“... Ҳақиқатан, сизларга ўзларингиздан (чиққан), қийинчиликларингиздан алам чекадиган, сизлар билан (ҳидоят топишингиз билан) қизиқувчи, мўминларга мушфиқ ва раҳмдил Расул келди” (Тавба сураси, 128-оят) деб марҳамат қилган ҳамда Ўзининг ҳидоятига бошлаган, уммати Муҳаммад қилган Аллоҳ таолога чексиз ҳамду санолар бўлсин!

“Аввалги пайғамбарлар ўз қавмларигагина юборилар эдилар. Мен эса ҳаммага баробар пайғамбар қилиб юборилганман”, деган ҳабибимиз ва шафоатчимиз Расули акрам соллаллоҳу алайҳи васалламга батамом салавоту саломлар бўлсин!

Севикли Пайғамбаримиз Муҳаммад Мустафао соллаллоҳу алайҳи васаллам Фил йилида Робиъул аввал ойининг ўн иккинчиси (баъзи манбаларда 8, 9 ёки 10-кунлари), душанба куни (милодий 571 йил, апрель ойида) дунёга келдилар. У зот соллаллоҳу алайҳи васаллам душанба куни рўза тутиб: “Бу мен туғилган кун”, деб айтардилар (Имом Муслим ривояти).

Робиъул аввал ойи қандай ой? Ҳижрий-қамарий тақвим бўйича йилнинг (Муҳаррам ва сафар ойларидан кейинги) учинчи ойи. Бу ой Ислом уммати учун энг севимли ойлардан бири саналади. Чунки бу ойда Аллоҳнинг сўнгги пайғамбари ва ҳабиби, Сарвари коинот Муҳаммад алайҳиссалом таваллуд топганлар. Шу боис бу ой “Мавлуд ойи” деб ҳам номланади.

Мавлуд нима дегани? Мавлуд луғатда “туғилиш” деган маънони англатади. Пайғамбаримиз соллаллоҳу алайҳи васаллам таваллуд топган ой Рабиъул аввал ойи муносабати ўтказиладиган маросим ва тадбирлар “Мавлуди Набий” дейилади.

Мавлуд ойи Пайғамбаримиз соллаллоҳу алайҳи васалламни янада қаттиқроқ севишга интилиш, сийратларини ўрганиш, у зотга ҳар бир ишда эргашиш, янада кўпроқ салавоту дурудлар йўллаш ойидир.

Бу ойни қандай ўтказиш керак? Бу ойни Пайғамбар алайҳиссаломни янада кучлироқ севишга интилиш, сийратларини ўрганиш, у зотга ҳар бир ишда эргашиш, кўпроқ салавоту дурудлар йўллаш билан ўтказиш лозим.

Салавот нима дегани? “Салавот” сўзи араб тилидаги “салот” сўзининг жами бўлиб, “дуо” деган маънони англатади.

Салавот қандай айтилади? Саҳобалар розияллоҳу анҳум Расулуллоҳ соллаллоҳу алайҳи васалламдан “Ё Расулуллоҳ сизга салавот айтиш қандай бўлади?” деб сўраганларида У зот алайҳиссалом: “Аллоҳумма солли ала Муҳаммадин ва аъла оли Муҳаммадин, кама соллайта аъла Иброҳийма ва аъла оли Иброҳийм. Иннака ҳамийдуммажийд. Аллоҳумма барик аъла Муҳаммадин ва аъла оли Муҳаммадин, кама барокта аъла Иброҳийма ва аъла оли Иброҳийм. Иннака ҳамийдум мажийд”, деб айтинглар, деганлар (Имом Бухорий ривояти).

Салавот айтишнинг қандай фазилатлари бор?

Салавот айтиш бахилликдан узоқ қилади. Расулуллоҳ соллаллоҳу алайҳи васаллам: “Ҳузурида зикр қилинсам, менга салавот йўлламаган киши бахилдир”, дедилар (Имом Термизий, Имом Аҳмад ривояти). 

*     *     *

Салавот айтиш дуо қабул бўлишининг омилидир. Анас розияллоҳу анҳудан ривоят қилинади. Расулуллоҳ соллаллоҳу алайҳи васаллам: “Ҳар бир дуо Пайғамбарга салавот айтилмагунча, осмон ўртасидаги парда туфайли ерда тўхтаб туради, салавот айтилса, ўша парда кўтарилади”, дедилар. 

