www.muslimuz
Ўзбекистонда диний-маърифий соҳадаги йил сарҳисоби
Ўтаётган йилни сарҳисоб этиш, иш фаолиятни таҳлил қилиш, режалар тузиб, келгуси йил учун мустаҳкам пойдевор тайёрлаш яхши анъанага айланган. Ҳар бир йилнинг ўзига хос номда аталиши эса давлатимиз тараққиётининг муҳим асоси бўлмоқда.
Муҳтарам Президентимиз раҳнамоликларида Қуръон мусобақалари билан бошланган 2018 йил қут-баракали ўтди, Аллоҳ таолонинг неъматлари бисёр бўлди. Юртбошимизнинг диний-маърифий соҳани такомиллаштириш тўғрисидаги бир қатор фармон ва қарорлари асосида:
– Халқаро ислом академияси таъсис этилди;
– Халқаро Ислом цивилизация маркази ташкил этилди;
– “Вақф” хайрия жамоат фонди тузилди;
– Ҳадис илми мактаби номли олий диний таълим муассаси иш бошлади;
– масжид-мадрасаларни давлат рўйхатидан ўтказишда бир қатор имтиёз ва енгилликлар берилди;
– 13 та янги масжид очилди, 39 таси янгидан қурилди, 100 га яқини капитал таъмирланди;
– Ҳаж қилувчилар сони 7200 дан ошди, умра сафарига чекланмаган миқдорда зиёратчилар бориши мумкин бўлди;
– Рамазон ойида 1149 та масжидда хатми Қуръон ўтказилди;
– “Қуръони карим ва тажвид” ҳамда “Араб тили” курслари ташкил этилди, бундан элу халқимиз жуда ҳам мамнун бўлди.
Диний соҳада амалга оширилаётган саъй-ҳаракатларни бутун дунё ҳамжамияти эътироф этмоқда. АҚШ Давлат департаменти Ўзбекистонда диний эркинлик йўлидаги ишларни тан олди. БМТ сессиясида Ўзбекистон ташаббуси билан “Маърифат ва диний бағрикенглик” номли муҳим ҳужжат қабул қилинди.
Юртимиз уламолари халқаро анжуманларда муносиб иштирок этди. Саудия Арабистони, Франция, Испания, Россия, Туркия ва бошқа кўплаб давлатлар мезбонлик қилган нуфузли халқаро тадбирларда вакилларимиз муваффақиятли қатнашди.
Ислом олами билан алоқалар мустаҳкамланиб, мусулмон дунёсининг энг мўътабар уламолари ўлкамизга ташриф буюришди. Азҳари шариф шайхи Аҳмад Тоййиб, йирик муҳаддис Муҳаммад Аввома ва тариқат пешвоси Зулфиқор Аҳмад Нақшбандий каби зотларнинг ташрифи ўзгача файз бахш этди.
2018 йил 28 декабрдаги Президентимиз Мурожаатномасидан келиб чиқсак, 2019 йилни – “Фаол инвестициялар ва ижтимоий ривожланиш йили” деб эълон қилиниши мамлакатимизда тобора куч-қувватга тўлиб бораётган ислоҳотларнинг давоми бўлади. Бошқача айтганда, келгуси йил жамиятимиз ҳаётида инвестиция ва ижтимоий соҳадаги ривожланиш янги босқичига кўтарилади, иншо Аллоҳ.
Ушбу йўналишда Ўзбекистон мусулмонлари идораси ҳам ўзининг муносиб ҳиссасини қўшишга тайёргарлик кўрмоқда. Хусусан, “Вақф” хайрия жамоат фонди аҳолининг ижтимоий ҳимояга муҳтож кишиларини қўллаб-қувватлаш билан бир қаторда жамиятни ижтимоий ривожлантириш лойиҳаларини ҳам ҳаётга тадбиқ этишни ўз олдига мақсад қилган. Сармоядорлар билан ҳам ҳамкорлик ўрнатишни назарда тутган.
Юқорида қайд этилганлар 2018 йилдаги кенг кўламли ишларнинг мухтасар баёни эди. Аллоҳ таоло мана шундай неъматларини янада бардавом айласин.
