muslim.uz
Мўминаларга ибрат мўминалар: “Аллоҳ бизга омонатга ўғил берган эди. Энди ўша омонатини қайтариб олди”
Умму Сулайм розиллоҳу анҳо Абу Талҳа розиллоҳу анҳу билан саодатли ҳаёт кечирди. Аллоҳ таоло уларни ширин бир ўғил билан сийлади. Абу Талҳа розиллоҳу анҳу ўғлига шу қадар меҳр қўйдики, уни ҳеч кимга ишонмас, ҳаётини суюкли фарзандисиз тасаввур этолмас эди...
Аллоҳ таоло маҳр бобида Умму Сулайм розиллоҳу анҳо сабабидан бир ибрат қолдиргани каби, муслима оналар учун унинг ҳаётида яна бир намуна бўлишини ирода қилди. Тўсатдан унинг гўдак ўғли касалликка чалинди. Бу ҳол Абу Талҳанинг фикру хаёлини машғул этди. У Расулуллоҳ соллаллоҳу алайҳи ва салламнинг ҳузурларига бориб-келиб турар, келган заҳоти ўғлининг аҳволини сўрар эди. Ана шундай кунларнинг бирида ўлим бу маъсум гўдакни уларнинг бағридан узиб олди.
Абу Талҳа розиллоҳу анҳу Набий соллаллоҳу алайҳи ва салламнинг ёнларида эди. Шўрлик она не қилсин? Кўзининг оқу қорасини, жигар порасини йўқотди! Ҳаммамиз биламизки, оналар бундай ҳолатда ўзларини йўқотадилар, дод-фарёд қиладилар, ёқаларини йиртадилар...
Умму Сулайм розиллоҳу анҳо бу ўринда ҳам Момо Ҳаво қизлари ичида мумтоз эканини кўрсатди. Аввал болани ювди, кафанлади, хушбўй нарсалар сепди, устига кийим ёпиб қўйди. Сўнг Анас розияллоҳу анҳуга боланинг вафоти ҳақида ҳеч нарса демасликни тайинлаб, Абу Талҳа розиллоҳу анҳуни чақириб келиш учун юборди.
Абу Талҳа розиллоҳу анҳу келиши билан ўғлининг аҳволини сўради. Умму Сулайм: “Ухлади. Худодан сўрайманки, шояд шу уйқуси роҳатли бўлса”, деб жавоб қилди.
Абу Талҳа хотинининг бу жавобидан: “Бола соғайиб қолибди”, деб гумон қилди. Ўша куни у рўза тугган эди. Ифторлик қилди.
Тун кирди. Шунда ҳам Умму Сулайм қалбидаги маҳзунликни билдирмади. Хушбўйланиб, зийнатланиб, эрининг ёнида бўлди. Тунни бирга ўтказишди...
Тонг отди. Эри масжидга отланар экан, Умму Сулайм секин гап бошлади:
— Абу Талҳа, агар бир кишидан омонат олинса, сўнг эгаси у нарсани сўраса, олганлар уни қайтармасликка ҳақлари борми? — деб сўради.
— Йўқ, омонат эгасига қайтарилади. Бермаймиз дейишларига ҳақлари йўқ.
Шунда Умму Сулайм мақсадга кўчди:
— Аллоҳ бизга омонатга ўғил берган эди. Энди ўша омонатини қайтариб олди...
Абу Талҳа:
– “Инна лиллаҳи ва инна илайҳи рожиъун” (Биз Аллоҳникимиз ва биз Унга қайтажакмиз), деди. Бошқа ҳеч сўз айта олмади. Чиқиб, Расулуллоҳ соллаллоҳу алайҳи ва салламнинг ҳузурларига борди. Намоз ўқиди. Сўнг кеча шом арафасида ўғли вафот этганини, бундан бехабар тунни хотини билан ўтказганини баён қилди. Ҳазрати Пайғамбаримиз соллаллоҳу алайҳи ва саллам шунда:
— Бу кечангизни Аллоҳ баракотли қилсин, — деб дуо қилдилар.