*     *     *

Салавот айтиш Расулуллоҳ соллаллоҳу алайҳи васалламнинг шафоатларига ноил этади. Анас розияллоҳу анҳудан ривоят қилинади. Набий соллаллоҳу алайҳи васаллам: “Менга жума кунида ва жума кечасида кўп салавот айтинглар, бас ким шундай қилса, мен унга қиёмат куни гувоҳ ва шафоатчи бўламан”, дедилар (Имом Байҳақий ривояти). 

*     *     *

Салавот айтиш Расулуллоҳ соллаллоҳу алайҳи васалламга яқин қилади. Абдуллоҳ розияллоҳу анҳудан ривоят қилинади. Набий соллаллоҳу алайҳи васаллам: “Қиёмат куни менга энг яқин кишилар, албатта, менга кўп салавот айтганлардир”, дедилар (Имом Термизий ривояти). 

*     *     *

Аллоҳ таоло салавот айтувчиларнинг гуноҳини мағфират этади, даражасини кўтаради. Анас ибн Молик розияллоҳу анҳудан ривоят қилинади. Расулуллоҳ соллаллоҳу алайҳи васаллам: “Ким менга бир марта салавот айтса, Аллоҳ унга ўн марта салавот айтади. Унинг ўнта гуноҳи ўчирилади. Ўн даража юксалтирилади”, дедилар (Имом Насоий ривояти). 

*     *     *

Салавот айтувчиларни Расулуллоҳ соллаллоҳу алайҳи васаллам эшитадилар. Абдуллоҳ ибн Абу Вафо розияллоҳу анҳудан ривоят қилинади: Набий соллаллоҳу алайҳи васаллам: “Жума куни менга салавотни кўпайтиринглар. Албатта, менга етказилади ва мен эшитаман”, дедилар (Имом Ибн Можа ривояти). 

*     *     *

• Салавот айтинг! Ҳар дуонинг аввали ва охирида.
• Салавот айтинг! Расулуллоҳ соллаллоҳу алайҳи васалламнинг исмларини айтганда ва эшитганда.
• Салавот айтинг! Таҳорат олгандан сўнг.
• Салавот айтинг! Жаноза намозининг иккинчи такбиридан кейин.
• Салавот айтинг! Масжидга кираётганда ва чиқаётганда.
• Салавот айтинг! Бошга мушкул тушганда ва хурсандчиликда
• Салавот айтинг! Ҳар намоздан сўнг.
• Салавот айтинг! Уйқудан турганда ва уйқуга ётишдан олдин.
• Салавот айтинг! Қуръони каримни хатм қилгандан кейин.
• Салавот айтинг! Тонг отганда ва қуёш ботганда.
• Салавот айтинг! Расулуллоҳ соллаллоҳу алайҳи васалламни соғинганингизда... Демак, ҳар кун, ҳар сония, ҳар нафасда салавот айтинг! 

АЛЛОҲУММА СОЛЛИ ВА САЛЛИМ ЪАЛА МУҲАММАДИН ВА ЪАЛА ОЛИ МУҲАММАД

Даврон НУРМУҲАММАД

Бирлашган Араб Амирликларига расмий ташриф билан бўлиб турган Франция Республикаси маданият ишлари вазири Френк Риестр икки мамлакат ўртасидаги ҳамкорлик йилдан йилга ривож топаётганини қайд этди. Бу ҳақда thenational.ae нашри маълум қилди.

Франциялик вазир БАА маданият ва билимни ривожлантириш вазири томонидан қабул қилинган. Нура ал Кааби хоним франциялик ҳамксбини Шайх Зайд катта масжидига таклиф этган ва диққтага сазовор жойлар билан таништирган.

ЎМИ Матбуот хизмати

Ўзбекистон Республикаси Президенти Шавкат Мирзиёев раислигида 9 ноябрь куни соғлиқни сақлаш тизимини ривожлантириш, ҳудудлар аҳолисини сифатли тиббий хизмат билан қамраб олиш, тиббиёт муассасалари моддий-техника базасини мустаҳкамлаш борасидаги ислоҳотлар натижаларини таҳлил қилиш ва истиқболдаги устувор вазифаларни белгилашга бағишланган видеоселектор йиғилиши ўтказилди.

Давлат раҳбари барча ислоҳотлардан асосий мақсад одамлар ҳаётини яхшилаш экани, сифатли тиббий хизмат бу борада муҳим ўрин тутишини таъкидлаган.

