muslim.uz
Иймон
آمنت بالله و ملائكته وكتبه ورسله واليوم الأخر والقدر خيره وشره
من الله تعالى والبعث بعد الموت
Яъни: “Мен иймон келтирдим - Аллоҳ таолога, Унинг фаришталарига, Китобларига, Пайғамбарларига, Охират кунига, тақдирнинг яхши ва ёмонлиги Аллоҳ таолодан эканига ҳамда ўлгандан сўнг қайта тирилмоқликка”
- Аллоҳ таолога иймон. Аллоҳ таоло ёлғиздир, якка-ягонадир. Тенгдоши йўқдир, ҳеч нарсага ўхшамас. Айбу нуқсонлардан покдир. Ҳеч ким унга тенг келмас. Унинг сурати, шакли йўқдир. Аллоҳ таоло ухламайди, ҳаттоки мудрамайди. Еру осмонни олти кунда яратган. Қуръони каримда келган 99 исми сифати ҳақдир. Қиёмат кунининг Молики (эгаси)дир. Фақат Унгагина ибодат қилинади ва фақат Ундангина ёрдам сўралади. Аллоҳ таоло қиёмат кунида ўз адолат тарозуси билан амалларимизни ўлчайди, шунга мувофиқ жазо ва мукофот беради. Аллоҳ таоло Жаннатни ва Дўзахни яратган. Уларнинг борлиги ҳақдир. Аллоҳ таоло инсу жинни Ўзига ибодат қилиш учун яратган. Бизларни қайси биримизнинг амалларимиз яхшироқ бўлишини имтиҳон қилиш учун Аллоҳ таоло ўлим ва тирикликни яратди. Аллоҳ таоло Азизу меҳрибон Зотдир. Аллоҳ таоло барча нарсани билади, У ҳамма нарсага қодирдир.
- Фаришталарга иймон. Аллоҳ таоло фаришталарни нурдан яратган. Улар фақатгина Аллоҳ таолога ибодат қиладилар. Гуноҳ қилмайдилар. Ўзларига буюрилган вазифаларни адо этадилар. Уларда эру хотинлик йўқ, ейиш ва ичиш йўқ, улар доимо ибодатдадирлар. Улар куфр ва гуноҳлардан покдирлар. Ичларида улуғ бўлганлари: ҳазрат Жаброил, ҳазрат Микоил, ҳазрат Исрофил ва ҳазрат Азроил алайҳимуссаломлардир. Жаброил алайҳиссалломга пайғамбарларга ваҳий етказиш вазифаси, Микоил алайҳиссаломга Аллоҳ таоло берган ризқ насибаларни тасарруф қилиш вазифаси, Исрофил алайҳиссаломга қиёматдан хабар берувчи сурни чалиш вазифаси, Азроил алайҳиссаломга жонларни қабз қилиш вазифаси юклатилган. Шунингдек, қабрга кирганимизда савол-жавоб қиладиган Мункар ва Накир исмли фаришталарга ҳам иймон келтирамиз.
- Илоҳий китобларга иймон. Бизлар Аллоҳ таоло ҳақ динини ўргатиш учун пайғамбарларга нозил қилган китобларига иймон келтирганмиз. Аллоҳ таолонинг барча китоблари Унинг каломи (сўзи) ва ваҳийсидир. Аллоҳ таоло томонидан нозил этилган китобларнинг энг машҳурлари Забур (Довуд алайҳиссаломга), Таврот (Мусо алайҳиссаломга), Инжил (Ийсо алайҳиссаломга) ва Қуръони карим бизларнинг пайғамбаримиз Муҳаммад алайҳиссаломга нозил этилган. Қуръони карим келгандан сўнг барча ўтган пайғамбарларга нозил бўлган китоблар ҳукми бекор бўлди. Қуръон карим ҳукмлари то қиёматга қадар ўзгармайди, бир ҳарф ҳам қўшилмайди, бир ҳарф олишга ҳеч кимнинг кучи етмайди. То қиёматгача умматлар қалбида сақланади, уни ўқиш ибодат ҳисобланади. Қуръони каримнинг энг буюк мўъжизаси - уни тиловат қилувчини қиёматда шафоат қилишидир.