Ўзбекистон мусулмонлари идораси Матбуот хизмати
Жумадан жумагача
Саудиялик меҳмонлар эътирофи
14 ноябрь куни Саудия Арабистони Подшоҳлигидан бир гуруҳ меҳмонлар юртимизга ташриф буюришди. Мартабали меҳмонлар Тошкент шаҳридаги “Минор” жоме масжидида жума намозини мўмин-мусулмонларимиз билан бирга-бирга адо этдилар. Шундан сўнг, Диний идора Масжидлар бўлими мудири Раҳимберди Раҳмонов томонидан саудиялик меҳмонларга ушбу муҳташам жоме масжиднинг фаолияти, намозхонлар кайфияти, олиб борилаётган ободонлаштириш ишлари ва юртимиздаги диний-маърифий соҳадаги улкан ўзгаришлар ҳақида сўзлаб берди. Подшоҳликдан келган меҳмонлар, ҳақиқатан, Ўзбекистон заминида сўнгги йилларда катта янгиланишлар ва ижроотлар бўлаётганини эътироф этишди.
Отинойилар учун ўқув-семинари ташкил этилди
11-14 декабрь кунлари Фарғона вилоятида Дин ишлари бўйича қўмита, Ўзбекистон Мусулмонлари идораси ва вилоят ҳокимлиги билан ҳамкорликда отинойилар учун ўқув-семинар ташкил этилди. Семинарни Ўзбекистон Мусулмонлари идораси, Халқаро Ислом академияси докторантлари ва Дин ишлари бўйича қўмита ходимларидан иборат мутахассислар иштирок этиб, белгиланган дастур асосида маърузалар ва давра суҳбатлари ўтказди. Ўқув-семинар долзарб мавзуларга бой савол-жавоблар асосида бўлиб ўтди.
Нукусдаги билим юртида тингловчиларга сертификат топширилди
Ўзбекистон мусулмонлари идорасининг буйруғига мувофиқ Нукус шаҳридаги Муҳаммад ибн Аҳмад ал-Беруний ўрта махсус ислом билим юртида ташкил этилган “Қуръони карим ва тажвид” ўқув курсининг иккинчи давра ўқув машғулотлари якунланди. Жорий йилнинг 10 декбрь куни Муҳаммад ибн Аҳмад ал-Беруний ўрта махсус ислом билим юртида мазкур ўқув курсларининг иккинчи давра тингловчиларига билим юрти томонидан “Қуръони Карим ва тажвид курси”ни якунлаганини тасдиқловчи сертификатлар топширилди.
Нургоҳо Сукамдани: “Асосий мақсад фойда олиш эмас, Аллоҳ ризолигини топиш”
18 декабрь куни Ўзбекистон мусулмонлари идораси раиси, муфтий Усмонхон Алимов ҳазратлари мамлакатимизга ташриф буюрган Индонезиянинг “Саҳид” номли вақф фонди раҳбари Нургоҳо Сукамданини қабул қилдилар. Меҳмонга Индонезиядаги “Истиқлол” музейи масъул ходими жаноб Сайфуддин ва диний таълим муассасалари мажмуаси раҳбари Анда Хоним ҳамроҳлик қилди. Самимий мулоқот чоғида Нургоҳо Сукамдани жаноблари Малайзия фонди томонидан Ўзбекистонда қурилаётган меҳмонхоналар, зиёрат туризмини ривожлантириш, ҳалол стандартлаш, диний таълим муассасалари талабаларини ўқитиш борасида ҳамкорлик қилиш ва “Истиқлол” музейида Ўзбекистон павилионини ташкил этиш таклифларини билдирди. Шунингдек, Ўзбекистондаги диний таълим бериш тизимига алоҳида қизиқиш билдирди. Нургоҳо Сукамдани жаноблари мана шундай ишларни амалга оширишдан асосий мақсад фойда олиш эмас, Аллоҳ ризолигини топиш эканини билдирди.
Қашқадарёда Туркия агентлиги иккита тарихий обидани таъмирлайди
Қашқадарё вилоятида 2019 йилда Туркия давлатининг ТИКА агентлиги кўмагида Китоб туманидаги Хўжа Илм Кон ва Мавлоно Дарвеш Муҳаммад Вахшуворий мажмуаларини реконструкция ва реставрация қилиш ишлари амалга оширилади. Қашқадарё вилоятидаги тарихий-маданий обидаларни реставрация қилиш ва ҳудудларни ободонлаштириш дастурига кўра Қарши туманидаги Имом Абу Муъин ан-Насафий мажмуаси ва Касби туманидаги Султон Мир Ҳайдар мажмуасини реставрация қилиш ишлари жорий йилда бошланган бўлиб, 2019 йилда якунланиши кўзда тутилган. Маълумот учун, айни пайтда Қашқадарё вилоятида 1 321 та маданий мерос объекти рўйхатга олинган бўлиб, мавжуд зиёратгоҳларни ободонлаштириш натижасида 2018 йилда сайёҳлар оқими ўтган йилга нисбатан 2 баробарга ортган.
