muslim.uz
Беш ойлик сабрдан сўнг... Шайх Зайниддин» жоме масжидида жума намози
Масжидларда беш ойдан сўнг жума намози адо этилди
Аллоҳ таоло жума кунини мусулмонлар учун фазилатларга бой байрам куни қилиб берган. Жума - кунларнинг саййиди, камбағаллар ҳажидир. “Жума” сўзининг маъноси “жамлаш” маъносини англатиб, бу кунда мусулмонлар жамланиб, Жума намозини ўқишларини истефода этади. Бироқ бу уммат бошига келган синов туфайли “жума”сиз ўтган жумаларни кўрди.
Бутун дунёга катта хавф солиб турган пандемия сабабли жамоат намозлари адо этилмаётган вақтда ҳар жумага етганимизда қалбларимиздаги маҳзунлик икка карра ошиб, энтикар эдик. “Илоҳимиз, бу балоларни бизлардан тезроқ кўтариб, масжидларда жамоат намозлари, жума, ҳайит ибодати қувончларига яна етказгин”, дея илтижолар қилар эдик. Алҳамдулиллаҳ, бугун дуолар аста-секин мустажоб бўлиб, Роббимизнинг раҳмат онларига яна етдик. Бугун юртимиздаги 1960 та жоме масжидда белгиланган карантин талаблари асосида 5 ой (24 ҳафта) дан буён илк бор жума намози қалбларда соғинч ва ҳаяжон ила адо этилди. Мавъизалар қилинди, хутбалар ўқилди.
Масжидларимиздан жамоат файзи энди ҳеч қачон узилмасин. Аллоҳ таоло бутун дунёга, тинчлик, саломатлик неъматини бардавом қилиб берсин.
Ўзбекистон мусулмонлари идораси
Масжидлар бўлими
Расмий муносабат: “Шарли Эбдо”даги карикатура бўйича
Шу йил 2 сентябрь куни Париж шаҳрида 2015 йилнинг 7 январида “Шарли Эбдо” журнали таҳририятига уюштирилган ҳужумга алоқадорликда айбланаётган 14 киши устидан суд иши бошланди. Шу муносабат билан мазкур журнал таҳририяти Пайғамбаримиз Муҳаммад алайҳиссаломга оид карикатурани қайтадан босиб чиқарди.
Ушбу карикатура чоп этилиши мусулмон оламида турли эътироз ва норозиликларга сабаб бўлмоқда. Жумладан, Мисрдаги Ал-Азҳар университети ушбу карикатурани чоп этгани учун “Шарли Эбдо” таҳририятини қоралаб баёнот билан чиқди. Баёнотда бундай карикатураларни атайин қайтадан чоп этиш мўмин-мусулмонларнинг ҳиссиётларини қўзғаш, фитна чиқариш ва мусулмонларнинг диний қадриятлари, тимсолларига нисбатан тажовуз экани айтилади ҳамда бу ҳолат мусулмонлар томонидан қаттиқ қораланиши билдирилади.
Шу ўринда, Ўзбекистон мусулмонлари идораси ушбу хатти-ҳаракатни қоралаб, Пайғамбаримиз соллаллоҳу алайҳи ва салламни обрўсизлантиришга қаратилган ҳолатни халқлар ўртасидаги ўзаро тотувликни бузишга қаратилган фитна, ўз навбатида, одамларнинг диний эътиқоди билан боғлиқ ҳис-туйғуларини ҳақоратлаш, диний қадриятларни оёқ ости қилиш, миллатлараро ва динлараро адоват уйғотиш, деб баҳолайди.
Шуни таъкидлаш зарурки, ким бўлишидан қатъий назар Расулуллоҳ соллаллоҳу алайҳи васалламни ҳар қанча камситишга уринмасин, бу иши билан муборак динимизга ёки У зотнинг сийратларига заррача ҳам зиён етказа олмайди. Ислом тарихидан кўриш мумкинки, Пайғамбаримиз соллаллоҳу алайҳи ва саллам ўзларига ҳатто суиқасд қилишга интилган Ҳаким ибн Ҳизомни бағрикенглик ила кечириб юборганлар. Суюкли амакилари бўлган Ҳамза ибн Абдулмутталибни ўлдирган Ваҳшийни бир умр қалбларида қайғули хотира сифатида муҳрланган бўлишига қарамай, уни афв қилганлар. Булар шубҳасиз, Қуръони каримдаги: “Афвни (қабул қилиб) олинг, яхшиликка буюринг! Жоҳиллардан юз ўгиринг!” (Аъроф, 199) кўрсатмасининг амалдаги исботидир.
Шундай экан, бундай ҳаракатларга нисбатан тажовузкорона эмас, балки Набий алайҳиссаломга хос ҳалимлик, босиқлик ва зукколик билан муносабат билдириш керак. Шунда ёмон ниятли кимсалар томонидан халқлар, миллатлар, динлар ўртасига низо уруғини сочиш мақсадида уюштирилаётган ҳар хил кўринишдаги фитналар, турли найрангларга Пайғамбаримиз алайҳиссаломга хос ва мос йўл тутган бўламиз.