- Пайғамбарларга иймон. Пайғамбарлар Аллоҳ таолонинг элчиларидир. Улар инсонлар орасидан танлаб олингандирлар. Пайғамбарлар маъсумдирлар. Уларнинг барчалари Одам наслидандир. Уларнинг барчалари бир динда – Ислом динидадирлар. Пайғамбарлар иккига бўлинадилар – набий ва расул. Расул деб бир динни олиб келиб, шунгагина даъват қилган ва унга шариат ҳамда китоб берилганларга айтилади. Набий эса, ўтган пайғамбарларнинг шариатларини давом эттирувчидир. Расул – ҳам расул, ҳам набий бўлади. Набий эса расул бўла олмайди. Қуръони каримда 25 пайғамбарнинг номлари зикр қилиниб, улар ҳақида қилиб ўтган ишлари хабарлари келган. Улардан аввалгиси Одам алайҳиссалом ва сўнггилари Муҳаммад алайҳиссаломдирлар. Нуҳ алайҳиссалом, Иброҳим алайҳиссалом, Мусо алайҳиссалом, Ийсо алайҳиссалом ва пайғамбаримиз Муҳаммад соллаллоҳу алайҳи васалламлар “улул-азм” пайғамбарлар дейилади. Одам алайҳиссалом билан Муҳаммад алайҳиссалом орасида қанча пайғамбар ўтган бўлса барчасига иймон келтирганмиз.
- Охират кунига иймон. Биз яшаб турган бу дунё тугаб, охират келиши ҳақдир. Охират кунида ҳамма қилган ишларимиз ҳақида ҳисоб берамиз. Бу дунё абадий яшайдиган охират дунёсининг бошланишидир. Охиратга иймон келтирмаслик – Аллоҳ таолодан қўрқмасликка, ўз нафсининг туганмас орзу ҳавасларига, шайтоннинг алдовларига берилиб, қиёматда афсус-надоматда қолишига сабаб бўлади. Ундай кишилар яшашдан мақсади нима эканлигини билмай, ғанимат берилган умрини бекорга совуриб ўтказиб юборадилар. Охират кунига ишонч – қиёматда бўладиган ҳисоб-китоб қилинишга ишончдир. Дўзах ва жаннат борлигига ишончдир. У кун савоб ва гуноҳларга бериладиган жазо кунидир. Охиратга ишонч – қайта тирилишга ишончдир. Охиратга ишонган инсон доимо яхши ишлар қилишга, заррадек яхшилик ва заррадек ёмонликнинг жавобини охиратда кўришига ишонади. Охиратда ҳисоб-китобдан сўнг, Аллоҳ таолонинг мўминларга Ўз зотига муносиб кайфиятсиз равишда кўриниши эса энг улкан бахтдир. Аллоҳ таоло барча мўминларга шу бахтни насиб қилсин (омийн).
- Тақдир (қадар)га иймон. Тақдирга иймон келтирмоқ – инсоннинг яхши ва ёмон қадарини Аллоҳ таолодан деб билишидир. Мўмин банда синов учун берилган мусибатларга сабрли, яхшиликларга шукрли бўлади. Ҳар икки ҳолатда ҳам Аллоҳ таолони ёд этади. Уни устида юргизилаётган ҳукмларни Аллоҳ таолодан эканини билади. Инсон ҳаётда ё бахтли ёки бахтсиз бўлиши мумкин. Бу яшаб турган дунёдаги “Бахт” ва “Бахтсизлик” нисбий тушунчадир. Мусулмон киши бахтсиз бўлмайди. Унинг мусулмон бўлиб яшаётганининг ўзи – унинг бахтидир. Қиёматда номаи аъмоли ўнг тарафидан берилганда бўладиган бахт – мўминнинг ҳақиқий бахтидир. Шундай бахт ҳаммамизга насиб қилсин. (омийн).