«Кейинги икки йилда Президентнинг соҳага оид 50та фармон, қарор ва фармойишлари, Вазирлар Маҳкамасининг 70дан зиёд қарор ва фармойишлари қабул қилинди. 6та янги илмий-амалий тиббиёт маркази ташкил этилиб, уларнинг сони 16тага етди. Халқимизга янада қулай бўлиши учун ҳудудларда уларнинг 10та филиали иш бошлади. Туман ва шаҳар шифохоналарида 306та янги ихтисослашган бўлимлар, 1 минг 200та тез тиббий ёрдам шохобчаси очилди. Умуман олганда, жорий йилда тиббиёт соҳасига давлат бюджетидан 2017 йилга нисбатан 40 фоиз кўп маблағ ажратилди. Йиғилишда келаси йил соҳага қарийб 30 фоиз кўп маблағ йўналтириш режалаштирилгани қайд этилди. Президентнинг куни кеча қабул қилинган «Давлат тиббиёт муассасалари ва соғлиқни сақлашни бошқариш органлари ходимларини моддий рағбатлантиришни кучайтириш чора-тадбирлари тўғрисида»ги қарори соҳадаги яна бир ижобий янгилик бўлди. Унга мувофиқ, тиббиёт ходимларининг ойлик маоши 1 декабрдан 20 фоизга, 2019 йил 1 апрелдан яна 15 фоизга оширилади», дейилади Президент матбуот хизмати хабарида.

«Фармон ва қарорлар чиқарилиб, соҳага шунча имкониятлар яратилди, долзарб масалалар ҳал қилиб берилди. Лекин соғлиқни сақлаш тизимида кутилган натижалар кўринмаяпти. Айниқса, туманлар, чекка қишлоқлардаги аҳоли тиббий хизматдаги жиддий ва туб ўзгаришларни ўз ҳаётида сезаётгани йўқ», деди Шавкат Мирзиёев.

Жорий йилнинг ўтган даврида президентнинг Виртуал қабулхонасига тиббиёт соҳасига доир 45 мингдан зиёд мурожаат келиб тушгани, бу соҳада ҳали муаммолар борлигини кўрсатиши қайд этилди.

Масалан, бирламчи тиббий-санитария ёрдами тизими, туман марказий шифохоналарининг моддий-техника базаси ва малакали кадрлар билан таъминланиш даражаси талабга жавоб бермайди. Бунинг оқибатида ҳудудлардаги беморлар катта маблағ сарфлаб, Тошкент шаҳрига келишга ёки чет давлатларга боришга мажбур бўлмоқда.

Шу боис йиғилишда тиббиёт тизимидаги муаммоларни вақтида аниқлаш ва ҳал этиш, бунинг учун ҳудудлардаги ҳолатни тўлиқ қайта кўриб чиқиш, ўрганишларда қишлоқ врачлик пунктлари ва оилавий поликлиникадан марказий тиббиёт муассасаларигача қамраб олиш кераклиги таъкидланди.

ЎМИ Матбуот хизмати

Исломий туризм йўналиши Малайзияда мамлакат ялпи ички маҳсулотида 202 йилга бориб 3,6 миллиард АҚШ доллари миқдорига эга бўлиши қайд этилди. Бу рақам 2017 йилда 2,8 миллиард АҚШ долларини ташкил этди. Бу ҳақда Salam Standard агентлиги ўз тадқиқотларида маълум қилди.

Малайзия АСЕАН минтақасида Исломий туризм бозорининг 22,7 фоизига эгалик қилади. 2020 йилга бориб исломий туризм ЯИМдаги туризмнинг қарийб 20,8 фоизини ташкил этиши тахмин қилинмоқда.

Ҳозирги кунда мамлакат бюджети исломий туризм соҳасидан 600 миллион АҚШ доллари миқдоридаги солиқларни қабул қилиб олади. Бу эса Жанубий шарқий Осиё минтақасида йиғилган солиқларнинг 24,4 фоизи демакдир.

Индонезия, Хитой ва Малайзия жаҳонда исломий туризмнинг улкан улушига эгалик қилади. Бу мамлакатларга дунё мусулмон сайёҳларининг 17 фоизи ташриф буюради.

ЎМИ Матбуот хизмати

Пайғамбаримиз Муҳаммад (с.а.в.)нинг таваллуд айёмлари бўлган Мавлид куни бутун дунё мусулмонлари орасида кенг нишонланади. Шундай маросимлар Буюк Британияда яшовчи мусулмонлар ўртасида ҳам жорий йилда нишонланиши режалаштирилган. Бу ҳақда birminghammail.co.uk нашри хабар берди.

Мавлид куни исломий тақвим бўйича Раби ул аввал ойининг 12 кунида нишонланади. Буюк Британия уламолари ушбу кун 2018 йилнинг 20 ноябрига тўғри келишини қайд этишди.

ЎМИ Матбуот хизмати