Қуръони каримнинг 900 йиллик нусхаси топилди
Эрон Ислом Республикасининг Теҳрон шаҳридаги музейда Қуръони каримнинг 12 асрга тегишли нусхаси намойиш этилди. Жорий йилнинг 16 декабрь куни Реза Аббосий музейида тадқиқотчилар ва қўлёзма мутахассислари иштирок этган анжуманда қадимий Мусҳаф кўздан кечирилди. Ушбу нусха 1150 йилга тегишли бўлиб, хаттот Абул Фаҳр ибн Абилфазл ал Зафароний томонидан кўчирилган ва унга Зафароний нусхаси деб ном берилган.
Мадридда Ислом маданияти маркази очилди
Испания Қироллигининг пойтахти бўлган Мадрид шаҳрида Ислом маданияти ва диний бағрикенглик маркази ўз фаолиятини бошлади. Ушбу маросимда Испания олий таълим муассасаларининг ўқитувчилари ва мамлакатда фаолият олиб бораётган дипломатик ваколатхона раҳбарлари иштирок этган. Бирлашган Араб Амирликларининг Диний бағрикенглик вазири Шайх Наҳян бин Муборак ҳам Марказнинг очилиш маросимида иштирок этди ва нутқ сўзлади. вазир уз нутқида бу лойиҳа жаҳонда турли дин вакиллари ўртасида ҳамжиҳатликни таъминлашни мақсад қилганини қайд этди.
АҚШда масжидлар "очиқ масжидлар куни"ни ташкил этишди
АҚШнинг Огайо штатидаги масжидларда жорий йилнинг 16 декабрь куни "Очиқ масжидлар куни" ташкил этилди.Огайодаги Марказий Огайо масжидида ҳам ушбу тадбир кенг миқёсда ташкил этилди. Ушбу тадбир Огайо штатида тарихида илк бор ўтказилаётгани қайд этилган. Лойиҳадан кўзланган мақсад мусулмонларга нисбатан жамоатчиликда шаклланган фикрни ўзгартириш экани таъкидланган. Штат аҳолиси эътиқодлараро ҳамкорлик масаласида қилинган ушбу ғояни қўллаб-қувватлашган. Ташриф буюрганлар енгил таомлардан истеъмол қилишлари, мусулмонлар ҳаёти билан танишишлари ва Ислом дини ҳақида маълумот олишларига имконият яратилган.
"Мурувват карвони" сирдарёликлар кўнглини шод қилди
15 декабрь куни «Вақф» хайрия жамоат фонди томонидан “Мурувват карвони”нинг навбатдаги хайрия юклари Сирдарё вилоятига етказилди. Ушбу вилоятда ўтказилган хайрия тадбирлари давомида мухтожларга 20 дона ногиронлик аравачаси, 315 метр аёллар газламаси, 500 кг шакар, 500 литр ёғ, 74 дона Росулуллоҳ рамазонда аудио диски, 296 дона китоблар (Ҳазрати Қусам ибн Аббос-Шоҳизинда, Тафсири Ирфон (19-22 жуз), (22-25 жуз), (26-28 жуз)) китоблари ва пул маблағлари беғараз тақдим этилди. Эслатиб ўтамиз “Вақф” фонди хайру эҳсонингизни ўз эгаларига етказишда очиқлик ва холисликни кафолатлайди, маблағларни шаффофлик асосида ҳақдорларга етказилаётганини vaqf.uz сайти орқали кузатиб боринг.
ЎМИ матбуот хизмати
"Энг маърифатли имом – 2018” кўрик танлови ғолиблари аниқланди
Бугун, 20 декабрь куни Ўзбекистон мусулмонлари идорасида ҳар йили анъанавий тарзда ўтказилиб келинаётган "Энг маърифатли имом – 2018" кўрик танловининг республика босқичи ўтказилди. Унда танловнинг Қорақалпоғистон Республикаси, Тошкент шаҳри ва вилоятлар босқичида биринчи ўринни эгаллаган 14 нафар имом-хатиб беллашдилар.
Тадбирда Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита, Ўзбекистон мусулмонлари идораси раҳбар ходимлари, уламолар, имом-хатиблар ва оммавий ахборот воситаси ходимлари иштирок этди.
Йиғилган баллар бўйича ғолиблар аниқланди.
