11 март куни Ўзбекистон мусулмонлари идораси раисининг Ёшлар ишлари бўйича ўринбосари Уйғун домла Ғафуров Термиз шаҳридаги Имом-Термизий ўрта махсус ислом билим юртига ташриф буюриб, талабалар билан очиқ мулоқот ўтказди.
Уйғун домла учрашувда тингловчиларга бугун диний соҳада бўлаётган ўзгаришлар ҳақида маъруза қилиб, диний таълим бўйича олиб борилаётган ислоҳотлар эътиборга молик эканини қайд этди. Шунингдек, бундай имкониялардан унумли фойдаланиш ҳар бир илм толибининг вазифаси эканини таъкидлаб, кўплаб тавсия ва маслаҳатлар берди.
Мазмунли маърузадан сўнг тадбир мулоқот тарзида кечиб, Уйғун домла тингловчиларнинг барча саволларига жавоб берди.
Шунингдек, тадбир сўнггида ислом билим юртининг фидойи ўқитувчи, ходимлари ва талабалари моддий рағбатлантирилди.
Хусусан, “Вақф” хайрия жамоат фонди Сурхондарё вилояти филиали томонидан ажратилган 17,5 миллион сўм моддий рағбатлар 2 нафар энг фаол ва жонкуяр ўқитувчига 5 миллион сўмдан, 2 нафар энг аълочи ва намунали талабага 3 миллион сўмдан ҳамда 1 нафар ходимага 1,5 миллион сўм тақдим этилди.

ЎМИ Матбуот хизмати

Кейинги йилларда Ўзбекистон мусулмонлари идораси раиси, муфтий Нуриддин домла ҳазратлари ташаббуси билан соҳа ходимларини рағбатлантириш, молиявий кўмак бериш ҳамда уларни ҳар томонлама қўллаб-қувватлаш борасида кўплаб саъй-ҳаракатлар олиб борилмоқда.

Албатта, бу эътибору эътироф бежиз эмас. Чунки айни дамда имом-хатибларимиз аҳолининг диний эҳтиёжларини қондириш баробарида уларнинг турли муаммоларини ҳал этиш, маҳаллаларда соғлом муҳитни шакллантириш, ёшларни соф ислом таълимотида улғайиши ва оилаларнинг тинч-тотувлигини таъминлашда ҳам муҳим роль ўйнамоқда.
Яқинда Ўзбекистон мусулмонлари идораси тизимида йиллар давомида фидойи меҳнат қилиб келаётган ана шундай бир қатор ходимлар эътироф этилиб, тақдирланди. Уларнинг 2022 йил давомидаги фаолияти идора томонидан муносиб баҳоланиб, қимматбаҳо совғалар улашилди.
Жумладан, Самарқанд вилояти бош имом-хатиби Зайниддин домла Эшонқулов, Хоразм вилояти бош имом-хатиби Хайруллоҳ домла Абдуллаев ва Қашқадарё вилояти “Хожа Бухорий” билим юрти мудири Ўткир домла Ғузоровларга музлатгич совға қилинди.

Навоий вилояти Томди тумани бош имоми Нурали домла Қўлдошев, Самарқанд вилояти Пахтачи тумани бош имоми Исроил домла Амириллаев, Тошкент ислом институти катта ўқитувчиси Фахриддин домла Маманосиров, Ҳадис илми мактаби устози Ойбек домла Ҳошимовларга кир ювиш машинаси ҳадя қилинди.
Тошкент шаҳри Олмазор тумани “Аҳмаджон қори” масжиди имом ноиби Ҳикматилла домла Абиев, “Вақф” фондининг Фарғона вилояти филиали раҳбари Бахтиёр Қирғизов ва “Шамсуддинхон Бобохонов” нашриёти муҳаррири Юлдуз Комиловаларга эса чангюткич туҳфа этилди.
Бундай эътироф ва эътибордан мамнун бўлган соҳа ходимлари идора раҳбарияти ва масъулларига ўз миннатдорлигини билдириб, хайрли дуолар қилдилар.

ЎМИ Матбуот хизмати

Ҳасан домла Қодиров

"Сирож-солиҳ" жоме масжиди имом-хатиби

Саудия Aрабистонининг Ислом, даъват ва иршод ишлари вазирлиги Мавританияда ҳар йили ўтказиладиган Қуръон ва Суннати набавия танловининг барча иштирокчиларига 300 000 га яқин Қуръон нусхаси тарқатилишини эълон қилди.
Мазкур мусобақа Саудия Aрабистони Ислом, даъват ва иршод ишлари вазирлиги ҳамда Мавритания Ислом ва таълим-тарбия ишлари вазирлиги, Қуръони каримни ёдлатиш хайрия марказлари ҳамкорлигида ўтказиб келинмоқда.
Ушбу 300 000 дона Қуръон китоби Мадинадаги Қирол Фаҳд мажмуаси томонидан чоп қилинган.
Китобларнинг маълум қисми шу йилнинг 10 март куни якунланган Қуръони карим ва суннати набавия мусобақаси иштирокчиларига тақдим қилинди. Китобларининг қолган қисми эса Мавританиядаги Қуръони каримни ёдлатиш бўйича фаолият олиб борувчи хайрия марказлари ва жамиятларида таҳсил олаётган талабаларга ҳадя этилади.
Ушбу Қуръони карим нусхаларининг 250 мингги Қуръони каримнинг Варш ривоятидаги Нофеъ қироати ва яна 50 минг нусхаси эса Қолун ривоятидаги Нофеъ қироатидан иборат. Ҳадя этилган бу Қуръони карим нусхалари мавританиялик қорияларнинг Нофеъ қироатида ўқишларини осонлаштиради.

ЎМИ Матбуот хизмати

Кеча, 11 март куни “Вақф” хайрия жамоат фонди Қорақалпоғистон Республикаси филиали томонидан Нукус Муҳаммад Ибн Аҳмад ал-Беруний ўрта махсус ислом билим юртининг ўқитувчи, техник-ходим ва талабалари ҳамда масжид имом-хатибларини моддий рағбатлантириш мақсадида хайрия тадбири ўтказилди.

Тадбир давомида фонд томонидан 2 нафар энг фаол ва жонкуяр ўқитувчига 5 миллион сўмдан жами 10 миллион сўм, 2 нафар энг аълочи ва намунали талабага 3 миллион сўмдан жами 6 миллион сўм, 4 нафар техник ходимларига 1,5 миллион сўмдан жами 6 миллион сўм ва олис ҳудудлардаги кам даромадли 12 та масжид имом-хатибларига 5 миллион сўмдан жами 60 миллион сўм, умумий ҳисобда 82 миллион сўм моддий рағбатлар ўз эгаларига тақдим этилганлиги ҳақида сертификатлар топширилди.

"Вақф" фонди Матбуот хизмати