- Ўлгандан сўнг қайта тирилишга иймон. Ҳар бир жони бор нафс бир кун ўлади. Ўлгандан сўнг қайта тирилишга иймон қиёмат кунига иймон келтиришнинг бир қисмидир. Ўлим – инсоннинг бу дунёдан кетиб, охират ҳаётининг бошланишидир. Мўмин киши ўлгандан сўнг қабрга киришига, қабрда икки фариштанинг саволларига жавоб беришига ҳамда қабр азоби ёки унда ҳузур бўлишига чин дилдан ишонади. Бу ишонч мўмин банданинг ёмонликлардан қайтишга, савоб амалларни кўпроқ қилишга ундайди. Инсон ўлиши билан охират ҳаёти бошланади. Бу дунё бир кун тугайди, охират эса абадий яшаладиган диёрдир.
Зарифа Маҳкам қизи тайёрлади
Ажойиб пандлар
Аллоҳ таолонинг наздида қўшниларнинг энг яхшиси қўшнисига яхшилик қиладиганидир.
*****
Жоҳилликнинг энг катта тури – жоҳил ўзининг жоҳиллигини билмаслигидир.
*****
Одамлар олтиндан айб топа олмадилар-да, кейин “Ялтираши кўзларни чарчатар экан” дедилар.
*****
Муҳаббат масаласи атом бомба ишлаб чиқариш каби осон эмас.
*****
Сабр секин юрадиган улов, аммо у эгасини истаган жойига олиб боради.
*****
Яхшилик қил! Чунки у йўқлигингда ҳам, вафот этганингдан кейин ҳам ўчмайдиган нарсадир.
*****
Туз билан шакарнинг рангида фарқ йўқ. Иккиси ҳам оқ. Лекин синаб кўрганингдан сўнг уларнинг орасидаги фарқни сезасан. Инсонларнинг қандайлигини ҳам синаб кўргач биласан.
*****
Молнинг баракаси унинг закоти адо этилиши билан бўлади.
*****
Кимнинг тили ширин бўлса, дўстлари кўпаяди.
*****
Жуда ҳам бўш инсон бўлма, акс ҳолда эзилиб кетасан. Жуда ҳам қаттиқ инсон бўлма, акс ҳолда синиб кетасан.
*****
Дунё жуда арзондир. У бойнинг ҳам, фақирнинг ҳам, подшоҳнинг ҳам, гадойнинг ҳам қўлида бўлиши мумкин. Жаннат эса жуда қимматдир. Унга фақат иймон келтириб, солиҳ амал қилганларгина эришадилар.
*****
Ким жаннатга муштоқ бўлса, солиҳ амалларга ҳарис бўлади.
*****
Йиқилишдан тўсишинг йиқилгандан сўнг туришга ёрдамлашишингдан афзалдир.
*****
Оғзи берк балиқни бирор киши овлай олмайди. Сен ҳам оғзингни ёп (кам гапир). Чунки кўплаб кимсалар сенинг хатоларингни овлаш илинжида юрган бўлиши мумкин.
mawdoo3.com сайтидан Нозимжон Иминжонов таржимаси
Ўзини эмас гуноҳини ёмон кўраман…
Ижтимоий тармоқларни кузатар экансиз, мусулмонларнинг ачинарли ҳолини кўриб ич-ичингиз эзилиб кетади. Қаерга қараманг, арзимас айб билан бир-бирига қора чаплаган, обрўсини тўккан, сирини ошкор этган, кимнингдир устидан кимгадир ёки қаергадир арз қилган ва ҳоказо мусулмончиликка мутлақо зид иллатлар. Пайғамбаримиз соллаллоҳу алайҳи ва саллам бир ҳадисларида шундай деган эканлар: “Мўминлар ўзаро муҳаббат, раҳм-шафқат ва меҳрибонликда мисоли бир жасаддир! Жасаднинг бир аъзоси дарддан шикоят қилса бошқа аъзолар ҳам уйқусизлик ва иситма билан унга қўшилиб кетишадику…”
Боши ёрилган одамнинг боши эмас кўзи ёш тўкади! Юзга йўналган муштга қўл қарши чиқади! Кўзга сочилган қумга киприк қалқон бўлади! Мусулмонлар ҳам худди шундай бўлиши керак. Бир-бирини ҳамиша асраб авайлаб, дардига шерик бўлиши керак.
