muslim.uz
Ўзбекистоннинг муборак масканлари Озарбайжон ОАВлари эътиборида
Бокуда Озарбайжон туризм-блогерлари уюшмаси вакиллари учун Ўзбекистоннинг сайёҳлик салоҳияти бўйича тақдимот ташкил этилди, деб хабар бермоқда «Дунё» АА.
Тадбир мамлакатимиз элчихонаси кўмагида ўтказилди. Тақдимот доирасида Ўзбекистоннинг сайёҳлик салоҳияти, мамлакатимиз ҳудудида 7 мингдан зиёд қадимий ва ўрта аср меъморчилиги ёдгорликлари, ЮНЕСКОнинг Жаҳон маданий мероси рўйхатига киритилган шаҳар ва объектлари ҳақида батафсил маълумотлар берилди.
Бундан ташқари, сўнгги йилларда дам олиш, спорт, зиёрат, соғломлаштириш ва туризмнинг бошқа турлари учун яратилган имкониятлар ҳақида маълумот берилди.
Тақдимотда Имом Бухорий ёдгорлик мажмуаси (Самарқанд), етти пир қадамжолари (Бухоро) ва бошқа муқаддас гўшалари мусулмон мамлакатлари, жумладан, Жануби-Шарқий Осиё давлатларидан келган зиёратчилар ўртасида машҳур эканлиги таъкидланди.
Тадбирда Жаҳон сайёҳлик ташкилоти (ЮНВТО) Бош Ассамблеясининг 25-сессияси 2023 йилда Самарқанд шаҳрида бўлиб ўтиши маълум қилинди. Ҳозирги кунда Самарқандни дунёнинг етакчи сайёҳлик марказларидан бирига айлантириш бўйича тизимли ишлар олиб борилаётгани ҳақида сўзлаб берилди.
Анжуман якунида май ойининг биринчи ўн кунлигида туризм соҳасини ёритувчи блогерлар кўмагида Ўзбекистоннинг сайёҳлик салоҳиятига бағишланган навбатдаги тақдимотни кенгроқ аудитория учун ўтказиш, шунингдек, Ўзбекистонни Озарбайжон жамоатчилиги орасида кенг тарғиб қилиш учун турли викторина ва танловлар ўтказиш тўғрисида келишувга эришилди.
Ўзбекистон мусулмонлари идораси Матбуот хизмати
Тула шаҳридаги “Нур” масжидида ватандошларга маърифат улашилди
Хабар берганимиздек, айни кунларда Ўзбекистон мусулмонлари идораси раиси ўринбосари Иброҳимжон домла Иномов Ўзбекистон делегацияси таркибида Россия Федерациясида бўлиб турибди.
Кеча, 19 апрел куни Иброҳимжон домла Иномов Россиянинг Тула шаҳридаги “Нур” масжидига йиғилган мўмин-мусулмонлар билан бирга пешин намозини адо этиб, маърифий суҳбат қилиб берди. Унда йиғилганларга диний соҳа раҳбарлари, хусусан, Ўзбекистон мусулмонлари идораси раиси, муфтий Нуриддин домла хазратларининг салом ва дуолари, Рамазон табриклари етказилди. Жамоат бундай жуда хурсандлигини билдиришди.
Суҳбат асносида муборак динимиз асослари, тинчлик-саломатлик неъмати, мусулмон одоблари, ёт оқимлардан сақланиш мавзуларда мавъиза қилинди. Йиғилганларнинг диний саволларига батафсил жавоб қайтарилди. Диний-маърифий маърузаларни Диний идора тизимидаги сайт ва ижтимоий тармоқлардан олиш тавсия этилди.
Ўз навбатида диндош ва ватандош биродарлар ҳам мамлакатимиздаги ислоҳотлардан хурсанд эканини баён этиб, Президентимиз ва барча раҳбарларимизга миннатдорчилик ва дуоларини изҳор этишди. Хусусан, Россиядаги Ўзбекистон элчихонаси хизматлари юқори даражада эканлигини таъкидлашди.
Маълумот учун, Тула шаҳридаги “Нур” масжидида ҳайит намозларида 10 минг, жумада 2000 намозхон қатнашади.
Ўзбекистон мусулмонлари идораси Матбуот хизмати
Рамазон - Қуръон ойи: Воқеа сураси фазилатлари
Воқеа – қиёмат номларидан бири. Воқеа сурасида қиёмат қоим бўлганда рўй берадиган ҳодисалар баён этилган, охиратда бандалар оладиган мукофотлари, жаннат неъматлари, дўзах аҳлининг азоб-уқубатлари тафсилоти келтирилган.
Ибн Асокир нақл қилишича, Абдуллоҳ ибн Маъсуд розияллоҳу анҳу вафот этиши арафасида бетоб бўлиб қолди. Усмон ибн Аффон розияллоҳу анҳумо уни кўргани бориб, ҳол-аҳвол сўради:
– Нимадан шикоятинг бор?
– Гуноҳларимдан.
– Нимани хоҳлайсан?
– Парвардигорим раҳматини.
– Сенга табиб буюрайми?
– Табиб (яъни, Аллоҳ) мени бетоб қилди.
