Яқинда Ўзбекистон мусулмонлари идораси томонидан Android мобил телефонлари учун “Умра қўлланмаси” иловаси ишлаб чиқилгани ҳақида хабар берилган эди. Албатта, бундай қулайликдан iOS тизимидан фойдалаётган ақлли гаджет соҳиблари бебаҳра қолаётган эди. Эндиликда мазкур илова iOS дастурида ҳам ишлаб чиқилди. Бу эса барча смартфон, планшет эгаларига иловадан фойдаланиш имкониятини яратади.

Қайд этиш жоизки, “Умра қўлланмаси” иловасида Умра сафари давомида лозим бўладиган зарур барча маълумотлар тафсилотларигача қисқа, содда ва лўнда баён этилган. Унда “Умра қўлланмаси”, “Умра дуолари”, “Сафарга тайёргарлик” ва “Ислом тарихига оид жойлар” номли бўлимлари мавжуд.

“Умра қўлланмаси” бўлимида Умра ибодатига оид барча масалалар келтирилган: “умра” сўзининг маъносидан то унинг амаллари-ю суннатларигача. Шу билан бирга, зиёрат қилиш одоблари, муборак шаҳар ва масжидларнинг фазилатлари, муборак сафар тартиб-қоидалари каби бир қатор рукнларда зарур маълумотлар тақдим этилган.

Шунингдек, “Умра дуолари” бобида муборак сафарда муҳим бўлган дуолар батафсил баён этилган. Сафарга тайёргарлик кўришда, сафар давомида, муборак шаҳарга киришдаги дуолар, тавоф асносида, зам-зам суви ичганда, табаррук жойларда, ватанга қайтишда ўқиладиган дуолар каби элликдан ошиқ дуолар берилган. Яна бир муҳим жиҳат, бу бўлимда Набий соллаллоҳу алайҳи васаллам билан бир қаторда Абу Бакр ва Ҳазрати Умар розияллоҳу анҳумога салом бериш одоб ва тартиблари баён этилган. Бу дуоларни мукаммал билиш зиёрату ибодатларни тўла-тўкис бўлишига омил бўлади.

Мазкур боблардан яна бири Ислом тарихига оиддир. Бунда сафар давомида бориладиган муқаддас жойлар ҳақида қизиқ ва тарихий манбалар берилган. Уларни ўқиган киши муқаддас қадамжоларга оид кенг тушунчага эга бўлади.
Яна бир муҳим бўлим – сафарга тайёргарлик бўлимидир. Унда муборак сафарга чиқмоқчи бўлган ҳар бир кишига муҳим тавсиялар, ман этилган тартиб-қоидалар, зиёратчилар эътибор қаратиш лозим бўлган масалалар баён этилган.
Шунингдек, иловада бир қатор эслатма ва хизматлар бор. Жумладан, пандемия шароитида Саудия Арабистонидаги тартиблар, қайси вакциналар олиш зарурлиги ҳамда об-ҳаво маълумотлари бериб борилмоқда. Қолаверса, муқаддас сафарга энг сўнгги рейслар қачон учиши ва қайтиши ҳақида ҳам аниқ хабарлар жойланган. Бундай замонавий хизматлар муборак сафарга отланганлар учун қулайдир.

Қисқаси, илова билан танишган киши Умра зиёрати хусусида тўлиқ маълумотга эга бўлади. Бу эса муборак зиёратга олдиндан тайёргарлик кўриш ва уни мукаммал адо этишда ўта муҳим қадамдир.

https://apps.apple.com/uz/app/umra-qollanmasi/id1613020749 

Ўзбекистон мусулмонлари идораси матбуот хизмати

Ўзбекистон мусулмонлари идораси раиси, муфтий

Нуриддин домла ҳазратлари

Ўзбекистон Халқаро Ислом академияси талабалари Ўмонда ўтказилган миллий қадриятлар танловида икки йўналишдаги бош совринни қўлга киритишди.
Араб тилини мукаммал эгаллаш мақсадида Ўмонда бўлиб турган Ўзбекистон Халқаро Ислом академияси талабалари Манаҳ вилоятидаги Султон Қобус коллежида ташкил этилган миллий анъана ва қадриятларга бағишланган танловда иштирок этдилар, деб хабар бермоқда «Дунё» АА мухбири.
Маданий тадбирда, шунингдек, Болгария, Жанубий Корея, Чехия, Қозоғистон, Япониядан келган талабалар ўзларининг миллий қадриятларини намойиш этдилар.
Мамлакатимиз элчихонаси маълумотларига кўра, ўзбекистонлик талабалар танловнинг «Энг яхши безатилган стенд» ва «Энг яхши тайёрланган миллий таом» йўналишида ғолиб, деб топилиб, тадбирнинг асосий совринини қўлга киритишди.
Таъкидлаш жоизки, Султон Қобус коллежида ташкил этилган араб тилини мукаммал ўргатиш курсларида дунёнинг 55 мамлакатидан келган талабалар таҳсил олмоқда.
Ушбу қисқа муддатли курсларда араб тили замонавий ўқув дастурлари ва интерфаол услублар орқали чуқур ўргатилади.

Ўзбекистон мусулмонлари идораси матбуот хизмати

Қобилжон домла АСЛАНОВ
Боёвут тумани "Абдухолиқ Ғиждувоний" жоме масжиди имом-хатиби.

— Фолбинга борган одамнинг никоҳи бекор бўладими?

— Ибн Обидин раҳимаҳуллоҳ: “Ким: “Мен ўғирланган нарсаларни биламан ва жин менга хабар берган нарсаларнинг хабарини бераман” деса, кофир бўлади”, деган. (Роддул мухтор). Буларнинг қаторига ғайбдан башорат берувчи мунажжим ва кафт, тош ва бошқа нарсаларга қараб фол очувчилар ҳам киради.

1. Ким фолбин ғайбни билади деган эътиқодда унинг ҳузурига борса ва айтганини тасдиқ қилса, кофир бўлади ва аёли билан ораларидаги никоҳи бузилади. Абу Ҳурайра розияллоҳу анҳу ривоят қилган ҳадисда Расулуллоҳ соллаллоҳу алайҳи васаллам: “Ким келажакда бўладиган ишлардан ҳабар берувчининг ёки бўлиб ўтган ғайб ишлардан ҳабар беручининг ҳузурига борса ва унинг айтганларини тасдиқ қилса, батаҳқиқ Муҳаммадга нозил қилинган нарсага кофир бўлибди”, деганлар (Имоми Аҳмад ривояти).
2. Ким фолбинлар ғайбни билмайди, деган эътиқодда бўлатуриб, улардан бирор нарса сўрашга борса, ҳаром ишга қўл урган бўлади ва қирқ кунлик намози қабул бўлмайди. Расулуллоҳ соллаллоҳу алайҳи васаллам: “Ким фолбинга бориб ундан бирор нарса сўраса, қирқ кунлик намози қабул бўлмайди”, деганлар (Имом Муслим ривояти).

Муҳаммад Айюб ҲОМИДОВ