Маънавий юксалиш йўлидан дадил қадамлар билан одимлаб бораётган жонажон юртимизда муқаддас динимизга алоҳида эътибор берила бошланди. Жумладан, ислом билим юртлари фаолияти тубдан яхшиланди. Бунинг замирида ислом динини асл ҳолатида ўрганишга бўлган эҳтиёжни қондириш, диёримиз алломаларининг динимизга доир бўлган бой маънавий меъросини тадқиқ этиб, уларни халқимизга содда ва равон услубда етказиш, замон талаблари даражасидаги малакали диний мутахассисларни тайёрлаш мақсад қилиб қўйилган.

Яратган парвардигорга беадад шукрлар бўлсинки, жамиятимизда рўй берган ижобий ўзгаришлар мамлакатимиз мусулмонлари ҳаётида ҳам улкан бурилишларга сабаб бўлмоқда. Республикамиз халқаро майдонда ўз ўрнини топишга интилмоқда. Ҳар йили турли мамлакатларда ўтказиладиган Халқаро Қуръони карим мусобақаларида диёримиздан етишиб чиқаётган иқтидорли қориларимиз ҳам қатнашиб, юртимиз шаънини юксак даражаларга кўтариб келмоқда.

Мисол учун, улар Саудия Арабистони Подшоҳлиги, Иордания Ҳошимийлар давлати, Миср Араб Республикаси, Қувайт, Малайзия, Эрон Ислом Республикаси, Туркия, Россия сингари бир неча давлатларда қатнашиб, юртимиз шаънини юксакларга кўтариб қайтмоқдалар.

Шу йилнинг 20-30 май кунлари Туркия давлатининг Истанбул шаҳрида бўлиб ўтган VI Халқаро Қуръони карим мусобақаси бўлиб ўтди.

Мусобақа қуйидаги икки йўналишда ўтказилди:
1. Қуръони каримни тажвид қоидаси билан тўлиқ ёддан ўқиш.
2. Қуръони каримни тажвид қоидалари билан тиловат қилиб бериш.

Юртимиздан “Имом ал-Бухорий” номли Тошкент ислом институти ходими Хидирбоев Хусан мусобақанинг мужаввид йўналишида ва “Саййид Муҳйиддин махдум” ўрта махсус ислом билим юрти 4-курс талабаси Абдужалилов Сирожиддин ҳифз йўналишида иштирок этдилар.

Мазкур мусобақада дунёдаги 72 давлатдан 126 та етук Қуръон ҳофизлари ва хушовоз соҳиблари қатнашди. Ҳифз йўналишида Сурия, Туркия ва Фаластин, мужаввид йўналишида эса Туркия, Марокаш ва Ироқлик қорилар юқори ўринларни эгаллаб, мусобақа совриндорлари бўлишди.
Вакилларимизга иштироки тўғрисидаги ташаккурнома ёрлиғи тақдим этилди.

Иштирокчи қорилар учун мусобақа ташкилий ҳайъати томонидан Туркиянинг Истанбул шаҳридаги диққатга сазовор бўлган жойларга зиёрат уюштирилди.

ЎМИ ходими И.Аҳмедов

Бугун, 31 май куни Муборак Рамазон ойи - мағфират даҳасининг, 15-кунидир. Тошкент шаҳридаги бир неча жоме масжидларда бу кеча Қуръони Карим хатмонаси яъни, Каломуллоҳнинг сўнгги суралари ўқилиб, чин ихлос ила дуолар қилинади.

Бугун 31 май санасида Тошкент шаҳридаги қуйидаги масжидларда Қуръони Карим хатмонаси якунига етади:

1. “Шайх Зайниддин” жоме масжиди. (Шайхонтоҳур тумани, Маннон Уйғур кўчаси-378 уй. Тел.: +998 71 243 25 22)
Қорилар: Аминов Мухаммадлоик Абдувохидович, Халимов Насрулло Холматович

2. “Оқ тунукали” жоме масжиди. (Манзил: Шайхонтоҳур тумани, Ҳувайдо маҳалласи, Зафаробод кўчаси 43-уй, Тел.: +998 93 379-80-17)
Қорилар: Мамасидиқов Камолидин Комилжон ўғли, Супиев Абдурахмон Аюбхон ўғли, Ҳайдаралиев Иброҳимжон Обабакирович

3. “Сирож солиҳ” жоме масжиди. (Олмазор тумани, «Умид» маҳалласи, Юнусова кўчаси 21а-уй. Телефон: +998 71 228 86 41.)

4. “Иброҳим ота” жоме масжиди. (Олмазор тумани, Иброҳим Ота кўчаси 20-уй.)

Хатми Қуръондан кейинги дуолар мустажобдир. Рамазоннинг энг баракотли онларини қўлдан бой берманг азизлар.