Расулуллоҳ соллаллоҳу алайҳи ва салламнинг дуоларига осмон эшиклари очилди. Суюкли фарзандларини йўқотган бу оилага Аллоҳ таоло Абдуллоҳ ибн Абу Талҳани берди. Абдуллоҳни эса, тўққизта фарзанд билан
сийлади. Ҳаммалари ҳофизи Куръон бўлишди. Айниқса, тўнғичи Исҳоқ ибн Абдуллоҳ йирик фақиҳ даражасига кўтарилди...
Ушбу ҳикоя муҳтарам оналаримизга, азиза опа-сингилларимизга дунё ва охират саодати сари ойдин йўлни кўрсатади, деб умид қиламиз. Зеро, Пайғамбаримиз соллаллаҳу алайҳи ва саллам:
“Аёлларнинг яхшиси – назар солсанг, хурсанд қиладиган, амр қилсанг, итоат этадиган ва ғойиб бўлсанг, сени ўз нафсида ва молингда муҳофаза қиладиганидир”.
Яна бир ҳадисда Пайғамбаримиз алайҳиссалом: “Агар аёл киши беш вақт намозини ўқиса, бир ой рўзасини тутса, фаржини сақласа ва эрига итоат қилса, унга: “Жаннатнинг қайси эшигидан хоҳласанг, киравер”, дейилади”, деганлар.
Манбалар асосида Саидаброр Умаров тайёрлади
Нишонга урилган гаплар: “Саодатга эришиш йўлларидан бири – сендан рози бўлиб турган онангнинг ихлос билан қилган дуосидир!”
Қуйида келтириладиган фикрлар, ҳикматлар сайтлардан ва ижтимоий тармоқлардаги турли саҳифалардан олиб таржима қилинган.
Эй Аллоҳ! Зикрингдан чалғиган онларимиз учун бизни кечиргин!
“Ховатир роқия журнали”
*****
Гўзал хотима топишнинг 4 та шарти бор:
- Ҳаром қилинган нарсалардан узоқлашиш.
- Фарз, вожиб ва суннат амалларни ўз вақтида адо этиш.
- Мустаҳаб, нафл амалларга эътиборли бўлиш.
- Аллоҳ таолодан гўзал хотима сўраб дуо қилиш ва У Зот ҳақида яхши гумонда бўлиш.
Шайх Муҳаммад Хайр Шаъъол ҳафизаҳуллоҳ
*****
Кўп либосларинг сенинг наздингда эскирган бўлиши мумкин. Аммо уни бирор кишига ҳадя қилсанг, у мазкур кийимни “Ҳайит куни киядиган либос” деб қабул қилади.
Али Тантовий раҳимаҳуллоҳ
*****
Ҳеч кимнинг шодлигини ўғирламанг.
Ҳеч кимнинг қалбига озор берманг.
Умр қисқа. Қабримизда бизни дуоибад эмас, дуоихайр қиладиган кишига муҳтож бўламиз.
“Ховатир роқия журнали”
*****
Саодатга эришиш йўлларидан бири – сендан рози бўлиб турган онангнинг ихлос билан қилган дуосидир!
“Ховатир роқия журнали”
Лаззатли нарсаларни татиб кўрдим. Офиятдан кўра лаззатлироқ нарсани топмадим.
Аччиқ нарсаларни ҳам татиб кўрдим. Одамларга муҳтож бўлишдан кўра аччиқроқ нарсани топмадим.
“Ховатир роқия журнали”
Интернет материалларидан тўплаб, таржима қилувчи
Нозимжон Иминжонов
Саҳарда “мактуб ёзинг”
Ризқларни тақсимловчи Аллоҳ таолодир. Ризқ борасида хотиржам бўл! У Зот ҳар бир бандасининг ризқини ёзиб қўйган, шу жумладан сенинг ризқингни ҳам. Ана шу ризқингни тўлиқ олмагунингча вафот этмайсан. Ўзинг яхши кўрган нарсаларни бошқаларнинг қўлида кўрганингда унинг ҳаққига барака тилаб дуо қилишга одатлан. Бу билан Набий соллаллоҳу алайҳи васалламнинг тавсияларига амал қилган бўласан. У зот соллаллоҳу алайҳи васаллам “Агар бирортангиз биродарида ёқтирган нарсасини кўриб қолса, унга барака тилаб дуо қилсин!” деганлар.
*****
Аллоҳга қуллик қилинмасдан, Уни танимасдан, неъматларини англамасдан, бутун борлиқни У яратганини билмасдан ўтказилган ҳаёт нақадар арзон, арзимас ҳаётдир.