1 ўрин: Фарғона вилояти Марғилон шаҳридаги «Худоёрҳожи» жоме масжиди имом-ноиби Абдувоҳид Аҳмадалиев. Унга Ўзбекистон мусулмонлари идорасининг биринчи даражали дипломи ва "Вақф" хайрия жамоат фонди томонидан тақдим этилган ноутбук ва 3.000.000 сўм пул мукофоти топширилди.
2 ўрин: Тошкент шаҳар Юнусобод туманидаги «Кулолқўрғон» жоме масжиди имом-хатиби Яҳёхон Абдураҳмонов. Унга Ўзбекистон мусулмонлари идорасининг иккинчи даражали дипломи ва "Вақф" хайрия жамоат фонди томонидан тақдим этилган LCD 42 телевизор ва 2.500.000 сўм пул мукофоти топширилди.
3 ўрин: Тошкент вилояти Қибрай туманидаги «Саъдулло ота» жоме масжиди имом-хатиби Обиджон Мирҳамидов . Унга Ўзбекистон мусулмонлари идорасининг учинчи даражали дипломи ва "Вақф" хайрия жамоат фонди томонидан тақдим этилган микро тўлқинли печ ва 2.000.000 сўм пул мукофоти топширилди.
Бундан ташқари, бир қанча номинациялар бўйича ҳам ғолиблар номи эълон қилинди.
"Энг кўп обуна уюштирган имом" номинацияси бўйича Самарқанд вилояти Пастдарғом туманидаги "Нурул Ислом" жоме масжиди имоми Озод Назаров;
"Энг кўп мақола чоп этган имом" номинацияси бўйича Қашқадарё вилояти Касби туманидаги "Фазли" жоме масжиди имоми Азамат Усмонов;
"Энг обод масжид" номинацияси бўйича Урганч шаҳридаги "Охун бобо" жоме масжиди;
"Энг инновацион ёндашув" номинацияси бўйича Самарқанд вилояти Қўшработ туманидаги "Домло Омонулло" Ғанижон Абиев ва Андижон вилояти Олтинкўл туманидаги "Далварзин" жоме масжиди имоми Искандар Ортиқов тақдирландилар.
Ўзбекистон мусулмонлари идораси Матбуот хизмати
Нишонга урилган гаплар: “Сен учун ўзини қурбон қиладиганлар бор. Ўзининг фойдаси учун сени қурбон қиладиганлар бор”
Қуйида келтириладиган фикрлар, ҳикматлар ижтимоий тармоқлардаги турли саҳифалардан олиб таржима қилинган. Бундан ташқари саҳобаи киромлар, улуғ олимлар, Яқин Шарқ, Осиё, Европа ва Америка мутафаккирларининг бир қатор фикрлари ҳам берилган.
*****
Сенинг нонингни ўғирлайдилар. Кейин сенга ундан бир бурда берадилар. Кейин ўша берганлари учун уларга раҳмат айтишингни буюрадилар. Улар нақадар жирканчлар!
“Тарих муҳрлаган сўзлар”
*****
Таълим юртни қўриқчи аскарлардан кўра яхшироқ ҳимоя қилади.
“Тарих муҳрлаган сўзлар”
*****
Баъзиларга иккинчи фурсатни бериш худди “Олдин отганингда кўксимга теккизолмаган эдинг. Мана сенга яна ўқ. Қайтадан отиб кўр” дейишга ўхшайди.
Нажиб Маҳфуз
*****
Сен учун ўзини қурбон қиладиганлар бор. Ўзининг фойдаси учун сени қурбон қиладиганлар бор.
“Ҳикмат дурдоналари”
*****
Бирорта одамнинг бирданига сенга нисбатан муомаласи ўзгариб қолган бўлса, хафа бўлма. Айрим одамлар (сендан фойда кўрмай қолсалар) актёрликдан воз кечиб, ўзларининг асл қиёфаларига қайтган бўладилар.
“Ҳикмат дурдоналари”
*****
Эсипастлар билан тортишма. Акс ҳолда, улар сени ўзларининг савияларига тушириб оладилар-да, кейин эсипастлик борасидаги тажрибалари билан сени енгиб қўядилар.
“Тарих муҳрлаган сўзлар”
*****
Агар яхши кўрган инсонинг билан бўладиган алоқанг сени афзал шахс бўлишингга сабаб бўлмаса, демак, сен хато шахс билан муомала қилар экансан.
Анис Мансур
Интернет материалларидан тўплаб, таржима қилувчи
Нозимжон Иминжонов
Қуёш кема каби ҳаракатланишини билармидингиз?
Олдинлари “Қуёш ҳаракат қилмайди” деб ўйланар эди. Бу гап Қуръони Карим оятига зиддир.