Ўзбекистон мусулмонлари идораси
Навоий вилоятида 5 та объект ЮНEСКО Бутунжаҳон мероси рўйхатига киритилади
Ўзбекистон Республикаси Президентининг 2019 йил 12-13 март кунлари Навоий вилоятига ташрифи чоғида Буюк ипак йўлининг Зарафшон —Қорақум қисмида жойлашган «Қосим-Шайх», «Мирсаид Баҳром», «Работи-Малик», «Сардоба», «Мавлоно Ориф Деггароний» маданий мерос объектларини ЮНEСКОнинг Бутунжаҳон маданий мероси ёдгорликлари рўйхатига киритиш топшириғи берилганди. Мазкур вазифалар ижросини таъминлаш мақсадида, юқорида номи кўрсатиб ўтилган тарихий ёдгорликларни, ЮНEСКО рўйхатига киритиш бўйича 2019 йил 20 май куни вилоят Туризмни ривожлантириш ҳудудий бошқармаси ва Ўрта Осиё Халқаро тадқиқотлар институти (IICAI) ўртасида лойиҳанинг умумий қиймати 1100,0 млн сўмлик икки томонлама шартнома имзоланди. Шартнома шартларига мувофиқ ишлар уч босқичда амалга оширилиши белгиланган. Биринчи босқич бўйича Ўрта Осиё Халқаро тадқиқотлар институти малакали мутахассислари ва хорижий экспертлари иштирокида мазкур тарихий объектларнинг қўриқлаш, муҳофаза қилиш чегаралари аниқ белгилаб олиниб, хулосалари тақдим қилинди. Бу ҳақда Туризмни ривожлантириш давлат қўмитаси хабар берди. Ўрта Осиё Халқаро тадқиқотлар институти томонидан иккинчи ва якуний босқич ишлари, яъни маданий мерос объектларининг илмий ҳужжатларини жаҳон мероси рўйхатига киритиш учун тайёрлаш, ҳар бир объектнинг ҳолатини ўрганиб чиққан ҳолда номинация матнини ёзиш учун дастлабки маълумотларни тўплаш ва умумлаштириш, объектларнинг хусусиятлари, объект тавсифи, тарихий ривожланиш чизиғи, Бутунжаҳон меросини муҳофаза қилиш Конвенциясига мувофиқ қўлланма формати ва мазмунига асосланган трансчегаравий номинация лойиҳасини ЮНEСКО жаҳон мероси рўйхатига киритиш мақсадида маданий мерос объектларининг илмий ҳужжатларини тайёрлаш ишлари учун бугунги кунда тегишли ишлар амалга оширилмоқда. Натижада маданий мерос объектларини муҳофаза қилибгина қолмасдан Навоий вилоятининг туристик имиджи яратилиб ҳудудларнинг мавжуд инфратузилмасини ривожлантириш, туризм соҳасида инвестицион лойиҳаларни амалга ошириш, янги иш ўринларини яратиш, соҳасидаги кадрлар малакасини ошириш, вилоятнинг туристик салоҳиятини ошириш имконияти пайдо бўлади.
Ўзбекистон мусулмонлари идораси Матбуот хизмати
Жума намози онлайн узатилади
Бугун, 4 сентябрь куни Muslim TV жамоаси томонидан Тошкент шаҳри “Имом Термизий” жоме масжидидаги жума намози, мавъизаси интернет ва ижтимоий тармоқлар орқали узатилади. Айни дамда мўмин-мусулмонларимиз жомеларга жума намозини адо этиш учун ошиқишмоқда, имом-домлаларнинг файзли суҳбатлари ва хушовоз қориларнинг тиловатлари ила интиқиб кутилган беш ойдан кейинги илк жума намозини жамоат бўлиб ўқиш саодатидан бахраманд бўлишади. 24 ҳафталик тўхталишдан сўнг мўмин-мусулмонлар муборак жума ибодатини яна адо этиш бахтига яна муяссар бўлаётганлари учун Аллоҳ таолога чексиз ҳамдлар айтмоқдалар. Барча жомеларда белгиланган карантин қоидалари асосида жамоатни қабул қилишга тайёргарлик ишлари олиб борилди. Биноларни тозалаш, дезинфекция ишлари, ижтимоий масофа сақлаш учун махсус белгилар ва бошқа зарурий чоралар кўрилди. Тошкент шаҳри “Имом Термизий” жоме масжидидаги жума намози ва мавъизасини қуйидаги линклар орқали тўғридан-тўғри кузатишингиз мумкин.
Ўзбекистон мусулмонлари идораси Матбуот хизмати
Янгиликлар