ЎМИ Тошкент шаҳар вакиллиги Матбуот хизмати

ЎМИ Матбуот хизмати

Ҳижрий ойлар милодий сана ойларига нисбатан ҳар ўн икки кун фарқи билан айланиб туради. Шунинг учун Рамазон ойи фаслларнинг турли вақтига тўғри келиб қолади.

Рамазон ойининг энг иссиқ ёз фаслининг энг узун кун ҳамда энг қисқа тунлар орасида келиши ҳам мусулмонларнинг сабр ва тақвосига берилган бир синовидир. Чунки куннинг энг қисқа ва туннинг энг узун вақти бўлган салқин ҳамда осон кунларда ҳам Рамазоннинг келиши, кимнинг нимага ва қанча тақвога эга сабр соҳиби эканининг намоён этади. Демак, йилларнинг айланиши билан ҳар Рамазонда озми - кўпми сабр имтиҳони топширамиз. Охиратда бу баҳоимизнинг мукофоти  “Сабрнинг мукофоти – жаннатдур” хадисига мувофиқ ажрга эга бўламиз, иншоаллоҳ.

Расулуллоҳ (саллоллоҳу алайҳи ва саллам): “Агар банда Рамазонда Аллоҳга яна ҳурмат ҳосил қилмоқчи бўлиб бирор нафл ибодат ёки хайрли амални бажарса, гўё Рамазондан бошқа ойда  бир фарзни бажаргандек бўлади. Ва кимки Рамазонда бир фарзни адо қилса, гўё Рамазон савобига эга бўлибди”, - деганлар.

Масалан закотни Рамазон ойида бериш керак деган кўрсатма йўқ, аммо у (Закот) Рамазонда адо этилса, бошқа ойларда адо этилган етмишта фарзнинг савобига эришишга қизиқтирилмоқда. Бу эса Рамазони шарифнинг баракотли ой эканини билдиради.

Мусулмонлар бу ойда масжидларга чиқиб, таровеҳ намозларида қатнашиб, сабр билан хатми Қуръонларга сомеъ бўлиб савоблардан бахраманд бўлишади. Кимлардир қалбидаги гиналардан фориғ бўлиб, ўзи учун покиза ҳаёт саҳифасини оча олади. Яна кимдир саховат ва силаи раҳмни кучайтириб бу муборак ой рўзасини астойдил адо этади.

Бу ой бизларга нафсимизни тарбия қилишда яқиндан ёрдам беради. Барчамиз рўза тутиш орқали нафсни тийиб, сабр қилишни ўрганамиз, муҳтожларга меҳр-шафқат кўрсатишга интиламиз. Барча пайғамбарлар нафс тарбиясида айнан рўза тутишни тавсия этишган. Агарда инсон мана шу ибодат машаққатига сабрли бўлса, уни муҳаббат билан адо этса, ушбу кунларда кўпроқ эҳсон (садақа)лар қилса, охират қийинчиликларидан қутилади.

Рамазоннинг фазилати ҳақида Пайғамбаримиз (соллаллоҳу алайҳи ва саллам): “Умматларим ҳар қайси ойда қилган бир яхши, солиҳ амали учун бир савоб олади. Аммо Рамазонда эса Аллоҳ бири учун ундан то етти юзгача ва ундан зиёда қилиб беради”, деганлар. Рамазон мўминларнинг ризқларини зиёда этадиган ойдир. Ким бу муборак ойда бир рўзадорни ифтор ёки саҳарлик қилдирса, бир қул озод қилганнинг савобини топади ва гуноҳлари мағфират қилинади. Шунинг учун бўлса керак, мулкдор кишилар шу ойда ўз закотларини беришга, саховатпешалар эса денгиз каби тошиб, меҳр-эътиборга интиқ кишиларга меҳр-мурувват, хайру саховат кўрсатишга ошиқишади.

عَنْ أَبِى هُرَيْرَةَ أَنَّ النَّبِىَّ صَلَّى اللهُ عَلَيهِ وَسَلَّمَ قَالَ الصِّيَامُ جُنَّةٌ إِذَا كَانَ أَحَدُكُمْ صَائِمًا فَلاَ يَرْفُثْ وَلاَ يَجْهَلْ فَإِنِ امْرُؤٌ قَاتَلَهُ أَوْ شَاتَمَهُ فَلْيَقُلْ إِنِّى صَائِمٌ إِنِّى صَائِمٌ.    رَوَاهُ اَبُو دَاودَ

Абу Ҳурайра розияллоҳу анҳудан ривоят қилинади: “Набий (соллаллоҳу алайҳи ва саллам): “Рўза қалқондир. Қачон бирортангиз рўзадор бўлса ёмон гап гапирмасин, жоҳиллик қилмасин. Агар бирор киши у билан урушса ё уни ҳақорат қилса: “Мен рўзадорман, мен рўзадорман”, десин”, дедилар” (Имом Абу Довуд ривояти).

