси ҳам, қалби ҳам пок бўлиши лозим. Ибодат олдидан ҳам, таом ейиш олдидан ҳам, меҳмонга бориш олдидан ҳам, хуллас, барча ўринларда покликга тарғиб этилган.
Пок инсоннинг танасидан ёқимсиз ҳид келмайди. Атрофдагилар ҳам уни яхши кўради. Ўша одамнинг ўзи ҳам хушнуд кайфиятда юради. Агар инсон покликка эътибор бермаса, танаси терлаши ва ювилмагани оқибатида зарарли микроблар кўпайиб, ундан ёмон ҳид келиши ва микроблар турли касалликларга сабаб бўлиши мумкин.
Инсоннинг деярли барча аъзоларида турли кўринишда ва катталикда микроблар бўлиб, улар тери, қулоқ, бурун, оғиз, кўз ва бошқа аъзоларда ўрнашиб олади. Агар инсон ўша аъзоларини мунтазам ювиб турса, мазкур микробларнинг кўпидан тезда халос бўлади.
Ушбу суратда инсон терисида доимий яшайдиган бактериялар кўриниб турибди. Улар миллионлаб марта катталаштириб кўрсатадиган электрон микроскопда тасвирга олинган. Булар бактерияларнинг бир тури. Бундан ташқари яна бошқа турдаги бактериялар ҳам бор.
Инсон терисида 500-1000 турдаги бактериялар яшайди. Ажабланарлиси шуки, ҳар бир инсонда ўша инсоннинг ўзига хос бўлган бактериялар ҳам бор экан. Бактериолог ва микробиолог олимларнинг таъкидлашларича, инсоннинг ўзига хос бўлган микроблари унинг руҳий ва физиологик ҳолатига қараб ривожланар ва шаклини ўзгартирар экан.
Агар сиз бир кунда бир неча бор қўлингизни ювсангиз, қўлингиздаги миллионлаб зарарли микроблардан халос бўласиз. Қуйидаги расмда ювилмаган қўлдаги микробларнинг микроскоп орқали олинган суратини кўриб турибсиз.
Шунингдек, бир кунда бир неча марта юзингизни ювсангиз, ундаги миллионлаб хатарли бактериялардан қутуласиз. Бу каби тез-тез ювиш мазкур микроблар сонининг ортишини кескин пасайтиради. Қуйидаги расмда юз ва бошқа аъзолар терисида бўладиган бактерияларнинг микроскопдаги тасвирини кўриб турибсиз.
Соҳа мутахассислари “Албатта, ҳар куни оғиз ва бурунни бир неча марта ювиб туриш кўп сонли микробларнинг йўқолишига ҳамда тери ва нафас олиш органларининг касалланишидан сақланишига ёрдам беради” дейишган. Сиз мана бу расмда оғиз бўшлиғи, хусусан, тилдаги микробларнинг микроскоп орқали кўринишини кўриб турибсиз.
Ҳа, азизлар, бу айтилган гапларга шуни қўшимча қиламизки, таҳорат ва ғусл турли тери-таносил ва оғиз бўшлиғи касалликларининг олдини олишда энг самарали воситадир. Биз мўмин-мусулмонлар ҳар куни бир неча бор таҳорат оламиз. Таҳорат асносида қўлларимизни, юзларимизни, билакларимизни, оёқларимизни, оёқ-қўл бўғимларимизни ҳамда бармоқларимиз орасини ювамиз. Шу сабабли бу каби ноқулайликлар бизни безовта қилмайди.
Динимиз бизни нега покликка буюрганининг ҳикматларидан бирини билиб олдик. Покликнинг ҳали биз билмаган сир-асрорлари, ҳикматлари жуда ҳам кўп. Шунинг учун биз Динимиз кўрсатмаларига амал қилиб яшасак, Аллоҳнинг раҳмати билан бу дунёда ҳам, охиратда ҳам бахт-саодатга эришамиз.
Аллоҳ таоло Қуръони Каримда шундай деган:
إِنَّ اللّهَ يُحِبُّ التَّوَّابِينَ وَيُحِبُّ الْمُتَطَهِّرِينَ
“Албатта, Аллоҳ тавба қилувчиларни севади ва покланувчиларни севади” (Бақара сураси, 222-оят).
Ислом неъматини бергани учун Аллоҳ таолога чексиз ҳамду санолар бўлсин!
Абдуддоим Каҳел мақоласи асосида
Нозимжон Иминжонов тайёрлади
Нишонга урилган гаплар: “Пул билан сотиб олиб бўлмайдиган нарсага эга бўлсанггина бой ҳисобланасан”
Қуйида келтириладиган фикрлар, ҳикматлар ижтимоий тармоқлардаги турли саҳифалардан олиб таржима қилинган. Бундан ташқари саҳобаи киромлар, улуғ олимлар, Яқин Шарқ, Осиё, Европа ва Америка мутафаккирларининг бир қатор фикрлари ҳам берилган.
*****
Узоқликнинг энг даҳшатли тури Роббингдан узоқ бўлишингдир. Ваҳоланки, У Зот:
وَنَحْنُ أَقْرَبُ إِلَيْهِ مِنْ حَبْلِ الْوَرِيدِ
“Ва Биз унга жон томиридан ҳам яқинмиз” деган.
*****
Фурсатни қўлдан бермайлик!
Фарзандингизга бошқа биров Фотиҳа сурасини сиздан олдин ёдлатиб қўйишига имкон берманг. Ахир у умр бўйи ушбу сурани тиловат қилиб намоз ўқийди.
Шайх Шаъровий раҳимаҳуллоҳ
Яъни бир умр ўқиладиган сурани бошқа киши ёдлатиб, бир умрлик савобдан қуруқ қолманг!
*****
Эй Аллоҳ! Мени уч нарсадан узоқлаштирма:
- Намозимдан.
- Ота-онамнинг розилигидан.
- Яхши кўрганимдан.
Шайх Шаъровий раҳимаҳуллоҳ
*****
Пул билан сотиб олиб бўлмайдиган нарсага эга бўлсанггина бой ҳисобланасан.
“Тарих мухрлаган сўзлар”
*****
Агар моддий нарсалар маънавий нарсалардан кўра аҳамиятлироқ бўлганида, жасад ерга кўмилмаган, руҳ эса осмонга кўтарилмаган бўларди.
Доктор Мустафо Маҳмуд
*****
Интернет материалларидан тўплаб, таржима қилувчи
Нозимжон Иминжонов
Видеолавҳалар