Аллоҳни танимай ўтказилган ҳаёт маҳрумликдир.
Аллоҳ таолони танимасдан ўтказилган ҳаёт хорликдир.
Уни норози қиладиган тарздаги ҳаёт йўқотишдир.
*****
Аллоҳ таолонинг мададисиз ҳеч нарса қила олмайдиган, муҳтож, мискин инсоннинг барча ризққа кафил бўлган, неъматлар бериб турган, осмонлару ернинг хазиналари қўлида бўлган Зотга исён қилиши жуда жирканч, хунук ишдир. Аллоҳ таоло Қуръони Каримда шундай деб марҳамат қилган:
يَا أَيُّهَا النَّاسُ أَنتُمُ الْفُقَرَاء إِلَى اللَّهِ وَاللَّهُ هُوَ الْغَنِيُّ الْحَمِيدُ
“Эй одамлар! Сизлар Аллоҳга муҳтождирсиз. Аллоҳ эса, Ўзи беҳожат ва мақталган зотдир” (Фотир сураси, 15-оят)
*****
Яъқуб алайҳиссалом: “Албатта, мен дарду ҳасратимдан фақат Аллоҳнинг Ўзига шикоят қилмоқдаман” деганларида, Арҳамур роҳимийн бўлган Зотдан дарҳол ижобат келди. Сиз ҳам саҳар пайтида кўз ёшингизни сиёҳ қилиб, у билан юзингиз дафтарига “мактуб”ингизни “ёзиб”, уни Аллоҳ таолога юборинг ва ижобатини кутинг! Зеро, Аллоҳ таоло Қуръони Каримда шундай деб марҳамат қилган:
وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُواْ لِي وَلْيُؤْمِنُواْ بِي لَعَلَّهُمْ يَرْشُدُونَ
“Агар бандаларим сендан Мени сўрасалар, Мен, албатта, яқинман. Дуо қилгувчи дуо қилганда ижобат қиламан. Бас, Менга ҳам ижобат қилсинлар ва иймон келтирсинлар. Шоядки тўғри йўлни топсалар” (Бақара сураси, 186-оят)
Доктор Оиз Қарний саҳифаларидан Нозимжон Ҳошимжон тайёрлади
Абу Ҳанифа раҳматуллоҳи алайҳнинг насаблари ва илмий фаолиятлари
"Имоми Аъзам" туркум суҳбатлар (3-қисм). Салоҳиддин Абдуғаффор ўғли. Тошкент шаҳар Учтепа тумани Ҳазрати Али жоме масжиди имом-хатиби
Аудиомаъруза (tas-ix)
Муфтий ҳазрат Покистон уламоларини қабул қилди
Муборак қадамжоларни зиёрат қилиш, уламоларимиз билан суҳбат қуриш мақсадида юртимизда бир неча кундан буён меҳмон бўлиб турган Покистон Ислом Республикасининг бир гуруҳ тариқатчилар делегацияси Самарқанд шаҳрида ўтказилаётган халқаро анжуманда ҳам иштирок этмоқда.
Нуфузли анжуман доирасида Ўзбекистон мусулмонлари идораси раиси, муфтий Усмонхон Алимов ҳазратлари ушбу делегация раҳбари, Покистондаги нақшбандия тариқатининг етакчиси Шайх Муҳаммад Нақибур-Роҳман Нақшбандий ҳазратлари билан мулоқот ўтказдилар.
Самимий суҳбат давомида Шайх Муҳаммад Нақибур-Роҳман Нақшбандий ҳазратлари юртимиз ҳақидаги таассуролари билан ўртоқлашди: “Ўзбекистон заминида турганимиздан ниҳоятда мамнунмиз. Жаҳоннинг кўплаб мамлакатларида бўлганмиз. Аммо юртингизга илк ташрифимиз эди. Файзли заминга илгарироқ келмаганимиздан таассуфдамиз. Бу ерда муборак қадамжоларни зиёрат қилиб, ўзгача шукуҳ ва сокинликолдик”.
Муфтий ҳазрат меҳмонларга сафарлари хайрли ва баракали бўлишини, зиёратлари манфаатли бўлишини тиладилар.
Ўзбекистон мусулмонлари идораси матбуот хизмати
Видеолавҳалар