Саҳобалардан Абу Дардо розияллоҳу анҳу Мадина даврида Бадр жангидан кейин Исломга кирган бўлсада, қисқа фурсат ичида Расулуллоҳ соллаллоҳу алайҳи васалламдан жуда кўп нарса ўрганади. Умар ибн Хаттоб розияллоҳу анҳу халифалик даврида Абу Дардо розияллоҳу анҳуни Дамашққа таълим ишларига бошлиқ қилиб юборади. Мадиналик Абу Дардо розияллоҳу анҳу Дамашқ кўчаларида айланиб юраркан, тўпланиб турган бир тўда одамларни кўрди. Қараса бир жиноятчини ушлаб олиб ҳар томондан уриб, сўкиб, тепиб азоб беришяпти. Абу Дардо розияллоҳу анҳу: Нима гап? –деди. Оломон ҳалиги одамнинг қилган гуноҳини айтдида яна уни жазолашда давом этди. Абу Дардо розияллоҳу анҳу уларни тўхтатди ва уларга қараб: “Агар шу одам қудуққа тушиб кетса, чиқариб олармидингиз ёки устидан сув қуйиб чўктирармидингиз?” – деди. Одамлар: “Чиқариб олардик, нега сўраяпсиз?” — дейишди. Абу Дардо: “Ундай бўлса буни ҳам уриб сўкишни бас қилинглар. Балки унга насиҳат қилинглар, хатосини англашига кўмаклашинглар. Унинг ўрнига сизларни тушириб қўймаган Аллоҳга ҳамд айтинглар” — деди. Оломон: “Эй Абу Дардо, сиз бу одамни ёмон кўрмайсизми?”— деб таажжубланди. Шунда Абу Дардо розияллоҳу анҳу: “Мен унинг ўзини эмас, қилган гуноҳини ёмон кўраман. Агар тавба қилса, у менинг биродаримдир!”— деди.
Бу гап ўша ерда турган барчага сабоқ бўлди. Ундан тегишли хулосани эса биринчи бўлиб ҳалиги жиноятчи чиқарди. Дарҳол тавба қилиб, қилмишидан афсусда эканини ошкор айтди. Азизлар, мана айбдорни йўлга солишнинг энг осон йўли. Айбдорни уриб сўкишдан, камситиб таҳқирлашдан асло фойда йўқ. Биз қачонки бир тану бир жон бўлсак, яқинларимизнинг дардига шерик бўлсак, хато ва камчиликларни биргалашиб бартараф этиш ҳақида бош қотирсак нур устига нур бўлади.
Фурқат ФАЙЗУЛЛАЕВ
Сирдарё вилояти Сардоба тумани
«Янги қишлоқ» жоме масжиди имом-хатиби
Ўзбекистоннинг биринчи президентини хотиралаб
Малайзиялик дастурчилар “ҳалол” браузерни ишлаб чиқди
Малайзиялик дастурчилар томонидан ишлаб чиқилган “Ҳалол” браузери орқали сайтлардаги контентни фильтр қилиш имконияти пайдо бўлди. Ушбу браузернинг SalamWeb номли иловасида исломий одоб-ахлоққа тўғри келмайдиган, турли ҳақоратли контентларни блоклаш учун бир қанча фильтр қилиш воситалари мавжуд. Мисол учун, браузер фаҳш тарғиб қилувчи ва қимор уйинларига ихтисослашган сайтларни умуман кўрсатмайди.
“Bloomberg”нинг хабар беришича, браузер намоз вақтларини ҳам кўрсатиб туради. Ҳозирда янги илова, асосан Малайзия ва Индонезия мамлакатларида истиқомат қилувчи мусулмонларга мўлжалланган. Бироқ компания яқин келажакда иловасини дунёнинг 10 фоиз мусулмонлари орасида тарқатишни режалаштирган. Бу ҳақда Ислом.уз сайти хабар берди.
“Биз интернетни яхшироқ қилишни истаймиз. У яхши ва ёмон қисмларга бўлинади. Бизнинг браузеримиз эса фақат яхши интернет учун ойна очиб беради”, дейди Salam Web Technologies вакили Ҳасни Зарина.
Ўзбекистон мусулмонлари идораси Матбуот хизмати
Видеолавҳалар