Ҳадиси шарифдаги “қалқон” дея таржима қилинган “жуннатун” калимаси луғатда “тўсувчи”, “ҳимоя этувчи” каби маъноларни англатади. Шунга кўра, уламолар ушбу калимадан қандай маъно кўзлангани ҳақида қуйидагиларни айтишган:

- Рўза, гуноҳ маъсиятлардан ҳимоя қилувчидир. Чунки у туфайли рўзадор танасидаги шайтон юрадиган йўллар бўлган таом ва қон йўллари тораяди. Ана шу эътибордан рўза уни гуноҳлардан ҳимоя қилувчи бўлади.

- Рўза, дўзахдан тўсувчидир. Чунки имон ва савоб умидида тутилган рўза рўзадорнинг олдинги гуноҳлари мағфират қилинишига сабаб бўлади. Ана шу эътибордан у дўзахдан тўсувчи бўлади.

Пайғамбаримиз (соллаллоҳу алайҳи ва саллам) сўзларининг давомида рўзадорга “ёмон гап гапирмасин”, дея амр этганлар. Яъни, бировни ҳақоратлаш, биров устидан кулиш, лаънат айтиш ва фаҳш гапларни гапириш каби шариат ман қилган гаплардан қайтарганлар. Демак, рўзадор киши ҳалим бўлиши, ўзгалар билан уришиб тортишмаслиги, жаҳли чиққан вақтда ҳам ўзини қўлга ола билиши рўзанинг одобидир.

Пайғамбаримиз (соллаллоҳу алайҳи ва саллам) рўзадорнинг яна бир сифатини таъкидлаб “жоҳиллик қилмасин”, деганлар. Яъни, рўзадор шариатда ман қилинган нотўғри сўзларни гапирмасин ва хато ишлар қилмасин. Шунга кўра, рўзадор кишини биров уришиб ҳақорат қилган тақдирда ҳам: “мен рўзадорман, мен рўзадорман” дейиши ва унинг ҳақоратига “жавоб” қайтаришдан ўзини тийиб сабрли бўлиши лозим. 

Абдувоҳид ЎРОЗОВ,

«Мовароуннаҳр» нашриёти махсус мухбири, “Коҳ ота Бузрук” жоме масжиди имом ноиби

Тожикистон Республикаси президенти Эмомали Раҳмон Имом Аъзам Абу Ханифа ибн Собит номидаги Тожикистон ислом институтининг янги биносига тамал тошини қўйди. Бу ҳақда Тожикистон президенти матбуот хизмати хабар берди.

Янги илм масканида 1,5 минг нафар талаба таҳсил олиши мумкин. Уч гектар майдонни эгаллайдиган бино учун 136 миллион сомон (салкам 15 миллион доллар) ажратилган.

Муассасасининг асосий биноси 5 та етти қаватли блокдан — ўқув корпуслари, бино маъмурияти, ётоқхона, спорт зали, ошхона, кутубхона ва анжуманлар залидан иборат бўлиши айтилган.

Лойиҳанинг тақдимоти вақтида Эмомали Раҳмонга институт ётоқхонаси 1,5 минг кишига мўлжаллангани, ошхонада 490 та ўрин борлиги, анжуманлар залига 550 киши сиғиши ҳақида маълумот берилган.

Тожикистон Ислом институтига мамлакат президенти томонидан 2007 йилнинг 2 ноябрида асос солинган эди. Бунга қадар институт Имом ат-Термизий номи билан аталган. 2008 йилда эса унинг номи Тожикистон президенти фармонига асосан ўзгартирилган. Ҳозирда ушбу институт 1400 нафар талаба таҳсил оладиган Тожикистондаги ягона ислом олий таълим муассасаси ҳисобланади.

Бундан ташқари, олий ўқув маскани ҳудудида фавворали дам олиш маскани, усти ёпиқ ўриндиқлар, автотураргоҳ ва бошқа иншоотлар ҳам барпо этилиши кўзда тутилган.

Институтга кириш учун абитуриентлар форс-тожик тили ва адабиёти бўйича ёзма имтиҳон ҳамда тестлар топширадилар.

Ўқишга қабул қилишда форс ва араб ёзувини биладиганларга афзаллик берилади. Бироқ “илми Қуръон” бўлимига кирувчилар Қуръони Каримни ёддан билишлари керак бўлади.

Институтда ўқиш 3 босқичдан: бакалавриат, магистратура ва аспирантурадан иборат бўлади. Таълим муассасасида кундузги ва сиртқи ўқиш жорий қилинган.

ЎМИ Матбуот хизмати