Хушхабар

Айни кунларда коинот султони, оламлар сарвари, кўзимиз нури, қалбимиз сурури, бошимиз тожи Муҳаммад соллаллоҳу алайҳи ва салламнинг муборак таваллуд саналари – Рабиул аввал ойи бутун дунё бўйлаб кенг нишонланмоқда.

Ўзини мусулмон билган киши борки, Аллоҳ таолонинг «Албатта, Аллоҳ ва Унинг фаришталари Пайғамбарга салавот айтурлар. Эй мўминлар! (Сизлар ҳам) унга салавот ва салом айтингиз!» (Аҳзоб сураси, 56-оят) оятига мувофиқ, мавлуд ойининг ҳар сониясини ғанимат билиб, ҳабибимиз Муҳаммад соллаллоҳу алайҳи ва салламга салавот, салом ва дурудлар айтмоқда.

Бу ой бутун Ислом умматини бир сўз – “Аллоҳумма солли ъала саййидина Муҳаммадин ва ъала аалиҳи ва асҳабиҳи ажмаъин” – атрофида жипслаштирди. Чунки қалбида имони бор киши Набий алайҳиссаломнинг: «Ким менга бир марта салавот айтса, Аллоҳ таоло унга ўн марта салавот айтади» (Имом Муслим ривояти), деган сўзларини чуқур идрок этиб, унга оғишмай амал қилади ва бунинг натижасида улкан савобларни қўлга киритади.

Куни кеча Ўзбекистон мусулмонлари идораси раиси, муфтий Усмонхон Алимов ҳазратлари бошчилигидаги бир гуруҳ уламоларнинг “Сийрат оқшоми”даги маърузалари қалбларимизни сел қилган бўлса, бугун, муборак жума куни Ҳиндистоннинг Керала штатидаги “Сунний маданият маркази” ташаббуси билан ташкил этилган халқаро мавлуд анжумани онлайн тарзда эфирга узатилгани барчамизни хушнуд этди.

Энг қувонарлиси, бугунги халқаро мавлуд анжуманида бутун дунёдан қатнашган машҳур шайхлар, уламолар қаторида юртимизнинг таниқли уламоси, Саййид Раҳматуллоҳ Термизий домла таъсирчан маърузаси билан барча мусулмонларни лол қолдирди.

Шу билан бирга, устоз Раҳматуллоҳ домла Имом Бухорий, Имом Термизий, Имом Мотуридийдек забардаст уламоларнинг муносиб вориси эканини амалда исботлади.

Тошкент шаҳар Юнусобод тумани бош имом-хатиби, “Мирза Юсуф” жоме масжиди имом-хатиби Саййид Раҳматуллоҳ домланинг “Одамлар орасида унсу улфат ҳосил қилиш йўли ва бу борада Пайғамбаримиз соллаллоҳу алайҳи ва саллам таълимотлари” мавзусидаги араб тилида қилган маърузасини дунёнинг турли бурчакларидаги мусулмонлар катта иштиёқ билан тинглашди.

Бутун дунё бўйлаб кенг нишонланаётган муборак мавлуд ойи барчамизга муборак бўлсин. Аллоҳ таоло бу ой шарофатидан, ҳабибимиз Муҳаммад соллаллоҳу алайҳи ва салламнинг ҳурматларидан юртимизни тинч қилсин, жаҳондан, хусусан, юртимиздан коронавирус балосини даф этсин, омин!

Толибжон НИЗОМ

Дўстлари билан тортишганлар душманлари билан жанг қила олмаслар.

Салоҳиддин Айюбий

***

Ақлли одам доимо буюк кишилар синовидан ўтган йўлни танлаши ва   энг ажойиб шахсларга тақлид қилиши керак, чунки у мабодо ўша буюклик    даражасига кўтарила олмаган тақдирда ҳам ҳар нечук, оз бўлсада, унинг        ёғдусидан баҳраманд бўлади.

Н.Макиавелли

***

Aёл кишига энг ҳаққи кўп киши эрдир, эркак кишига энг ҳаққи кўп киши – онасидир.

Илм бир чироқдурким, сени роҳат ва фароғатга ҳеч бир захматсиз етказади.

Абу Лайс Самарқандий

***

Ўтган ҳар куним - дарс, учратган ҳар бир инсоним муаллимимдир.

Солиҳа аёл ота-онаси учун фахр, эри учун хазина, фарзандлари учун ибратдир.

Олимларнинг ишларига жоҳиллар аралашса аҳмоқлар сони ортади.

Обиднинг ибодати нафсини, одилнинг адолати оламни ислоҳ етар.

Араб халқ ҳикматларидан

***

Мол зиқналарнинг, қурол қўрқоқларнинг, раҳбарлик заифларнинг қўлига тушса, ишлар бузилади.

Абу Бакр Сиддиқ розияллоху анҳу

***

Умр ўтказишнинг иккита усули бор. Биринчиси, гўё ҳеч қандай мўжиза йўқдай яшаб ўтиш. Иккинчиси, ҳаётдаги ҳамма нарса мўжиза эканига ишониб яшаб ўтиш.

Aлберт Ейнштейн

***

Энг зўр қобилиятлар бекорчилик сабаб сўнади.