Аллоҳ таоло Қуръони Каримда шундай деган:
وَالشَّمْسُ تَجْرِي لِمُسْتَقَرٍّ لَّهَا ذَلِكَ تَقْدِيرُ الْعَزِيزِ الْعَلِيمِ
“Қуёш ўз истиқрори учун жараён этар. Бу азизу ўта билгувчи зотнинг тақдир қилганидир”. (Оятда қуёшнинг ўз истиқрори учун ажратилган маконда ва замонда жараён этиши–ҳаракатланиши ҳақидагина гап кетмоқда.) (Ёсин сураси, 38-оят).
Дарҳақиқат, Қуёш ўзининг барча сайёралари билан бирга жуда катта тезликда Сомон йўли галактикасининг маркази атрофида айланади. У галактика маркази атрофини 225 миллион йилдан кўпроқ вақтда бир марта тўла айланиб чиқади. Агар биз фаразан Қуёшнинг ҳаракатига ташқаридан назар солсак, унинг ҳаракати худди мавжли денгиздаги кеманинг ҳаракатига ўхшаб, пастлаб-кўтарилишдан иборат экан. Қуръоннинг ушбу ҳаракат ҳақидаги хабарида وَالشَّمْسُ تَجْرِي (“Вашшамсу тажрий”) дейилган. Эътибор беринг “тажрий” феъли ишлатилган.
Биз юқорида Қуёшнинг галактика маркази атрофидаги ҳаракати кеманинг мавжли денгиздаги ҳаракатига ўхшайди дедик. Қуръони Каримда кеманинг ҳаракати борасида ҳам бир неча оятлар бор. Шулардан бирини келтирсак:
أَلَمْ تَرَ أَنَّ الْفُلْكَ تَجْرِي فِي الْبَحْرِ بِنِعْمَتِ اللَّهِ لِيُرِيَكُم مِّنْ آيَاتِهِ إِنَّ فِي ذَلِكَ لَآيَاتٍ لِّكُلِّ صَبَّارٍ شَكُورٍ
“Кемалар Аллоҳнинг неъмати ила сизга Унинг оят-белгиларини кўрсатиш учун денгизда юрганини кўрмадингми?! Албатта, бунда ҳар бир ўта сабрли ва ўта шукрлилар учун оят-белгилар бордир” (Луқмон сураси, 31-оят).
Бу оятдаги кеманинг денгизда юришини ифода этган сўз ҳам تَجْرِي (“тажрий”) бўлиб келган.
Юқоридаги оятда Қуёшнинг ҳаракатини ифода этувчи сўз تَتَحَرَّكُ (татаҳарраку – ҳаракат қилади), تَدُورُ (тадууру – айланади), تَسِيْرُ (тасийру – сайр қилади) тарзида эмас, балки айнан تَجْرِي (тажрий) тарзида келган. Бу эса Қуёшнинг бир текис эмас, балки кеманинг мавжли денгиздаги ҳаракатига ўхшаш ҳаракат қилишига ишорадир.
Шундай қилиб, Аллоҳ таоло Луқмон сурасидаги оятда кеманинг ҳаракатини “тажрий” сўзи билан баён этди. Ёсин сурасидаги оятда Қуёшнинг ҳаракатини ҳам “тажрий” сўзи билан баён қилди. Бу эса юқорида айтганимиздек, Қуёшнинг галактика маркази атрофидаги ҳаракати бир кўтарилиб, бир тушиш тарзидаги ҳаракат эканига ишорадир.
Энди бундан ўн тўрт аср олдин бирор киши Қуёшнинг ҳаракат қилиши ҳақида, қилганда ҳам денгизда кетаётган кеманикига ўхшаш ҳаракат қилиши ҳақида маълумотга эга бўлган бўлиши мумкинми? Албатта, йўқ! Чунки ўтган асрда ҳам олимлар “Қуёш ҳаракатланмайди” деб юришарди. Қуёшнинг ҳам ҳаракат қилишини инсоният яқин йиллар ичида билди.
Бундан бир минг тўрт юз йил олдин Қуръони Каримда бу илмий ҳақиқатнинг ўта нозик иборалар билан айтиб қўйилгани Қуръон Аллоҳнинг ҳақ Каломи эканига, у нозил қилинган инсон – Муҳаммад соллаллоҳу алайҳи васаллам Аллоҳнинг ҳақ Расули эканликларига очиқ-ойдин далилдир!
Субҳаналлоҳ!
Абдуддоим Каҳелнинг мақоласидан
Нозимжон Иминжонов таржимаси
Видеолавҳалар