– У ҳолда сенга совға-салом буюртирайми?
– Ҳожати йўқ.
– Сенга керак бўлмаса, қизларингга қолади.
Ибн Масъуд розияллоҳу анҳу бунга жавобан бундай деди:
– Қизларим камбағал бўлиб қолишларидан қўрқяпсанми? Мен уларга ҳар кеча Воқеа сурасини ўқишни буюрганман. Чунки Расулуллоҳ соллаллоҳу алайҳи васаллам: “Ким ҳар кеча Воқеа сурасини ўқиса, зинҳор қашшоқликка учрамайди”, деганларини эшитганман.
Тунда Воқеа сурасини бошидан охиригача ихлос билан ўқиган одам қашшоқлик кўрмайди: ризқи кенг бўлади, касб-корига барака киради. Тажрибада синаб кўрганлар бунинг ҳақиқат эканини таъкидлашган.
Воқеа сураси кенг ризққа сабаб бўлиши ҳақида бундан бошқа ривоятлар ҳам бор. Жумладан, Анас ибн Молик розияллоҳу анҳудан ривоят қилинади. Расулуллоҳ соллаллоҳу алайҳи васаллам: “Воқеа бойлик сурасидир. Уни (ўзингиз) ўқинг, фарзандларингизга ҳам ўргатинг”, деганлар (Ибн Мардавайҳ ривояти).
Даврон НУРМУҲАММАД
Уламоларнинг АҚШ сафари бошланди
Мамлакатимизнинг Вашингтондаги элчихонаси хабарига кўра, халқимиз учун эзгулик, мурувват ва меҳр-оқибат рамзи ҳисобланган муборак Рамазон ойини муносиб ўтказиш мақсадида шу йилнинг 20 апрелидан 2 майга қадар ўзбекистонлик бир гуруҳ имом-хатибларнинг Америка Қўшма Штатларига ташрифи ташкил этилмоқда, деб хабар бермоқда “Дунё” АА.
АҚШдаги дипломатик ваколатхонамиз ташаббуси ва Ўзбекистон мусулмонлари идораси билан ҳамкорликда амалга оширилаётган ушбу ташриф доирасида имом-хатиблар юртдошларимиз истиқомат қилаётган ва таҳсил олаётган Американинг 6 та шаҳрида бўладилар. Хусусан, 20 апрель куни Вашингтон шаҳрига, 21 апрелда - Филаделфияга, 22 апрелда - Нью-Йорк, 23 апрель куни – Синсиннатига, 24 апрелда - Чикагога, 25 апрелда эса Орландога ташриф буюришади.
Ташриф давомида Ўзбекистон мусулмонлари идораси вакилларининг ватандошлар, миллий диаспоралар етакчилари билан учрашувлари ҳамда маҳаллий масжидларда ислом динининг қадриятлари, радикализмга қарши курашиш, АҚШда яшовчи ўзбек ёшлари ўртасида экстремистик ғоялар тарқалишининг олдини олиш ҳақида маърузалар билан чиқишлари кутилмоқда. Бундан ташқари, Ўзбекистон имом-хатибларининг АҚШ расмий, диний ва жамоат доиралари вакиллари иштирокидаги конфессиялараро ифторлик, шунингдек, юртдошларимиз ташаббуси билан қурилган масжидларнинг тантанали очилиш маросимларида иштирок этишлари ҳам режалаштирилган.
Ўзбекистонлик имом-хатибларнинг АҚШга ташрифи доирасида АҚШ Давлат департаменти, Халқаро диний эркинлик бўйича АҚШ комиссиясида алоҳида учрашув ва музокаралар ўтказилиши кутилмоқда.
Шунингдек, америкалик эксперт ва жамоатчилик доираларини Ўзбекистонда диний бағрикенглик тамойилларини таъминлаш ва миллатлараро тотувликни мустаҳкамлаш учун амалга оширилган ишлар ҳақида хабардор қилиш мақсадида АҚШ Тинчлик институти таҳлил марказида брифинг ўтказиш ҳам режалаштирилган.
Ўзбекистонлик имом-ҳатиблар AҚШнинг Шарқий қирғоғида жойлашган, Aмерика мусулмонларининг асосий ибодат маскани ва Виржиния штатидаги 5000 дан ортиқ оилаларга ҳизмат кўрсатувчи AДAМС марказига боришади ҳамда ушбу марказ билан ислом асослари ва араб тилини ўрганиш бўйича ҳамкорликни йўлга қўйиш масалаларини муҳокама қилишади.
Ушбу кенг қамровли ташриф давомида икки давлат диний идоралари вакиллари ўртасида тўғридан-тўғри ҳамкорликни йўлга қўйиш, академик алоқаларни кучайтириш, араб тилини ва ҳадис илмини ўқитиш борасида фикр алмашиш, америкалик зиёрат саёҳатчиларининг Ўзбекистонга сафарларини муҳокама қилиш ҳам кўзда тутилган.
Ўзбекистон мусулмонлари идораси Матбуот хизмати
Шайх Рамазон Бутий (раҳимаҳуллоҳ): Жоҳилиятда кетиб қолишдан огоҳлантирув (Инфографика)
Мақолалар