Мишел де Монтен

***

Одамни барбод қилиш учун кўп нарса шарт эмас, шунчаки у қилаётган иш ҳеч кимга керак эмаслигига уни ишонтириш лозим, холос.

Фёдор Достойевский

Манбалар асосида Саидаброр Умаров тайёрлади

Муҳаммад Айюб Ҳомидов

Тошкент ислом институти катта устози

وعن أنس رضي الله عنه قال : قال رسول الله صلى الله عليه و سلم :  لا يؤمن أحدكم حتى أكون أحب إليه من والده وولده والناس أجمعين                                     

Анас розияллоҳу анҳу айтадилар: Расулуллоҳ соллаллоҳу алайҳи васаллам дедилар: “Сизлардан бирортангизнинг иймони мен унга ота-онаси фарзанди ва барча инсонлардан ҳам кўра суюклироқ бўлмагунимга қадар комил бўлмайди.” Муттафақун алайҳ.

Ушбу ҳадиси шарифнинг ровийси Анас ибн Молик р.а.дирлар. У зотнинг кунялари Абу Ҳамзадир. “Ҳамза” сўзи бир ўсимликнинг номи бўлиб, Анас р.а. уни ҳуш кўрганлари туфайли шу ном билан аталганлар. У зот ўн йил давомида Пайғамбаримизнинг хизматларида бўладилар. Оналарининг исми Умму Сулайм р.а. Набий алайҳиссалом у кишининг ҳақларига тўрт дуони қилганлар: умрига, фарзандларига, ризқига барака ва гуноҳларнинг кечирилиши. Мана шу дуонинг баракаси ўлароқ у зот ҳаётлари давомида унинг ижобатини кўрадилар.

Ҳадиси шарифда Пайғамбар алайҳиссалом у зотнинг ўзларига уммат томонидан бўладиган муҳаббатни баён қилмоқдалар. Яъни, бирор кишининг иймони Набий алайҳиссаломга бутун борлиғи билан муҳаббат қўймагунига қадар комил бўлмайди. Ҳатто ўз ота-онаси, фарзандлари ва бошқа барча инсонларга бўлган муҳаббатдан устун бўлиши зарур. Ваҳоланки, муҳаббат қалбнинг иши бўлса, киши унга ўз ихтиёри билан молик бўлолмайди. Бу ўринда киши ўзини ўз ихтиёрида бўлмаган нарсага мажбурлаш лозим келмайдими, деган савол юзага келса, унга шундай жавоб берилади: муҳаббат аслида икки хил бўлади: табиий ва ақлий. Табиий муҳаббат инсоннинг ихтиёрисиз, ўзи ҳам билмаган ҳолда бир инсонга боғланиб, уни яхши кўриб қолишидир. Ақлий муҳаббат эса, бир инсоннинг камолоти ва етуклиги ҳақида тафаккур қилгандан сўнг ўша шахс ва зотга нисбатан қалбда муҳаббат пайдо бўлади. Бу худди аччиқ дорининг шифоси борлигини билиб, ўзи ихтиёр қилиб истеъмол қилишга ўхшайди. Шу сабабдан ҳам ҳадиси шарифда таржиҳ берилаётган муҳаббат бу – ақлий муҳаббат саналади.

Баъзи уламолар бу ердаги муҳаббат табиий муҳаббат дедилар. Чунки, муҳаббатнинг сабаблари топилган вақтда, ўз-ўзидан табиий муҳаббат юзага келиши мумкин. Демак, муҳаббат пайдо бўлишининг сабаблари ҳусн, саҳоват, комиллик экан. Бу сабаблар эса Расулуллоҳ соллаллоҳу алайҳи васалламда энг мукаммал даражада мавжуд эди. Аллома Дархос р.а. айтадиларки: “Пайғамбар алайҳиссаломнинг ҳуснлари бемисл бўлган ва у зотнинг гўзалликлари ёнларида ҳозир бўлган инсонларга ҳам акс берарди. Шу туфайли у зотни сўраб келган аъробийлар дарҳол у зотни таний олмаган.” У зотнинг саҳоватлари ҳам бениҳоя кенг бўлган. Билол р.а.га келган инсоннинг қўлини қуруқ қайтармасликка, қарз олиб бўлсада унга бирор нарса бериб жўнатишга амр қилганлар. Шу туфайли Пайғамбар алайҳиссаломда муҳаббатнинг барча сабаблари мукаммал тарзда топилиши туфайли табиий муҳаббат ҳам ҳосил бўлар экан.

Бошқа ривоятларда Умар р.а. Пайғамбар алайҳиссаломга бўлган муҳаббатлари ўз нафсларидан кейинги ўринда эканини айтганларида, у зот ҳатто ўз нафсига бўлган муҳаббатдан ҳам устун муҳаббатда бўлишларини айтадилар. Шундан кейин Умар р.а. ўз нафсларидан ҳам кўра Пайғамбаримиз Муҳаммад Мустафо соллаллоҳу алайҳи васалламга муҳаббатлироқ бўладилар. Бу ҳолат эса, нафақат Умар р.а. балки, бутун уммати Муҳаммадияга тегишли бўлган ишдир. 

Муҳаммадий қори Эргашев 

Aҳмаджон қори жоме масжиди имом-хатиби